Khotbah Lukas 11: 27-28 Kebahagiaan Orang yang Mendengar Firman Allah

 Minggu 20 Set. Trinitatis; 17 Oktober 2021

11:27 Ketika Yesus masih berbicara, berserulah seorang perempuan dari antara orang banyak dan berkata kepada-Nya: "Berbahagialah ibu yang telah mengandung Engkau dan susu yang telah menyusui Engkau."

11:28 Tetapi Ia berkata: "Yang berbahagia ialah mereka yang mendengarkan firman Allah dan yang memeliharanya."

Hata martua somal do tabege jala tajaha. Di Padan na robi dohot Padan na imbaru pola 106 hali hata i disurathon. Jala diparngoluanta siganup ari jotjot do tabege hata on. Udut tu si tar torop do nang halak Btak na margoar si Martua. Saluhut pamangkeon di hata martua martudu do i tu ngolu na marhasonangan, ngolu na marlas ni roha. Jala sude do jolma manghirim manang mamparsinta hatuaon di ngoluna ndada burabura. Dapot roha jala mura antusan molo sude do jolma manghirim las ni roha dohot pasupasu di ngoluna. Alai na ringkto tapahusorhusor ima aha do ojahan ni las ni rohanta? Aha do ojahan ni hasonanganta? Boha do asa tarpasupasu hita jala gabe halak na martua hita? Molo di halak Batak somalna adong tolu ojahan na boi patubu las ni roha dohot hasonangan huhut gabe tanda ni ngolu na tarpasupasu, ima hamoraon, hagabeon dohot hasangapon. Alai na gabe sungkunsungkun, molo nunga dapot na tolu on tutu do hita boi gabe halak na martua? Jala molo so boi dapot na tolu i, gabe dohonon ma ngoluna ndang tarpasumasu manang ndang martua?

Di turpuk on boi jumpang hita dua hali didok hata “martua ma”. Tung mansai torop do angka na ro mandapothon Jesus hatiha i. Marragam sibonsirina, adong na naeng mangido hamamalum sian parsahiton, adong naeng umbege pangajarionNa, adong ala naeng mangalului sipanganon ala pigapiga hali dipatupa Jesus mangalehon mangan, laos adong muse ma i laho paurakhon manang manjergothon Jesus. Tongon di na mangajari Jesus taringot tu na martangiang, laos dipamalum Ibana sahalak na ngungu, longang ma angka natorop i marnida pambahenan ni Jesus. Alai tutu ndang saluhut nasida longang jala ndang las rohana marnida na masa i. Gariada tahe sai dilului nasida do dalan laho paurakhon manang mangunjuni Jesus, alani do asa adong na mandok, ai marhite Beelsebul do dipangke Jesus hagogoon i, na deba muse mangido angka tanda na asing asa porsea alai tangkas di dialusi Jesus sude angka sungkun-sungkun nasida i. Molo deba sian nasida sai diuji do mangunjuni Jesus, alai adong sahalak parompuan na sai longang rohana marnida jala mambege saluhutna. Jala tongon di na mangajari  dope Jesus, pintor marsoara na gogo ma sada boruboru mandok pujian tu Ibana, jala dipuji boruboru i ma ina na manubuhon Jesus. Alani las ni rohana, hinorhon ni kekagumanna tu na binahen ni Jesus, gabe disoarahon boruboru i ma pujian i. Tutu, las ma roha ni natoras tarlumobi ina na manubuhon molo denggan ianakhonna. Songon panghilalaan ni boruboru i, sai dihirim angka ina do asa denggan angka na tinubuhonna.

Ndang muruk Tuhan Jesus ala tompu marsoara boruboru i tagan manghatai/mangajari dope Jesus. Nunga somal nian diadopi Jesus angka na songon i jotjot do sai adong na tompu mangalusi manang manungkun tu Ibana tagan manghatai dope Ibana. Gariada denggan do dialusi Jesus boruboru i, didok: “Martua ma angka na umbege hata ni Debata jala na umpeopsa”. Ndada naeng diporso manang naeng diparsoada Jesus hata ni parompuan i. Ndang diparsoada Jesus, martua ma ina na manubuhon Ibana. Ndang diparsoada Jesus martua angka ina na manubuhon anak na denggan jala sibahen las ni roha. Alai na niida ni Jesus sian boruboru i, pujian na nidok ni boruboru i marharoroan sian pamerengan daging sambing do. Ala denggan pangajarion ni Jesus boi dialusi Ibana angka sungkungsungkun ni natorop i. I do umbahen na dialusi Jesus songon i asa umbagas dope hatuaon i molo olo manjangkon jala mameop hata ni Debata songon si Maria ina ni Tuhan Jesus na manjangkon dohot mameop hata ni Debata na pinasahatna marhite surusuruanNa taringot tu barita hatutubu ni Jesus, diantusi jala dijalo si Maria do saluhut na sinangkapan ni Debata marhite alus ni si Maria na mandok: “Naposo ni Tuhan i do ahu. Sai saut ma tu ahu songon na nidokmi”. Jala dung lam bagas diantusi si Maria na naeng masa i didok si Maria ma di ende pujipujianna di Lukas 1: 48 “Sesungguhnya mulai dari sekarang segala keturunan akan menyebut aku berbahagia”. Didok pe si Maria gabe ina na martua ndada holan ala na manubuhon Jesus, alai tarlumobi ala haserepon ni rohana mambege jala mameop hata ni Debata. Tangkas do i didok di Lukas 2: 19 “Ia si Maria dipeop do hata i jala dipahusorhusor dibagasan rohana”. Ndada holan dipeop jala dipahusorhusor alai huhut dijalo, dioloi dohot diulahon ibana. Alani ojahan na sasintongna jala na hot patauhon si Maria gabe ina na martua ima ala olo mambege jala mameop hata ni Debata. Jala ndada holan si Maria na dipatau gabe parjambar didi. Tung saluhut na olo mambege dohot mameop hata ni Debata dipatau do gabe halak na martua.

Alani dipangidohon Jesus asa unang ma holan parnidaan pardagingon sambing hita laho mamuji Tuhan i. Naeng ma dohot nang sian partondionta. Unang ma alani pasupasu pardagingon sambing gabe tapuji Debata. Unang ma holan ala mamora hita, denggan parkarejoanta, gabe na ni ula, dapot na nijalahan, gabe ringgas hita mamuji Tuhan i. Alai lobi sian i, nunga tajalo pasuasu partondion sian Debata marhite anakNa Tuhan Jesus Kristus, i ma ojahanta laho mamuji dohot pasangaphon Debata. Taharingkothon ma ngolu partondion i, unang ma holan ngolu pardagingon na tapatujolo. Tongtong ma talehon roha nang tingkinta laho manangihon hata ni Debata. Jala unang ma nian holan panganginangi, alai naeng ma gabe siulahon hata ni Tuhan i ma hita (Jak. 1: 22-24). Unang marsidalian hita laho manangihon hata ni Tuhan i, marsidalian ro tu parsaoran dohot parpunguan ni angka na porsea ringkot do manangihon hata ni Debata, asa sian na tumangihon do ro haporseaon (Rom 10: 17). Jala ringkot do peopon hata ni Debata, lapatanna hata ni Debata gabe ojahan di ngolunta laho mangulahon angka siulahononta. Antong lam taparinggas ma rohanta manangihon hata ni Debata marhite na manjaha Bibel dohot sian angka jamita huhut marsihohot ma hita laho umpeopsa, mangoloi dohot mangulahon di bagasan ngolunta. Hata ni Debata do na mangapuli rohanta dohot patoguhon hita uju mangadopi hamaolon di pardalanan ni ngolunta. Godang angka na masa di ngolunta on na maol tarantusi manang tarjalo hita. Alai lehonon ni Tuhan i do gogo di hita mangantusi saluhut angka na masa. Hata ni Debata na mangaramoti langkanta asa unang tarurak hita. Ala sipata ndang taboto tangkas dalan sidalananta, alai molo Tuhan i do na mangaramoti hita, padaoonNa do hita sian jorgong sian parjahat, sian angka na so hasea. Laos hata ni Debata do na mangajari hita laho mangaramoti manang mangargahon na adong di hita, angka pasupasu ni Tuhan i. Asa taboto mamangke arta na adong di hita hombar tu lomo ni rohaNa, asa taboto manogunogu ianakhonta tu dalan hasintonganNa, asa taboto mangalugahon rumatangganta hombar tu lomo ni rohaNa, gabe boi daionta pasupasuNa di ngolunta. Alani tongtong ma marsaor hita dohot hata ni Debata.