Khotbah Roma 1: 16-17 Injil yang Membaharui

 Minggu 22 Set. Trinitatis; 31 Oktober 2021

1:16 Sebab aku mempunyai keyakinan yang kokoh dalam Injil, karena Injil adalah kekuatan Allah yang menyelamatkan setiap orang yang percaya, pertama-tama orang Yahudi, tetapi juga orang Yunani.

1:17 Sebab di dalamnya nyata kebenaran Allah, yang bertolak dari iman dan memimpin kepada iman, seperti ada tertulis: "Orang benar akan hidup oleh iman."

Di bagasan minggu XXII dung Trinitatis sadari on laos gabe ari parningotan Gerakan Reformasi Gereja. Ari nabalga do Ari Reformasi na pinatupa ni Dr. Martin Luther di ari 31 Oktober 1517 na salpu. 504 taon naung salpu mulai ma gerakan reformasi Gereja marhite na tinempelhon ni Dr. Martin Luther 95 Dalil Reformasi di pintu ni gareja Wittenberg-Jerman. Dalil-dalil i marisihon pernyataan-pernyataan taringot songon dia gareja asa mulak tu hatigoran hombar tu hata ni Debata songon na tarsurat di Buku na Badia. Dipatupa ibana reformasi manang haimbaruon ni huria, marhite na patingkoshon ngolu haporseaon. Tangkas do di pangajarionna dipaboa na holan Jesus Kristus do Sipalua ima na holan asi ni roha ni Debata do haluaon (sola gratia), holan haporseaon do dalan manjalo haluaon (sola fide), jala holan hata ni Debata do na manindangi haluaon (sola scriptura), jala bahen hasangapon ni Debata do haluaon i (Solideo Gloria). Ngolu na paimbaruhon do ngolu ni angka na porsea. Ia haimbaruon ima mulak tu Debata, mulak tu asi ni roha ni Debata.

Marsitutu do Apostel Paulus mamaritahon Barita Nauli tu saluhut inganan na boi didalani ibana. Nang pe torop angka na mangalo ibana di ulaon marbarita nauli, sai marsihohot do ibana manghatindanghon hasintongan ni barita nauli na binaritahonna i. Marpos ni roha situtu do ibana di hasintongan ni barita nauli, ala barita haluaon do i, na paluahon ganup na porsea di Tuhan Jesus. Gok huasoNa do barita nauli i, jala ido dalan ni Debata di laho paluahon saluhut na manghaporseai hataNa. Asa barita nauli, barita haluaon i, ima Kristus naung mate ala ni dosanta. Kristus do haluaon i, laos Ibana do hagogoon ni Debata paluahon na porsea. Kristus do barita nauli i, hagogoon ni Debata na paluahon jolma, manesa dosa ni jolma, paimbaruhon ngolu ni jolma. Jala dalan mandapot haluaon i, ima haporseaon. Ia haporseaon na marlapatan do i mangoloi Debata, unduk tu Debata, satia tu Debata. Asa molo didok porsea tu Tuhan Jesus na marlapatan do i mangihuthon Tuhan Jesus, gabe siseanNa, mangulahon na nidokNa, jala unduk tu hataNa. Jala haporseaon i ima dalan bongot tu angka sihirimon na sian Debata. Haporseaon tu Tuhan Jesus na marlapatan do i manjalo hangoluan na pinatupa ni Jesus, naung mate ala ni dosanta jala naung hehe di ari patoluhon bahen haheheon ni jolma sian na mate asa dipabongot hita tu hangoluan na so ra suda.

Di bagasan barita nauli i nunga patar hatigoran ni Debata. Ai dipapatar do disi hatigoran ni Debata, na sian haporseaon tu haporseaon, ai na manongtong do haporseaon i sian najolo sahat ro di nuaeng nang tu angka tingki na naeng ro, gabe dalan manjalo hatigoran. Haporseaon i panjaloon na hibul do i di hata ni Debata dohot di saluhut pambahenanNa, marpangoloion tu Debata di saluhut na tinonahonNa. Haporseaon i do hapataran ni parsaoran ni jolma dohot Debata. Jesus Kristus do dipadiri Debata bahen habangsa parasian marhite sian haporseaon di mudarNa asa dipapatar Debata disi hatigoranNa. Hatigoran ni Debata marasing do dohot hatigoran ni jolma. Ia hatigoran ni jolma ima:”garar utangmu hombar tu utangmu”. Molo mardosa ho, garar hombar tu dosa na niulahonmu. Alai anggo hatigoran ni Debata ima dibolus mataNa angka dosa i (Rom 3:25), disalpuhon, dilupahon jala disesa dosa ni jolma i. Dungi digarar Ibana utang ni dosa ni jolma i marhite mudarNa na durus i. Ima dalan ni Debata mamintori angka na porsea gabe halak partigor. Asa partigor i, digoari halak partigor ndada alani hatauonna mangulahon patik, alai ala nuang dipatupa Tuhan Jesus do hatigoran i jala dipintori Tuhan Jesus angka na porsea i.

Nunga dipintori Debata hita angka na marhaporseaon di Tuhan Jesus. Ima hagogoon ni Barita Nauli i. Ndang be manggarar utang dosa hita jolma marhite pambahenan na mangulahon patik, alai marhite haporseaon dohot pangoloion di Tuhan Jesus i do. Nunga dibolushon Debata dosanta marhite lambas ni roha dohot asi ni rohaNa (Sola Gratia). Asa asi ni roha ni Debata sambing do umbahen malua hita sian dosa dohot hamatean, marhite mudarNa i. Asa mangolu hita naung dipintori Debata binahen ni haporseaonta. Barita Nauli, ima Kristus naung mate ala ni dosanta, ido paimbaruhon ngolu ni jolma i, malua sian dosa dohot hamatean asa bongot tu hangoluan na so ra suda. Nunga ingkon mate hian jolma i ala ni dosa pangalaosionna di patik ni Debata, alai marhite asi ni roha ni Debata ditobus jolma i sian huaso ni dosa. Hagogoon ni Debata do Barita Nauli i, paluahon hita jolma, alani i ingkon taingot ia malua pe hita ndada ala ni hagogoonta manang ala ni haburjuonta mangulahon angka patik, alai tung hagogoon ni Debata dibagasan Barita Nauli.

Alani haluaon na pinatupa ni Tuhan Jesus manjadi haimbaruon di jolma i. Haporseaon manjalo hasesaan ni dosa naung pinatupa ni Tuhan Jesus, ido dalan ni Debata mamintori hita. Jala nunga mansai tangkas, ia Barita Nauli ima “Nunga mate Kristus ala ni dosanta”, hagogoon ni Debata do i paluahon hita na porsea dohot na paimbaruhon haporseaonta di Debata. Antong: marsihohot ma hita mian di Barita Nauli, manjangkon hasesaan ni dosa, saor tu haporsuhonNa, sapangalaho di hamateanNa, sapangalaho nang di haheheonNa. Nunga dipintori Debata hita marhite asi ni rohaNa di bagasan mudarNa i, hot ma hita marhaporseaon disi ai na mangolu do partigor hinorhon ni haporseaonna. Mangolu ma hita di haporseaonta, mangihuthon Tuhan Jesus i, unduk tu hataNa jala tongtong satia mangulahon na nidokNa. Di bagasan partingkian sisaonari on, olo do mago haporseaon ni jolma. Jala pangalapaton taringot tu hadirion ni huria pe jotjot lam dao sian hasintongan na tarsurat di Buku na Badia. Alani i tung mansai denggan mulak hita tongtong tu dasor, manang songon istilah Back to Bible (Kembali ke Aliktab) songon na pinapatar ni turpuk jamita on. Tung tahamauliatehon ma silehonlehon ni Debata na umbalga jala na ummarga i. Dia do silehonlehon ni Debata na umbalga jala na ummarga? Tontu, ndang arta, ndang huaso, ndang hasangapon, ndang popularitas, alai Barita na Uli, barita hasesaan ni dosanta, haluaon dohot hangoluan na salelenglelengna tu ganup na porsea.