Khotbah Yesaya 52: 13 - 15 Hamba Tuhan yang Menderita

 Jumat Agung; 15 April 2022

52:13 Sesungguhnya, hamba-Ku akan berhasil, ia akan ditinggikan, disanjung dan dimuliakan.

52:14 Seperti banyak orang akan tertegun melihat dia -- begitu buruk rupanya, bukan seperti manusia lagi, dan tampaknya bukan seperti anak manusia lagi --

52:15 demikianlah ia akan membuat tercengang banyak bangsa, raja-raja akan mengatupkan mulutnya melihat dia; sebab apa yang tidak diceritakan kepada mereka akan mereka lihat, dan apa yang tidak mereka dengar akan mereka pahami.

Ala sitaonon na mandondoni ngolu ni namarungkil, sai lulululu do ibana di pangurupion. Molo tarhurung manang tertindas sada halak sai luluanna do na boi paluahon ibana sian hagogoon ni halak na menindas i. Tudos tusi ma pargoluan ni bangso Juda di habuangan Babel. Ala parungkilan na niadopan nasida lao nasida mangido pangurupion tu portibion. Di lului haluaon nasida sian hagogoon ni portibi on, lam holang ma nasida sian Jahowa. Parir jala tung mansai porsuk do ngolu nasida hatiha i. Hira so adong dalan haluaon manang pangurupion na boi sihirimon. Ndang talup nasida mangalo bangso Babel na gogo i. Alai ro ma Tuhan i mangapuli nasida. Dilehon ma bagabaga haluaon tu nasida. Disuru Tuhan i ma naposoNa paluahon nasida jala mamboan mulak nasida.

Tontu barita las ni roha do i di bangso Israel ala nunga marujung parungkilonna. Ai malua ma nasida sian habuangan i jala mulak ma nasida tu tano na pinarbaga ni Debata. Alai laos huhut do tarhalomong nasida ala maol siat tu roha nasida hatorangan na pinasahat ni panurirang Jesaya taringot tu hadirion ni naposo ni Debata na disuru paluahon nasida. “Ai simbur do ibana tubu songon tumbur di adopan ni bohina, jala songon tunas sian tano na mahiang. Ndang adong hinauli ni rupana manang hamuliaonna; ia huida hami ibana, ndang adong rupana umbahen sihalomohononhon ibana (Jesaya 53: 2)”. Maol siat tu roha nasida hatorangan i. Ai dihirim nasida do Mesias Sipalua i, na gogo, na sangap, na marmulia jala na gok huasona. Hape andul do na ro i di rohanasida. Boha do nasida manghirim haluaon marhite gombaran si songon i? So tung ma gabe tarhirim nasida.

Di turpuk on diatorang do taringot tu hatimbulon dohot hametmeton ni naposo ni Debata. Sasintongna saihot do Jesaya 52: 13-15 on dohot Jesaya 53 laho patoranghon naposo ni Debata. Alai agak marasing do turpuk on on patoranghon hadirion ni naposo ni Debata ala dipungka marhite hata panimpuli, i ma parbue ni ulaonna. Ai tangkas do didok: “Ida ma, pistar do pambahen ni naposongku; tarhinsat do ibana jala dipatimbo, gabe timbul situtu sogot (ay. 13)”. I ma na naeng masa tu naposo ni Debata di ujungna. Alai andorang so masa i, andorang so tarhinsat jala dipatimbo ibana, andorang so patar hatimbulonna, nunga jumolo ditaon ibana parsorion bolon, ganda situtu parniahapan na sahat tu ibana.

Di bagasan turpuk jamita on ndang apa nunur dipatorang saluhut parniahapanna i. Alai boi do bagas taantusi i molo tajaha Jesaya 53. Molo di turpuk jamita on dipatorang do, pola songgot roha ni torop halak mida ibana, binahen ni hinaroa ni rupana dibahen tandina sian jolma hian. Boasa didok tarsonggot ? Boi do ala ndang hea dope diida nasida jolma na mangae parsorion songon i posa. Dileai, dipasiding jolma do ibana, mangae parpardangolan dohot sahit, tartullang, mabugang, dipasipal dohot lan na asing dope dipatorang disi taringot tu parsorion bolon na sahat tu ibana. Alai boi do nasida tarsonggot, ndada holan alani parniahapan na borat i alai tarlumobi ala maol siat tu rohanasida na ingkon songon i ma masa tu sahalak na targoar naposo ni Debata. Nda marhuasa do Debata jala sun timbul do hagogoonNa? Antong boasa ma ingkon songoni masa tu naposo ni Debata? Dihirin nasida do naposo ni Debata i na marhagogoon situtu, asa talup manaluhon bangso Babel na gogo i. Hape na ro on andul do sian na dipingkiri roha nasida.

Alai tutu ma hatani Tuhan i “Ai songon timbo ni ngka langit sian tano on, songon i do tumimbo angka dalanKu sian dalan muna i, jala angka pingkiranKu sian pingkiran muna i” (Jesaya 55:9). Laos gabe tarsonggot do muse nasida, gariada angka raja pe gabe hohom do ndang boi be manghuling. Ala masa ma na so hea dibege nasida, masa angka na maol siat tu pingkiran nang rohanasida. Ala marhite haleaon dohot hapariron ni naposoNa i do hape dipangke Debata dalan laho paluahon bangsoNa. Jala diujungna dipatimbul Debata do ibana. Ima na ingkon masa tu nposo ni Debata songon na disuriranghon Panurirang Jesaya tu bangso Israel. Jala ima na masa tu Jesus Kristus, Mesias na ro tu portibi on laho paluahon jolma manisia. Marhite parningotan di ari hamamate ni Tuhan Jesus sadari on tangkas do tapaingotingot saluhut parniapanan na niae ni Tuhan Jesus laho manghophop hita jolma. Dipilit ibana do dalan haleaon. Olo do ibana gabe metmet jala manaon haporsuhan godang holan laho manobus hita sian dosa dohot hamatean i.

Alai udut tusi laos diungguli do nang rohanta asa lam porsea hita tu Ibana. Ai nunga monang Ibana, nunga ditaluhon hamatean dohot sibolis i. Ndang hamatean ujungna, alai haheheonNa do. Tangkas do i dipatorang di turpuk on: “Tarhinsat do Ibana jala dipatimbo, gabe timbul situtu sogot”. hatimbulonNa i do na gabe panimpuli. Alani ndang adong be sidalianta sumurut manghaporseai Ibana. Disaluhut na masa di ngolunta, tarlumobi diparsorion na taadopi, tongtong marhaposan ma hita tu Ibana, ai tuk do huasoNa laho mangurupi jala paluahon hita. Nang pe sipata angka na masa di ngolunta i maol tapingkiri jala suhar di rohanta, alai unang sumurut rohanta manghaporseai Ibana, unang tatadinghon Ibana, unang tatundalhon Ibana. Ingkon pos do rohanta, ragam do dalan dibahen jala dipatupa Ibana laho mangasii hita. Ai taboti di, saluhut manumpak tu na denggan di angka na marholong roha di Debata, angka na jinouNa sian tahiNa hian (Rom 8: 28).