Khotbah Ayub 42: 1 - 6 Tuhan Sanggup Melakukan Segala Sesuatu

 Minggu 22 Set. Trinitatis; 27 Oktober 2024

42:1 Maka jawab Ayub kepada TUHAN:

42:2 "Aku tahu, bahwa Engkau sanggup melakukan segala sesuatu, dan tidak ada rencana-Mu yang gagal.

42:3 Firman-Mu: Siapakah dia yang menyelubungi keputusan tanpa pengetahuan? Itulah sebabnya, tanpa pengertian aku telah bercerita tentang hal-hal yang sangat ajaib bagiku dan yang tidak kuketahui.

42:4 Firman-Mu: Dengarlah, maka Akulah yang akan berfirman; Aku akan menanyai engkau, supaya engkau memberitahu Aku.

42:5 Hanya dari kata orang saja aku mendengar tentang Engkau, tetapi sekarang mataku sendiri memandang Engkau.

42:6 Oleh sebab itu aku mencabut perkataanku dan dengan menyesal aku duduk dalam debu dan abu."

42:1 Dung i ninna si Job ma mangalusi Jahowa:

42:2 Nuaeng pe asa huboto, tung * guru dokmu do luhutna, jala ndang hasundatan sangkap ni roham nanggo sada.

42:3 * Ise do ibana na paholom tuptupan so marpanimbangaon? ** Tongon tahe, nunga huhatahon tutu na so huantusi; halongangan do angka i, * salpu sian rohangku jala na so huboto.

42:4 Ua tangihon ma, naeng ahu mangkatai; adong do naeng sungkunonku tu Ho, asa Ho pabotohon tu ahu.

42:5 Nunga nian dibege pinggolhon lingona taringot tu Ho, alai anggo nuaeng nunga dohot * matangku marnida Ho.

42:6 Dibahen i jora ma ahu jala husolsoli dagingku hundul di bagasan orbuk dohot sirabun.

Boasa boi masa hapariron di ngolu ni sahalak jolma na daulat, na soada hasalaan manang hahuranganna? Ndang sai mura laho mangalusi sungkun-sungkun i. Molo sian hajolmaon do hita mangalului alus, ndang siat tu pingkiranta parsorion na paet binolus ni si Job. Dung masa ma sude na hansit tu ngoluna, mago artana songon i nang ianakhonna tompu marujung ngolu ditopot angka ale-alena do ibana jala dilehon nang poda, sipaingot dohot panuturion, boasa masa na songon i tu diri ni si Job. Sude panghataion i ndang gabe mangorui sitaononna gariada tahe lam sorat do manaon na parir i. Tongtong dope ibana mangandungi siala hinahansit ni parniahapanna. Ndang mago nang holsona. Mansai leleng ditaon na marsingkor i. Nang pe songon i dokdok ni sitaonon hot do ibana ndang muba gabe manadingkon na hinaporseaanna. Satia do ibana manghaposi dohot mamuji Jahowa jala ndang olo ibana mamurai Tuhan i songon na jinujuan ni donganna i. Asa songon leleng ni panaonon ni si Job do nang hita laho mangalusi sungkun-sungkun i, ingko tongtong marhasabamon paihutihut dalan ni Jahowa tu angka na unduk mangoloi Ibana.

Marujung do parsorion na parir na niae ni si Job. Sumuang do sude angka naung mago sian parngoluonna pola tahe silompit dijalo sian Debata. Ndang salelengna dipasingkor sibolis i ngolu ni si Job. Pangunjunan na marulak loni i ingkon sidung. Asa songon dia tompu masa sude tu ngoluna, songon i do nang Tuhan i tompu do ro so panagaman ni si Job pasuang dohot pagandahon nasa na ringot di ibana. Jahowa do pargogo na so hatudosan dohot na umboto saluhut ro manopot ibana laho patangkashon hadirionNa, asa tubu di ibana panandaon na so marlaok. Ndang dalan na sala dilehon Jahowa di angka na mangihuthon Ibana nang pe ingkon mamolus parsorion na paet dohot na dangol. Gariada tahe marhite angka na masa i naeng lam tubu panandaon nang pamujion tu sangkap hatuaon ni Jahowa. Sian na masa i do si Job lam tangkas manadan dalan ni Jahowa na so hadodoan huhut mananda diri na so tuk mangantusi parsorion na masa. Laos sian na masa di diri ni si Job on ma nang hita marsiajar asa unang tibu laho mamintori diri huhut mandok mardingkan Debata molo tapatudos na masa di parngoluonta tu diri ni donganta.

Songon dia do tagamon rohanta molo mangadopi hasusaan? Ndang otik jolma mandok na so ditangi Jahowa tangiang manang pangidoanna. Nian di buku Psalmen godang do tajaha tudos tu si. Jotjot do Parpsalmen i mangandungkon hoihoina tu adopan ni Debata jala didok na so olo Ibana marnida parniahapanna. Alai sai marujung di pamujion do nang Parpsalmen marpanindangion ia Jahowa, haposan do Ibana di angka dalanNa. Ndang na dipasombu Ibana angka na hansit. Rap dohot na porsea i do Jahowa. Ro do Ibana mangurupi. Alai sipata ala madokdokhu tahilala na masa gabe holip do taida Ibana. Alani molo tapasahat pe sungkun-sungkun tu Jahowa mandok, boasa ma masa na songon on huae? Tutu sude hita ndang marlomo ni roha manaon na hansit, alai ndang tarjua molo ro. Sian haporseaon dumenggan do molo tapasungkunhon tu Jahowa, dia do lapatan ni na paet na taadopi i? Nian ndang manigor hatop ro alus molo pe angkai tapasungkunhon tu adopan ni Debata. Alai, molo so hatop pe ro alus, nunga lam neang panghilalanta manaonsa, ai diboan sungkun-sungkun i do hita manatap tu jolo ndada be manaili tu pudi, alai paimahon angka na imbaru na naeng masa, i ma angka haulion na marragam.

Ngolu ni jolma di tano on jotjot digombarhon songon parporangan. Ia niadopan ni si Job i ma sada parporangan na masai posi marparsirangguthon haporseaon dohot haunduhonna tu Jahowa. Ujung ni parporanganna na mambahen hamonangan i patubu panindangion, “nunga nian dibege pinggolhon lingona taringot tu Ho, alai ianggo nuaeng nunga dohot matangku marnida Ho”. Dung dibolus ibana parsorion na dangol i, lam tangkas ma panandaonna. Ndang holan Debata na binegena be alai nunga Debata naung diidana. On ma apala sintuhu ni parsorion i gabe panandaon na polin siala naung diida, on ma nian na ingkon suan tu bagasan rohanta. Godang do hita naung umbege jamita manang gabe parjamita, alai uju taadopi hamaolon, ndang hot hita mangunsande tu Debata. marsiajar sian angka na masa i do hita asa togu jala hot marhaporseaon di Debata Jahowa.

Di ari na parpudi on godang do jolma manghatindanghon mandok dung sun pe dibolus angka na maol asa dapot parsaulian godang. Jolo mamolus pardangolan do ibana. Sian sidangolon do godang jolma lam pasolhot diri mandapothon Debata. Sian hatorangan on do mura antusanta hata ni Jesus na mandok “martua ma na marsak roha, ai siapulan do nasida (Mat. 5: 4)”. Unang ma sitaonon paholanghon jolma sian Debata alai lam pasolhothon diri ma nian. Unang ma ala mangadopi na maol gabe mandele padao diri sian gomgoman ni Jahowa alai lam pajonok diri ma tu Debata. Apostel Paulus pe didok do di 2 Korint 1: 14 “Ai diapuli do hami dibagasan saluhut haporsuhonnami, asa tarapul hami angka dongan na dibagasan ragam ni haporsuhon, hinorhon ni apulapul na binasabasahon ni Debata tu hami.

Sahat tu ujung ni baritana ndang taida boa-boa na mandok boasa ingkon manaon na hansit si Job. Ndang apala i na ringkot sian parngoluon ni si Job. Panandaon na polin, saguru di Debata do sandok ngoluna. Ujung ni ngoluna pabotohon, saluhut do manumpak tu na denggan, nang pe sude ingkon mago, i ma angka na hinalomohonna hian. Ai Jahowa do nampuna saluhut jala di tanganNa do sude partingkian, tung pe porsuk ditaon ibana ndang dung gabe ditadingkon Jahowa ibana nang pe hira na madai dao Ibana dihilala. Asa apul-apul na denggan do barita on di hita, tarlumobi na tongon mangadopi hapariron ngolunta jala mansai maol taantusi aha na masa i boasa ingkon adopanta sudena i, alai taparhatutu ma na guru dok ni Debata do saluhut ngolunta. Ndang di dirinta hita mangolu alai ingkon di Tuhan i. Taingot ma hata ni endeta “ndada au guru di au be, Jesus do nampuna au (B.E. No. 476). Dipargogoi jala dipasupasu Tuhanta ma hita mangihuthon lomo ni roha ni Debata. amen.