Khotbah Lukas 3: 15-17+21-22 Yesus adalah Anak Allah

 Minggu 1 Set. Epihanias; 09 Januari 2022

3:15 Tetapi karena orang banyak sedang menanti dan berharap, dan semuanya bertanya dalam hatinya tentang Yohanes, kalau-kalau ia adalah Mesias,

3:16 Yohanes menjawab dan berkata kepada semua orang itu: "Aku membaptis kamu dengan air, tetapi Ia yang lebih berkuasa dari padaku akan datang dan membuka tali kasut-Nya pun aku tidak layak. Ia akan membaptis kamu dengan Roh Kudus dan dengan api.

3:17 Alat penampi sudah di tangan-Nya untuk membersihkan tempat pengirikan-Nya dan untuk mengumpulkan gandum-Nya ke dalam lumbung-Nya, tetapi debu jerami itu akan dibakar-Nya dalam api yang tidak terpadamkan."

3:21 Ketika seluruh orang banyak itu telah dibaptis dan ketika Yesus juga dibaptis dan sedang berdoa, terbukalah langit

3:22 dan turunlah Roh Kudus dalam rupa burung merpati ke atas-Nya. Dan terdengarlah suara dari langit: "Engkaulah Anak-Ku yang Kukasihi, kepada-Mulah Aku berkenan."

Ia ojahan ni turpukon: Jesus do anak ni Debata. Di Ibana do Hangoluan nang haluaon sian ragam ni parsahiton, haru sian dosa nang hamatean pe nungnga di palua hita. Asa tangi ma hita tu HataNa mangadopi saluhut angka parsorionni ngolu. Si Johannes Pandidi ima anak ni si Zakarias (1:5). Hira-hira marumur 30 taon mulai ma ibana marbarita Nauli, ujui taon pasampululimahon tingki Harajaon ni Kaisar Tiberius. uju Pontius Latus manggomgomi luat Judea, di tingki ni angka raja na opat on: Si Herodes di luat Galilea, si Pilippus, donganna saama, di luat Iturea dohot Trakonitis, si Lisanias di luat Abilene (1:1). Bagak do digombarhon si Lukas situasi politik uju tarjou si Johanes gabe Panurirang. Tingki panjouon nai sada partingkian dohot naung patar muse Tuhan Jesus mangajari di adopan ni halak natorop.

Johannes Pandidi ima sahalak panurirang namarulaon parade haroro ni Mesias si Palua i, tangkas diturpuhon dipabotohon, ndang gabe mangalului sangap ibana tu dirina, ndang madabu ibana tu dosa mambuat sangap tu diri di ulaon pasahat barita Nauli. Alai tangkas do dihatahon ise Jesus. Dipandohanna; andul umbalga/sumangap do naro di pudina ima Mesias Anak ni Debata,  haru mangharhari tali ni sipatuna hurang tama ibana. Mesias ima “Jesus Anak ni Debata” na mandidihon Todi Porbadia dohot api. Asa di Minggu Ephipanias/hapapatar on ingkon patar ma antong tajanghon jala tapangasahon Mesias mangadopi sude namasa di ngolunta.

Nunga tung leleng bangso Israel tarpaima di Mesias najinanjihon ni Jahowa. Alai hira mar 400 taon ma lelengna songon na hohom Debata, ndang adong panurirangon, panuraton buku panurirang pe dang adong. Alai pergolakan politik dohot pangosagosaon ido diadopi bangso i. Jadi bangso ni Debata holan napaima-imahon ma di haroro ni Mesias paluahon nasida. Hatihai ma mullop si Johanes Pandidi: Asing pamboantonna sian angka panurirang naung hea masa. Marjamita di  halongonan Judea, marsoara na gogo mandok Paubahon roha ihut pature dalan ni Tuhan i. Imbulu ni unto do ulos ni si Johannes, hulingkuling do hohosna: Angka sihapor dohot situak ni loba do sipanganonna. Songon na asing/“aneh” ma toho rumangna alai tajom situtu pandohan di jamitana.  (Pat. Matius 3:1-4) Asa diripu bangso i do si Johanes Kristus manang Mesias. Mesias marharoan sian hata Heber: ”Mashiah” lapatanna “yang diurapi”. Di hata Junani hata Mesias dilapati Kristos (Kristus). ima sada gelar ni Jesus. Pandohan Mesias di halak Jahudi ima taringot tu sahalak tokoh “masa depan” nanaeng ro gabe singkat ni Jahowa mamboan haluaon.

1.        Uju dirippu na toropi si Johannes Mesias, ndang gabe “terlena” ibana di pamujian/sanjungani gabe margabus manang gabe ginjang rohana manang paburnang diri. Alai marhite i gabe di patorang ibana hadirionna di bandingkon tu Mesias i:

a.    Gumogo do Jesus Sian ibana. Si Johanes holan sahalak Panurirang do. Nang pe humebat ibana sianangka panurirang na robi (Pat. 7:26). Hape Jesus sahalak Mesias Anak ni Debata.

b.    Johanes mandidihon dohot aek tanda hamubaon ni roha, hape Jesus menurut Johanes mandidihon dohot Tondi Porbadia dohot api. (nang pe di Bibel tai ndang adong Jesus mandidi) Pandidion dibagasan Jesus dohot Tondi napaimbaruhon nang api namamburi tu habadiaon naboi manobus jolma sian dosa dohot hamatean.

c.    Si Johanes ro pasingothon angka pardosa asa paumaba rohana, Tuhan Jesus ro humongkop dohot manesa dosa. Di tanganNa do Anak hunci ni Banua Ginjang. Tuhan Jesus ima Anak ni Debata di Ibana do anak hunci ni Banua Ginjang (Pat. Matius 16:19) Di tanganna do Huaso (Manaring) ise na patut tu Harajaoonna dohot ise naso patut. Naung tardidi jala porsea ima angka nadapot asiniroha tu bagas ni Debata. Naso tardidi jala ndang porsea tutungonna doi ima na dipatudos songon hurangkam dipamasuk  tu api naso ra mintop.

2.        Tardidi Tuhan Jesus dohot namasa di hatihai.

Bahat do sungkun-sungkun di peristiwa on. Siala nii, denggan do sigatanta dia do umbaen dohot Jesus tardidi di pandidion pinatupa ni si Johannes:

a.       Di na didini ni si Johannes Jesus, ndada namandok asa dohot Jesus paubahon roha. Ai so mardosa ibana jala Mesias do Ibana.  Alai marhite i dipatuduhon  Jesus haoloonna laho sumeahon diriNa bahen tabus ni dosa dohot hamatean marhite silang i. Dibaptis (Baptizo= dibonomhon) ima simbol ni hamatean. Haruar sian aek i, ima simbol ni hahehehon-Na sian na mate.

b.      Tardidi Jesus ihut patutuduhon solidaritas tu saluhut jolma, jala laos patuduhon, ia Ibana Debata naung gabe jolma  sarupa songon hita on. Surungna Ibana dang hea mardosa, jala ro Ibana laho manobus dosa ni jolma (Pat. Heber 4:15) . Pandidion ni Jesus ima tudutudu nalaho adopanNa nama silang nang hamatean, ima ulaon napinasahat ni Jahowa naung niuarihon ni angka panurirang (Pat Mat 3;14-15, Luk12:50, Jesaya 53, Heber 2:9)

c.       Di natardidi Jesus jala martangiang Ibana masa ma soara sian Ginjang songon on: “Ho do AnakHu, haholongan i; lomo do rohangKu di Ho.” Mungkap ma langit patuduhon hahomion ni Jahowa tu Jesus. Jesus do Anak-Na na Badia. Dang adong be namangholangi Jesus dohot Jahowa Debata. Dibagasan Ibanama di papatar Harajaon Banua Ginjang. Halak naung marnida Jesus nungnga marnida Surgo, songon nani dokna:… “Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu.” (Joh 14:6)

d.      Jala mijur ma Tondi Porbadia tu atasNa. Namasaon nungnga diuarihon panurirang Jesaya nanidokna: Ida ma * naposongki na hutogu; na hupilliti * hasudungan ni rohangku! Nunga huampehon Tondingku tu ibana… (Jesaya 42:1). Dung martangiang Jesus mijur ma Tondi Porbadia tu Ibana. Tondi I mangalehon Huaso tu Jesus pasauthon rencana ni Debata, ima paluahon portibion.

e.       Pandohan Ho do AnakHu…Somalna diendehon halak Israel di tikki patindangkon/pelantikan ni sahalak raja. Hape dison soara i ro sian Banua ginjang songon proklamasi ni Debata tu portibion, Ia Jesus tutu situtu do Anak ni Debata Jahowa. Mesias naung diuarihon sian najolo (Pat. 2 Petrus 1:17). Ibana do Raja ni Israel naimbaru ima saluhut jolma na porsea tu Ibana naung tidonobusNa marhite mudarNa.

Martoruk ni roha do si Johannes nang pe dipapujipuji natorop. Nuaeng on bahat do angka parbarita nauli gabe holan na paburnang diri di hata nang di Medsos (media sosial). Sai holan patudutudu angka naniulana nang keberhasilanna, jala saluhutnai gabe sai hira holan ala ni gogona, gabe dang be dihaporseai Huaso ni Jahowa di ngoluna, asa dirina nama na gabe tu jolo. Sisean ni Jesus ingkon tetap focus jala konsisten pasahathon Barita Nauli jala  berprinsip: Ianggo Ibana (Jesus), patut lam ganda; lam moru ma anggo ahu! (Johannes 3:30)

Pandidion ni si Johanes ima pandidion hamubaon ni roha. Pandidion ni Tuhan Jesus didok si Johannes: Mandidi tu hamu Tondi dohot api. Pandidion na sinuru ni Jesus/Pandidion napinatupa ni halak Kristen nuaeng ima marhite aek didok:  “didi hamu ma nasida dibagasan goar ni Debata Ama, Anak dohot Tondi Porbadia” (Matius 28:19) Di Rom 6:4 didok :  Antong, naung tartanom do hita rap dohot Ibana marhitehite pandidion i tubagasan hamatean, asa marparange hita di bagasan ngolu na imbaru. Padidion sisongon on mangombarhon pasupasu ni Debata marhite aek i marhite goar ni Sitolusada i, gabe parsidohot natardidi i di hamatean nang haheheon ni Kristus. Di tingki i ma ihut dijangkon natardidi i, hamatean ni Jesus manobus dosanta (Rom 6:11) dohot haheheonNa tu ngolu naimbaru (Kolose 2:12). Di Markus 16:16 didok: Na porsea jala tardidi, dapotan haluaon; alai na so porsea i, hona uhum do!. Haporseaon dohot tardidi, ndang sae holan porsea (marparange denggan, mangulahon holong, jugul martangiang) ingkon do tardidi. Konsekwensina ia sasahalak ndang tardidi hape marujung ngoluna, ndang dohot ibana tu haluaon napinatupa ni Jesus. Ido nanidok ni Jesus di Johanes  3:5 Jadi dialusi Jesus ma: Na tutu situtu do na hudok on di ho: Anggo so tubu jolma sian aek dohot sian Tondi, ndang habongotansa harajaon ni Debata.

Di didihon Tondi dohot api. Namandidi Tuhan Jesus media na binahenna Tondi dohot api. Jadi padidion on holan Jesus do naboi mangulahonsa. Ibana do na boi mangalehon Tondi, ima Tondi Hasintongan, namangajari tu nasa hasintongan (Pat Johanes 16:13). Molo tajangkon jala tahaporseai Jesus parsidohot ma hita di pandidion dibagasan Tondi dohot api.

Halak naung manjangkon Pandidion marhite Goar ni Debata Ama, Anak dohot Tondi Porbadia  naung  parsidohot doi manjangkon silehon-lehon ni Jesus ima hasesaan ni dosa dohot Tondi Porbadia namangurupi dohot mangajari hita manghatindangkon Jesus Anak ni Debata, lumobima di baga-bagaNa ima surgo hasonangan i. (Pat. Ul. Ap 2:38-39) .