Khotbah Ibrani 2: 1-4 Keselamatan dari Tuhan

 Minggu 18 Set. Trinitatis; 03 Oktober 2021

2:1 Karena itu harus lebih teliti kita memperhatikan apa yang telah kita dengar, supaya kita jangan hanyut dibawa arus.

2:2 Sebab kalau firman yang dikatakan dengan perantaraan malaikat-malaikat tetap berlaku, dan setiap pelanggaran dan ketidaktaatan mendapat balasan yang setimpal,

2:3 bagaimanakah kita akan luput, jikalau kita menyia-nyiakan keselamatan yang sebesar itu, yang mula-mula diberitakan oleh Tuhan dan oleh mereka yang telah mendengarnya, kepada kita dengan cara yang dapat dipercayai, sedangkan

2:4 Allah meneguhkan kesaksian mereka oleh tanda-tanda dan mujizat-mujizat dan oleh berbagai-bagai penyataan kekuasaan dan karunia Roh Kudus, yang dibagi-bagikan-Nya menurut kehendak-Nya.

     Surat on ditujuhon tu halak Jahudi Kristen na mangadopi parungkilon, penganiayaan sian Jahudi nonkristen, hinorhon ni i gabe naeng mulak muse nasida tu agama Jahudi. Tujuan ni surat Heber on laho mangkehei roha dohot manungkoli dohot patoguhon haporseaon ni huria i marhitehite na mangondolhon paboa di bagasan Jesus Kristus nunga singkop haluaon na pinatupa ni Debata. Ai Jesus Kristus do Malim Nabolon naung mamelehon diriNa sahali tu salelenglelengna, bahen haluaon ni saluhut hajolmaon. Tujuan ni turpuk on dipaandar tu nasida asa unang sumurut nasida jala ragu nasida tu Jesus na gabe unok ni nasinurirangkon ni angka panurirang dohot angka tokok-tokoh na di Padan Narobi. Jesus do nagabe pardengganan ni angka jolma pardosa tu Debata. Ingkon hot do haporseaon nasida tu Jesus nang pe ditongatongani penganiayaan sian halak Jahudi non Kristen. Surat jamita tu halak Heber on, tarlumobi turpuk jamitaon papatarhon na Jesus do dalan, parhitean na gabe haluaon ala tu Jesus do dipagomgomhon hasangapon dohot hamuliaon. Hajolmaon ni Jesus na sempurna gabe dalan haluaon  di hita jolma, jala na hot rodi salelenglelengna (Yesus imam untuk selama-lamanya) dipapatar do i di Surat Heber on. Ndang adong goar na asing na boi paluahon hita sian dosa jala namangalehon jaminan na pasti ia so Jesus Kristus (jaha Heber 1:4-6). Tolu bagian bolon do bindu dua ni surat Heber on, i ma : a). Ayat 1-4 (hata ni angka Panurirang di Padan Na Robi na sian Debata do i; b). Ayat 5-10 (hasangapon dohot hamuliaon ditumpakhon Debata tu Anak i); c). Ayat 11 - 18 (Ibana do Sintua ni Malim na sintong, na patupahon pardengganan i. Jamita sadarion i ma bagian na parjolo.

Tung mansai balga jala godang do hasurungan ni Tuhan Jesus sian surusuruan ni Debata ala ni ingkon sumurung do haunduhanta tu Jesus Sipalua i sian surusuruan. Ai ndang boi suruan ni Debata na di Padan na Robi paluahon jolma sian dosa, holan Tuhan Jesus do na tuk paluhon jolma i sian dosa marhite haporseaon tu Tuhan Jesus i. Ingkon sumurung do panjangkononnta tu Jesus, ido umbehan didok: Dibahen i, naeng ma muba gomosta, maniop hata naung tabege i, unang tung dibaorhon hita. Pandohan ‘dibaorhon’ marharoroan sian hata ‘pararrein’ lapatanna: tarsulandit manang dibaor. Hata pararrein somal dipangke tu kapal na tarboan arus manang alogo. Ala lalap juru mudi ni kapal i, ndang diparrohahon gogo ni alogo ujungna gabe dibaor arus ni laut ma kapal i. Torop do joma dilalapi portibi on, gabe lupa di haluaon na pinasahat ni Jesus. Torop dope halak Batak naung Kristen dilalapi hasomalan (tradisi) manang adat, sipata tumimbo dibaen adat i sian Hata ni Debata dohot ruhut-ruhut ni parhuriaon.

Ingkon unduk saluhutna tu Jesus, molo pe so taida dope nuaeng alai ingkon sahat tu panghirimon na songoni. Jala angka na marsoara marhatopothon: Jesus Kristus do Tuhan, bahen hasangapon ni Debata. Naeng ma ngolu na marojahan dohot mian dibagasan huasoNa, jala unduk tu sangkap dohot lomo ni roha ni Debata hita, ai ido na pinangido ni turpuk on. Ditongatonga ni luat na marserak, marragam siadopan (kemajemukan suku, agama/kepercayaan) jala sibuk mangalului ngolu na boi do madabu tu ngolu na lalap holan mangula ulaon rutinitasna be. Ngolu na tertuju/terfokus tu ngolu siganup ari (mangula dengan sukses-mangan) alai ndang adong panatapan tu jolo dohot hangoluan sogot. Aha do lapatan ni ngolu on, aha do gunanta na mangolu on, songon dia do ngolu na marugamo (mar-Tuhan)? Dipatupa Jesus do tiruan na arga dihita patuduhon ngolu na marlapatan tu saluhut marhitehite panghophopon (na rade marsitaonon, tarsilang jala mate) (Patudos; Pilipi 2:6-9).

Ndang adong na boi mamintori hita asa boi hita partohap dihaluaon sogot ia so manjalo Jesus dohot manghangoluhon hataNa. Tung adong pe dihita hasangapon, hamoraon, hagabeon, ndang tuk i gabe dalan haluaon di hita. Ndang adong jolma, tokoh na sangap, na tuk mangalehon hangoluan sogot. Hadirion ni Jesus do na boi mangulahon sangkap ni Debata, unang adong nanggo sada na tartading, naso unduk tu Debata. Saut ma hita manjalo asi ni roha ni Debata marhitehite naung ditaon Jesus hamatean humohop saluhut alai na ingkon dibagasan haundukon ni roha do hita disaluhut nanidokNa. Tung so dapot sada halak be haporusan dohot haluaon molo ditoishon haluaon na sai godang na pinatupa ni Tuhan Jesus.

Marragam do pambahenan ni Jahowa uju mamangkulingi bangsoNa marhite angka panurirang dohot ragam ni angka tanda halongangan (ay. 4). Alani naeng lam tangkas panandaonta di Tuhan Jesus asa lam bagas haporseaonta mangoloi Ibana mandapot haluaon na manongtong i. Di tongatonga ni partingkian na hatop mubauba, ragam do hamubaon na jumpang di ngolu ni jolma. Ragam do nang angka parbinotoan na imbaru na bongot tu ngolunta. Naeng do lam tangkas di hita angka na porsea, manghangoluhon hata ni Tuhan i, asa margogo marsihohot so mubauba di tongatonga ni angka pangalaho na hatop mubauba. Dipanghulingi Debata do hita marhite turpuk on, asa lam marsihohot di Tuhan Jesus Kristus AnakNa i. Ala nunga sahat huaso tu Tuhan Jesus Kristus Anak ni Debata. Ia Tuhan Jesus i, ro di salelenglelengna do habangsaNa. Nunga dipatupa Ibana haluaon sian angka dosa, jala hundul Ibna di siamun ni hatongamon na di ginjang i. Molo mago pe sude nasa na tinompa i, buruk songon ulos, alai anggo Tuhan i, hot do i mian ro di saleleng ni lelengna. Tuhan Jesus Kristus do na marhuaso di parluhutan i, na manongtong ro di salelenglelengna do Ibana, jala naeng bongot tu si do hita. Alani do umbahen mate Ibana humophop hita pardosa asa boi bongot tu harajaonNa na manongtong i. Nunga tajalo haluaon na pinatupa ni Tuhan Jesus Kristus. Naung mate do Kristus alani dosanta. Naung tartanom do Ibana jala dipahehe di ari patoluhon bahen haluaonta. Tuhan i sandiri do patupahon i di hita. Alai na marungkil dope hita tagan di hasiangan on paima sahat hita tu hatongamon na di ginjang i. Dibahen i, naeng ma gomos hita maniop hata ni Debata, asa unang mura hita dibaorhon. Tagamon do ro tu tongatonganta ragam ni poda haliluon dohot angka na paotootohon songon na masa di huria na parjolo i. Molo ro angka i aeng jamot hita so tung dibaor gabe lonong. Barita nauli naung tabege, naung tajalo, i do gabe hajongjonganta asa unang magopo haporseaonta. Naung mate do Kristus alani dosanta jala naung dipahehe di ari patoluhon (1 Kor. 15: 3-4). Nunga godang na pinatupa ni Kristus di ngolunta sian na jolo sahat ro di nuaeng. Naeng ma sumurung gomos ni rohanta tu Kristus i, naung paluahon hita sian dosa dohot hamatean. Jala taingot ma na nidok ni apostel Paulus 1 Kor. 15: 58 “Marsihohot jala so mubauba ma hamu, jala lam sumurung ma tongtong dibagasan ulaon ni Tuhan i diboto hamu do, ndang magopo halojaonmuna di bagasan Tuhan i”