Khotbah 1 Tesalonika 3: 9-13 Menyambut Kedatangan Tuhan dalam Kekudusan

 Minggu Advent I; 28 November 2021

3:9 Sebab ucapan syukur apakah yang dapat kami persembahkan kepada Allah atas segala sukacita, yang kami peroleh karena kamu, di hadapan Allah kita?

3:10 Siang malam kami berdoa sungguh-sungguh, supaya kita bertemu muka dengan muka dan menambahkan apa yang masih kurang pada imanmu.

3:11 Kiranya Dia, Allah dan Bapa kita, dan Yesus, Tuhan kita, membukakan kami jalan kepadamu.

3:12 Dan kiranya Tuhan menjadikan kamu bertambah-tambah dan berkelimpahan dalam kasih seorang terhadap yang lain dan terhadap semua orang, sama seperti kami juga mengasihi kamu.

3:13 Kiranya Dia menguatkan hatimu, supaya tak bercacat dan kudus, di hadapan Allah dan Bapa kita pada waktu kedatangan Yesus, Tuhan kita, dengan semua orang kudus-Nya.

 Mansai marparbue do panghobasion Ap. Paulus di huria Tessalonik siala torop na rade jala mangalehon ngoluna gabe siihuthon Kristus. Sada pangalaho na masa na so boi dihalupahon di hatiha i, ima toropan do sian duru ni Jahudi na gabe ruas di hatiha i. Alai huroha, dung lam torop na mangihuthon Kristus, gabe tubu ma sogo ni roha di halak Jahudi tu nasida. Dipatubu nasida ma angka hagunturon, dipasuhar nasida ma hasintongan marhite na mandok Ap. Paulus na mambahen angka hagunturon i. Ujungna ndang adong be dalan na asing na dumenggan so ingkon ruar ibana sian luat i manadingkon parpunguan nasida. Mangihuthon Ulaon ni Apostel 17:10 ingkon bungkas do Ap. Paulus rap dohot si Silas dohot si Timoteus manadingkan kota Tessalonik hinorhon ni paraloan dohot parmusuon na mansai mara dompak halak Jahudi hatiha i.  Diuduti Ap. Paulus ma pardalananna pararathon Barita Nauli sahat tu luat Korint. Alai umbege barita na masa dohot sori ngolu ni huria bona di Tessalonik, dihalaputi Ap. Paulus ma muse manghobasi nasida marhite na marsuru si Timoteus.

Nunga masihol apostel Paulus naeng mangebati huria Tessalonik alai ndang dapot dope tingki na lehet, alani disuru ibana ma si Timoteus mangebati nasida (ay. 2). Dung mulak si Timoteus sian Tessalonik mandapothon si Paulus na tongon di huta Aten (ay.1), dipabotohon si Timoteus ma tu si Paulus taringot tu haporseaon ni huria Tessalonik (ay.4) suang songon i nang taringot tu holong ni roha nasida (ay. 6-7). Mansai las roha ni apostel Paulus umbege barita na sian si Timoteus alani ditongos ibana ma suratna tu huria Tessalonik, i ma turpukta sadari on. Marlas ni roha apostel Paulus marnida huria Tessalonik sialani haporseaon nasida na togu dohot ala holong ni roha nasida na polin nang pe marragam haporsuhon diae nasida. Dipasahat ibana hamauliateon ni rohana tu Debata siala barita na denggan taringot tu huria Tessalonik on. Sungkun sungkun tu hita saonari: Aut sura ma mangolu si Nomensen, na digoari apostel ni halak Batak, suraon do las rohana marnida halak Kristen Batak? Suraon do las rohana marnida hurianta on manang marsak? Sada na tangkas di hita, apostel Paulus mandok mauliate do tu Debata jala marlas ni roha umbege barita taringot tu huria Tessalonik. Songon i ma nian hurianta marsadasada, ima patubuhon las ni roha di na umbege nang di na humaliang.

Nang pe mandok mauliate apostel Paulus taringot tu huria Tessalonik jala nang pe las rohana marnida nasida, tongtong do ditangianghon apostel Paulus nasida arian dohot borngin. Borngin dohot arian marlapatan marulakulak jala diharingkothot martangiang. Sihol ni roha laho pajumpang bohi diboan dibagasan tangiang. Di bagasan tangiang i do tarida parsaoranta tu Debata, patuduhon na Debata do bona dohot pamusatan ni ngolunta. Dipangidohon apostel Paulus tu Debata asa adong nian tingki di nasida masipaidaan bohi asa boi dipatingkos apostel i atik tung adong na hurang di haporseaon nasida (ay. 10). Ditangianghon apostel Paulus do asa ditambai haholongan di huria Tessalonik (ay. 11) nang pe nunga dipuji ibana holong ni roha nasida. Sada do tujuan ni tangiangnai, asa marhabadiaon nasida di jolo ni Debata (ay. 13). Tangiang ni apostel Paulus on sahat tu hita, tu hurianta. Boha, marhabadiaon do hita di jolo ni Debata? Polin do haporseaonta nang pe rongom haporsuhon songon na masa tu huria Tessalonik? Molo masa dope Covid-19 jala ndang boi dope hita mamestahon Natal songon taontaon naung salpu i, gabe gale jala lomos do haporseaonta? Haporsuhon na masa tu huria Tessalonik dohot tu apostel Paulus ndang mambahen mansohot haporseaon nasida, ndang gabe ditadinghon nasida Tuhan Jesus. Tangkas diauhon jala dihaporseai nasida paboa naung parjolo Tuhan Jesus mananon na porsuk holan laho manghophop hajolmaon. Alani, songon siihuthon Jesus hita, ingkon rade ma hita manaon na porsuk, unang alani ragam ni haporsuhon na masa di portibi on mambahen sumurut haporseaonta, baliksa ingkon lam patoguhon do. Togu do haporseaonta manang mura munggilunggil? So tung do marhaporseaon hita holan di tingki  godang pasupasu dohot las ni roha. Asa marhabadiaon hita didapot Tuhanta do ari parpudi, naeng dohononta songon hata ni BE. No. 149: 3: “Manang aha pe na masa las ni roha arsak pe, tioponku Ho na basa  na marholong roha pe , tung salelelng au mangolu nang dung suda bohalhon, ingkon Ho o Sipangolu pujionku sai tongtong”.

Mansai gara do panghirimon di haroro ni Kristus di hatiha i. Pola do dirajumi nasida boi idaon nasida i uju di ngolunasida be. Alai sai dipaima ndang marnaro. Biar roha ni Apostel Paulus so tung gabe tarhapus haporseaon. Alani ma dohot gomos disoarahon Apostel Paulus tu nasida ulaon dohot pangalaho na sintong na ingkon sijamothonon ni ganup halak Kristen. Sasintongna ndada sai manigati andigan manang sadihari haroro ni Kristus ulaon manang urusan ni halak Kristen. Sada do na ringkot ima manang sadihari pe, dapotsa nasida so hasurahan marhabadiaon di adopan ni Debata. Di pandohan si songon i, naeng arahonon ni Apostel Paulus nasida tu rumang ni ngolu na sasintongna. Unang diula na so ulaonna na marpangkorhon tu hasesega ni parngoluon. Unang meret sian unokna, ai unok manang ndada di sadiharina alai di haradeon do.

Alani do haporseaon na togu ndang boi holan di hata, ndang boi holan di roha, ndang boi holan diparbinotoan alai ingkon tarida sian ngolu siganup ari. Dia mai? I ma mangolu dibagasan holong. Dihamauliatehon apostel Paulus do holong ni roha ni huria Tessalonik jala dihatindanghon apostel Paulus do holong ni rohana maradophon huria i (ay. 12). Masihaholongan do huria i dohot apostel Paulus. Boha hurianta? Masihaholongan do parhalado dohot ruasna? Masihaholongan do rua tu ruas manang parhalado tu parhalado? Manang boha pe alusta tu sungkun sungkun on, diboto Debata do tingkos manang so tingkos. Alai di minggu Advent naparjolo on dijouhon tu hita asa masihaholongan nian hita. Tapadao ma angka hosom, pangiburuon, parbadabadaan, na masipaototoan, bangko naeng maruntung, monang jala mora sandiri. Molo songon i dope hita ndang marhabadiaon dope hita dijolo ni Debata, ndang tutu dope hita na maradvent. Marurat jala lam togu haporseaon di Jesus Kristus Anak ni Debata. Ngolu haporseaon na lam tu majuna, ndada lam marpengpeng, alai lam magodang do sahat tu na marparbue. Saluhutna i ndada alani dirinta manang gogonta sambing, alai tung ala mangasahon asi ni rohaNa sambing do. Anggiat nian lam patar ngolunta naung mangoloi hataNa, mangihuthon na nidokna, gabe angka na marhabadiaon na polin mangolu dibagasan hatiuron. Di na manomunomu hita diharoro ni Tuhan Jesus Kristus paduahalihon, tapauli ma ngolunta songon angka oroan na parade miak parpalitoanna, paima haroro ni Pangoli ima Jesus Kristus Tuhanta i.