Khotbah Keluaran 15: 19 - 21 Bernyanyilah bagi Tuhan

 Minggu Kantate; 15 Mei 2022

15:19 Ketika kuda Firaun dengan keretanya dan orangnya yang berkuda telah masuk ke laut, maka TUHAN membuat air laut berbalik meliputi mereka, tetapi orang Israel berjalan di tempat kering dari tengah-tengah laut.

15:20 Lalu Miryam, nabiah itu, saudara perempuan Harun, mengambil rebana di tangannya, dan tampillah semua perempuan mengikutinya memukul rebana serta menari-nari.

15:21 Dan menyanyilah Miryam memimpin mereka: "Menyanyilah bagi TUHAN, sebab Ia tinggi luhur; kuda dan penunggangnya dilemparkan-Nya ke dalam laut."

Minggu Kantate sadari on manjou hita laho mangendehon sada ende na imbaru di Jahowa. Didok pe ende na imbaru ndada ingkon na imbaru disurat manang dikarang, manang na so hea dope diendehon jolma. Ende na imbaru apala na pinangido ni minggu on, i ma na ro sian roha dohot tondi na imbaru. Boi do ende i na imbaru alai ndang sian roha mangendehon, alai boi do ende naung leleng i, molo sian roha na ias, imbaru do endehon manang tangihonon. Ende na imbaru i ro sian pangauhonon di angka na masa jala tangkas panindangion i taringot tu panumpahion ni Jahowa. Asa ende na imbaru i haruar sian pamangan, disuarahon sian roha parbagasan, dipatubegehon sian nasa roha dohot panghilalaan. Lapatanna, ala ganup tingki do taida pambahenan dohot panumpahion ni Jahowa di ngolunta, ende na imbaru pe ingkon ganup tingki do patubegehononta. Hombar tu si ma taida tinuju ni turpuk Evangelium on. Dalan laho padasiphon dohot pasingkophon pangantusion taringot tu tolu ayat on denggan ma dijaha mulai sian ayat na parjolo, ende hamonangan n si Musa rap dohot halak Israel (ay. 1-18).

Turpuk jamita on somal do digoari ende ni si Miryam (ay. 21), na diendehon angka parompuan ni halak Israel hatiha manaripari laut rara. Ende pujian tu Debata na mardomu tu haluaon sian parhatobanon. Debata Jahowa nunga paluahon bangso Israel sian Misir jala i do dasor ni haporseaon ni bangso Israel. Diendehon si Miryam ende i dung taripar halak Israel sian laut rara. Diadu jala dilele parangan ni raja Parao nasida naeng mamboan mulak tu parhatobanon Misir. Asa nunga malua nasida sian hamatean jala ndang diloas Jahowa bangso Israel mago dibahen bangso Misir. Haluaon i do na diendehon nasida songon dalan manghatindanghon hagogoon ni Jahowa. Diendehon do pangurupion ni Jahowa na mambahen hamonangan. Sian on ma taida isi ni ende i, ima panandaon di pambahenan ni Jahowa. Las ni roha bolon dung malua sian pangaleleon i do impola ni ende i. Nunga singkop be malua nasida sian gomgoman ni halak Misir. Ndang tarhahua ni halak Misir be halak Israel. Sude na masa i ndada alani hagogoon nasida manang alani hagaleon ni halak Misir, alai holan ala hagogoon ni Jahowa do na marporang humongkop nasida. Molo diingot nasida ungutungut na pinasahatna tu si Musa na mandok, tagonan mate di tano Misir sian na mate di tonga dalan, ndang tagamon so hibul las ni roha nasida laho mandok mauliate.

Ala memang hatiha i ndang tutu naung marhalambokan roha ni Raja Parao i, dung haruar Bangso Israel sian tano misir,  disuruh Raja i  ma angka naposona laho mangalumba bangso Israel. Pola do diboan nasida 600 hureta ni nasida lengkap dohot sinjatana. Marnida i, mabiar situtu ma bangso Israel. Ala ni biari, dipangkilalaon ni nasida na ingkon mate bangso i di padang gurun, alani i di muruhi nasida ma si Musa, jala didok “ boasa boanon mu hami haluar sian Misir, molo naeng mate do ? Ditangihon Debata do anggukangguk ni bangso Israel i, diramoti Debata do bangso Israel laho mamolus laut na rara. Dipatuduhon Debata do halongangan bolon, marhite na dipatoltol si Musa tanganna tu atas laut, gabe mabaor lauti dibahen Jahowa marhitehite alogo na pur sian purba manipat saborngin pahiang lauti, gabe tolak ma angka aek i, jadi bongot ma halak Israel tu tongatonga ni laut di na mahiangi, jadi hira dorpi angka aeki di siamun dohot di hambirang nasida. Dungi dieahi halak Misiri nasida, jala bongot sian pudinasida, nasa hoda ni parao, angka huretana dohot angka parsihundulna tu tongatonga ni laut, jala didok Jahowa ma tu si Musa asa dipatoltol muse tangnna tu atas laut, asa sumuang aeki lingkup tu halak Misir, tu angka huretana dohot angka parsihundulna. Diulahon si Musa do na nidok ni Jahowa, gabe sumuang ma laut i tu dalanna hian mareak torang ari, dilingkupi ma sude angka hureta nasida dohot angka parsihundul ro di sude angka parangan ni Raja Parao i, jala ndang adong teba sian nasida nanggo sada.

Molo tapahombar tu angka na masa di parngoluanta, ringkot do sungkunonta dirinta be. Hea do tahilala na tung mansai ganjang tangan ni Jahowa mangondihon hita uju mansai gale hita mangadopi parungkilon dohot paraloan? Hea do masa di pardalanan ni ngolunta dibahen Jahowa tanda halongangan tu hita? Molo hea, aha ma dohononta taringot tusi? Nda talup ma nian hita laho mangendehon habalgaon ni Tuhan i? Mangendehon Jahowa boi do ndang holan marhite soara alai marhite uninguningan manang parhinaloan. Si Miryam dohot angka parompuan i marende mardongan odap sada dibagasan tanganna be. Lapatanna sude do nasa na marsoara talup mamuji Jahowa. Tarbarita do halak Batak parende, pola do sahat barita i tu desa naualu. Alai, nuaeng tasungkun ma, dia do gumodang diendehon halak Batak? Ende na masa di parngoluonna isara holso, ungutungut, arsak manang pamujion tu Debata? Molo tapadomu tu goar ni minggu Kantate, naeng tangkas taantusi ende na songon dia do na ingkon endehononta di parngoluonta on?

Parjolo, Kantate marlapatan endehon ma Jahowa jala puji Ibana naung patupa haluaonmu. Sian hadirionta ingkon hatindanghononta do na so adong agia aha na pangoluhon hita ia so holan asi ni roha ni Jahowa. Dilehon di hita hosa hangoluan, gogo laho mangula ulaon na denggan dohot pingkiran laho patupa angka haulion. Gale do nian hita di pardagingon alai ala diondihon hita di hagaleon i tarbahen hita do mandungdung lobi sian na tasangkapi. Nda pambahenan ni Jahowa do i sude? Paduahon, haulion ni ende ndada holan di soara na pinadomu gabe sada koor alai na ro sian pardalanan ni ngolu do. Na marjamita do parende di tonga ni huria molo diendehon sian roha na ias angka ende, ala na umbegesa pe boi mura ditangkup rohana dia lapatan ni angka ende i. Alani i do, manigor ro do soara na so tabo begeon molo sala mangendehon sasahalak di ende naung binotona. Lapatanna, taendehon ma ende i tingkos jala sintong ai dihorhon i do hahisaron ni partondion ni anga na umbegesa. Patoluhon, didok reformator Martin Luther, ngolu ni halak na porsea di huaso ni Jahowa ima ngolu na marende. Pamingkirion ni si Luther i ro sian pangantusionna di buku na badia, ai angka surusuruan ni Debata pe marende do di surgo. Hombar tusi, naeng ma tongtong mangolu parendeon na uli di hita be. Jala na umbalga na binahen ni Jahowa tu hita, iman naung sada hita dohot Debata marhite Kristus, parjambar hita di hangoluan sogot, jala taruli ragam ni pasupasu hita di hasiangan on.

Minggunta sadarion ima minggu Kantate, namarlapatan ma i “Endehon hamu ma di Jahowa ende naimbaru”, jala saurdot do i tu Ojahan ni minggunta sadarion, ima Marende ma hamu di Debata lapatanna taendehon ma ende naimbaru marhite parange naimbaru dohot ngolu na marhaimbaruon. Dijou do hita asa mar-Kantate, ala naung dipatupa Jahowa do angka halongangan dohot angka haimbaruon di ngolunta, jala tarpatalu jala tabolus do angka arsak, parungkilon, dohot angka namanosak ngolu ni haporseaonta.