Khotbah Matius 13: 1 - 9 Pemeliharaan Allah bagi Umat PilihanNya

 Epistel Minggu 6 Set. Trinitatis; 16 Juli 2023

13:1 Pada hari itu keluarlah Yesus dari rumah itu dan duduk di tepi danau.

13:2 Maka datanglah orang banyak berbondong-bondong lalu mengerumuni Dia, sehingga Ia naik ke perahu dan duduk di situ, sedangkan orang banyak semuanya berdiri di pantai.

13:3 Dan Ia mengucapkan banyak hal dalam perumpamaan kepada mereka. Kata-Nya: "Adalah seorang penabur keluar untuk menabur.

13:4 Pada waktu ia menabur, sebagian benih itu jatuh di pinggir jalan, lalu datanglah burung dan memakannya sampai habis.

13:5 Sebagian jatuh di tanah yang berbatu-batu, yang tidak banyak tanahnya, lalu benih itu pun segera tumbuh, karena tanahnya tipis.

13:6 Tetapi sesudah matahari terbit, layulah ia dan menjadi kering karena tidak berakar.

13:7 Sebagian lagi jatuh di tengah semak duri, lalu makin besarlah semak itu dan menghimpitnya sampai mati.

13:8 Dan sebagian jatuh di tanah yang baik lalu berbuah: ada yang seratus kali lipat, ada yang enam puluh kali lipat, ada yang tiga puluh kali lipat.

13:9 Siapa bertelinga, hendaklah ia mendengar!"

Somal do hata boni dipangke Tuhan Jesus di angka umpamana Dipangke Jesus hata boni i, Parjolo: laho patuduhon na ador do hagogoon na buni di bagasan boni i, jala patar muse hagogoonna i molo dung marparbue. Gogo na songon i do mambaen tubu, mangoli magodang jala marparbue angka suan-suanan, parbuena i ma papatarhon na marhagogoon boni i. Paduahon, na ginoaranna boni na denggan i ma angka anak harajaon banua ginjang. Targoar angka anak harajaon banua ginjang i boni na denggan, ala adong hagogoon na mangolu di nasida, i ma Hata ni Debata, na mambaen magodang jala manggulmit nasida. Dihangoluhon angka na porsea, anak harajaon banua ginjang i do na tinaon ni Tuhan Jesus, hamamateNa dohot haheheonNa. Songon boni na simuan i, jolo ditanom do asa tubu, suman tusi do Tuhan Jesus dohot angka na mangihuthon Ibana, jolo manaon (ditanom) songon boni i alai tubu muse jala marparbue. Angka na rade manaon songon Tuhan Jesus, i ma na ginoaran na tubu paduahalihon. Halak si songon i ma na manaburhon boni na denggan muse di portibi on marhite-hite hata dohot pambahenan. Domu tusi do lapatan ni umpama ni Tuhan Jesus di turpuk on, umpama taringot tu panabur la na pinasahat ni umpama on, i ma:

1. Jamot hita di angka na mangambati huaso, hagogoon ni Hata ni Debata.

Na tarjou do hita manabur boni i rap dohot Jesus. Dijou hita mangula rap dohot Ibana, ndada ala na patut, manang ala na tau, manang ala denggan ni pangalahonta, ala asi ni rohaNa do umbahen dijou hita. Ndang marnaloja, sai mardalani do Tuhan Jesus, Panabur i, marhite na porsea i tu sandok portibi on laho manaburhon Hata ni Debata. Alai godang do na so tubu, ala ro do angka pidong na martonga-tonga langit mamarguti boni na mamiltik di dalan i, deba sian boni i madabu tu parsihupian gabe hapusohan, rahar jala mate. Boasa songon i godang ni boni i na so tubu? Ala dipatangkang jolma i rohana, ndang rade manjalo barita na uli i. Didok panurirang Jeremia, dipajogal bangso i do rohana, diela dosa i do nasida, na tarrante do nasida dibahen portibi on ala so olo nasida manangihon angka panurirang, Jer. 17,23. Manang didia Tuhan Jesus marjamita, sai torop do halak manangihon. Ndada diriNa na naeng patuduhonon ni Jesus, Hata i do. I ma boni na marharoroan sian ginjang jala na so tarasam hinaargana. Sian boni na sinaburhon i do hirimon parbue, jala laos di bagasan boni i do hagogoon na manuanhon panghirimon di hita di pudian ni ari. Mansai arga do boni i di angka na porsea, ai sian i do dihirim parbue na palashon rohana songon upa ni halojaonna na manabur boni i.

Hata ni Debata do boni i, na sinaburhon ni Tuhanta marhite hataNa dohot pambahenanNa. Na mangolu do boni (Hata) i jala manggulmit di bagasan roha ni angka jolma. HataNa i do mamodai, mangajari, mangapuli dohot manogunogu tu panandaon di Debata, jala ulaonNa i patandahon hinabalga ni holongNa. I do alana umbahen didok: "Martua ma angka na manangihon Hata ni Debata, jala na umpeopsa". Nang pe marhagogoon boni i, adong do musuNa na sai mangambati hatutubu ni boni i. Digoari do angka na mangambati partubu ni boni i di turpuk on: Pangambati parjol.o, i ma dalan na pir. Gabe so masuk be boni i tu tano i, ala pir tano i. Gabe so masuk be Hata ni Debata tu rohanta, ala jogal dohot tangkang ni rohanta. Marpir rohanta ala pangalahonta. Adong dope mara na jumorbut, ro pidong mamarguti boni na sinaburhon i. Diparguti pidong i ma boni na madabu tu dalan na pir i. Lapatanna, na ro do sibolis i menyamar tu lambungta, tar paula dibahen las rohanta, hape na mamarguti boni na madabu tu rohanta na songon dalan na pir i do sangkapna. Pangambati paduahon, i ma batu. Lohot do nian urat ni eme i tu tano na di batu i, alai ndang bagas. Alai di ujungna rahar ma eme i laos mate, ala hurang bagas uratna masuk. I ma harohaon na hurang bagas mangantusi, neang ni roha, ndang bagas marurat haporseaon i jala laos tangkang rohana di bagasan. Pangambati patoluhon, i ma parsihupian na mamisat eme i. Ai humatop do magodang sihupi i asa eme i. Ndang manahan di angka parungkilon, sai holsoan di arta dohot hasonangan portibi. Dipisat holso i ma Hata i, ujungna mate. Denggan do ia boni i, tubu, mangolu do jala mangalehon ngolu. Na margogo do Hata ni Debata, rohanta do na so olo manjalo. Godang do musu ni Hata i di ngolunta siganup ari. Tupa di lambungta do sibolis i, mamarguti Hata i, mamisat Hata i asa unang marparbue. Masa na songon i ala mura-mura do hita dililuhon sibolis i, ala sai mangalului hasangapon tu diri hita ndang pasangaphon Kristus.

2. Margogoihon hita asa marparbue na denggan.

Alai adong do tano na denggan inganan hatubuan ni boni i, na mangalehon parbue na godang. I ma ngolu ni angka na porsea i. Monang do pos ni roha di Debata di rohana, jala talu dosa i. Asa boi hita suman tu tano na denggan i, ingkon taungkap rohanta tu Hata ni Debata, jala sai joujou hita songon halak na mapitung na di huta Jeriko i, "Ale Jesus anak ni si Daud, asi rohaM di ahu. Lehon ma di au mata na marnida”, Mat.20,30+33. Unang taloas rohanta diela-ela hagiot portibi on, asa unang sundat hita sahat tu tujuan ni ngolunta. Martujuan do ngolunta.

Suman tu batang aek do i, adong bonana, adong ujungna. Marbona do i di lambung ni Debata jala tuat ma ibana tu laut. Marhasak do jotjot ngolunta on asa sahat tu ujungna, tu muara na di laut i. Hasak i ma angka ujian di ngolunta. Asa manahan hita ingkon adong do partahanan di hita, i ma haporseaon, holong dohot panghirimon. la sisean ni Kristus, i ma angka na manaon parungkilon. Buni do Tuhan i, jala gale do angka siseanNa Alai ndang jadi hita mabiar. Porsea ma hita, ai Tuhanta do na paturehon ngolunta.

Jolo manaon do eme i asa marparbue. Ingkon adong do udan, las ni ari, na marsoring soring, asa mangolu jala marparbue eme i. Suman tu si do ngolu ni angka na porsea i. Marhite sitaonon na songgop tu ngolunta, gabe taruli hita nang na asing pe di panghirimon di haluaon sian Tuhan Jesus. Aut sugari ndang adong udan, dohot las ni ari marsoring-soring, ndang tagamon adong parbue ni eme i, ndang tagamon ganjang biurna, bonana. Ingkon marurat bagas haporseaonta di Kristus jala marparbue, tau las ni roha ni Tuhan Jesus, Panabur i, jala parsaulian di angka na humaliang hita. Amen.