Khotbah Markus 1: 16 - 20 Menjadi Pengikut Yesus

 Minggu 5 Set. Epiphanias; 06 Februari 2022

1:16 Ketika Yesus sedang berjalan menyusur danau Galilea, Ia melihat Simon dan Andreas, saudara Simon. Mereka sedang menebarkan jala di danau, sebab mereka penjala ikan.

1:17 Yesus berkata kepada mereka: "Mari, ikutlah Aku dan kamu akan Kujadikan penjala manusia."

1:18 Lalu mereka pun segera meninggalkan jalanya dan mengikuti Dia.

1:19 Dan setelah Yesus meneruskan perjalanan-Nya sedikit lagi, dilihat-Nya Yakobus, anak Zebedeus, dan Yohanes, saudaranya, sedang membereskan jala di dalam perahu.

1:20 Yesus segera memanggil mereka dan mereka meninggalkan ayahnya, Zebedeus, di dalam perahu bersama orang-orang upahannya lalu mengikuti Dia.

Turpuk ni jamita di minggunta sadarion i ma bagian panghobasion ni Jesus na parjolo di Galilea (1:14-6:44). Turpuk on ndang tarsirang sian ulaon ni si Johannes Pandidi. Boasa? Ai dung tardidi Jesus, ndang sadia leleng dihurungkon ma si Johannes (ayat 14), dung i ro ma Jesus tu luat Galilea manjamitahon Barita na Uli ni Debata. Dung dipature si Johannes Pandidi dalan ni Jesus, dibaritahon Jesus ma hamubaon ni roha tu na torop (ayat 15). Na marlapatan, naso haotapan ni portibi on angka dalan ulaon parbaritaannauli i. Dung ditangkup si Johannes Pandidi jala tarhurung, manigor ro do na gumogo jala marhuaso manguduti ulaon i, i ma Tuhan Jesus.

Sopot di bona ni barita na Uli na sinurathon si Markus, dipabotohon taringot tu panjouon ni siseanNa na mangihuthon Tuhan Jesus. Adong dua na saama na margoar Simon dohot Andreas nasida anak ni si Jonas. Tongon nasida manjala dengke di tao, ai parjala do nasida. Dung i adong ma muse dua nari na saama, i ma si Jakobus dohot si Johannes, anak ni si Zebedeus. Nasida pe tong do parjala na tongon patureturehon jala nasida di bagasan parau. Asa nasida na opat: Simon, Andreas, Jakobus dohot Johannes mangula songon parjala dengke. Dijou Jesus do nasida sian ulaon nasida i, jala naeng bahenonna ma nasida gabe sijala jolma. Didok Tuhan Jesus tu nasida: "Ihuthon hamu ma Ahu; bahenonHu do hamu sijala jolma. Ditadinghon nasida do amanasida dohot angka anak gajianna laho mangihuthon Tuhan Jesus.

Dung sun Jesus mamodai natorop i, disuru Jesus ma si Petrus mangalugai parau na i tu na umbagas asa disampakhon muse jala nasida i. Alai didok si Petrus ma "Guru, manipat saborngin on do huhalojahon hami, so adong dapot, alai mangasahon hataMi olo do ahu sumampakhon". Dipasaut nasida ma i, gabe dapot nasida ma dengke mansai godang pola maribak jala i. Dijaou nasida ma donganna si Jakobus dohot si Johannes asa rap nasida mambuat dengke i. Tarhalomong ma si Petrus jala didok ma: "Laho ma Ho sian ahu, Tuhan, ai halak pardosa do ahu", laos disi ma dijou Jesus nasida asa gabe si jala jolma. Jempek do pandohan ni Jesus tu nasida di parjumpangan i, ai didok: "Ihuthon hamu ma Ahu". Hatop do dioloi nasida Jesus, ditadinghon nasida ulaon na marjala i jala diihuthon Jesus. Nunga diida nasida huaso ni Jesus diulaonnasida na marjala dengke i. Ditanda nasida do dirina halak pardosa di adopan ni Jesus, alai ala nunga dijou Jesus nasida mangihuthon Ibana, gabe ro ma nasida mangihuthon Ibana. Pangoloion tu Jesus i sambing do umbahen ditadinghon nasida ulaonna na marjala dengke i, ai gabe bahenonna nasida gabe si jala jolma. Torang dipabotohon tarlumobi si Jakobus dohot si Johannes paboa na ditadinghon nasida amana si Sebedeus rap dohot angka anak gajianna. Panjouon ni Jesus di sada halak na naeng jouonNa gabe siseanNa, sian ulaon dohot ngolu nasida siganup ari do dipatupa.

Asa ganup na mangihuthon Jesus, i ma angka naung hibul mamelehon dirina tu Tuhan Jesus. Molo dung mangolu sada halak di ngolu ni Jesus, dipasahat Jesus ma ulaon i tu angka siseanNa gabe sijala jolma. Gabe sijala jolma lapatanna gombaran do i na mandok gabe halak na manogihon jala papunguhon natorop ro tu Tuhan Jesus laho mangihuthon Ibana. Tuhan Jesus sandiri do na mambahen nasida gabe sijala jolma. Marhite parngoluon na manghangoluhon ngolu ni Tuhan Jesus, boi ma nasida manogihon jolma ro tu Tuhan Jesus marhite ngolu nasida nang marhite panindangion nasida. Nasailaonnai, marhite ulaon nasida manjala dengke, torop jolma dapotan sipanganon. Asa na patupahon sipanganon di natorop rap do ulaon nasida manguduti ngolu siganup ari. Nuaeng ndada holan mangarade sipangon di ngolu siganup ari tu na torop be ulaon nasida, alai manjou natorop i nama asa mangihuthon Tuhan Jesus jala bongot tu hangoluan na pinatupa ni Tuhan Jesus.

Marsaringar do nuaeng nang di tingki on di tongatonganta, soara ni Jesus na mandok: "Ihuthon hamu ma Ahu". Marhite hita angka siseanNa, angka naung porsea di Tuhan Jesus naeng marsaringar joujou tu natorop asa bongot tu hangoluan, jala gabe siihuthon Kristus. Ndada dompak bohi be nuaeng tu hita Jesus i molo naeng manjou hita gabe sisean-Na. Hata-Na nama na gabe sitioponta di na laho mambahen haputusan hita di haradeonta gabe sisean-Na. Tarlumobi di naung patar hadirion dohot huaso-Na di bagasan parngoluonta. Ibana naung manompa hita, mangaramoti hita jala manesa nasa dosanta. Dia do na ummarga di hita nuaeng? Panjouon-Na i do manang angka ragam ni basabasa naung pinasahat-Na tu hita? Tung mansai torop do nuaeng on hita na so rade be maninggalhon ulaonna, tingkina, artana, nang tuturna ala didok asa gabe sisean ni Jesus. Jotjot ma gabe sidalian dibahen, di na didok na i sada ulaon na borat, ala dipangasahon gogo nang pingkiranna sandiri, hape asa unang ibana do na tarpillit. Tung tangkas do ganup hita be ditanda Jahowa. Diboto do roha nang pingkiranta. Diida do haoloon manang panjuaonta. Sadihari pe hita dijou gabe sisean-Na, rade ma hita. Taoloi ma i sian nasa ias ni rohanta. Tarlumobi di tingki adong gogonta, manang haboionta. Unang tatulak asa unang gabe sanga dibahen Jahowa hita martangkang roha songon bangso Israel di turpuk Epistelta (Jesaya 6:9-13). Jala unang gabe rade hita gabe sisean-Na dung magale hita, marsahitsahit hita, manang dung tarunjun hita. Tapasahat ma tu Jahowa bunga na uli jala na hushus i ma dirinta gabe sisean-Na, unang bunga naung malos jala roa.