Khotbah Kisah Para Rasul 9: 36 - 43 Kuasa Tuhan yang Membangkitkan

 Minggu Jubilate; 08 Mei 2022

9:36 Di Yope ada seorang murid perempuan bernama Tabita -- dalam bahasa Yunani Dorkas. Perempuan itu banyak sekali berbuat baik dan memberi sedekah.

9:37 Tetapi pada waktu itu ia sakit lalu meninggal. Dan setelah dimandikan, mayatnya dibaringkan di ruang atas.

9:38 Lida dekat dengan Yope. Ketika murid-murid mendengar, bahwa Petrus ada di Lida, mereka menyuruh dua orang kepadanya dengan permintaan: "Segeralah datang ke tempat kami."

9:39 Maka berkemaslah Petrus dan berangkat bersama-sama dengan mereka. Setelah sampai di sana, ia dibawa ke ruang atas dan semua janda datang berdiri dekatnya dan sambil menangis mereka menunjukkan kepadanya semua baju dan pakaian, yang dibuat Dorkas waktu ia masih hidup.

9:40 Tetapi Petrus menyuruh mereka semua keluar, lalu ia berlutut dan berdoa. Kemudian ia berpaling ke mayat itu dan berkata: "Tabita, bangkitlah!" Lalu Tabita membuka matanya dan ketika melihat Petrus, ia bangun lalu duduk.

9:41 Petrus memegang tangannya dan membantu dia berdiri. Kemudian ia memanggil orang-orang kudus beserta janda-janda, lalu menunjukkan kepada mereka, bahwa perempuan itu hidup.

9:42 Peristiwa itu tersiar di seluruh Yope dan banyak orang menjadi percaya kepada Tuhan.

9:43 Kemudian dari pada itu Petrus tinggal beberapa hari di Yope, di rumah seorang yang bernama Simon, seorang penyamak kulit.

Goar ni Minggunta sadarion Jubilate, na marlapatan “Marolopolop tu Jahowa ma sandok tano on”. Minggu Jubilate ima sada minggu rangkaian Paskah ni halak Kristen. Marhite minggu Jubilate dibaritahon do ulaon ni Jahowa na paluahon bangsona. Hata Jubilate marharoroan sian hata latin, jubilee. Molo di hata Heber didok do Yobel na marlapatan ari palimapuluh taonhon dunghon ari ari haluaon. Molo di halak Israel kuno somal do diulahon ulaon Jobel sahali di limapuluh taonhon. Di na diulahon halak Israel ulaon Jobel on, marningot do nasida angka pambahenan ni Jahowa, Debata na paluahon bangso i sian parhatobanon di tano Misir. Pambahenan ni Jahowa na patuduhon huaso dohot hamuliaonNa na so hatudosan i laho paluahon bangso Israel. Hombar tu goar ni minggunta Jubilate, marolopolop ma tutu hita angka na porsea disude angka pambahenan ni Jahowa ima ulaon halongangan bolon do.

Turpukta sadarion ima pardalanan ni barta na uli di Joppe marhite ulaon ni Apostel Petrus. Dipangolu ibana sahalak parompuan na porsea na margoar Tabita marhite huaso ni Debata, i do umbahen topik ni minggu Jubilate di hita sadarion ima: huaso ni Debata na pangoluhon. Tabita manang di hata Gorik: Dorkas, ima sahalak parompuan na porsea jala tangkas do marparbue haporseaon na di Tuhan Jesus ai sumurung do ibana mangulahon na denggan dohot mambahen asi ni roha (ay. 36). Uju di ngoluna dipauli ibana ulos dohot abit tu angka na mabalu di huta i(ay. 39). Alai marsahit ma si Tabita sahat tu na marujung ngolu. Tung mansai lungun jala marsak situtu do angka na porsea di huta i marningot haburjuon ni si Tabita. Dibege nasida ma di huta Lidda do ianggo apostel Petrus, gabe disuru nasida ma dua halak manopot si Petrus laho mangidohon asa ro si Petrus tu huta nasida. Ndang na jonok huta Lidda sian Joppe (mangihuthon angka na pistar tarhira 15 km ma daona), ingkon mardalan pat do nasida hatihai ala so adong dope kendaraan songon sinuaeng. Jadi, tung mansai dao do nasida holan laho manopot apostel Petrus holan ala ni si Tabita.

Ro do tutu apostel Petrus nang pe nunga diburi jala dipeakhon si Tabita di bilut parginjang. Di ayat 40 tarsurat do: “Alai dipalaho si Petrus ma nasida saluhutna, dung i marsinggang ma ibana martangiang, didompakkon ma bangke i, didok ma: O Tabita, hehe ma ho! Jadi dipabidok ma matana; dung i di na niidana si Petrus i, hundul ma ibana.”  “Marsinggang jala martangiang” ima tanda mangido pangurupion tu Jahowa Debata di bagasan Jesus Kristus. marsinggang jala martangiang ima patuduhon panandaion dohot patuturohon diri tu adopan ni Jahowa, na so margogo dirina sambing patupahon angka tanda halonganan. Marhite tangiang do mangido gogo dohot huaso sian Jahowa di bagasan Jesus Kristus. Marhite tangiang do dijalo si Petrus huaso laho patupahon halongangan i. Ingot ma hita, unang ma dipangasahon gogona dohot pingkiranna laho patupahon ulaon partondion, alai jalo jala pangasahon ma gogo dohot huaso na sian Jahowa, Debata di bagasan Jesus Kristus. Parhitean do hita, parhitean do si Petrus, jala parhitean do angka apostel. Na patupahon haluaon ima Jahowa Debatanta di bagasan Jesus Kristus sambing do. Dung i sar ma barita halongangan na pinatupa ni apostel Petrus marhite huaso ni Tuhan i, diboto saluhut pangisi ni huta Joppe, jadi torop do gabe porsea di Tuhan i. Hot do huaso ni Debata sian Padan na Robi sahat tu Padan na Imbaru, sahat tu partingkian saonari jala sahat ro di saleleng ni lelengna. Debata na tasomba ima Debata pargogo na so hatudosan jala hagogoonNa i dipangke Ibana laho pangoluhon. Alani Debata na tasomba ima Debata na pangoluhon, ndada Debata na pamatehon. I do umbahen nang pe ingkon mate hita sude alani dosanta, alai dipangolu Ibana do hita marhite mudar ni Tuhan Jesus. Ianggo ngolu na di portibi on ingkon salpu do, si Tabita na pinabangkit di turpuk on pe, di sada tingki pasti do marujung ngolu sian portibi on. Na tapeop ima dibalik ni hamatean nunga rade di hita hangoluan saleleng ni lelengna. Dilehon Debata do tu hita hangoluan saonari nang hangoluan sogot.

Alai andorang so sahat hita tu hangoluan saleleng lelengna, ingkon arga do tong di hita ngolu sisaonari. Pasupasu ni Debatado ngolu na tadalani saonari, alani ingkon jamot do hita di ngolunta sisaonari. Molo tung pe godang hamaolon na taadopi, isarana parsahiton, parhepengon na tung masani maol, parsalisian di keluarga, taingot ma adong do Debata mamasumasu hita. Huaso ni Debata na pangoluhon, i do na mangaramoti jala margogoihon hita manghamonanghon saluhutna i. Ndada holan paheheon sian na mate huaso ni Debata alai dohot do mangalehon hangoluan sisaonari. Huaso ni Debata na pangoluhon ima na mandongani jala margogihon hita mangulahon ulaonta siganup ari. Ndang tagamon mandele manang putus asa hita ala tangkas taboto dilinggomi huaso ni Debata na pangoluhon i do hita songon pangalinggomanna di si Tabita.

Di naung mate si Tabita, ndang holan marsak dohot tumatangis angka donganna (ay. 39). Dipatupa nasida do tanda ni holongna marhite na mamuri si Tabita jala mameakhon tu bilut parginjang (ay. 37). Alai ndada holan i, na ummarga ima rade do nasida patupa pardalanan tung mansai dao sian Joppe tu Liddia laho manjumpangi apostel Petrus. Ndang tarsirang haroro ni apostel Petrus tu huta Joppe sian pengorbanan ni dua halak na olo laho manopot si Petrus, jala tontu dibohali angka dongan na asing do nasida nadua. Marsirainan do halongangan na pinatupa ni Debata marhite apostel Petrus tu pardonganon na marsiurupan na pinatuduhon ni angka dongan ni si Tabita. Tahaporseai do na hot huaso ni Debata sian na robi sahat tu saonari. Taongkuhon do songon topik ni minggunta on huaso ni Debata na pangoluhon, alai marhite turpuk sadarion dipaingot do hita, dipangke Debata do angka na porsea gabe ulaulaNa patupahon halongangan. Dipangke Debata do apostel Petrus dohot angka dongan ni si Tabita. Di partingkian saonari dijouhon Debata hita sa gabe ulaula ni Debata patupahon hangoluan. Ingkon rade do hita songon apostel Petrus martangiang jala marsinggang tu hamamalum ni donganta. Ingkon olo ma nian hita dipangke Debata songon angka dongan ni si Tabita na olo berkorban manarihon ngolu ni dongan. Tanda ni angka na porsea, ndang sae holan ringgas marminggu dohot martangiang, alai ingkon rade marpanarihon tu dongan, rade berkorban tu hangoluan ni dongan. Nang si Tabita pe di turpuk on mangulahon na denggan jala marpanarihon do ibana umbahen dipauli ibana ulos dohot abit tu angka na mabalu. Molo masihol hita marnida huaso ni Debata patar di portibi on, rade ma hita gabe parhitean ni Debata, ima gabe halak na marpanarihon, tarlumobi di dongan angka na ringkot siurupan. Di na marsiurupan, masitangiangan, masilehonhan semangat, rap mamparrohahon, disi ma masa halongangan, disi ma patar hangoluan na sian Debata.