Khotbah Roma 10: 8 - 13 Orang yang Berseru Kepada Tuhan akan Diselamatkan

 Minggu Invokavit; 06 Maret 2022

10:8 Tetapi apakah katanya? Ini: "Firman itu dekat kepadamu, yakni di dalam mulutmu dan di dalam hatimu." Itulah firman iman, yang kami beritakan.

10:9 Sebab jika kamu mengaku dengan mulutmu, bahwa Yesus adalah Tuhan, dan percaya dalam hatimu, bahwa Allah telah membangkitkan Dia dari antara orang mati, maka kamu akan diselamatkan.

10:10 Karena dengan hati orang percaya dan dibenarkan, dan dengan mulut orang mengaku dan diselamatkan.

10:11 Karena Kitab Suci berkata: "Barangsiapa yang percaya kepada Dia, tidak akan dipermalukan."

10:12 Sebab tidak ada perbedaan antara orang Yahudi dan orang Yunani. Karena, Allah yang satu itu adalah Tuhan dari semua orang, kaya bagi semua orang yang berseru kepada-Nya.

10:13 Sebab, barangsiapa yang berseru kepada nama Tuhan, akan diselamatkan.

Di doari do minggunta sadarion Invocavit na marlapatan “Jounna ma Ahu, jadi alusanHu ma ibana (Psalmen 91: 15). Pandohan on manungguli rohanta rade do Debata mangurupu hita, ala olo hita manjou goarNa, jala tapasahat sude holoso dohot angka hahuranganta tu Ibana dibagasan haporseaoan, rade do Tuhan i mangalusi joujou na dibagasan haporseaon. Ai gok do asi ni roha ni Debata sipasahatonNa tu ganup na olo manjou goarNa dibagasan haporseaon. Ndang alani pambahenanta umbahen na malua hita jolma. Pardosa do hita, jala hinorhon ni dosa i godang angka hamaolon dohot ragam ni hasusaan tu bu di ngolunta. Alai nunga tangkas didok: "Na mangolu do partigor i hinorhon ni haporseaonna" (Rom 1: 17). Marulahulak do i dihatahon mamungka sian buku Padan na Robi, sahat tu Padan na Imbaru di bagasan pangajarion ni Jesus nang di bagasan pangajarion ni angka apostel, suang songon i nang marhite angka jamita na tabege nasailaon. Nunga dipaboa i tu hita, dihatahon, diajarhon, ditonahon, diondolhon marulahulak. Alani do umbahen na didok: "Talpe do di ho hata i di bagasan pamanganmu dohot di bagasan roham do"(ay.8). Asa sasintongna ndang na maol be nian taantusi i. Holan marhite haporseaon do hita dipintori jala dapotan haluaon. Molo songon i boi do gabe tubu sungkunsungkun di torop halak na mandok, “berarti ndang apala ringkot be mangulahon na denggan manang mangulahon patik i?” Ringkot do, jala ingkon ulahononta do angka ulaon na denggan songon parbue ni haporseaonta songon tanda naung tutu hita porsea di Kristus Jesus.

Marhite turpuk jamita on dapot hita do sada parsiajaran na arga taringot tu haporseaon, ima marhite hata "pamangan" dohot "roha", pola di tolu ayat rap disurathon hata on (ay.8,9.10). Masirainrainan do na dua hata on jala ringkot situtu laho patorangon. Mangauhon jala papatarhon haporseaon i di bagasan ngolunta. Haporseaon i ndang na simo manang so boi idaon, alai marhapataran do i di ngolunta marhite pamangan dohot rohanta. Di bagasan rohanta do tahaporseai Tuhan Jesus jala marhite pamanganta do taparhatopat Ibana. Marsirainrainan do i jala molo disirang na dua i boi do gabe lipe, ndang sintong be haporseaon i. Antong tasulingkit ma jolo hatana dua on.

Na parjolo, haporseaon i marmula sian roha do, tubu jala suan di bagasan roha, ima roha parbagasan. Molo ndang tubu jala suan di bagasan roha, boi do pangalahonta gabe songon halak pangansi. Marhite pangantusion dohot panatapan na bagas boi do taboto ngolu partondion ni sasahalak manang haporseaonna ndada holan marhapataran marhite ruhut parduru. Ruhutruhut parduru di ngolunta i ndang boi holan i gabe ojahan laho patuduhon manang papatarhon haporseaonta. Ai boi do idaon sasahalak songon na suman marpahean, lambok hata dohot rupana, songon na hormat, tama ma idaon songon sahalak partigor jala partondi huria, hape gabe tarhirim do hita manang lobi sian i gabe maoto tahilala ala panamun manang pargabus do ibana. Jala molo tapamanat di pardalanan ni ngolunta on nunga godang masa si songon i. Alani boi do gabe lipe hataridaan ni haporseaon i molo ndang marharoroan sian roha, ima marhite panandaion na tangkas di rohanta taringot tu Jesus Kristus na tahaporseai. Alani ringkot hita maniru si Maria uju dipasahat surusuruan hata ni Debata tu ibana di Lukas 2: 19 “Ia si Maria, dipeop do hata i sudena jala dipahusorhusor dibagasan rohana”. Songon naung didok: “Talpe do hata i” alani naeng hita mameop hata i, mameop barita taringot tu Jesus na tahaporseai, huhut tapahusorhusor dibagasan rohanta asa lam bagas taantusi  jala tarimangtimangi, asa lam bagas jala togu haporseaon i. Ai tangkas do didok di Rom 10: 17 “Asa sian na tumangihon do ro haporseaon, i panangihon i, sian hata ni Kristus do”. Alani naeng tongtong hita girgir manangihon hataNa jala pahusorhusorhon i dibagasan rohanta asa lam togu haporseaonta.

Na paduahon, ndada holan mameop haporseaon di bagasan roha na ringkot, alai udut tusi ringkot situtu do nang panghatindanghonon marhite pamangan. Molo dung porsea hita tu Tuhan Jesus, ringkot do haporseaon i dihatindanghon marhite pamangan. Panghatindanghonon ido parbue ni haporseaon manang songon tanda na sintong haporseaonta i. Alani naeng saurdot ma haporseaonta dohot panindangionta i Di partingkianta sinuaeng on hira na mura do patupahon panindangion ni haporseaon. Ganup minggu do hita manghatindanghon 3 ponggol hata haporseaonta i. Mura, ndang maol. Boi do denggan jala nunur tahatindanghon i. Alai di inganan na asing manang di partingkian na asing borat situtu do i dipatupa. Alani borat situtu do manghatindanghon haporseaon i marhite pamangan. Alai diulahon Apostel Paulus do i rap dohot angka halak Kristen na satia. Ndada holan hasatiaon na ringkot alai ringkot situtu do nang habaranion jala boi tupa sisongon i ala adong haporseaon na polin di bagasan rohana. Haporseaonta tu Debata i do unok ni parugamoonta dohot parsombaonta tu Debata. Alani i unang ma holan di hata haporseaon i taparhatopot, alai ihut ma nian tapapatar di angka ulaon, pambahenan dohot pangalaho siganup ari.

Alani naeng gabe tiruan ma i di hita di partingkian si nuaeng on, asa lam marsitutu jala margogo hita manghatindanghon haporseaonta i. Dao umborat hamaolon na niadopan ni angka apostel dohot halak Kristen na parjolo i alai tong to barani nasida manghatindanghon Jesus Tuhan Sipalua. Lam hita ma di partingkian si nuaeng on naeng lam girgir ma nian manghatindanghon Ibana na tahaporseai i, marhite pamanganta tarlumobi marhite ngolunta na tau pasangap goarNa na badia. Naeng lam marsitutu hita manghaporseai lbana di rohanta dohot manghatindanghon Ibana marhite pamanganta, asa dipatau hita manjanghon haluaon naung diparade Tuhan i di hita. Asa jumpang ma pangantusion na sintong na mandok “marhuaso do haporseaon  molo tahangoluhon”.