Khotbah Yehezkiel 36: 22 - 27 Diperbaharui untuk Hidup Menurut Ketetapan Allah

 Khotbah Minggu Quasimodogeniti; 16 April 2023

36:22 Oleh karena itu katakanlah kepada kaum Israel: Beginilah firman Tuhan ALLAH: Bukan karena kamu Aku bertindak, hai kaum Israel, tetapi karena nama-Ku yang kudus yang kamu najiskan di tengah bangsa-bangsa di mana kamu datang.

36:23 Aku akan menguduskan nama-Ku yang besar yang sudah dinajiskan di tengah bangsa-bangsa, dan yang kamu najiskan di tengah-tengah mereka. Dan bangsa-bangsa akan mengetahui bahwa Akulah TUHAN, demikianlah firman Tuhan ALLAH, manakala Aku menunjukkan kekudusan-Ku kepadamu di hadapan bangsa-bangsa.

36:24 Aku akan menjemput kamu dari antara bangsa-bangsa dan mengumpulkan kamu dari semua negeri dan akan membawa kamu kembali ke tanahmu.

36:25 Aku akan mencurahkan kepadamu air jernih, yang akan mentahirkan kamu; dari segala kenajisanmu dan dari semua berhala-berhalamu Aku akan mentahirkan kamu.

36:26 Kamu akan Kuberikan hati yang baru, dan roh yang baru di dalam batinmu dan Aku akan menjauhkan dari tubuhmu hati yang keras dan Kuberikan kepadamu hati yang taat.

36:27 Roh-Ku akan Kuberikan diam di dalam batinmu dan Aku akan membuat kamu hidup menurut segala ketetapan-Ku dan tetap berpegang pada peraturan-peraturan-Ku dan melakukannya.

Sude do jolma masihol di na imbaru. Loja jolma mangula asa jumpang do na imbaru. Ringgas hita mangula asa dapot na imbaru. Aha do na imbaru? Adong do na imbaru di portibi on? Ai molo tatuhor saonari na imbaru, marsogot buruk ma i, bosan ma hita mamake. Molo tagadis na buruk tu pasar loak, gabe na imbaru do i di na manuhor. Molo didok na imbaru, i ma angka mode na imbaru, sintong do i? Hape angka mode na imbaru i pe mode naung hea do i adong. Isarana mode kuncup salaoar ni baoa nuaeng, nunga masa i di taon pitupuluan. Lapatanna mode naung adong i do mulakulak. Antong aha do na imbaru? Roha ni jolma i do na mambahen imbaru na pineop na. molo sai imbaru roha, sude na pineop i sai imbaru do. Domu tu si do na pinasahat ni turpuk on. Di habuangan Babel do bangso Israel nang panurirang Hesekiel uju disurathon buku on alani dosa ni bangso i na manomba ganaganaan jala marparange na maralo tu lomo ni roha ni Debata. Pangidoan ni bangso malua ma nian nasida sian habuangan. Masihol nasida naung mandate di habuangan i di haimbaru on. Hombar tu sintasinta i ma di bagabagahon tu nasida na imbaru molo olo nasida paubahon dohot paiashon roha nasida. Ala roha i do pusat, sentral ni parngoluan ni jolma, roha na i do sipaimbaruon. Haimbaruon ni roha i do mangalehon di nasida pangoloion tu Debata. Songon bangso ni Debata nasida, ingkon marparange hombar tu hata ni Debata nasida.

Hatangkangon i do bangko ni bangso Israel. Hatangkangon nasida i do mambahen nasida tarbuang tu Babel. Molo tung pe diloas Jahowa bangso Israel tarbuang tu Babel ndada ala na talu Jahowa maralohon debata ni halak Babel alai na diuhum Debata do bangso Israel. Alai ndang dipasombu Jahowa nasida hot di habuangan asa unang lam marlea goar ni Debata songon na tarsurat di ayat 22-23. Angka naung sanga mandok naung talu Jahowa ala tarbuang Israel tu Babel, nuaeng marnida ndang talu hape Jahowa. Hamumulak ni bangso Israel papatarhon habadiaon dohot hatimbulon ni Debata Jahowa. Nang pe bangso Isael mambahen ramun goar ni Jahowa, ndang tuk gogo dohot huaso nasida paulakhon habadiaon ni goar ni Debata. Holan Debata sandiri do na tuk mangulahonsa. Suang songon i nang dipartingkian saonari. Alani perkembangan teknologi dohot komunikasi, jamita na dipasahat khusus tu penganut ugamo i sandiri jotjot diunggah tu media sosial gabe dohot ma angka penganut ugamo na asing umbegesa. Tontu isi ni jamita adong ma i na risi jala maralo tu angka penganut ugamo na asing, jala torop do alani gabe adong na paroaroahon ugamo na asing jala hatop rarat alani media sosial. Molo tung pe di era digital on bahat jolma na mangaleai ugamo na asing, alai songon halak Kristen hita unang nian terpancing hita gabe manghorhon hagaoron di pardalanan ni ngolunta. Memang hurang do tabona begeon pandohan “Tuhan tidak perlu dibela oleh pengikutNya” alai i do sasintongna songon na taida di turpuk on. Debata sandiri do pabadiahon goarNa, ndada bangso Israel, jala ndada hita angka na porsea

Ala hapariron na niahap nasida di habuangan i malungun nasida di haluaon sian habuangan i, malungun nasida di haimbaruon. Domu tu sihol ni roha dihaimbaruon i, dibagabagahon tu nasida haluaon dohot haimbaruon molo olo nasida urason ni Jahowa sian nasa haramunon na niula nasida na sailaon (ay. 25). Imbaru ma nasida molo bolong sian roha nasida roha batu jala soluk roha sibuk (ay. 26). Jaloon nasida ma na imbaru molo sumuang nasida gabe bangso ni Debata, jala sumuang Jahowa gabe Debata nasida. Pangurason marhite aek na tio na adong di turpuk on manggombarhon naung marujung ngolu na ramun jala mamungka ngolu na imbaru, na badia, na unduk tu Tuhan i marhite hamubaon ni roha. Ndada hamubaon ni parduru na pinangido ni Debata, alai roha parbagasan do. Boi do i masa molo Tondi ni Debata manggohi roha ni jolma i, jala tondi i do na patupahon haimbaruon. Tondi ni Debata do na mangalehon haimbaruon di bangso Israel marhite na manguras dohot mangunsat roha batu jala manolukkon roha sibuk. Roha batu i ma gombaran ni ngolu na so unduk tu Debata. Roha i dipangido Debata gabe ingananNa. Alani do didok, lehonongku ma tu hamu roha sibuk. Roha sibuk i ma aloalo ni roha batu. Roha sibuk i ma roha na marpanghilalaan, na unduk tu Debata. jumpang haimbaruon i molo bolong sian roha nasida roha batu jala mian roha sibuk. Dipaingot jamita on hita asa muba rohanta. Hamubaon ni roha papataron di haunduhon tu Debata. Unduk tu Debata lapatanna niulahon lomo ni roha ni Debata. Haporseaon tu Debata papataron marhite pangoloion.

Dipaimbaru nasida asa sumuang nasida manean tano bagabaga , sumuang nasida gabe bangso ni Debata, jala sumuang Jahowa Debata nasida. Marulakulak di buku Hesekiel on didok, “Hamu gabe bangsoKu, jala Ahu gabe Debatamuna”. Mulakulak pandohan i dihatahon ala diose bangso Israel padan nasida tu Debata jala manimbil nasida sian patik dohot sian uhum ni Debata. Dihirim Debata do asa gabe tiruan na denggan nasida di parange dohot hasatiaon tu Jahowa maradophon bangso na humaliang, hape dialo nasida do Debata, ginjang rohana, disompol pinggolna tu hata ni panurirang ni Debata. Alani do asa didok tu nasida, asa marparange hamu dibagasan angka PatikKu, angka uhumHu pe radotan jala patupaonmuna do. Parange na denggan na hombar tu lomo ni roha ni Debata, i do hataridaan ni naung dipaimbaru Tondi ni Debata.

Songon halak na porsea, tontu ndang lomo rohanta ramun goar ni Debatanta, jala i do sintongna. Boha ma cara na asa unang marlea goar ni Debatanta? Mangolu ma hita marparange hombar tu hata ni Debata, ndada marhite debat agama. Mangihuthon turpuk on, na mambahen ramun goar ni Jahowa ima pangalaosion ni bangso Israel di hata ni Debata. Alani molo so lomo rohanta marlea Debata, unang ma talaosi hata ni Debata. parsitutuonta mangaradoti habadiaon dohot hatimbulon ni Jahowa tarida marhite parangenta siganup ari na hombar tu lomo roha ni Debata. Unang be dos pangalahonta songon pangalaho ni portibi on, angka na so mananda Tuhan Jesus, asa unang ramun goar ni Debata alani hita. Diunsat ma roha batu sian hita gabe marroha na imbaru ma hita asa tubu angka parange na hombar tu hata ni Debata asa gabe badia jala marsangap ma goar ni Debatanta.