Khotbah Lukas 6: 27 - 37 Membalas Kejahatan Dengan Kebaikan

 Minggu Sexagesima; 20 Februari 2022

6:27 "Tetapi kepada kamu, yang mendengarkan Aku, Aku berkata: Kasihilah musuhmu, berbuatlah baik kepada orang yang membenci kamu;

6:28 mintalah berkat bagi orang yang mengutuk kamu; berdoalah bagi orang yang mencaci kamu.

6:29 Barangsiapa menampar pipimu yang satu, berikanlah juga kepadanya pipimu yang lain, dan barangsiapa yang mengambil jubahmu, biarkan juga ia mengambil bajumu.

6:30 Berilah kepada setiap orang yang meminta kepadamu; dan janganlah meminta kembali kepada orang yang mengambil kepunyaanmu.

6:31 Dan sebagaimana kamu kehendaki supaya orang perbuat kepadamu, perbuatlah juga demikian kepada mereka.

6:32 Dan jikalau kamu mengasihi orang yang mengasihi kamu, apakah jasamu? Karena orang-orang berdosa pun mengasihi juga orang-orang yang mengasihi mereka.

6:33 Sebab jikalau kamu berbuat baik kepada orang yang berbuat baik kepada kamu, apakah jasamu? Orang-orang berdosa pun berbuat demikian.

6:34 Dan jikalau kamu meminjamkan sesuatu kepada orang, karena kamu berharap akan menerima sesuatu dari padanya, apakah jasamu? Orang-orang berdosa pun meminjamkan kepada orang-orang berdosa, supaya mereka menerima kembali sama banyak.

6:35 Tetapi kamu, kasihilah musuhmu dan berbuatlah baik kepada mereka dan pinjamkan dengan tidak mengharapkan balasan, maka upahmu akan besar dan kamu akan menjadi anak-anak Allah Yang Mahatinggi, sebab Ia baik terhadap orang-orang yang tidak tahu berterima kasih dan terhadap orang-orang jahat.

6:36 Hendaklah kamu murah hati, sama seperti Bapamu adalah murah hati."

6:37 "Janganlah kamu menghakimi, maka kamu pun tidak akan dihakimi. Dan janganlah kamu menghukum, maka kamu pun tidak akan dihukum; ampunilah dan kamu akan diampuni.

Sada sian jamita pangajarion ni Jesus na tung mansai maol ulahonon, i ma turpuk Evangelium minggu sadari on ala mansai suhar tu pangantusion ni torop jolma; di partingkian ni Jesus nang nuaeng. Songon dia manghaholongi musu dohot mambahen na denggan tu manghosomi hita? Nda dohononta do, molo tahaholongi musu ndang goaron be nasida musu jala molo tabahen na denggan tu na manghosomi hita,so adong be hosom? Alai manat hita, mura do mangulahon i? Ra, sude do hita rap mandok, ndang! Adong do pandohan ni halak Batak songon on, “metmet sihapor lunjung, dijujung do simajujungna". Lapatanna, dang mura mambahen dirinta gabe sitalutalu.

Manghaholongi musu dohot mambahen na denggan tu na manghosomi. Di tongatonga ni halak Jahudi, ndang na imbaru poda manghaholongi musu (3 Musa 19: 18), alai adong do hatandion di jamita ni Jesus. Parenta di Patik ni si Musa i ma na so jadi mamalos na hurang denggan, mangondolhon pambahenan na sarupa songon na masa tu diriniba. Jamita ni Jesus mangondolhon pambahenan na andul suhar tu na jinalo, ai didok, “haholongi hamu ma musumuna!" Manghaholongi dos lapatanna unang baloshon na hurang denggan. Sada na tung mansai arga niotapan ni jamita i, i ma asa unang tubu pangarimason na manghorhon jea dohot mara. Molo so tubu roha holong di ngolu ni jolma, holan angka na roa nama na masa. Asa ia molo didok Jesus,“na denggan ma bahen hamu tu na manghosomi hamu" na manjagahon asa unang masa be parmusuon di parsaoran ni jolma. Lumobi ma tu angka sisean na umbegesa, ai di ayat 22-23 nunga dilumbahon Jesus tu nasida, "martua ma hamu molo dihosomi halak hamu ala ni Anak ni jolma i! Na boi masa do panghosomion tu angka siihuthon Jesus sian tingki ni huria na parjolo i sahat tu nuaeng.

Mamasumasu na mamurai dohot manangianghon namangasupi. Diuduti Jesus do jamita i asa sude sisean rade mamasumasu na mamurai dohot manangianghon na mangasupi. Ndang tagamon so tubu tu bagasan roha, angka sungkunsungkun taringot tu poda on. Boasa songon i dijamitahon Jesus, na so adong be agia aha na boi patupaon ni halak angka na mangihuthon Jesus uju masa angka hamaolon siala haporseaon? Molo tapamanat di angka pangajarion di Padan na Imbaru, taida ma ndada holan Jesus na mamodahon songon i. Apostel Paulus pe di Rom 12:14 didok do,“pasupasu hamu ma angka na paburuburu hamu, pasupasu ma antong, unang burai! Songon i do nang barita pinaboana tu huria Korint taringot parsorion na mansai porsuk siala Barita na uli ni Kristus i (1 Kor. 4 : 11 - 13). Asa marhite angka baritai, taboto ma na tongon mangadopi hamaolon bolon do huria na porjolo i. Alai, nang pe mangadopi ragam parmaraan huria I dipaingot apostel Paulus do angka siihuthon Jesus, ai didok di 1 Kor 14-12. "sapala diringkoti hamu partondion, paulihon huria i, asa adong hasurunganmuna'.

Mamarangehon Holong. Di ayat 27-28 tangkas dipodahon Jesus taringot tu holong jala di ayat 29 - 30 dipatuduhon ma parange taringot tu poda i.Molo tangkas tajaha angka pandohan di ayat 29 - 30 on, taida ma tu ise hata i dipasahat. Hasahatan ni jamita ayat 27 - 28 i ma situan natorop, ai didok, “hamu" alai di ayat 29 - 30 ndang natorop alai nunga tu marsasahalak ala didok “ho". Dua ayat on patuduhon parange ni siihuthon Jesus na tongon mangadopi hasusaan nang hamaolon siala haporseaon. Adong opat siparangehonon jala na opat i mamodahon na so jadi patujoloon parnampunaon nang pe nian tingkos mangihuthon ruhutruhut ni paradaton, patik dohot uhum. Parjolo didok, 'anggo dipastap hurummi', ndada holan hansitna na diae alai nunga dohot hasangapon ni jolma na hona pastap i dileai. Ndang boi baloson gariada ingkon lehonon nang na sambariba; asa duansa do hurum i loason dipastap. Lapatanna ingkon jaloon do lea laho mangihuthon Jesus i. Paduahon, ‘anggo dibuat ulosmu, unang jua nang bajubajum’. Patoluhon, ‘nasa na mangido tu ho, lehon’ jala na Paopathon, ‘unang tunggu halak naung mambuat ugasanmu’. Marhite pandohan na opat on, angka siihuthon Kristus boi do agoan sangap dohot arta. Rade manaon na hansit, manjalo haleaon, nang na agoan arta. Asa unang tarihot jolma tu arta molo naeng rap dohot Jesus ai molo agoan arta hita alani Jesus, sasintong na ndang marisuang i.

Mangulahon Patik Raya. Pandohan di ayat 31 on “Ia i na pinangidomuna, naeng bahenon ni halak tu hamu, i ma bahen hamu tu nasida!” somal tagoari patik raya. Ndang adong jolma na manghirim na roa, hansit, dohot susa. Sai angka na uli, denggan dohot na lehet do dipaima manang ditagam sijaloonna. Asa molo i do tutu na naeng masa sibahenon ni halak, ingkon i do tong bahenon. Ala dijoloani parenta manghaholongi musu dohot mambahen na denggan tu angka na manghosomi, songon i mamasumasu angka na mamurai dohot manangianghon na mangasupi do patik raya on, boi do gabe ummura antusanta tu dia sundung ni jamita i. Dipaadop do angka sisean i tu sitaonon na naeng masa dohot na ingkon masa siala mangihuthon Jesus.

Gabe parasiroha. Di padan na robi nunga tung tangkas dipabotohon taringot tu hadirion ni Jahowa. 2 Musa 34 : 6, mandok, "Jahowa, Jahowa do Debata na talup jala na asi roha, lambat tarrimas, jala godang denggan basana dohot habonaronna", songon i nang di Psalm 86:15;103:8;145:8 mamaritahon Jahowa parasiroha bolon. Hadirion ni Jahowa i do dipangke Jesus laho manosoi angka sisean i asa gabe parasiroha. Molo tapadomu tu ayat 35 na mandok anak ni Natumimbul, ndang adong be sidalian nasida so mangihuthon pambahenan ni Debata. Ala anak ni Natumimbul do nasida, ingkon ulahononnasida do na niula ni Debata. Jamita i do nang na dipasahat apostel Paulus tu huria Rom na mandok asa unang sarombang dohot portibi on (Rom 12:1-2). Disosoi si Paulus do nang ruas ni huria Korint uju dipabotohon haporsuhon tinaonna ala ni Kristus i. Impola ni jamita parpudi sian turpuk jamita Evangelium on taida di ayat 37 na mandok, na so jadi manguhumuhumi dohot manorui, alai ingkon paluahon. Taringot tu aha do tahe parenta i na mangorai asa unang manguhumuhumi? Ndada tu sude pangulaon ni jolma pandohan i isara mamintori manang manjua pambahenan ni jolma alai taringot tu harohaon ni jolma. Unang ma adong jolma mambahen pamintorion manang panguhumion tu dongan na so marpanghilalaan asa unang mantat dosa jala gabe so dietong dirina naung marsala. Tahirim do hinauli ni ngolu sibolusonta tu angka tingki na mangihut. Taingot ma, haru na denggan taula, boi do na so denggan masa tu dirinta. Alani, manongtong ma hita mangulahon na denggan tu saluhut halak. Molo pe adong tarajumi di humaliangta songon musu, naeng boi hita manghaholongi nasida.