Khotbah Kejdian 1: 1-2 + 26-28 Allah Tritunggal Pencipta Segala Sesuatu
Minggu Trinitatis; 04 Juni 2023
1:1 Pada
mulanya Allah menciptakan langit dan bumi.
1:2 Bumi
belum berbentuk dan kosong; gelap gulita menutupi samudera raya, dan Roh Allah
melayang-layang di atas permukaan air.
1:26
Berfirmanlah Allah: "Baiklah Kita menjadikan manusia menurut gambar dan
rupa Kita, supaya mereka berkuasa atas ikan-ikan di laut dan burung-burung di
udara dan atas ternak dan atas seluruh bumi dan atas segala binatang melata
yang merayap di bumi."
1:27 Maka
Allah menciptakan manusia itu menurut gambar-Nya, menurut gambar Allah
diciptakan-Nya dia; laki-laki dan perempuan diciptakan-Nya mereka.
1:28 Allah
memberkati mereka, lalu Allah berfirman kepada mereka: "Beranakcuculah dan
bertambah banyak; penuhilah bumi dan taklukkanlah itu, berkuasalah atas
ikan-ikan di laut dan burung-burung di udara dan atas segala binatang yang
merayap di bumi."
Minggu
Trinitatis, ima minggu Hasitolusadaon Ni
Debata. dipapatar Debata
hadirionNa na sangap, na songkal i tu jolma na gok dosa dibagasan 3 rumang.
Parjolo, dipapatar diriNa Debata Ama,
Debata di ginjang ni saluhut. Tagoari Ibana Ama, ala Ibana haroroan,
mual ni nasa na adong. Paduahon, Jesus Kristus. Debata di tongatonganta. Ala
dosa ni jolma, ndang ditanda jolma i be Debata nang sai marulakulak disuru
suruanNa. Alani ingkon Debata sandiri ro tu tongatonga ni jolma. Asa boi Ibana
marsaor dohot jolma ro Ibana mardaging jolma. Marhite i boi hilalaonta balga ni
holongNa di portibi on. patoluhon, Tondi Parbadia. Debata mian di bagasan hita.
Dung manaek Jesus tu banua ginjang dipapatar Debata hadirionNa tu portibi on
marrumang tondi. Ndang be mardaging jolma Ibana, alai marrumang Tondi. Tondi
Parbadia i do na mangajari hita mangantusi ulaon ni Jesus. Asa Trinitatis i ma
dalan ni Debata papatarhon hadirionNa tu jolma pardosa asa porsea jolma di
Ibana. Di turpuk on dipapatar hadirion ni Debata Sitolu sada i sitompa nasa na
adong.
Buku
1 Musa ima buku na parjolo sian sude isi na adong di Bibel jala dikenal do buku
on sebagai Buku Tora na marisihon taringot tu panompaoan langit dohot tano
dohot nasa isina ima na pinatupa ni Debata. Sada panindangion na tung
mansai tangkas pabotohon hadirion ni Jahowa, i ma pandohan parjolo di buku na
badia i “dimula ni mulana ditompa Debata
ma langit dohot tano on”. Debata manompa nasa na adong: langit, tano dohot
aek, angka panondang na bolon dohot na metmet, binatang, jolma nang nasa na
marhosa. Sian
pandohan
ayat na parjolo on ima parbinotoan taringot tu pambahenan ni Debata na mansai
luar biasa patupahon panompaon nasa na so boi dipikkiri sian hajolmaon termasuk
dohot sian teknologi tercanggih na adong di portibion. Siala dipatupa Debata do
panompaon i marhite-hite huaso na adong di Ibana, ai Debata na marhuaso jala
marmulia do Debata. Mansai
tarida do huaso ni Debata di angka proses panompaon na pinatupaNa nang songoni
ulaon ni Tondi dibagasan panompaon i. Sian ayat na parjolo on laho
mangalehon pangantusion na mansai bagas tu hita taringot tu panompaon ni Debata
na parjolo, ima panompaon langit dohot tano on andorang so ditompa Debata jolma
i tumiru rupaNa tudos tu pangalahoNa.
Debata
Sitompa Saluhut, boi antusanta ia manompa lapatanna mambahen manang patupahon
sian na so adong hian gabe adong. Molo jolma jotjotan do mambahen dang na
manompa, molo adong pe ahli dang na manompa nasida didok alai na menemukan.
Siala memang sian na adong hian do jolma mambahen bahkan menemukan sesuatu.
Alai anggo panompaon ni Debata di hata Heber dipakke hata “Bara”
patuduhon holan pribadi ni Debata do na tuk patupahonsa, jala dang adong na
manompa sarupa dohot na pinatupa ni Debata. Di bahasa Latin adong istilah “Creatio
Ex Nihilo” na patuduhon huaso ni Debata na tuk manompa langit dohot tano
dohot nasa isina marhite-hite hata ni Debata. Dungi ayat na paduahon on naeng
paboahon songon dia do kondisi manang situasi ni langit dohot tano naung
ditompa Debata. Ditangkasi do paboa tarulang ma tano i, gabe halongonan jala
holom di atas lung i, dung i mangareapreap ma Tondi ni Debata di atas ni angka
aek. Alai nang pe songoni situasi ni tano on, boi do diaturhon Debata gabe
bagak saluhutna marhite-hite na manompa angka isi ni tano on gabe uli ma idaon
sahat nuaeng on. Ido umbahen panompaon ni Debata bahenon ma gabe sada kesaksian
di ngolu angka na porsea, paboa adong sangkap ni Debata na naeng pasahatononNa
tu hita ima haluaon dohot hasonangan i. Panompaon ni Debata tahaporseai do dang
alani kebetulan manang holan secara alamiah sajo umbahen na adong nuaeng on. Alai
tangkas do haporseaonta mandok paboa adong tano dohot langit dohot nasa isina
ima ditompa Debata. Andorang ditompa Debata jolma manisia, jumolo do diparade
sude angka aha na ringkot di parngoluon ni jolma, tarida do kekhususan ni jolma
i maradophon tompaan na asing.
Tangkas
do disurathon di ayat 26-27 paboa ditompa Debata do jolma i di ari paonomhon
tumiru rupaNa tudos tu pangalahoNa, baoa dohot boruboru do ditompa Debata. Tung
mansai arga do jolma i ditompa Debata, pola ma tumiru rupa dohot pangalahoNa sandiri.
Aha do lapatanna jolma i ditompa tumiru rupa dohot pangalaho ni Debata ? Alusna
secara sederhana ima asa gabe sorminan manang gombaran ni Debata do jolma manisia di
parngoluonna laho patuduhon holong, hamuliaon dohot habadiaon ni Debata huhut
mangulahon hasintongan ni Debata. Molo secara fisik dang sarupa Debata dohot
jolma ala dang hea dope taida songon dia do bohi ni Debata, alai didok sarupa
dohot sagombar dohot Debata asa songon Debata ma nian pangalaho ni jolma secara
kualitas. Sumurung ma nian pangalaho ni jolma sian sude angka na tinompaNa na
asing ala tangkas tumimbo do ditompa Debata jolma i, laos adong do huaso na
dipasahat tu ganup jolma dung dipasupasu Ibana. Aha ma tugas manang songon
huaso na dipasahat Debata tu jolma i, di ayat 28 didok : Marpinompari ma hamu,
asa sopar hamu, jala gohi hamu sandok tano on, jala patunduk hamu; jala raja i
hamu dengke angka na di laut dohot pidong angka na martongatonga langit ro di
sude binatang, angka na manjirir di atas tano on. Alai didok Debata songon i,
ndang na mandok boi gabe lomo-lomo ni jolma tu angka na asing na tinompa ni
Debata, alai na nidok na disi ima asa boi do jolma i bertanggungjawab laho
mangaradoti angka na
tinompa ni Debata di portibion. Ditoma Debata jolma i tudos tu pangalaho, tumiru rupa ni
Debata, na marlapatan ma i, ia jolma i gabe ulaula ni Debata laho papatarhon
huasoNa tu saluhut na tinompaNa bahen hamuliaonNa. Dipasupasu Debata do jolma
i, jala dipasahat huaso laho mangarajai sandok na tinompa ni Debata, na
marlapatan ma i, ia jolma i sasintongna “mitra” ni Debata laho mangulahon angka
nauli na denggan tu saluhut na tinompa ni Debata. Ndang gabe manegai manang
pasudahon na tinompa ni Debata.
Marhite
sian turpuk on, naeng ma tangkas pangantusion halak Kristen taringot tu
panompaon na pinatupa ni Debata. Ibana do manompa langit dohot tano dohot nasa
isina, jala ditompa do i saluhutna marhite-hite huaso na adong di Ibana. Naeng
ma bagas pangantusion di hita taringot tu turpuk jamita on asa mangolu
haporseaon dohot haunduhon ni roha laho marsomba huhut pasangaphon Debata di
ngolunta. Molo mangasahon logika manang parbinotoan do laho mangalapati turpuk
jamita on, dang tolap hita i ala on ma na nigoaranna Debata na Transenden ima
na so boi dijangkau dohot pikkiran ni hajolmaon na mansai terbatas. Alai naeng
ma nian hita mangalapati panompaon ni Debata dibagasan haporseaon na mangolu
siala Debata nunga adong andorang so adong dope portibion. Sialani ngolunta pe
ingkon mamuji pasangaphon Debata. Marhite tema minggu di minggu Trinitatis on
na mandok Debata Sitolusada Sitompa Saluhut, anggiat asa hot haporseaonta di
Debata jala mamakke sude pasupasu na adong di hita bahen hasangaponNa i, jala
mangulahon angka ulaon na hombar tu lomo ni rohaNa. Amen
Post a Comment for "Khotbah Kejdian 1: 1-2 + 26-28 Allah Tritunggal Pencipta Segala Sesuatu"