Khotbah Ulangan 24: 17-18 Hidup Rukun dengan Sesama

 Minggu 21 Set. Trinitatis; 24 Oktober 2021

24:17 Janganlah engkau memperkosa hak orang asing dan anak yatim; juga janganlah engkau mengambil pakaian seorang janda menjadi gadai.

24:18 Haruslah kauingat, bahwa engkau pun dahulu budak di Mesir dan engkau ditebus TUHAN, Allahmu, dari sana; itulah sebabnya aku memerintahkan engkau melakukan hal ini.

Manghaholongi Debata sian nasa roha, sian nasa ateate dohot sian nasa gogo (Ul. 6: 5), i do patik na tung tangkas dipasahat Debata tu bangso na pinaluaNa sian parhatobanan Misir. Ummarga do i sian sude uhum dohot aturan na adong di bangso ni Debata. Hataridaan ni pangulahonon nasida di holong ni roha tu angka dongan jolma, na patar tarida di pambahenan. Ndang holan di hata manang di roha, alai ingkon tarida marhite pambahenan. Ala nunga jumolo Debata patuduhon holong ni rohaNa tu nasida nang uju di pardalanan marhite na mangalehon manna dohot lote. Dunghon i molo mardalan nasida arian tarida ombun mardalan di borngin i tarida dila ni api na marsinondang. Sian i taida ma tung holan asi dohot holong ni roha ni Debata do na jinalo nasida. Suang songon i do nang di partingkianta sinuaeng on, dijou do hita asa tangkas patuduhon holong ni roha i. Ala Debata sandiri nunga jumolo manghaholongi hita, pola dilehon AnakNa na sasadai tu hita, i ma Jesus Kristus. Alani dalanta mandok mauliate di panobusion ni Debata siulahononta i ma holong ni roha tu saluhut halak. Ndang boi dohononta: holan tu Debata ma holong rohangku, anggo dongan jolma ndang pola ringkot. Ndang boi songon i, ingkon dohot ma manghaholongi dongan jolma. Dongan jolma lapatanna ndang holan na tinanda, sahuria, samarga, sahoum. Dongan jolma i ma sude rumang ni halak na ingkon haholonganta, tarlumobi angka na ringkot siurupan.

Tongon do nuaeng si Musa dohot bangso Israel marsaro di adaran ni Moab, martopihon batang aek Jordan, tondong ni Jeriko (5 Mus. 1:5). Dison ma si Musa mangujungi angka panghataionna tu saluhut bangso Israel, andorang so borhat bangso i manaripari batang aek Jordan laho bongot tu tano na pinarbagabaga i, i ma Tano Kanaan. Tontu dung sahat nasida tu tano Kanaan, boi do masa parasingan di parngoluan siganup ari, adong na gabe halak na mora adong muse do halak na pogos, boi do muse gabe adong perbedaan status sosial, jala ingkon tagamon adong do halak dagang na maringanan raphon nasida di tano Kanaan. Alani do di turpuk tangkas dipaingot si Musa nasida asa tongtong manghaholongi dongan jolma. Hurang lobi opat ratus taon lelengna bangso Israel di parhatoban halak Misir. Dimulana i dung sahat nasida di Misir hira bangso na terhormat do nasida, alai dung mate si Josep jala dung marganti generasi ni raja Parao, mangae ma nasida ala pambahenan na mansai koras menindas bangso i. Debata do na paluahon nasida sian parhatobanon i. Ndang mampu hian nasida laho mangalo raja Parao dohot angka paranganna. I do na niondolhononna di ayat 18: “ingkon paingotingoton ni roham”. Pandohan “ingkon” patuduhon sada bentuk kewajiban na ingkon diulahon salelengna. Ingkon tongtong suan jala mangolu dibagasan rohanasida nasa pambahenan ni Debata na paluahon nasida sian Misir jala ingkon baritahononnasida do i secara turun temurun. Asa marhite i gabe adong panandaion diri na hatoban manang halak dagang do nasida najolo di Misir na manaon na hansit siang angka na marhuaso. Asa dung sahat nasida di tano na pinarbaga ni Debata unang ma nian diulahon nasida songon na binahen ni halak Misir. Alani do pandohan parpudi di ayat 18 “alani do umbahen hudokhon ho mangulahon si songon i” laho mangondolhon songon dia na tama nasida patuduhon hataridaan ni pangoloion tu Debata. Angka dia ma i na ingkon ulahonon ni bangso i dung sahat di tano Kanaan?

Parjolo, ndang jadi papeol uhum tu halak dagang. Ise ma na nidokna halak dagang? I ma angka jolma na ro sian duru ni halak Israel di hatiha i. Angka jolma naung maringanan hian di dapot nasida di tano Kanaan, dohot angka bangso na marlao ro tu luat nasida. Naeng ma sintong uhum tu nasida. Unang ala halak na asing manang ala so samarga dohot nasida gabe peol uhum tu nasida. Manang marlomolomo. Uhum ingkon gabe hataridaan ni holong ni roha tu dongan. Uhum unang laho mangalului pangomoan tu dirina sandiri. Alai ingkon tangkas paluahon halak dagang. Somalna halak dagang sai marsigantung do tu penduduk asli, na mian di luat i. Gariada gabe dongan sabangso nasida ma i dirajumi. Ingkon las do roha molo tamba dongan. Didok halak Batak: “dongan do hatotogar” lapatanna molo godang donganta boi do i gabe manambai semangat di hita. Unang manamba alo manang musu alai ingkon manambai dongan.

Paduahon mangondihon angka dakdanak na so marama. On do sada na naeng ulahonon nasida. Boasa ndang dohot na so marina? Ala uhum di tongatonga ni bangso Israel, ama do na masuk etongan manang bilangan ni parbangsoon. Molo disi ama i, dietong ma hot parbangsoonna. Sipata pis do mata marnida angka na so marama di hatiha i, i do umbahen diondolhon tu angka na so marama. On ma angka dakdanak na so adong pangalualuanna ia so holan pangurupion ni angka na marholong ni roha. Manarihon angka dakdanak marlapatan paturehon generasi nasida tu tingki na aneng ro. Molo so radot laho paulihon ngolu ni dakdanak tagamon ma terancam masa depan ni parbangsoon. Ai ndang adong jolma na migor magodang, alai sian dakdanak do. Uju metmet do hau i boi sihorsihoran, molo dung balga rumpak do i, ninna di umpasa ni halak Batak. Martudutudu do pandoha i asa manarihon angka dakdanak, sian na metmet do nasida ajaranta, anggo dung balga mangalo nama i.

Patoluhon, ndang jadi buatonmu ulos ni parompuan na mabalu bahen singkoram (jaminan). Di tongatonga ni bangso Israel adong do tradisi manggadehon ulosna manogot jala manobus botari asa adong hepeng pangkeonna. Marhite na manggadehon ulos na i arian, nunga boi pangkeonna hepeng i gabe modal mangalului ngolu. Dingolu parbangsoon ni halak Israel di turpuk on, angka na mabalu dohot angka na sopot so marama marsigantung tu halak na marasi roha do i. Jadi asa boi nasida mangolu tontu ingkon siurupan do nasida, i do umbahen didok unang mambuat ulos ni na mabalu bahen singkoram (jaminan). Ala ibana sandiri na ma na manarihon angka ianakhonna, ingkon tangkas do nasida diurupi tanpa mambuat ulosna songon jaminan. Ingkon ungkap do huria marnida angka na mabalu di tongatonga nasida. Nian marasing do na masa tu na mabalu di turpuk on dohot na masa di tingki nuaeng. Ndang boi tarpatudos i. Alai na naeng dohonon, ingkon ungka simalolongta mangurupi angka na mabalu na mangharingkothon pangurupion sian hita.

Alani ndang jadi leas roha marnida angka na pogos, na lea, na gale, na dangol, na martihas, na anturaparon dohot lang angka na asing. Siurupanta do nasida songon hataridaan ni holong ni rohanta na sian Debata. Aha ma na boi sibahenonta tu nasida dalan patuduhon holong ni roha, tapatupa ma i.