Khotbah Yesaya 55: 10 - 13 Firman Tuhan Sumber Kekuatan Untuk Melakukan PekerjaanNya

 Minggu Estomihi; 27 Februari 2022

55:10 Sebab seperti hujan dan salju turun dari langit dan tidak kembali ke situ, melainkan mengairi bumi, membuatnya subur dan menumbuhkan tumbuh-tumbuhan, memberikan benih kepada penabur dan roti kepada orang yang mau makan,

55:11 demikianlah firman-Ku yang keluar dari mulut-Ku: ia tidak akan kembali kepada-Ku dengan sia-sia, tetapi ia akan melaksanakan apa yang Kukehendaki, dan akan berhasil dalam apa yang Kusuruhkan kepadanya.

55:12 Sungguh, kamu akan berangkat dengan sukacita dan akan dihantarkan dengan damai; gunung-gunung serta bukit-bukit akan bergembira dan bersorak-sorai di depanmu, dan segala pohon-pohonan di padang akan bertepuk tangan.

55:13 Sebagai ganti semak duri akan tumbuh pohon sanobar, dan sebagai ganti kecubung akan tumbuh pohon murad, dan itu akan terjadi sebagai kemasyhuran bagi TUHAN, sebagai tanda abadi yang tidak akan lenyap.

Olo do jut roha molo sai adong dongan rupani na mandok hatana manang janjina tu hita hape ndang ditepati. Holan hata, manang asal ma haruar hata i sian pamanganna. Huroha ala so martuhor hata i. Ndang mararga be nanidokna. Gariada tahe ndang diingot aha naung hea pinandokna tu donganna. Ndang palobihu ra molo tadok angka jolma sisongon on ma naginoaranna angka jolma pargabus atehe. Alai anggo Debata tung so hea do margabus tu hita, aha nanidokNa dohot nahinatahonNa lumobi najinanjihonNa tu hita. Ingkon masa do i jala jaloonta do parbue ni hata naung hinatahonNa tu hita di buku na badia i. Ido umbahen dijou Debata angka naposoNa pasahathon hasisintong ni hata ni Debata. Songon panurirang di turpuk on laho pasahathon dohot mangatahon hata ni Debata tu bangso Israel napinillitNa i. Mamungka sian panjouon na sahat tu si Abraham sahat tu na tarbuang jala mulak muse bangso i tu Jerusalem. Sai tongtong do marsaringar hata ni Debata tu bangso i. Jala parbue ni hata i dipasaut Debata tu bagasan ngolu nasida. Diramoti, didongani,disarihon sipanganon di bangso i mamolus parhorsihon i. Jouju sisongon i do nanaeng dohonon ni jamita sadarion tu hita. Asa pos rohanta di hata ni Debata. Ido umbahen topik ni jamita on: ndang mulak boti hata ni Debata.

Parjolo, ia hata ni Debata ima holong dohot hasatiaon ni Debata tu hita. Ai songon hadadabu ni udan dohot ambolas sian langit, jala ndada mulak boti tusi, nda jolo dibornohi tano i jala dipagabe, asa martamburi, jala dilehon tu halak panabur dohot roti tu halak na manganhon. Paduahon, hata ni Debata gabe poda dohot sipaingot tu angka naumbegesa, panduan kehidupan mangeahi ngolu na denggan. Lapatanna ingkon ulahononton do hata i. Ima manghaporseai Debata dohot mian di bagasan panghirimon. Nuaeng sahat ma barita on tu hita saluhutna asa taparrohahon jala tatangihon huhut taulahon asa unang mulak boti hata ni Debata. Molo dihatahon natuatua hatana tu hita hape ndang taulahon ra hurang suman do. Alai molo tatiop jala taoloi hata ni natuatua i, gabe pasupasu do i di hita. Lobi sian i do dipangido Debata tu hita asa molo taradoti hataNa las ma rohaNa. Ido umbahen didok di turpuk on: “Unang mago boti. Ndang mulak boti tu Ahu, ingkon bahenonna do lomo ni rohangKu,jala manjadi tu na Hutongos.”

Patoluhon, padan asi ni roha dohot bagabaga na tu hita. Didok di turpuk on, ai ingkon dibagasan las ni roha hamu borhat, jala dibagasan hadameon hamu pataruon. Ingkon saut do nasida bungkas sian habuangan i, holan paima tingki nama. Alani i porlu pangaradeon dohot hasabaron, unang mandele, unang mamurai dohot manundalhonDebata. Paima tingki ni Tuhan i masa. Ala masa ma hatuaon ni Debata tu angka napinillitNa i bungkas nasida sian parhatobanan songon na hea masa tu ompu nasida di huta Misir. Nang pe di habuangan bangso i unang gabe mandele nasida alai naeng tongtong mangaradoti hata ni Debata. Ia hata ni Debata na hot do i. Hata ni Debata ima padan hasatiaonNa tu saluhut hita. Hamu angka dongan nahinaholongan, di ganup partingkian ma naeng marsaringar hata ni Debata tu hita. Ido nidok ni Martin Luther: hata ni Debata gabe (sola scripture) di ngolunta. Ido umbahen didok ibana back to the Bible-mulak tu hata ni Debata. Jala Apostel Paulus mandok hata ni Debata hasea mamodai dohot maminsang hita (2 Tim 3:16-17).

Aha do na naeng peoponta sian hata ni Debata? I ma holong ni roha ni Debata na so hea maninggalhon hita na manghaporseai Ibana. Manang didia pe hita ingkon marhite hata ni Debata. Tutu godang do hamaolon na masa di ngolunta. Ingkon boi do hita mian dibagasan hata ni Debata. Hata ni Debata na gabe sulusulu di ganup sidalananta siganup ari songon nidok ni Parpsalmen: ‘Hatami do sulusulu ni pathu jala hatiuron di dalanku’ (Psalmen, 119: 105). Ala ndang hea Debata maninggalhon hita, ingkon tangkas jumpang di hita panghirimon na mangolu. Tadalani ma ngolunta siganup ari mardonganhon haporseaon tu Debata. Ingkon dibagasan pos ni roha do hita laho mangadopi nasa parngoluon on. Unang hita mandele jala unang pabiarhu ala Debata do mandongani hita. I do asa didok di ayat 12: ‘Ai ingkon dibagasan las ni roha hamu borhat, jala dibagasan hadameon hamu pataruon........’. Hata on dipasahat tu bangso na naeng mulak sian habuangan i. Ndang piga leleng na i hasasaut hata ni Debata tu bangsoNa i. Alani porlu di nasida hasabaron paimahon pangurupion ni Debata. Jala hata on sahat ma tu hita nuaeng. Asa tongtong mian hita dibagasan haporseaon dohot panghirimon nang pe nuaeng taadopi dope hamaolon alani panghorhon ni Pandemi Covid-19, na so haru tangkas andigan marujung pandemi on. On ma hata pangapulion dohot panghirimon na pinasahat ni Debata marhite panurirang i: “Singkat ni tadatada tubu ma sampinur, jala singkat ni latong tubu ma bunga na hushus, i ma bahen barita di goar ni Jahowa, bahen tanda salelenglelengna”. Lapatanna jumpang ma muse di nasida las ni roha singkat ni angka haberniton na tahilala nasailaon.

Alai ndang boi dohononta, molo dung porsea tu Debata ndang adong be hamaolon dohot angka na hansit. Tu sude jolma do boi masa hamaolon, parungkilon. Alai hita halak na porsea ingkon tongtong marpangunsandeantu Debata Jahowa asa unang gabe mandele hita. On do na sai tongtong didok Jesus tu angka siseanNa dohot angka siihuthon Ibana. Ido umbahen dipahombar Evangelium on tu turpuk Epistel taringot umpama ni Tuhan Jesus taringot tu panabur. Didok Jesus adong manang piga ragam ni boni na sinaburhon ni panabur di bonina. Boi ma tapatangkas tu turpuk epistelta i. Lapatanna nanaeng sidohononna ima tu hinaarga ni hata ni Debata. Ido umbahen didok Jesus:“Martua ma na umbege hata ni Debata jala naumpeopsa”. Nunga sahat hita nuaeng tu minggu-minggu pasion,pangaradeonta manomunomu parningotan Hamamate dohot Haheheon ni Tuhan Jesus. Dipaingot ma hita tu pandonganion dohot pangaramotion ni Debata. Laos hombar do goar ni minggunta sadarion, ima Minggu Estomihi lapatanna sai ho ma ale Tuhan gabe partanobatoanku (Psalmen 31:3.b).