Khotbah Mazmur 146: 1-10 Mengasihi Bumi dan Segala Isinya

 Minggu 23 Set. Trinitatis; 07 November 2021

146:1 Haleluya! Pujilah TUHAN, hai jiwaku!

146:2 Aku hendak memuliakan TUHAN selama aku hidup, dan bermazmur bagi Allahku selagi aku ada.

146:3 Janganlah percaya kepada para bangsawan, kepada anak manusia yang tidak dapat memberikan keselamatan.

146:4 Apabila nyawanya melayang, ia kembali ke tanah; pada hari itu juga lenyaplah maksud-maksudnya.

146:5 Berbahagialah orang yang mempunyai Allah Yakub sebagai penolong, yang harapannya pada TUHAN, Allahnya:

146:6 Dia yang menjadikan langit dan bumi, laut dan segala isinya; yang tetap setia untuk selama-lamanya,

146:7 yang menegakkan keadilan untuk orang-orang yang diperas, yang memberi roti kepada orang-orang yang lapar. TUHAN membebaskan orang-orang yang terkurung,

146:8 TUHAN membuka mata orang-orang buta, TUHAN menegakkan orang yang tertunduk, TUHAN mengasihi orang-orang benar.

146:9 TUHAN menjaga orang-orang asing, anak yatim dan janda ditegakkan-Nya kembali, tetapi jalan orang fasik dibengkokkan-Nya.

146:10 TUHAN itu Raja untuk selama-lamanya, Allahmu, ya Sion, turun-temurun! Haleluya!

 

Psalmen 146 on i ma sada sian lima ‘Psalmen Haleluya (Mazmur Haleluya)’, di bagian pangunjungi ni Buku Psalmen. Digoari lima Psalmen na parpudi on ‘Psalmen Haleluya’ ala dibonai jala diujungi dohot hata Haleluya. Partingkian ni Psalmen 14 on ima dung mulak bangso Jahudi sian habuangan Babel. Boi pe mulak bangso Jahudi sian Babel, ndada ala hagogoon nasida manang ala bisuk ni angka na sangap ni bangso i. Alai dalan na so hea tubu tu pingkiran ni bangso i, i do dipangke Debata dalan paluahon bangso i. Hagogoon ni Debata sambing marhite dalan na so hea piningkiran ni jolma, i do mamboan bangso i malua sian habuangan, i ma marhite hamonangan ni harajaon Media-Persia maralohon Babel. Alani haluaon na binahen ni Debata tu bangso i tarjou do Parpsalmen on laho mamuji Debata marhite pandohan ‘Ale tondingku, puji ma Jahowa!’ Digora jala dihehei Parpsalmen on do tondina sandiri laho mamuji Jahowa. Ndang adong tondi na tuk laho mamuji ia so tondi naung hehe, naung hinsat. Sada sian kewajiban ni tondi i ima mamuji Debata. Saleleng ngoluna mamuji Debata. Ndang mansohot dope sada ende nunga udut ende pujian na mangihut laho pasangap Jahowa. Jala molo taida ganup halak na porsea na tardok na mate martyr, ndang hea mansadi nasida laho mamuji Debata, manghatindangkon hasintonganNa. Laho mandok atik pe donok situtu nasida tu hamatean i, alai ndang mansadi Debata laho mangaramoti tondina.

Pamujian sisongon on mansai ringkot jala arga situtu, huhut boi gabe ubat di parngoluonta na gok arsak, hamaolon, dohot lan angka na asing hinorhon ni pangontak ni sorimago Covid-19 na masa di liat portibi on. Jala molo disungguli minggunta sadarion hita laho mamuji Debata, asing ni na patoguhon pos ni rohanta di Debata, suman ni na manggohi tujuan ni ngolu i do hita disi. Ai laho mamuji dohot pasangaphon Debata do hita umbahen na ditompa. Atik pe dipabangkit Debata do angka pangarajai parhiteanNa laho mangaramoti angka houm dohot bangso, alai ndang dompak pangarajai i hita mamuji jala ndang boi hita marhaposan tu nasida, tung songon dia pe gogo ni sasahalak pangarajai, tongon do ibana pinompar ni si Adam na sorang tu portibi on. Ndang adong haluaon sian ibana. Molo di hata Batak ni Bibelta on didok: "Ndang adong panumpahion di bagasan ibana," lapatanna ndang adong haluaon, hangoluan si salelengna i di ibana. Pangarajai ni portibi mangalului huaso, atik pe lan do i dipangke laho mangaramoti angka donganna.  Molo pe jolma i dirajumi na umbisuk sian saluhut angka na tinompa i, alai unduk do nang jolma i tu hamatean. Domu tu si didok do di Psalmen 118: 8-9 ‘Dengganan marhaporusan tu Jahowa, asa marhaposan tu jolma. Dengganan marhaporusan tu Jahowa, asa marhaposan tu angka raja’. Boasa didok songon i? Alana ndang tarpalua jolma i dirina sian hamatean. Jala hatop situtu do hamatean i ro manonggopi jolma i. Na sian tano mulak ma i gabe tano. On do sialana umbahen ndang diloas hita marhaposan tu jolma. Mansohot do sude, ro di gogo, usaha suang songoni nang pingkiranna, nasa na binahenna maradophon dirina manang sandok humaliangna, molo nunga songgop hamatean i. Debata sambing do na manongtong tuk mangaradoti hita dohot nasa na tinompaNa.

Dibahen hurianta do (dohot huria anggota Sekber UEM) Psalmen 146 on ojahan ni Topik Minggu sadarion ‘Manghaholongi Pangisi ni Portibi on (Mengasihi bumi dan segala isinya)’. Antong songon dia ma rumang ni pangaradotion ni Debata di hita angka na tinompaNa? Tangkas do dihajongjonghon di turpuk on, dihaholongi Debata do sude na tinompaNa i. Debata siingot hasintongan. Di ganup partingkian dohot di sandok liat portibi on, sada do dilehon uhum dohot hasintongan na ingkon tongtong peopon ni ganup na porsea (ay. 6). Ndang mubauba Debata, ndang mardingkan holong ni rohaNa, hot do Ibana di hasintonganNa. Na mangihut, Ibana do Debata sipatingkos uhum tu angka na ni rupa (ay. 7). Torop do halak na so tuk be marnida dirina sandiri alani na nirupa ni halak. Ndang tolap ibana be marnida Debata alani sitaonon na masa tu ibana. Lam patuduhon na so tuk be nasa parnidaanna. Debata do siungkap parnidaan i, silehon sipanganon tu angka na male, dohot sipalua halak na tarrante. Ibana do Jahowa na patonggor mata ni angka na mapitung, pahehe angka na tungki, mangkaholongi angka partigor. Ibana do Jahowa siramoti halak na buro, na margogoihon angka na sopot so marama so marina dohot angka na mabalu, jala Ibana palipehon dalan ni angka parjahat (Ay. 7–9). Nang pe hira na dipasombu Ibana tongkin jolma i patupahon na hinalomohon nii rohana, alai unang lupa hita ndang gabe boi jolma i marlomolomo tu saluhut na tinompa ni Debata.Tangkas do disarihon jala diradoti Debata na tinompaNa i.

Alai ndada holan jolma disarihon dohot dihaholongi Debata, angka na nitompa na asing i pe tong do diparmudu Debata (pat. 1 Musa 1:30; Psalmen 104: 11-12; Mat. 6:26). Udut tu si tahaporseai do, parsuruon ni Debata tu jolma di 1 Musa 1: 28; sahat do hinanghamna tu na mangaramoti angka na nitompa. Alai na gabe sungkun-sungkun, tutu dope adong di hita jolma nuaeng panarihonon tu angka na tinompa na asing? Hombar tu topik ni Minggunta sadari on taringot tu joujou manghaholongi dohot mangaradoti angka na tinompa, ndada holan sipaingot na uli begeon be i, alai ingkon tamulai ma sian dirinta dohot hurianta be. Dia ma naung tapatupa songon dalan mangaradoti angka na tinompa i? Molo pe ndang siparsidohot hita manegai angka na tinompa i, pinomat dohot hita maminsang angka jolma na sai manegai i. Molo sega portibi on ala harauson ni jolma, tontu gabe manghorhon hasusaan do muse i tu ngolu ni jolma dohot na tinompa. Ingkon taparade do bohal ni ngolu angka pomparanta. Bohal ni ngolu i ndada sipanganon na rumingkot alai inganan parmianan nasida. Tagamon dope dapot nasida tano na uli jala na boi hatubuan ni suansuanan? Aha do naung taparade tu sundut na mangihut? Songon panarihonon ni Debata di angka na tinompaNa i ma taparangehon saleleng mangolu hita di tano on. Taradoti ma nasa ulaon na pauliulihon portibi on. Taida ma dihumaliangta be, adong dope donganta manang hita sandiri do na sai manegai na tinompa ni Debata? Unang ma nian adong be jolma na so marningot pinsangpinsang ni Debata di angka na patuduhon gogona laho manegai pangisi ni portibi on ala huaso ni Debata maminsang dohot mangorai dohot mangambati tahi ni parjahat. Alani tapauliuli ma na tinompa ni Tuhan i, ala i do parsuruan ni Debata tu hita. Molo uli portibi on, uli ma nang ngolunta. Taingot ma hata ni Eric Weiner na mandok: ‘Ketika pohon terakhir ditebang, ketika sungai terakhir dikosongkan, ketika ikan terakhir ditangkap, barulah manusia akan menyadari bahwa dia tidak dapat memakan uang’.