Khotbah Mazmur 32: 8 - 11 Bersukacita dan Bersorak-sorak di dalam Tuhan

 Minggu Letare; 27 Maret 2022

32:8 Aku hendak mengajar dan menunjukkan kepadamu jalan yang harus kautempuh; Aku hendak memberi nasihat, mata-Ku tertuju kepadamu.

32:9 Janganlah seperti kuda atau bagal yang tidak berakal, yang kegarangannya harus dikendalikan dengan tali les dan kekang, kalau tidak, ia tidak akan mendekati engkau.

32:10 Banyak kesakitan diderita orang fasik, tetapi orang percaya kepada TUHAN dikelilingi-Nya dengan kasih setia.

32:11 Bersukacitalah dalam TUHAN dan bersorak-soraklah, hai orang-orang benar; bersorak-sorailah, hai orang-orang jujur!

Minggu Letare sadari on manjou hita asa tongtong marlas ni roha dibagasan Tuhan i mandalani ngolunta siganup ari. Alani tasungkun ma dirinta be, dia ma las ni rohanta nuaeng? Tontu marragam sasintongna na boi tapajojor taringot tu sibonsiri ni las ni rohata, alai dibagasan Tuhan i do las ni rohanta manang ndang? So tung do holan ala sombu panghilalaanta hape ndang apala songon na diigil jamita on. Ra hansit dope parngoluanta nuaeng, adong do ra sahit na posi diae angka sisolhot jala nang dipandaraman pe maol do dapot na dumenggan. Hoihoi ala haberniton na boi masa do tu ganup na porsea. Alai, panatapan dibagasan haporseaon taringot tu ari sogot na ummuli sian Tuhan i, tontu boi do i patu las ni rohanta. Haporseaon na togu di pangurupion ni Debata i do na mangajari hita mananda dalan ni Debata, nang pe sipata maol jala suhar tu pingkiranta angka pambahenan ni Debata. Songon na nialaman ni raja Daud na manggurithon Psalmen 32 on.

Psalmen 32 on boi do dibagi gabe tolu bagian bolon, i ma: ayat 1-2 Pamuhai; 3-7 tangiang ni parpsalmen tu Jahowa na huhut gabe pangajarion tu angka na umbegesa; 8-11 pangujungi, i ma pangajarion sian Jahowa. Pangajarion i, boi ma taida dibagian turpuk on, i ma Di ayat 8-9 na patuduhon ni padan ni Jahowa dalan sidalanan dohot pangiringiringNa tu angka na marhaposan tu Ibana. Ayat 10 pangajarion asa marhaposan tu Jahowa. Ayat 11 sosososo asa marlas ni roha jala marolopolop.

Dibonai do ayat 8 marhite hata “Huparrohai..” artina, adong do pandonganion dohot pangiringiringon ni Jahowa tu angka na olo umbege pangajarionNa. Pandohan “Huiringiring pe ho dohot pamereng ni matangKu” manggombarhon jaminan pandonganion ni Jahowa. Dihamham pandohan i do na tongtong dipaihutihut Jahowa pardalanan ni ngolu ni angka na olo tumangihon podaNa, ndang hea ditadinghon Debata hita. Marpadan do Jahowa laho patuduhon dalan asa unang lilu angka na porsea di Ibana, rade do Jahowa mandongani hita asa unang marmara hita. Diparrohai Debata do hita taringot tu dalan dia do na laho sidalananta. Asa “unang tung songon hoda hamu, manang songon halode na so marroha, ndang olo dumonok tu ho, nda pinatunduk ni kongkang.” Dilehon do tu jolma i pangantusion dohot tondi alai ndang songon i ianggo tu angka na tinompa na asing. Ndang adong pingkiran ni hoda dohot halode na ingkon jumolo dilinsing asa asa mangoloi manang asa hatop langkana. Sasintongna nia jolma i mangoloi tu Debata ndang alani dipaksa ingkon unduk mangoloi pangajarion ni Jahowa, alai ingkon sian kesadaran dohot ias ni rohanta do haunduhon ni rohanta. Ingkon marbisuk hita mangalangkahon simanjojakta jala tongtong marroha na bisuk mamolus parngoluan natorop angka parjahat asa unang gabe dohot hita mangulahon hajahaton.

Adong do jaminan tu halak na mangoloi podaNa. I ma, pandonganion dohot pangiringiring ni Jahowa tu nasida. Tung na lan pe parniahapan ni parjahat, alai manang ise na marhaposan tu Jahowa, haliangkononna tusi asi ni roha (ay. 10).  Marhite hata “haliang” naeng mandok tu hita ndang adong sada sisi pe sian ngolu ni angka na marhaposan tu Jahowa na so mardongan asi ni roha ni Debata. Pandohan on gabe hagogoon di angka na porsea. Molo tung sipata mabiar hita di pardalanan ni ngolunta ala godang ni mara dohot sipingkirhonon, taingot ma sasintongna dihaliangi asi ni roha ni Jahowa do hita. Umbalga do asi ni roha ni Jahowa sian angka na naeng manusai hita. Gumogo do asi ni roha ni Jahowa sian angka nasa hagogoon ni portibi on.

Molo di ayat 11, disurathon do disi, ingkon marlas ni roha, marolopolop, dohot marende. Olo do ra tubu sungkunsungkun di hita: boha do bahenon marlas ni roha dohot marolopolop di portibi na gok hamaolon on? Turpuk on naeng mangajari dohot mangarahon hita asa tongtong marlas ni roha nang pe gok hamaolon ngolunta, ala tangkad do padan ni Jahowa na tongtong mandongani hita jala dihaliangi do hita marhite asi ni rohaNa. Tung maol pe dalan siboluson, tung godang pe angka hamaolon tarlumobi siala panghorhon ni pandemi covid-19 na so haru tangkas sadihari ujungna. Asa unang bobonosan hita laho mandalani ngolunta on.

Togihonon ni turpuk on do asa tongtong di bagasan las ni roha dohot marolopolop. Ala adong do jaminan na dilehon Jahowa tu halak na manghaporseai, tu halak na olo manangihon podaNa. Ndada holan di toru dohot diginjang pandonganion ni Jahowa tu na tinompaNa. Alai di sude sisi do adong pandonganionNa tu ganup jolma na porsea tu Ibana. Ibana do guru, Ibana do Debata na mangalehon haluaon tu na tinompa. Jala ise na manangihon Ibana, dijamin do masa depan na. alani i ido ingkon tahaporseai Ibana. Molo pe di bagasan hamaolon, di bagasan parungkilon, tarlumobi ma kabar covid19 na muncul muse varion Omicron adong muse ninna deltacron dohot lan angka na asing, boi do gabe lomos do panghilalaanta. Alai  ingkon taingot do, adong do jaminan keselamatan na pinarade ni Jahowa tu hita. Alani i ma ingkon marlas ni roha hita di bagasan pandonganion ni Jahowa jala ingkon tahaporseai do Ibana. Molo tung godang pe mara, marpadan do Jahowa mangiringiring hita asa ndang tahahua ni mara i hita. Nunga digohi Jahowa padanNa marhite hamamate ni Tuhan Jesus na paluahon hita sian musu na jumorbut di portibi on ima dosa dohot hamatean sisalelenglelengna. Jala didok Tuhan Jesus do andorang so manaek Ibana tu banua ginjang, “Sai na dongananKu do hamu ganup ari, rasirasa ro ajal ni hasiangan on (Mat. 28: 20b)”. Ojahan ni las ni rohanta manang olopolopta ndada situasi manang kondisi di humaliang hita manang portibi on ala pandonganion ni Tuhan Jesus do. Alani tongtong ma hita marlas ni roha dibagasan Tuhan i.