Khotbah Ibrani 5: 7 - 10 Yesus Pokok Keselamatan yang Abadi

 Khotbah Jumat Agung, 07 April 2023

5:7 Dalam hidup-Nya sebagai manusia, Ia telah mempersembahkan doa dan permohonan dengan ratap tangis dan keluhan kepada Dia, yang sanggup menyelamatkan-Nya dari maut, dan karena kesalehan-Nya Ia telah didengarkan.

5:8 Dan sekalipun Ia adalah Anak, Ia telah belajar menjadi taat dari apa yang telah diderita-Nya,

5:9 dan sesudah Ia mencapai kesempurnaan-Nya, Ia menjadi pokok keselamatan yang abadi bagi semua orang yang taat kepada-Nya,

5:10 dan Ia dipanggil menjadi Imam Besar oleh Allah, menurut peraturan Melkisedek.

Di ari parningotan Hamamate ni Tuhan Jesus sadarion, tama do marlas ni roha hita. Molo tapatupa parningotan sadarion, ndang na naeng tangis manang tariluilu hita. Na marlas ni roha do hita ala marhite hamamate ni Tuhan Jesus di hau pinarsilang gabe taruli hita di hangoluan na salelengleleng na. Jadi tingkos do digoari on “ Pesta Parningotan Hamamate ni Tuhan Jesus”. Di hata Indonesia didok “Jumat Agung”, Agung itu adalah mulia dan besar. Alani sadarion ima hari yang besar dan mulia. Molo di hata Inggris didok “Good Friday” manang ari Jumat na denggan. Tung na denggan ma tutu na masa di ari Jumat, ari hamamate ni Tuhan Jesus i. Ai marhite hamamateNa gabe malua hita. Jala somal do si ari Parningotan hamamate ni Tuhan Jesus dipatupa Ulaon na hohom, dijaha barita sitaonon ni Tuhan Jesus asa marhite i lam tapanghilalahon balga ni holong ni Tuhan Jesus manghophop hita pardosa on, pola ro Debata tu portibi on marrumanghon jolma, laho mamangkulingi jolma pardosa na di portibi on.

Jotjot jala ragam na jolo pambahenan ni Debata mamangkulingi jolma i, isarana marhite angka panurirang, alai ndang diantusi bangso Israel, alani ingkon Debata sandiri nama na ro gabe jolma asa diantusi jolma i asa unang mago nasida, baliksa asa malua. Diuji panurat ni surat Heber on do papatarhon hadirion ni Jesus marhite dalan na ummura antusan ni halak Kristen Jahudi, i ma marhite mangondolhon ulaon hamalimon ni Tuhan Jesus. Alani ma diondolhon di turpuk on hadurion ni Jesus songon malim na sintong. Dipatudos ulaon ni Tuhan Jesus tu ulaon ni malim na pasahathon pelean pardengganan ni halak Jahudi di bagas joro. Marhite pandohan “tagan jolma Ibana” (ay. 7), tangkas ma taantusi na Debata do Jesus Kristus, alai di sada partingkian ro tu portibi on dibagasan daging songon na hinatindanghon di Evangelium Johannes 1: 14 “gabe daging ma Hata i jala maringan di tongatonga ni hita on”. Hataridaan ni Jesus na tutu gabe jolma tangkas dipatorang di ayat 7b, “dipelehon do angka pangidoanta dohot elekelekNa, mardongan angguk bolon dohot iluilu tu na tuk paluahon Ibana sian hamatean...” Angguk bolon dohot iluilu patuduhon na tutu do jolma Jesus Kristus, manghilala do Ibana songon hita jolma alani dokdok na niae ni Ibana andorang so diparsilangkon. Songon jolma situtu Jesus, diae Ibana do angka na niae ni jolma, sahat tu parniahapan na umparir. Diantusi jala diae Ibana do sude parniahapan ni jolma. Songon birubiru na gabe pelean pardengganan di Padan na Robi, songon i ma Jesus gabe pelean pardengganan ni jolma tu Debata. Ibana ma singka ni jolma mangae uhum na sasintongna tuhuhon ni hita jolma pardosa on.

Tangkas do dipatorang di turpuk on hinabernit dohot hamamate ni Tuhan Jesus ima laho mangalehon haluaon sisalelenglelengna tu hita jolma. Haluaon salelenglelengna diharingkothon jolma ala sasintongna jambar ni jolma i ma hamatean na salelenglelengna do hinorhon ni dosa ni si Adam, huhut alani dosa na taula di ngolunta (pat. Rom 6: 23). Alai ndang pulut roha ni Debata tu jolma na tinompaNa i tu hamatean na salelenglelengna alani ma ro Ibana tu portibi on marrumanghon jolma songon na tarsurat di ayat 9, “jala dung rimpas gabe sihorhon haluaon salelenglelengna do Ibana di sude na mangoloi Ibana”. Nunga be rade haluaon salelenglelengna dibagasan Tuhan Jesus, alai adong sipamanatonta dipangunjungi ni ayat 9 i, ima pandohan “disude na mangoloi Ibana”. Lapatanna, dipangido do sian angka jolma na tinobusNa asa gabe pangoloi tu Ibana. Tutu rade do haluaon i tu sude jolma so mardia imbar, houm, bangso, nang status ekonomi, sosial dohot politik. Alai hombar tu turpuk on dipangido sian hita pangoloion tu Tuhan Jesus Sipalua i. Jala nunga jumolo diula Tuhan Jesus i songon na tarsurat di ayat 8, “Ai atik pe Anak i Ibana, diguruhon do pangoloion marhite sian na tinaonanNa i!” Na unduk do Jesus diparsuruon ni Ama i, pangoloi do Ibana pola mate tarsilang jala marsiak bagi holan laho patulushon haluaon salelenglelengna i. Nuaeng dipangido ma tu hita songon pangoloion ni Jesus tu Debata Ama, songon i ma pangoloionta tu Ibana.

Ganup sitaonon na binolus ni Jesus, dibahen do i gabe parsiajaran manang pengalaman na arga laho patorashon pangoloionNa tu Debata Ama. Ndang talu Ibana dibahen pangunjunan i, alai dihamonanghon do pangunjunan i ala pangoloionNa tu Debata. Alani boi dohonon  na marsora do Debata tu hita marhite angka na masa, laho manguji haunduhonta dohot pangoloionta di Ibana. Sude ragam ni parungkilon, tudos do i tu ujian laho patuduhon kualitas ni pangoloionta tu Debata. Ndang holan disitaonon, nang di las ni roha pe, dipangke Debata do i gabe soaraNa laho manguji pangoloionta. Molo masa pe na paet, unang ittor manarita hita, alai benget ma hita disitaonon i, unang biahaton hita, alai hohom (tenang) ma hita martangiang songon Tuhan Jesus na martangiang di taman Getsemani (songon slogan ni ujian di sikkola: harap tenang, ada ujian!). Molo benget do hita mangantusi angka na paet i, gabe parsiajaran na arga do i laho patorashon pangoloionta tu Debata. Alani ndang sude na paet i utahonon, ai boi do i gabe ubat, jala ndang sude na tonggi i bonduton, ai boi do i gabe sahit. Habengetonta, i do na gabe jamita tu angka na asing, asa benget nasida disitaononna. Habengetonta disitaonon, na gabe panindangionta do i tu na asing, asa marpanghirimon nasida di pangurupion ni Tuhan i. Diarahon jamita on do hita asa tu Jesus hita ro molo manaon sitaonon, ala diantusi Ibana do i sitaononta i, ala nunga hea Tuhan i gabe jolma jala holan Ibana do na boi mangondihon hita di sitaononta. Antong pos ma rohanta, Jesus do bona dohot mual ni haluaonta di sude parungkilonta.