Khotbah Pengkhotbah 10: 10-15 Hidup Dalam Didikan Tuhan

 Minggu 16. Set. Trinitatis; 19 September 2021

10:10 Jika besi menjadi tumpul dan tidak diasah, maka orang harus memperbesar tenaga, tetapi yang terpenting untuk berhasil adalah hikmat.

10:11 Jika ular memagut sebelum mantera diucapkan, maka tukang mantera tidak akan berhasil.

10:12 Perkataan mulut orang berhikmat menarik, tetapi bibir orang bodoh menelan orang itu sendiri.

10:13 Awal perkataan yang keluar dari mulutnya adalah kebodohan, dan akhir bicaranya adalah kebebalan yang mencelakakan.

10:14 Orang yang bodoh banyak bicaranya, meskipun orang tidak tahu apa yang akan terjadi, dan siapakah yang akan mengatakan kepadanya apa yang akan terjadi sesudah dia?

10:15 Jerih payah orang bodoh melelahkan orang itu sendiri, karena ia tidak mengetahui jalan ke kota.

Aha do na niluluan ni jolma di ngoluna? Jala songon dia do jolma I mandalani parngoluon, nabinabasabasahon Debata tu ibana? Adong do na mangalului hamoraon, hagabeon dohot hasangapon. Adong naso marna sonang marnida jala mandai na adong di ibana. Adong dope na mangarajumi haulion, hamoraon, hagabeon, hahipason dohot hasangapon boi mangalehon hasonangon na manongtong di jolma. Didok Parjamita on “Alogo sambing do luhut na i!” (Parjamita 1:2) jadi songon dia do hita mangalapati luhut na on? Gabe ndang mulaulaon ma hita? Ndang eahanta be ari marsogot? Antong songon dia do hita di minggu on marhite topik minggu on mangalusi realita on dibagasan haporseaon, tanda na ditogutogu Debata do hita di ngolunta, ima mandao sian pangoluan ni na oto jala manontong mangolu dibagasan pangajarion manang hapistaran na sian Debata.

Jotjot do jumpang hita hata “Haotoon” di buku parjamita on. Di hata Indonesia dilapati do i “kesiasiaan, sia-sia, tidak berguna”. Hata “Haotoon” marharoroan sian hata Heber ima “Hebel” manang “Habel”  namarlapatan uap air, kesombongan, sia-sia, kekosongan (tidak berhikmat). Haotoon dohot hapistaran tung mampanghorhon di ngolu ni hajolmaon, Ayat 10 dipungka marhite patuduhon halak naoto, ima naso mangarut baba ni tangke na naung matultul, ujungna tutu mangalojai dirina ala mangasahon gogona nama ibana manallikhon. Sumurung do didok halak na pistar (berhikmat) “songon surung ni hatiuron tahe martimbanghon haholomoon” (2:13), ai idaon ma tutu disi angka mutiha na arga na patiurhon roha dohot pingkiran, parbinotoan na bagas jala bidang, dohot solusi na denggan di ragam ni angka hamaolon. Alani molo halak na pistar, diboto ibana naung matultul baba ni tangke i, tubu ma tu roha na laho manggarut baba ni tangke i gabe boi ma muse dipangke. Di son ma hataridaan ni na oto dohot na pistar songon ni dok ni jamita on.

Paduahon, na oto dipatudos tu sitangkup ulok. Di pangantusion ni angka natuatua na jolo masa dope angka tabastabas. Dipangke ma on laho pasiding angka na jahat, alai laos boi do ninna manjou hagogoon tu dirina. Laos dipangke ma i laho manangkup ulok.  Ala ndang sude jolma na boi manangkup ulok, alani dipangke ma tabastabas i. Molo na oto do sitangkup ulok i, pargutonna ma tanganna ala so jolo dijaha ibana tabasna. Alai molo marbisuk do sitangkup ulok i tontu jolo jahaonna ma tabastabas i dung i ndang pargutonna be tanganna. Ndang ditabastabas i habisuhonna, alai dihajamotonna do, asa unang dipargut ulok i. Dia do nidok ni i? Dipatudos tu halak na jumolo mangarade diri dohot roha nang pingkiran laho patupa ulaonna. Molo ditaringoti di turpuk on manangkup ulok, ndada na gabe sitangkup ulok hita, tu ahai tangkuponta, dung i boi do i mambahen maratu dirinta. Urusan ni sitangkup ulok ma manangkup i, unang dohotdohot hita. Na mangihut dipatudos do halak na oto mamondut ibana sandiri sigodang hata. Di halak Batak didok jolo nidilat bibir asa nidok hata, lapatanna manatmanat manghatai unang paro rimas ni halak. Jala memang somalna sai gumodang do na oto on manghata i, on ma na nidokna parhata manggang. Boi dipadomu sian A sahat tu Z, manang didok “ si segala tau”. Alai molo marbisuk do ingkon manat do mandok sidohononna jala sude na nidokna naeng mambahen las roha ni halak. Alai ndang na mandok molo angka na marroha ndang boi muruk, manang maminsang na sala. Garida i do ulaon ni na marbisuk, maminsang, paingothon dohot manghatindangkon na tingkos.

Panurat buku Parjamita mandok halak na mangasahon gogo didok do na oto, ima naso olo mangalehon  tingkina laho pahinsathon, patajomhon parbinotoanna (ay.10), dirajumi ibana umbisuk ibana sian angka na asing, ndang olo marpanunghun jala manjalo habisuhon ni Debata (Ay. 14) jala holan palojaloja dirina sandiri (Ay. 15). Dison ma hataridaan ni naoto dohot na pistar songon nidok ni Parjamita on. Alai na marhaseanghon hapistaran ido na dumenggan. Sai jamot do angka na pistar I diangka ulaonna, unang marisuang gogo dohot pingkiranna. Lumobi asa marguna tu halak na asing na manghaporluhon, ndada holan tu dirina alai dohot do tu na asing. Ala hapistaran manang habisuhon na sian Debata jumping hita do i marhite parsingkolaan na arga di pangoluonta siganup ari. Molo nunga jumpang pangalaho na manjalahi hapistaran manang hapandean, ringkot ma tutu diparsaulihon hapistaran i tu torop halak. Istilah na asing “ndang aci makan sandiri”. Molo rade marsagi hapistaran i, jumpang ma songon na nidok ni na malo “boban na dokdok molo disagi gabe neang, jala pasupasu na godang molo disagi gabe hembang”. Ai pasupasu do tarajumi hapandean na binabasabasahon ni tuhan Debata tu angka na tinompana.

Di zaman na modern on, olo do tarunjun torop halak mandiori kesuksesan ndada hasatiaon. Ukuran na jotjot dipangke tu jolma ima kesuksesan di parngoluan, ndada parsihohotan di bagasan Tuhan i. ujungna, marlojong ma angka jolma I mangalului kesuksesan so pola mangharinghothon hasatiaon, hape molo dialusi marhite turpuk on angka halak na oto do molo sisongoni ala tangkas hakrsitenon ndang mananda hata sukses alai hasatiaon do. Molo tung sukses pe ibana hombar tu panatapan ni angka jolma alai naeng ma dibagasan parsihohotan na togu maradophon Debata. Tangkas na naeng dohonon ni parjamita marhite turpuk on ima saluhut angka ulaon manang hasonangan na dijalahi di duru ni Debata holan parsatongkinan, haotoon, ginjang ni roha, jala  sisoada do i sude.

Thema ni minggu sadari on ima “Ngolu dibagasan Panogunoguon ni Debata”. Ditogu tontu ala adong hahuranganna. Tarsongon angka dakdanak na metmet nang angka natuatua na naung  moru gogo na suang songoni angka na hurang hipas dipamatang na. Isarana ditogu mardalan tontu ala ndang boi tigor mardalan, Molo nga ditogu tontu sian namaol mardalan gabe boi denggan mardalan, sian na maol hundul gabe boi hundul, sian na maol jongjong gabe boi denggan muse jongjong. Suang songoni do nang ngolu ni ganup jolma, na ura tartuktuk, manimbil, lilu jala pola gojap manang manabu. Ima hakekat ni hajolmaon molo sian pardangingon binahen ni “Haotoon/Tidak berhikmat”, ima ngolu naso marimpola, umbahen I ringkot panogunoguon ni Debata ima bisuk nang hapistaran na sian Ibana.  Na mangihut marhite panjouon ni ngolunta ima patuduhon holong tu ganup halak, pajongjong parsaoran na denggan tu ganup donganta, ima marhite bisuk na sian Debata jamot diangka panghataion, asa marhite panghataionta I lam patoguhon roha ni na gale, patubuhon semangat na imbaru diangka na mandele. Lapatanna panghataion na mamboan pasupasu. Jolma na mananda panogunoguon ni Debata di bagasan ngoluna sai marusaha do mangolu di bagasan hasatiaon, parsihohotan di adopan ni Debata. Alani i do diigil hata ni Debata sian angka naporsea asa ringgas mangguruhon huhut manjanghon hapistaran, habisuhon na sian Debata jala hobas mangurupi angka na patut siurupan. Alani i sai olo ma hita manangihon huhut marpanunghun tu Debata diangka pangidoanta.