Khotbah Yeremia 1: 4 - 10 Dipanggil Untuk Mengasihi

 Minggu 4 Set. Epiphanias; 30 Januari 2022

1:4 Firman TUHAN datang kepadaku, bunyinya:

1:5 "Sebelum Aku membentuk engkau dalam rahim ibumu, Aku telah mengenal engkau, dan sebelum engkau keluar dari kandungan, Aku telah menguduskan engkau, Aku telah menetapkan engkau menjadi nabi bagi bangsa-bangsa."

1:6 Maka aku menjawab: "Ah, Tuhan ALLAH! Sesungguhnya aku tidak pandai berbicara, sebab aku ini masih muda."

1:7 Tetapi TUHAN berfirman kepadaku: "Janganlah katakan: Aku ini masih muda, tetapi kepada siapa pun engkau Kuutus, haruslah engkau pergi, dan apa pun yang Kuperintahkan kepadamu, haruslah kausampaikan.

1:8 Janganlah takut kepada mereka, sebab Aku menyertai engkau untuk melepaskan engkau, demikianlah firman TUHAN."

1:9 Lalu TUHAN mengulurkan tangan-Nya dan menjamah mulutku; TUHAN berfirman kepadaku: "Sesungguhnya, Aku menaruh perkataan-perkataan-Ku ke dalam mulutmu.

1:10 Ketahuilah, pada hari ini Aku mengangkat engkau atas bangsa-bangsa dan atas kerajaan-kerajaan untuk mencabut dan merobohkan, untuk membinasakan dan meruntuhkan, untuk membangun dan menanam."

Ra hea do hita kecewa manang tarhirim dibahen donganta ala tapasahat sada ulaon tu ibana hape ndang diulahon. Panjoraan do i tu ibana na so pasahaton be ulaon tu ibana muse. Songon i ma hita di adopan ni Debata mangaradoti angka ulaon na pinasahatNa tu hita. Jala i ma hataridaan ni holong ni rohanta tu Debata na mangulahon ulaon i. Manang aha pe taho ragam ni ulaon na di hita nuaeng, tontu ulaon na denggan na nidokna, parhatopotonta do i silehonlehon ni Debata. Alani i bahenonta do i patuduhon holong ni rohanta tu Debata dohot tu dongan jolma marhite ulaon i asa marsangap Debata jala las ni roha di na humaliang hita. Alani i di bagasan sude angka ulaonta i, taingot ma dijou Debata do hita laho manghaholongi songon topik ni minggunta. Di turpuk jamita sadarion dijou Debata do panurirang Jeremia laho mangulahon ulaon i. Dimulana i tung manjua do Ibana ala dietong ibana borat ni ulaon i, alai ala naung dilehon Debata jaminan tu ibana gabe ndang manjua be ibana. Joujou na songon i do na sahat tu si Jeremia di tingki hinarajaan ni si Amasia raja Jehuda. Jala rade ibana diparsuruon ni Debata atik pe dimulana i manua do ibana.

 Dia ma jaminan i? Parjolo, tagan so hujadihon dope ho. Jala tagan so ruar dope ho sian ampuan ni natorasmu, nunga huparbadiai hian ho: hupabangkit ho gabe panurirang tu angka bangso. Adong dua hata na mansai arga di jaminan i, ima diparbadiai dohot dipabangkit. Marhite hata na dua paboa ndang guru di jolma hape sintuhu ni panjouon i ala saguru di Debata do. Jolma mangetong hita na lea, pardosa, na so mardihadiha, alai anggo dung dijou Debata ndang adong na boi manundati. Paduahon, unang ho mabiar maradophon nasida, ai sai ahu do donganmu, paluahon ho ninna Jahowa. I do tutu molo Debata donganta ise ma alonta ninna apostel Paulus di Rom 8: 31. Jaminan na songon i do nang na adong di hita dipartingikian on laho mangoloi parsuruon ni Tuhan i. Alani i taulahon ma i. Jala dijou hita asa taulahon angka na pinasahat ni Debata. Sude hita nunga tarjou gabe ulaula ni Debata dibagasan ngolunta on. Alani i unang ma hita marsidalian, ala memang jotjot do jumpang ngolu na marsidalian di hita jolma, jala olo do sidalian i na binahenna sandiri.

Ulaon na borat do mamaritahon barita na uli. Alai sude do hita dijou Tuhanta i laho mamaritahon barita na uli. Joujou i ndada holan tabege alai ingkon do ulahononta ima parsuruon ni Debata na sahat tu hita. Tarjou do hita sude gabe dibaritahon barita na uli songon si Jeremia di turpuk on. Tutu godang do angka hamaolon na tabolus alai didongani Debata do hita mangulahon ulaon i. Molo tangkas hita mangido gogo dohot pangurupion sian Debata. Ndang pasombuonNa hita punjung so mardongan. Alai dipatau jala dipargogoi do hita. Alani i di minggu hapapatar sadari on naeng patar ma idaonta holong ni roha ni Debata na tongtong mandongani hita. Patar ma tongtong tu hita asi ni rohaNa i. I do hagogoon di hita laho mangoloi parsuruon i. Songon panurirang Jeremia na jinou ni Debata gabe naposoNa, dokdok do ulaonna jala tung mansai maol situtu. Dia ma ulaonna i, ima mangaranapi angka bangso dohot harajaon, laho mangurati dohot maniaphon, mangago dohot mangaloha, paulihon dohot manuan.

Dijou Debata do hita asa dohot hita gabe ulaulaNa mamaritahon holong ni roha ni Debata tu ganup bangso na di tano on. panjouonta ndada sian portibi on alai sian Debata sandiri do. Songon i ma angka na mangihuthon Jesus, dijou Jesus angka siseanNa asa laho mamaritahon holong ni roha ni Debata. Tongtong do ingotonta na diparbohali Debata do hita jala diurupi asa tau hita mangulahonsa. Manang songon dia pe dokdok ni ulaon i, ndang dipasombu Debata hita. Jala dipanjouon i naeng tangkas patuduhon holong ni roha tu Debata. Alai ndada holan dipangoloion panjouon i hataridaan ni holong ni roha i. Ingkon sahat do tu na mangulahon panjouon i. Dia mai? I ma mamatitahon barita na uli i tu saluhut halak.

Hea do tasungkunhon dirinta tu aha do Debata manompa hita, tu aha do Debata paluahon hita? Ra adong do na mangalusi: Asa gabe anakhonna hita, jala gabe panean di harajaonNa. Alus na denggan do i. Ra adong do na mangalusi: asa malua hita sian naroko mamongoti surgo hasonangan. Ipe alus na uli do i. Alai, ndada holan i. Ditompa Debata hita, dipauli Debata hita, jala dipillit Debata hita, sasintongna asa pangkeonna do hita mangulahon nasa ulaon na denggan, pasauthon lomo ni rohan, jala olo ditongos manang tudia lomo ni rohana. Tu aha do Debata manompa Jeremia, aha do sangkapna Debata  pauliohon ibana uju dibagasan bortian, uju so tubu dope tu hasiangan on. Alusna, asa pangkeon ni Debata ibana mangulahon, pasauthon lomo ni roha ni Debata, ndang adong na asing. Nunga dipillit Debata hita gabe anakhonna di bagasan Kristus Jesus. Aha do sangkap ni Debata tu hita? Naeng pangkeonna hita gabe ulaulana marhobas, paulihon, pasauthon ulaon ni Debata, lomo ni rohana di portibi on marhite ngolunta siganup ari. Dipillit hita, dipauli hita huhut do dibohali dohot gogo, hatauon, sahala, pangaramotion sahat tu na paluahon tondinta sian hamatean saleleng ni lelengna. Ndada asal na dipillit debata si jeremia ala didok Debata do tu ibana: Huparbadiai ho, hudangani ho, paluangonhu ho, hupasahat hatangku tu pamanganmu.

Hamu angka dongan, mansai singkop bohal na pinasahat ni Debata tu si Jeremia. Laos songoni do bohal naung tajalo dibagasan Kristus. Marpadan do Kristus tu angka na porsea: Sai ramotanhu do ho sahat ro di ajal ni hasiangan on. Toho jolma na gale do si Jeremia, jolma na terbatas do ibana, jolma na gale do hita, tarbatas do gogonta. Alai, didok debata tu si Jeremia, unang dok na bajar dope ahu, unang dok mabiar ahu, manang tudia ho husuru ingkon borhat jala ulahon. Laos hata on do nang tu hita amang inang. Dibagasan Kristus do gabe tubu hagogoon di hita, dibagasan Kristus do gabe marsahala hita, dibagasan Kristus do gabe margogo hata nang pambahenanta, jala dibagasan na pos roha tu Kristus disi di gabe tubu habaranion di hita mangulahon na denggan, mandok na sintong jala manulak nasa na jat. Ingkon dohononta do ala dibagasan Kristus do hita umbahen na tarbahen hita patuduhon holong ta tu donga na dihumaliangta. Porsea ma hita, ndang hurangan hita di na tatumpahi ulaon ni Tuhanta, ndang tarhirim hita molo ias rohanta mangalehon na adong di hita, songon tanda ni holongta, baliksa pasupasuon ni Debata angka halak na girgir pangkeon ni Debata gabe ulaulana patulushon angka ulaon lomo ni rohana.