Khotbah Lukas 4: 14 - 21 Yesus Penggenapan Firman Allah

 Khotbah 3 Set. Epiphanias; 23 Januari 2022

4:14 Dalam kuasa Roh kembalilah Yesus ke Galilea. Dan tersiarlah kabar tentang Dia di seluruh daerah itu.

4:15 Sementara itu Ia mengajar di rumah-rumah ibadat di situ dan semua orang memuji Dia.

4:16 Ia datang ke Nazaret tempat Ia dibesarkan, dan menurut kebiasaan-Nya pada hari Sabat Ia masuk ke rumah ibadat, lalu berdiri hendak membaca dari Alkitab.

4:17 Kepada-Nya diberikan kitab nabi Yesaya dan setelah dibuka-Nya, Ia menemukan nas, di mana ada tertulis:

4:18 "Roh Tuhan ada pada-Ku, oleh sebab Ia telah mengurapi Aku, untuk menyampaikan kabar baik kepada orang-orang miskin; dan Ia telah mengutus Aku

4:19 untuk memberitakan pembebasan kepada orang-orang tawanan, dan penglihatan bagi orang-orang buta, untuk membebaskan orang-orang yang tertindas, untuk memberitakan tahun rahmat Tuhan telah datang."

4:20 Kemudian Ia menutup kitab itu, memberikannya kembali kepada pejabat, lalu duduk; dan mata semua orang dalam rumah ibadat itu tertuju kepada-Nya.

4:21 Lalu Ia memulai mengajar mereka, kata-Nya: "Pada hari ini genaplah nas ini sewaktu kamu mendengarnya."

Dungkon mulak sian dolok na niunjunan ni sibolis i do Jesus dipaborhat Tondi i muse tu Galilea. On ma partingkian na parjolo Ibana mangajari di bagas joro (Sinagoge). Didok sar ma baritaNa tu sude liat na humaliang, ala ni pangajarionNa na luar biasa, ujungna sude mamujimujisa (ayt.14-15). Sian i borhat ma Ibana muse tu Nazaret huta hagodanganNa i. Jumpa ari Sabat, hombar tu hasomalan na masa laho do Ibana tu Sinagoge inganan parguruan i, dipasahat ma tu Ibana pustaha panurirang Jesaya, jala dipatudu Tondi i ma jahaonNa Jesaya 61:1-2. Impola pangajarion ni Tuhan Jesus di turpuktaon ima bagabaga na tarsurat di Jesaya 61 na tongon dijaha Tuhan Jesus nunga jumpang di diri ni Tuha Jesus. I do na digurithon di ayat 21 huhut na gabe topik ni minggu di hita. Jesus do hagogok ni hata ni Debata na disuriranghon di Jesaya 61. Antong tauhal ma angka dia ma na digohi Jesus hombar tu Lukas 4: 18 – 21 na gabe bohal ni partondionta di partingkian saonari.

Parjolo, barita na uli tu angka na pogos (ay. 18-19). Nunga sian na robi disurirangkon paboa Debata berpihak tu angka na pgos. Ulaon ni naposo ni Debata ima mamboan Barita na Uli tu angka pogos. Panurirang Amos tarbarita do songon panurirang na pajongjong uhum dohot hatigorang (Amos 5: 24), na manulak pangarupaon tu halak na pogos (Amos 2: 6-7; 5: 11-12; 8: 4-6). Ndada holan panurirang, dohot do pangajarion habisuhon pe mangondolhon panarihonon tu na pogos na jumpang di buku Poda (14: 31; 17: 15; 19: 17; 22: 16). Nang pe songon i, ndang singkop dope jumpang panarihonon tu na pogos di ngolu si ganup ari. I do umbahen di ondolhon Tuhan Jesus paboa sude naung disurathon taringot tu panarihonon (keberpihakan) tu halak na pogos, singkop ma i jumpang di diriNa. Haroro ni Jesus tu portibi on ima mamboan barita na uli tu na pogos. Na pogos di turpukta on termasuk do na di ayat 19, ima na tarhurung, na mapitung, nang na ginosagosa. Tangkas didok Jesus Ibana hagogok ni natarsurat ondeng. Ala ulaula ni Debata do hita dibagasan Jesus, parsidohot ma huria secara organisasi nang halak Kristen marsadasada mamboan barita na uli tu na pogos. Di angka paradongan dohot na berjabatan, tapangke ma na adong di hita nang jabatan na di hita laho pahinsathon ngolu ni na pogos paluahon na ginosagosa. So tung tapangke arta nang huaso na di hita laho manggosa na pogos dohot angka na so margellok.

Tu hita angka horong na “pogos” unang mandele, unang manarita. Molo tung pe ndang apala singkop pamarenta nang huria manarihon hita, alai taingot ma ianggo Debata berpihak do tu hita. Tuhan Jesus nunga ro mamboan barita na uli tu angka na pogos. Tangkas tajaha jala taguruhon songon na di Padan na Imbaru i maraleale jala berpihak tu na pogos do Tuhan Jesus, jala sahat do i tu partingkian sisaonari. Tatangianghon ma asa marsitutu pamarenta nang huria laho mamboan barita na uli na pogos, alai molo so haru singkop pe, ndang pola manarita hita. Taingot ma paboa Tuhan Jesus do donganta, raphon hita do Ibana berjuang mangalehon hangoluan na dumenggan di hita. Molo ndang ditanda portibi on hita, alai ianggo Jesus tangkas do ditanda hita. Mangula do Ibana marhite ragam cara na taantusi dohot na so taantusi. Na pasti, Tuhan Jesus mamboan barita na uli tu angka na pogos, tu na so mardihadiha, tu na ginosagosa ni portibi on. on ma tatiop jala tahaporseai.

Paduahon, Tondi ni Tuhan na patauhon. Jesaya 61 1 na jinaha ni Tuhan Jesus di parguruan i dibonai do marhite pandohan: “Songgop do tu ahu Tondi ni Tuhan...” Lapatanna, Tondi ni Debata do mangula di diri ni Tuhan Jesus laho mamaritahon barita na uli tu angka na pogos. Laos i do sihangoluhononta di partingkian sisaonari. Ianggo sian hadirion ni jolma i sandiri, ndang tarbahen hita mamboan barita na uli tu na pogos. Ditait hagiot ni daging do hita manarihon holan tu diri, jala disi ma jumpang na manggosagosa halak na pogos. Hagiot ni daging manait hita papunguhon holan tu diri so pola marpanarihon tu dongan. Alani, di hita na manghaporseai Tuhan Jesus do hagogok ni Jesaya 61 on, ingkon rade do hita mansoadahon dirinta, ingkon rade do hita ditogu tondi ni Debata asa unang holan marpanarihon di diri alai dohot marpanarihon di dongan. Tuhan Jesus mate di hau pinarsilang holan laho manobus hita sian hadosaonta, asa mangolu nasa jolma, ndang marpanarihon di diri, baliksa mansoadahon dirina.

Tardidi do hita dibagasan goar ni Debata Ama, Anak dohot Tondi Parbadia. Disi ma tarajumi naung songgop Tondi Parbadia tu hita. Dipungka do ganup parmingguon marhite Votum: “Dibagasan goar ni Debata Ama, AnakNa Tuhan Jesus Kristus dohot Tondi Parbadia, na manompa langit dohot tano on”. Lapatanna, sude do halak Kristen jala sude na marminggu disonggopi Tondi Parbadia. Tajangkon jala taloas ma Tondi ni Debata mangula asa dipatau hita mamaritahon barita na uli tu na pogos. Ndada holan di tonga ni huria, alai dohot do di sude panggulmiton ni ngolunta ingkon siboan barita na uli hita tu angka na pogos. Manang aha pe ulaonta siganup ari, manang tu dia pe hita mangalangka, manang aha pe sidohononta, diurupi Tondi ni Debata ma hita asa marpanarihon tu na pogos.

Songgop do Tu hita Tondi ni Tuhan i, laho mambohali hita mangulahon ulaon na pinasahat ni Debata, tabaritahon ma Barita na uli tu saluhut halak, ai ido tugas ni halak Kristen si ihuthon Jesus, rade manjaha Hata ni Debata na di Bibel i, unang salpu sada ari sian ngolunta dang manjaha hata ni Debata ( Pslm 119). Nunga di todo jala dipillit hita gabe ulaulaNa antong tatuhuk ma ulaon na pinasahat ni Tuhan Jesus tu hita. Gabe Parasi ni Roha ma hamu ala Amamuna Parasi roha do, tabaritahon ma Barita na uli tu angka na tarhurung, tu namapitung dohot na ginosa gosa, gabe haluaon ma hita tu ganup jolma unang gabe sitambai hamagoanna. Paluahon na marutang unang gabe manambai utangna. Jala unang lomo rohanta mangida donganta marpogos.