Khotbah 2 Samuel 22: 1-7 Tuhan Mendengar Seruan UmatNya

 Minggu, Exaudi; 21 Mei 2023

22:1 Daud mengatakan perkataan nyanyian ini kepada TUHAN pada waktu TUHAN telah melepaskan dia dari cengkeraman semua musuhnya dan dari cengkeraman Saul.

22:2 Ia berkata: "Ya, TUHAN, bukit batuku, kubu pertahananku dan penyelamatku,

22:3 Allahku, gunung batuku, tempat aku berlindung, perisaiku, tanduk keselamatanku, kota bentengku, tempat pelarianku, juruselamatku; Engkau menyelamatkan aku dari kekerasan.

22:4 Terpujilah TUHAN, seruku; maka aku pun selamat dari pada musuhku.

22:5 Sesungguhnya gelora-gelora maut telah mengelilingi aku, banjir-banjir jahanam telah menimpa aku,

22:6 tali-tali dunia orang mati telah membelit aku, perangkap-perangkap maut terpasang di depanku.

22:7 Ketika aku dalam kesesakan, aku berseru kepada TUHAN, kepada Allahku aku berseru. Dan Ia mendengar suaraku dari bait-Nya, teriakku minta tolong masuk ke telinga-Nya.

Molo disungkun di hita ise do Debata di ngolunta, tontu marragam do angka alus ni jolma taringot tu sungkunsungkun on. Jala molo nunga tatanda Debata, marhite aha do patuduhononta partinandaanta i. Molo holan mananda alai ndang mangulahon manang aha, porlu do sungkunon, toho do partinandaanta i? Ingkon adong do partinandaan di hita taringot ise do Debata di ngolunta. Partinandaanta i unang ma nian tadapot holan sian mambege jamita manang parsiajaran agama. Alai dibagasan ngolunta siapari ingkon mardalan jala tapangasahon do Tuhan i laho mangadopi sude gulmit ni ngolu on. Sian i, idaonta ma ise do Debata di ngolunta.

Tongon dihaliangi hamagoan do si Daud na manjou Debata dibagasan turpuk on. sandok sian sude humaliang do ibana manaon, secara fisik, emosional, sosial sahat ro di nang partondionna. Pola dipasuman ibana angka hamagoan i tu “umbak dohot sunge” (ay. 5), i ma patuduhon hamagoan na marlao ro, ndang mansadi, jala hamagoan na mansai gogo jala doras situtu. Gogo situtu do dijouhon ibana na mandok “gogo situtu Debata” (ay. 2). On ma joujou huhut panindangion ni si Daud  di turpuk on. Dipajohor ibana rumang ni partinandaan ni ibana taringot ise do Debata dibagasan pardalanan ni ngoluna, i ma: dolok batu, haporusan, sipalua, partanobatoan, lombulombu, parondingondingan, haporusan, dohot sipartumpak. Ndang na holan ala manjaha pustaha na badia raja Daud umbahen na adong partinandaan ni ibana. Ndang na holan alani na bigena jamita taringot tu huaso ni Debata. Alai dihilala raja Daud do langsung diparngoluan ni ngoluna umbahen sahat jala dirajumi ibana holong ni roha ni Debata, gabe manghorhon partinandaan ni ibana di Debata. Holan dibagasan Debata do jumpang ni raja David angka sisongon on.

Boha do dibahen raja Daud asa mananda hita di Debata. Molo marhite turpuk on, disurathon do di ayat 4 dohot ayat 7, ima dijou raja Daud do Debata. Parungkilon ndang mambahen raja Daud gabe laho maninggalhon Debata alai gabe dalan di ibana laho patanghon haporseaonna di Debata. Sian on ma tabereng, ndang marpangusandean raja Daud di hasangapon ni ibana nang pe raja ibana, alai marhaposan tu Jahowa do ibana. Aha do huroha na secara spesifik na dialami ni raja David umbahen pola sai joujou ibana di goar ni Debata, jala pola gabe di dokkon ibana dihaliangi ombak ni hamatean ibana? (ay. 5-6). Molo taparrohahon di bindu 21, boi do berengonta ima masa do haleon potir tolu taon lelengna (21:1), masa do parporangan halak Pilistim dompak halak Israel (21:15). Uju na targogot ibana, dijou ibana ma Jahowa, dipangiar anggukna, manigor tangkas ma dipatuduhon ibana na ditangihon Jahowa do soarana sian joroNa jala tolhas anggukanggukna i tu pinggolNa (ay. 7). Mata ni haporseaon na i do marnida saluhutna i, umbahen na diida ibana surduk tangan ni Jahowa.

Tung so adong do nanggo saotik pe disungguli ibana taringot tu dirina sandiri, haboionna, manang taringot tu haboion ni angka halak na rap dohot ibana. Ai dirajumi ibana holan di Jahowa sambing do hamulaon. Mansai songkal jala marmula situtu Debata Jahowa dihilala ibana. Dirajumi ibana Debata na martinangi do Jahowa. Na mambahen dokdok dihilala si Daud ndada be agoan birubiru ibana, alai molo pola ingkon agoan hosa ibana. Alai tangkas situtu di haporseai ibana, Debata na martinangi do Jahowa. Ndang dipasombu Tuhan i juojou angka na hinaholonganNa. Dipaima Debata do joujounta ganup. Jala unang lupa hita manongtong do asini ni roha ni Debata. ndang loasonna hita madabu. Ndang tadingkononna hita. Urupannna do hita. Na gabe sungkunsungkun nuaeng boha do tu parngoluanta si nuaeng?

Molo si Daud dipuji ibana Jahowa naung paluahon ibana di angka tingki naung salpu, jala tontu manghirim do ibana tongtong paluahon ni Jahowa ibana nang tu angka tingki na laho ro. Alai molo taida, ndang manontong diondingi Debata ibana. Jala hita pe ingkon rade do hita laho marnida, ndang di sude hamagoan diondingi Debata hita. Diloas Tuhani do sipata hita manaon, ro angka rumang ni sitaonon, hamaolon, ro di hamagoan, asa lam toruk rohanta, asa lam benget hita, asa lam ganda haporseaonta, asa lam marsihohot hita dompak Ibana. Siala ditonga ni angka sitaonon i do lam patar haidahan haporseaonta. Jala tagamon ganda torop ni halak na manghaposi Debata marnida habengeton dohot pos ni rohanta laho manaon. Sungkunsungkun na parpudi,ditangihon Tuhan i do pe joujounta? Ditangihon Debata do hita. Lobi sian na tahatahon i ditangihon Debata do hita, diida Ibana do ro di na dibagasan roha nang pingkiranta. Dibagasan Psalmen 139 i dipatuduhon, ndang adong inganan partabunian na so haidahan sian Ibana. Ndang adong nanggo sada na buni sian adopanNa. Ndang tarsonggot Debata, jala ndang tarlalap Ibana.

Hea do tahe tubu di rohanta laho mandao sian Debata alani angka sitaonon namasa tu hita? Malas martangiang, losok marminggu, mandao sian Debata, malas mamuji Debata? Boha ma asa lam dao hita sian Debata, ido tahi ni sibolis. Ndada holan asa manaon hita, alai asa diganup sitaononta i tapaholang dirinta sian Debata, tapangasahon gogo dohot dirinta sandiri, ido na tinahi ni sibolis sian hita. Diturpuk on digombarhon raja Daud do jorbut ni parungkilonna tudos tu ombak na mangharomhon, tudos tu sunge na mangaup, jala tudos tu rante na mangarahut halak tu hamatean. Alai nang pe songon i jorbut ni hamatean na mangondam ngoluna, gumogo do huaso ni Debata mangurupi dohot paluahon ibana sian hamatean. Dipapatar si Daud di turpuk on na nidok ni Psalmen 50: 15 “jala jou ma Ahu jumpa di ari hagogotan, asa hupalua ho, asa dipuji ho Ahu”. Marhuaso do Debata paluahon na porsea tu Ibana. Turpuk on mangarahon na porsea i asa ringgas mangalualu dohot manjou goar ni Tuhan i, asa unang ganggu di joujou ni Tuhan i na mandok: “Ro ma hamu tu Ahu, hamu angka na loja, jala na sorat, asa hupasonang hamu (Mat. 11: 28).