Khotbah 1 Tawarikh 16: 23 - 28 Bernyanyilah bagi Tuhan Hai Segenap Bumi

 Minggu Kantate; 07 Mei 2023

16:23 Bernyanyilah bagi TUHAN, hai segenap bumi, kabarkanlah keselamatan yang dari pada-Nya dari hari ke hari.

16:24 Ceritakanlah kemuliaan-Nya di antara bangsa-bangsa dan perbuatan-perbuatan-Nya yang ajaib di antara segala suku bangsa.

16:25 Sebab besar TUHAN dan terpuji sangat, dan lebih dahsyat Ia dari pada segala allah.

16:26 Sebab segala allah bangsa-bangsa adalah berhala, tetapi TUHANlah yang menjadikan langit.

16:27 Keagungan dan semarak ada di hadapan-Nya, kekuatan dan sukacita ada di tempat-Nya.

16:28 Kepada TUHAN, hai suku-suku bangsa, kepada TUHAN sajalah kemuliaan dan kekuatan!

Kantate, lapatanna marende ma hamu tu Jahowa (Psalmen 98: 1). Marende, i do ngolu ni halak Kristen na ingkon tongtong tarida di gulmit ni ngoluna. Marende ndada holan tabo ni soara na nidokna alai marende ima mamuji, manghatindangkon asi ni roha ni Debata di bagasan ngolunta marsadasada. I do turpuk jamita on, i ma na marisihon sada pujipujian na dilehon ni bani Asaf tu Jahowa ala nunga sahat be Poti Parpadanan ni Jahowa (Tabut Perjanjian Allah) tu Jerusalem. On ma sada pujipujian na mansai ringkot tu angka acara-acara nasional na mansai balga di Israel. Dipamuhai, dijouhon bangso i asa gomos marsomba dohot satia di padan na nilehon ni Debata marhite sian si Abraham (ay. 8-13). Dipaingot do bangso i tu kesadaran i ma Jahowa do Debata nasida na tarbarita tu liat portibi on. dipatorang do tu bangso i asa marningot di padan na binahen ni Debata tu angka ompung nasida najolo. Padan na binahen ni Debata ndang marnamuba ndang marnamose. Sai didongani Debata do nasida ganup tingki (ay. 14-18). Alani saluhut pambahenan dohot pangaramotion ni Debata tu bangso i, dijou ma bangso i asa marningot mamuji Debata jala marbarita tu saluhut portibi on taringot tu hatuaonNa ganup ari. Panjou ni panurat 1 Kronika on, asa sude do bangso ni Debata di portibi on mamuji Debata ala saluhut pambahenanNa tu bangso i ganup tingki. Mansai godang do pambahenan ni Jhaowa tu bangsoNa na dipillit marhite sian asi ni rohaNa.

Pajojor hamu ma di tongatonga ni halak parbegu hamuliaonNa i (ay. 24) jala lehon hamu ma tutu tu Jhaowa hamuliaon dohot hagogoon (ay. 28). Hata hamuliaon di ayat 24 dohot 28 on di hata Heber tarsurat: Kabod, lapatanna puji ma Tuhan i marhite sikap na paunduk simajujung (secara harafiah artinya pujilah Tuhan dengan sikap menundukkan kepala). Marlapatan ma i, sikap na mamuji Tuhan i ingkon dibagasan haunduhon ni roha, ndada manenganengahon tu halak na asing angka naung binahen jala ndada patutoru halak na asing manang mamparsoada na binahen ni halak na asing. Alani i ma, mangendehon Tuhan i sasintongna ingkon dibagasan unduk ni roha.

Ai na timbul do Jahowa, jala tama situtu Pujion. Hata pujion di ayat on di hata Heber tarsurat halal. Lapatanna ni hata halal on ima puji ma marhite aha na adong di ho. Sian lapatan ni hata halal on, dohononta ma ndang adong jolma na so bi mamuji, mangendehon Tuhan i. Halak na sehat manang marsahit, namora manang napogos, halak na berhasil manang gagal, halak na matua manang naposo bahkan dakdanak, sude do boi mamuji Tuhan i marhite aha na adong di ibana. Hata aha na adong di ibana ndada marlapatan molo pujipujian i gabe boi sembarangan, molo pelean gabe boi na lapungon, na ummetmet bilanganna, na so denggan rupana, molo marende asal ma marende. Jala ingkot manat do hita, molo tung pe tabahen na dumenggan ndang asa diida manang dipuji halak. Jala pandohan aha na adong di ibana marlapatan ma ndang dipaksahon jala unang sian neang manang langgus ni roha.

Na songka do Ibana mangatasi sude angka debata. Ai ajiajian do sude debata ni angka bangso parbegu. (ay. 25;27). Sian pandohan on, tangkas diondolhon panurat 1 Kronika on asa lam marsitutu mangendehon Tuhan i (bernyanyi bagi Tuhan) ala dao ummuli, dao dumenggan, dao gumogo Tuhanta i sian debata ni angka bangso parbegu. Ai ajiajian manang ganaganaan do debata ni bangso parbegu. Dohot hata na jempek, terbatas do huaso ni debata ni bangso parbegu. I do alana umbahen ingkon holan mamuji Tuhan i hita, ala ndang terbatas Ibana, ala Ibana do Bonana dohot Ujungna, laos ala ni i ma talup do Ibana mangalehon lobi sian na diparsinta dohot na pinangido jolma manisia.

Ndang adong na boi mangimbangi angka debata ni bangso parbegu, molo dipatudos dohot Debata ni bangso Israel. Alani i do umbahen disoarahon asa sude namgso mo Debata pajojorhon angka hamuliaonNa i, na songka do Debata ni Israel, jala na timbul. Di saluhut pambahenan ni Jahowa tu bangsoNa, i do na mambahen tama situtu do ingkon pujion nasida Debata. sada pangungkapon do dihit turpuk on, Debata do na parjolo mambahen na denggan tu hita, alani i ingkon boi do hita mangalehon angka na denggan tu saluhut halak. Ndang adong debata na asing na boi disarupahon dohot Debata ni Israel. Molo Debata ni Israel, ima Jahowa naung manjadihon angka langit dohot sude isina, alai molo debata ni angka bangso parbegu, ai ajiajian do sude.

Dipangido hita marende mamuji Jahowa. Marende ndada ingkon sai marnot manang marlagu opat. Marende lapatanna papuashon pujipujian sian roha dohottondi ala pos ni roha di Tuhan i. I do ende. Asa molo disosoi hita marende, na nidokna: tapasahat pujipujian tu Debata dibagasan ende na imbaru. Ende na imbaru i ma ende na pinatubegehon dibagasan semangat na imabru, ndada ingkon ende na imbaru dikarang, alai ende na niendehon dibagasan pos ni roha dohot semangat na imbaru. Jala tama do dibagasan hahormaton halak Kristen marende uju marpungu di bagas joro ni Debata. paheanna, parhundulna ingkon dibagasan hahormaton ala Tuhan i do na nidapothon di joro i. Ingkon tangka rajuman ni roha ni sude na bongot tu gareja, na mian di joro ni Debata do nasida na marpungu i. Parendeon i pe ingkon nionjar ni roha na manghamauliatehon dohot mamuji Tuhan. Unang galegale, unang so sian rohana na marende i. Ingkon semangat, ala pujipujian do na marende i. Ala na mamuji Tuhan i do ende i ingkon hibul roha patubegehonsa. Sude angka na marende di huria tama di bagasan pangaradeon na tangkas laho patubegehon ende pujiapujian unang songon na latihan be di parmingguon i. Marende ma hita di Jahowa ala holan Ibana do Tuhan na tama manjalo pujipujian, hamuliaon dohot hagogoon. Marende ma hita di Jahowa dibagasan unduk dohot serep ni roha dohot nasa na adong di hita. Marende ma hita di Jahowa ala ni huasoNa, talup do Ibana mangalehonn lobi sian na taparsinta.