Khotbah Kolose 3: 1 - 4 Dibangkitkan Bersama Kristus

 Khotbah Minggu Paskah I; 09 April 2023

3:1 Karena itu, kalau kamu dibangkitkan bersama dengan Kristus, carilah perkara yang di atas, di mana Kristus ada, duduk di sebelah kanan Allah.

3:2 Pikirkanlah perkara yang di atas, bukan yang di bumi.

3:3 Sebab kamu telah mati dan hidupmu tersembunyi bersama dengan Kristus di dalam Allah.

3:4 Apabila Kristus, yang adalah hidup kita, menyatakan diri kelak, kamu pun akan menyatakan diri bersama dengan Dia dalam kemuliaan.

Jotjot do masa diskusi ditongatonga ni halak Kristen mandok dia do sabotulna perayaan na umbalga Hari Natal manang Paskah. Alani gabe ragam do alusna. Adong mandok NATAL adong Mandok PASKAH. Ala adong do na tubu, umbahen adong namate, jala ala adong do namate gabe adong na mangolu (hehe). Alai manang na diapei saluhutna marharoroan sian Debata do ima na laho patupahon haluaon ni jolma sian dosa dohot hamatean. Di jamita paskah na tapestahon diombason, Apostel Paulus patolhashon tu saluhut huria Kolosse, ianggo haheheon ni Kristus sada pesta las ni roha bolon doi, pesta hamonangan ni Kristus maralohon hamatean jala marhitei hita naung tardidi dapotan haluaqon ni angka na porsea. Di Roma 6:3-4 di dok ala naung tardidi hita, nunga dohot hita mate, tartanom jala di pahehe di bagasan Kristusi. Turpuk jamitaon, sada perikop do dohot pasal 2:4-3:4, (sian Ensikolpedi Alkitab masa kini), Apostel Paulus paingothon huria i unang tarboan mangulahon angka poda haliluon (ajaran Palsu).  Nungga hehe Kristus, nungga talu hamatean, antong songon dia do huria pataridahon dibagasan ngoluna naung dipahehe jala mangolu dibagasan Kristus?:

Dijou asa mamparrohahon na di ginjang (ay. 1-2), marhite pandohan on, boi do gabe tubu sungkunsungkun dibagasan rohanta, ai di portibi on dope hita, boha do bahenonta ndang mamingkiri dohot manjalahi na di portibi on? antong tatinggalhon ma portibi on asa unang be tajalahi na di portibi on? Turpuk on ndang na mandok asa tatinggalhon portibi on asa sude hita mate saonari. Ndang i na naeng dohonon ni turpuk on. tutu di portibi on dope hita mangolu, alai sasintongna nunga marsada hita dohot Kristus marhite hamamateNa dohot haheheonNa (songon naung dipatorang dipamuhai ni jamita on). manjalahi angja na di ginjang termasuk manghalomohon dia do lomo ni roha ni Debata na ingkon taulahon di ngolu siganup ari. Manjalahi na di ginjang mangaradoti manang manghasiholi parsaoran na rosu/akrab dohot Debata marhite haporseaon, holong nang panghirimon dibagasan las ni roha na sian ginjang. Molo didok mamparrohahon na di ginjang na marlapatan naeng ma sude na tahasiholi dohot na tajalahi hombar tu lomo ni roha ni Kristus. Ndang be angka na sian portibi on tahasiholi. Jala boasa diarahon hita mamparrohahon na di ginjang? Ala di ujung ni ngolunta ndang portibi on inganan ni angka na porsea di Kristus, alai dibanua ginjang raphon Kristus, ai di banua ginjang do ingananta na manongtong naung pinarade ni Kristus asa rap hita dohot Ibana.

Ngolu di bagasan Kristus (ay. 3). Ditonahon do tu hita marhite pandohan di ayat 3 on, ia hita naung dihamonangkon sian dosa dohot hamatean nungga sada hita rap dohot Kristus dibagasan Debata. Namarlapatan doi, ingkon sipangoloi ma hita di hata ni Debata. Songon dia Kristus pangoloi jala mangula dibagasan haunduhonNa laos tusi do hita tarjou dibagasan Panjouonna. Ala panghophopon ni Kristus digoari do angka na porsea i, jolma na imbaru, jolma naung mangolu dibagasan Kristus. Ala naung dihophop Kristus ingkon mangolu dibagasan Kristus nama na porsea i. Mangolu dibagasan Kristus, lapatanna sude panggulmiton ni ngoluna ingkon marojahan tu bangko manang lomo ni roha ni Kristus. Ndang sirang be ngolu ni angka na porsea i sian Kristus, dohot sian lomo ni rohaNa. Unang be hita ragu disi, tapatupa ma unang adong be mardebatahon: Gogonta, Pingkiranta, ajaran ni si jolo-jolo tubu namaralo tu hata ni Debata, lumobi tu hagogoon portibi (dang haolon dua uluan); (ndang mungkin dua nahkoda di sada kapal).

Las ni roha sogot (ay. 4). Di partingkianta sinuaeng on tung mansai godang do bisnis namartigatiga “Jaminan” (Ansuransi). Adong jaminan Kesehatan, jaminan Kecelakaan, jaminan masa tua, dohot jaminan hamatean (tung godang ragamna). Sian na Legal sahat tuna bodong malah godang na gabe ansuransi sipaoto-oto. Dimulana tung mansai tabodo begeon program dohot harapan harapan. Bohama asa posroha, parsidohot iba hape dung mardalan, godang do mamboan harugian dohot jut ni roha. Gabe godang jolma tung menolsoli mandohoti ansuransi i. diturpukta aya 4 on, di bahen Kristus  do jaminan, tadok Ansuransi na sintong. Ia angka na mian jala mangolu (namangihon dohot namangulahon) hata i dapotan haluaon ima gabe marsangap ibana dohot Kristus diharajaonna. Boi tadok Halak na dibagasan Kristus I na dapotan haluaon dohot las n iroha do ditingkina langsung sian Ama i. marhite turpuk on naeng hot tatiop hamuliaon na aneng pinasahat ni Debata tu hita diharoroNa di ari paprpudi, tumpal hasonangan ngolu na hot salelengleleng rap dohot Kristus di banua ginjang. Di haroroNa na parpudi pajumpang doo sude angka na porsea dohot Kristus. I do didok di ayat 3b-4, “Jala buni do ngolumuna raphon Kristus dibagasan Debata. Alai ia dung gabe patar sogot Kristus, hangoluanta i, disima gabe patar nang hamu raphon Ibana dibagasan hasangapon”. Boasa dipangke apostel Paulus hata “na buni”, i ma laho patuduhon situasi ni halak Kristen uju i na buni sian portibi on ala ndang olo sarombang dohot portibi on, gabe leas halak marnida halak Kristen di portibi on. gabe didok ma “na buni”, na so diida. Jala uju i mangadopi angka hamaolon, haporsuhon do halak Kristen di huria na parjolo i. Tung porsuk situtu do ngolu ni halak Kristen hatiha i gabe didok apostel Paulus ma “na buni” do ngolumuna raphon Kristus i dibagasan Debata. Ali dung ro Kristus di ari parpudi gabe “patar” ma ngolu ni angka na porsea dohot Kristus. Gabe diungkap Debata ma asa tangkas, asa tarida jala patar angka na porsea di Kristus diida portibi on. I do las ni roha na sumurung na gabe dasor di hita manjalahi na di ginjang. Hamuliaon na naeng dipapatar Debata tu hita, i do na ummarga sian saluhut na adong di hasiangan on. alani i do didok dao ummarga na di ginjang sian angka na adong di portibi on.