Khotbah Mazmur 90: 1-12 Ajarlah Kami Menghitung Hari-hari Kami

 Minggu Akhir Tahun Gereja; 21 November 2021

90:1 Doa Musa, abdi Allah. Tuhan, Engkaulah tempat perteduhan kami turun-temurun.

90:2 Sebelum gunung-gunung dilahirkan, dan bumi dan dunia diperanakkan, bahkan dari selama-lamanya sampai selama-lamanya Engkaulah Allah.

90:3 Engkau mengembalikan manusia kepada debu, dan berkata: "Kembalilah, hai anak-anak manusia!"

90:4 Sebab di mata-Mu seribu tahun sama seperti hari kemarin, apabila berlalu, atau seperti suatu giliran jaga di waktu malam.

90:5 Engkau menghanyutkan manusia; mereka seperti mimpi, seperti rumput yang bertumbuh,

90:6 di waktu pagi berkembang dan bertumbuh, di waktu petang lisut dan layu.

90:7 Sungguh, kami habis lenyap karena murka-Mu, dan karena kehangatan amarah-Mu kami terkejut.

90:8 Engkau menaruh kesalahan kami di hadapan-Mu, dan dosa kami yang tersembunyi dalam cahaya wajah-Mu.

90:9 Sungguh, segala hari kami berlalu karena gemas-Mu, kami menghabiskan tahun-tahun kami seperti keluh.

90:10 Masa hidup kami tujuh puluh tahun dan jika kami kuat, delapan puluh tahun, dan kebanggaannya adalah kesukaran dan penderitaan; sebab berlalunya buru-buru, dan kami melayang lenyap.

90:11 Siapakah yang mengenal kekuatan murka-Mu dan takut kepada gemas-Mu?

90:12 Ajarlah kami menghitung hari-hari kami sedemikian, hingga kami beroleh hati yang bijaksana.

Minggu ujung taon parhuriaon, i ma minggu parningotan di angka na monding. Dijaha do di tingki on goar ni angka na monding sian huria i manipat sataon parhuriaon. Dipatupa hurianta pe i ndada laho parigatrigat bulung gaol, paingotingot hinadangol. Baliksa na martujuan pasunggulhon tu sude ruas ni huria naung sonang nasida di paradiananna be paima dipahehe Tuhan i sian hamatean. Na mangihut muse, laho pasunggulhon tu sude angka ruas ni huria, paboa saluhut jolma di tingkina be sahat do tu hamatean. Ganup halak naeng mangarade dirina manjangkon haroro ni hamatean i asa marsihohot di haporseaon. Di angka na marsihohot di haporseaon, pamoluson do hamatean i paima hehe muse tu hangoluan na so ra suda. Hombar tusi, turpuk sadari on paingothon hita asa lam mangantusi parngoluan ni jolma parsatongkinan i. Naeng lam malo mamangke angka tingki tagan mangolu dope sahat ro di na lao mate. Ise do jolma i maradophon Jahowa? Naeng lam gorga di rohanta, ise do hita maradophon Debata. Ido na pinaandar di tangiang ni si Musa on. Mansai tangkas do dipapatar ibana, ia Debata na manongtong do Ibana, alai anggo jolma orbuk na laho salpu do. Sumuang do gabe orbuk jolma i dibahen Ho, dung i didok Ho muse: “Mulak ma hamu ale, jolma manisia!” Sian orbuk do jolma i ditompa Debata, jala ditingkina be mulak ma i muse gabe orbuk. Asa jolma na tinompaNa i, sangullus sambing do i di adopan ni Debata, ai orbuk do ibana. Ido na naeng suan dibagasan rohanta be, paboa na laho salpu do ngolunta di hasiangan on jala orbuk sambing do hita.

Jempek do ariari ni jolma manisa. Sobokhon sadari natoari naung salpu do na saribu taon ianggo di jolo ni Debata, jala songon sada gansi panjaga borngin. Songon duhutduhut do jolma i, torang ni ari marbunga jala martumbur hape bodarina i disabi do jala malos. Siap do jolma i alani rimas ni Jahowa, tompu do jolma i mago jala mate. Lam moru do ariari ni jolma i. Tung aha pe na masa di jolma i, las ni roha manang arsak pe, hamoraon manang hapogoson pe, hahipason manang parsahiton pe, saluhutna do laho salpu. Tung diuji pe mangetongi lelengna manang tongkinna, ganjang na manang jempek na angka ari na binolus ni jolma i, intap ni pitupulu taon do ariari ni jolma i. Jala marhagogoon situtu dieak ro di ualu pulu taon. Alai tung dipamanat pe hinadenggannasida, hangaluton dohot halojaon do jambarna. Tung aha ma sipangasahonon ni jolma na laho salpu i? Tung ise ma na tuk mangadopi muruk dohot rimas ni Jahowa? Ido na naeng gorga dibagasan diri ni jolma, asa diboto aha hadirionna. Molo taboto na laho salpu do hita sian hasiangan on, lam masihol ma hita di Debata na mangalehon hosa hangoluan i asa mangolu hita.

Alai anggo Debata, na manongtong do ro di salelenglelengna. Tagan so adong dope tano on dohot portibi on, nunga adong Debata. Ibana do na manompa jolma i sian orbuk jala mulak muse gabe orbuk. Alani ma Parpsalmen on martangiang mangidohon: “Ale Tuhan, sai Ho do haporusannami marsundutsundut”. Tung tangkas do hasahatan ni andung dohot tangiang ni Parpsalmen on, ima tu Debata na manongtong i do hita marhaporusan. Ndang tu angka debata sileban manang tu hagogoon ni portibi on dipasahat andung dohot tangiangna. Ia pandohan marsundutsundut, na marlapatan do i na manongtong hot ro di saleleng ni lelengna. Marhaporusan tu Debata na manongtong i manang marsihohot mangoloi Debata na manongtong i, ido mamboan jolma i tu hatongtongan ni Debata, i do naung nilehon ni Debata marhite AnakNa Tuhan Jesus Kritus, di na nidokna i Johannes 5: 26-29: “Ai songon Ama i Parngolu hian di bagasan dirina, laos songon i do dilehon tu Anak i, asa Parngolu Ibana di bagasan dirina. Jala dilehon do tu Ibana huaso manguhumi, ala Anak ni jolma i Ibana. Unang longang rohamu ala ni i, ai di na ro tingkina, begeon ni saluhut halak na di angka tanoman i ma soarana. Dung i ruar be ma: Angka sibahen na denggan hehe tu hangoluan; alai angka siula na jahat hehe tu uhum”. Orbuk na laho salpu do jolma i alani dosa hajahatonna. Mate jala habang do jolma i binahen ni muruk dohot rimas ni Debata. Alai bongot tu hangoluan do ganup na marhaporusan tu Jahowa dibagasan asi ni rohaNa na manongtong i.

Molo songon i ma hatop do salpu ngolu ni jolma i, adong dope argana? Nang pe satongkin do jolma i di hasiangan on, arga do i, jala ingkon hamauliatehononhon do i. I do umbahen ringkot mangido tu Debata: “Sai parrohai ma hami mamilangi angka ariarinami asa dapotan roha na bisuk hami”. Ala jolma na gale do hitamansai ringkot situtu do panuturion, panogunoguon dohot pangajarion tu hajolmaon, asa mananda dirina di adopan ni Debata. Hasintongan na so boi disoadahon dipardalanan ni ngolu hajolmaon, i ma ingkon marujung do ariarina. Asa lam diboto jala lam marroha ma jan jolma i mandalani angka ari ni ngoluna dibagasan biar mida Debata. Ai di na martamba angka ari ni ngolunta, sasintongna lam moru do partingkianna mangolu di hasiangan on. Ai ndang tarbahen ‘mulak poso’ manang mulak tu pudi. Ingkon marujung do di tingki angka ari na dibilangi i di ganup ngolu ni hajolmaon. Marhite pangajarion na sian Debata dapotan roha na bisuk ma jolma i, roha na bisuk diparsaulihon sian biar mida Debata (Poda 1: 7), marhite habisuhon i gabe diparhaseang jolma i partingkian ni ngoluna gabe parngoluan na hinalomohon roha ni Debata, boi nian ngolunta on gabe pasupasu di ujungna (lagu hidup ini adalah kesempatan).

Atik pe hangaluton dohot halojaon do jambar ni jolma i, alai arga do ngolu i. Jambar hajolmaon do hangaluton dohot halojaon, jala na laho salpu do i sian ngolunta. Marhite na malo mamilangi angka ariari ni ngolu di adopan ni Debata, i do dalan mandapot roha na bisuk sian Ibana. Naeng lam tangkas di hita hinaarga ni ngolunta si satongkin i. I do na nidok ni angka pande bisuk i, momentomori, ingot ari hamamatem. Ala ingkon sahat do hita tu hamatean i, naeng arga bahenonta angka ariari ni ngolunta. Taparhaseang ma tingki laho mangulahon na denggan, angka ulaon na marguna songon parbue ni parsihohotanna manghaporseai Debata. Molo tung marsalpuan angka tingki na so marimpola, denggan ma tatopoti dosanta songon na hinatindanghon ni BE.No 182: 2 “Husolsoli do rohangku na gok dosa i tongtong, ai godang ariaringku na hubahen ambolong”. Antong marsihohot ma hita marhaporusan tu Debata na manongtong i. Ibana do na manompa hita, jala arga do hita songon na tinompaNa. Nunga diullushon tu hita hosa hangoluan nang pe orbuk do hita, manongtong ma hosa hangoluan i di hita asa martondi na mangolu hita. Ai molo hot hita di Debata na manongtong i, na manongtong do hita muse togihononNa tu lambungNa. Ido hangoluan naung binoan ni Tuhan Jesus i, laho mamboan hita tu ngolu na manongtong i. Antong, tagan adong doe ariari ni ngolunta naeng tapangke i sadenggandengganna, laho mandai huaso dohot holong ni roha ni Debata. Pangido ma roha bisuk Tuhan Debata marhite pangajarion ni Tondi Parbadia na sai mamparrohai angka na porsea asa lam tau hita mandalani angka ariari ni ngolunta.