Khotbah Lukas 24: 44 - 53 Yesus Terangkat ke Sorga dan Kita Bersukacita

 Peringatan Hari Kenaikan Tuhan Yesus; 09 Mei 2024

24:44 Ia berkata kepada mereka: "Inilah perkataan-Ku, yang telah Kukatakan kepadamu ketika Aku masih bersama-sama dengan kamu, yakni bahwa harus digenapi semua yang ada tertulis tentang Aku dalam kitab Taurat Musa dan kitab nabi-nabi dan kitab Mazmur."

24:45 Lalu Ia membuka pikiran mereka, sehingga mereka mengerti Kitab Suci.

24:46 Kata-Nya kepada mereka: "Ada tertulis demikian: Mesias harus menderita dan bangkit dari antara orang mati pada hari yang ketiga,

24:47 dan lagi: dalam nama-Nya berita tentang pertobatan dan pengampunan dosa harus disampaikan kepada segala bangsa, mulai dari Yerusalem.

24:48 Kamu adalah saksi dari semuanya ini.

24:49 Dan Aku akan mengirim kepadamu apa yang dijanjikan Bapa-Ku. Tetapi kamu harus tinggal di dalam kota ini sampai kamu diperlengkapi dengan kekuasaan dari tempat tinggi."

24:50 Lalu Yesus membawa mereka ke luar kota sampai dekat Betania. Di situ Ia mengangkat tangan-Nya dan memberkati mereka.

24:51 Dan ketika Ia sedang memberkati mereka, Ia berpisah dari mereka dan terangkat ke sorga.

24:52 Mereka sujud menyembah kepada-Nya, lalu mereka pulang ke Yerusalem dengan sangat bersukacita.

24:53 Mereka senantiasa berada di dalam Bait Allah dan memuliakan Allah.

Hurang arga do di hita ari parningotan hananaek ni Tuhan Jesus. Somalna ngali do pamestahononta di parningotan hananaek ni Tuhan Jesus. Hape sasintongna ari parningotan hananaek ni Tuhan Jesus manadinghon siseanNa mangalehon panghirimon na imbaru tu siseanNa dohot tu halak na porsea. Hananaek ni Tuhan Jesus tu banua ginjang, paingothon hita na so portibi on ingananta na manongtong, surgo i do. Molo tapamanat di Bibelta i, otik do digurithon panurat ni Evangelium na opat i taringot tu hananaek ni Tuhan Jesus, ala ndang proses ni hananaek ni na rumingkot, alai tonaNa dohot lapatan ni hananaekNa i do na rumingkot di panurat Evangelium na opat i. Marhite hananaekNa i dilehon kepastian tu angka na porsea, paboa songon Jesus na sahat tu hasangaponNa songon i do na porsea i pajumpang sogot dohot Ibana.

Topik ni jamita di parningotan ari hananaek ni Tuhan Jesus tu banua ginjang manogihon hita asa marlas ni roha. Molo sian hajolmaon maol do tarjalo roha topik ni jamita on. Ala ingkon marsirang ma muse Jesus dohot angka siseanNa, ala na parjolo nunga marsirang nasida uju ditangkup Jesus jala dipasahat tu hamatea di hau pinarsilang. Tontu molo sian hajolmaon lungun situtu do dihilala angka sisean dohot angka siihuthon Jesus alani parsirangan i. Dapot roha do i jala boi antusan. Jotjot do tutu lungun roha molo marsirang sian nna hinaholongan, tarlumobi molo marsirang alani hamatean. Ai ndang boi be pajumpang, nunga mansohot saluhut angka parsaoran dohot holong ni roha. Alani lungun do molo masa parsirangan sisongon i. Alai andul do masa songon na dipabotohon tu hita di turpuk jamita on. Na manaek do Jesus tu banua ginjang jala marsirang ma Ibana sian angka siseanNa, alai ndang lungun roha ni sisean i. Gariada tahe marlas ni roha do nasida. Tangkas do i dipabotohon di ayt 52 “Marlas n roha situtu”. Ndada holan marlas ni roha nasida, alai marlas ni roha situtu. Alani gabe tubu ma sungkun sungkun, aha do na mambahen sisean i marlas ni roha situtu?

Tangkas do alus ni sungkun sungkun i, i ma ala nunga lam diantusi angka sisean i sangkap ni Debata. Molo dimulana maol situtu do diantusi nasida na masa tu Jesus, tarlumobi uju na ingkon marsitaonon Jesus sahat tu hamatean, tahutan jala lungun situtu do rohanasida. Alai dung hehe Jesus sian na mate adong do partingkian na ganjang, i ma 40 ari dipangke Jesus laho patuduhon diriNa tu angka siseanNa dohot tu angka natorop na mangihuthon Ibana nasailaon. I ma dalan ni Jesus laho manungkoli haporseaonnasida jala laho paratarata pangajarion naung dipasahat Jesus uju manghobasi dope Ibana rap dohot angka siseanNa. Aja tutu tung godang do panghorhonna tu angka sisean. Nuaeng nunga diboto jala diantusi nasida sangkap ni Debata. Laos tangkas ma di roha ni sisean i, marhite hananaek ni Jesus tu banua ginjang lam patar ma huasoNa na sumurung i. Ibana do Tuhan jala Raja na marhuaso. Sian banua ginjang do haroroNa, ndang sian portibi on, jala mulak ma muse Ibana tu hasangaponNa. Jala marhite hananaek ni Jesus tu banua ginjang lam dipasingkop Jesus ma holongNa tu angka na porsea. Ai manaek ma Ibana tu banua ginjang laho parade inganan tu angka na porsea.

Dung dibuhai Jesus roha ni angka siseanNa i gabe diantusi nasida ma angka na tarsurat i (ay. 45). Tutu Jesus do mambuhai rohanasida, alai adong haoloon di angka sisean i mambungka rohanasi. Adong roha na marsitutu di angka sisean i mambuha rohanasida laos i do gabe dalan di nasida boi mangantusi angka na tarsurat i. Dung i diantusi nasida ma sangkap dohot ulaon ni Debata, i ma sangkap hasonangan do, ndada sangkap hamagoan, nang pe dimulana i maol jala ndang tarjalo roha angka na masa i (Jer. 29: 11). On ma na mambahen sumisi lungun ni roha dohot biar ni roha ni angka sisean i. Gabe talup nasida marlas ni roha situtu nang pe ingkon marsirang nasida sian Jesus. Ala pos do rohanasida di sangkap haluaon na pinarade ni Debata di ngolunasida. Laos pos ni roha i do na patogu roha ni angka sisean manjalo jala mangulahon parsuruon ni Jesus laho manghatindanghon barita haluaon na pinatupa ni Jesus, laho manjouhon saluhut bangso asa marhamubaon.

Ndang ulaon na mura na pinasahat ni Jesus. Sian na robi nunga godang angka panurirang dohot parbarita nauli na manaon na porsuk jala sahat tu hamatean ala pasahathon hata ni Debata. Diboto nasida do i jala tiur dope di parningotannasida na masa tu Jesus. Alai ndang mabiar jala tahutan nasida. Di na tarhindat Jesus tu banua ginjang jala sirang ma nasida, disomba nasida ma Jesus dung i mulak ma nasida dibagasan las ni roha godang huhut tongtong ma nasida mamujimuji Debata. ai di na tarhindat Jesus tu banua ginjang dipaherbang do tanganNa mamasumasu nasida. Lam togu ma nasida, ai manongtong do Tuhan i mamasumasu nasida. I do ojahan na arga di nasida gabe marlas ni roha situtu ma. Ndada holan sangombas i nasida marlas ni roha situtu, ndada holan na sangombas i nasida marsomba jala mamujimuji Debata. Sian pardalanan ni ngolu ni angka sisean i tung tangkas do parsitutuonnasida mangulahon parsuruon ni Jesus. Dibagasan las ni roha dohot dibagasan haporseaon na togu diulahon nasida do ulaon marbarita nauli. Nang pe godang hamaolon alai ndang gabe sumurut manang mandele nasida.

Laos songon i ma nang hita angka naung manjalo barita na uli i, ditogihon turpuk on do hita asa tongtong marlas ni roha dibagasan ngolunta. Sada joujou na arga do on jala sude do hita manghirim asa boi tongtong marlas ni roha dibagasan ngolunta. Ai di pardalanan ni ngolunta on godang do na mangambati hita marlas ni roha. Angka na masa di ngolunta jotjot mambahen hita maol marlas ni roha. Baliksa tahe godang do na boi patubu arsak ni roha di hita. Boha ma tarbahen hita marlas ni roha molo masa angka na rundut di ngolunta, isara ni maol mangatur ianakhon, maol mangalului pandaraman ni ngolu, molo masa angka parsahiton na posa, molo ndang boi dos roha ni na mardongan saripe laho mangalugahon ngolu parrumatanggaon, molo nunga jojor jojor anak dohot boru magodang di jolonta hape ndang ra ro sirongkap ni tondina, molo ndang maralus dope angka tangiangta di jolo ni Tuhan i hape nunga leleng taparungkilhon, dohot lan dope angka na asing na boi patubu arsak ni roha di hita. Boha ma tarbahen hita marlas ni roha molo masa angka na rundut i? Maol do i, molo pingkiranta tapangasahon mangadopi saluhut na masa i.

Alai molo taauhon songon na dipabotohon di turpuk on, molo tabuha pingkiranta dohot rohanta mangantusi sangkap dohot holong ni roha ni Tuhan i di ngolunta, tontu dapot hita do ojahan na togu manghaporseai Tuhan i jala laos disi ma boi jumpang hita las ni roha di ngolunta. Antong marhite ari parningotan di hananaek ni Tuhan Jesus sadari on, naeng ma tatambortambori haporseaonta tu Tuhan i asa boi jumpang hita angka silas ni roha di bagasan ngolunta. Pos ma rohanta, gok do huaso ni Tuhan i mangurupi hita di angka na borat na taadopi di ngolunta, tuk do Ibana mangaramoti jala manjagai hita asa unang marmara. Manongtong do Ibana mamasumasu hita di saluhut gulmit ni ngolunta.