Khotbah Lukas 5: 1-11 Dipanggil menjadi penjala manusia

 Minggu 5 Set. Epipanias; 09 Pebruari 2025

5:1 Pada suatu kali Yesus berdiri di pantai danau Genesaret, sedang orang banyak mengerumuni Dia hendak mendengarkan firman Allah.

5:2 Ia melihat dua perahu di tepi pantai. Nelayan-nelayannya telah turun dan sedang membasuh jalanya.

5:3 Ia naik ke dalam salah satu perahu itu, yaitu perahu Simon, dan menyuruh dia supaya menolakkan perahunya sedikit jauh dari pantai. Lalu Ia duduk dan mengajar orang banyak dari atas perahu.

5:4 Setelah selesai berbicara, Ia berkata kepada Simon: "Bertolaklah ke tempat yang dalam dan tebarkanlah jalamu untuk menangkap ikan."

5:5 Simon menjawab: "Guru, telah sepanjang malam kami bekerja keras dan kami tidak menangkap apa-apa, tetapi karena Engkau menyuruhnya, aku akan menebarkan jala juga."

5:6 Dan setelah mereka melakukannya, mereka menangkap sejumlah besar ikan, sehingga jala mereka mulai koyak.

5:7 Lalu mereka memberi isyarat kepada teman-temannya di perahu yang lain supaya mereka datang membantunya. Dan mereka itu datang, lalu mereka bersama-sama mengisi kedua perahu itu dengan ikan hingga hampir tenggelam.

5:8 Ketika Simon Petrus melihat hal itu ia pun tersungkur di depan Yesus dan berkata: "Tuhan, pergilah dari padaku, karena aku ini seorang berdosa."

5:9 Sebab ia dan semua orang yang bersama-sama dengan dia takjub oleh karena banyaknya ikan yang mereka tangkap;

5:10 demikian juga Yakobus dan Yohanes, anak-anak Zebedeus, yang menjadi teman Simon. Kata Yesus kepada Simon: "Jangan takut, mulai dari sekarang engkau akan menjala manusia."

5:11 Dan sesudah mereka menghela perahu-perahunya ke darat, mereka pun meninggalkan segala sesuatu, lalu mengikut Yesus.

5:1 Jongjong di topi tao Genesaret do Ibana sahali, di na nirongoman ni natorop Ibana, laho umbege hata ni Debata.

5:2 Jadi tongon ma diida dua parau di topi pasir; ia pardengke i nunga ruar mamburi jalanasida.

5:3 Gabe dibongoti Ibana ma parau na sada na di si Simon i, jala dipangido tu ibana, asa dipaholang parau i saotik sian pasir i. Hundul do anggo Ibana mamodai natorop i sian parau i.

5:4 Asa dung mansohot Ibana marjamita, ninna ma mandok si Simon: Lugai ma tu na umbagas jala sampakkon hamu ma jalamuna, asa dapotan.

5:5 Gabe ninna si Simon ma mangalusi: Guru! Manipat saborngin on do huhalojahon hami, so adong dapot; alai mangasahon hatami olo do ahu sumampakkon.

5:6 Dipasaut nasida ma i, gabe dapot nasida ma dengke mansai godang, pola maribak jala i.

5:7 Jala dihilap nasida ma dongannasida na di parau na sada, asa ro mandongani nasida mambuatsa. Ro do nasida, gabe digohi ma parau i duansa maradu lonong.

5:8 Marnida i si Simon Petrus, marsomba ma ibana tu jolo ni Jesus, huhut ma didok: Laho ma Ho sian ahu, Tuhan, ai halak pardosa do ahu!

5:9 Ai tarhalomong do ibana ro di sude donganna siala dengke na binuatnasida i.

5:10 Songon i do nang angka dongan ni si Simon i, si Jakobus dohot si Johannes, angka anak ni si Sebedeus. Jala ninna Jesus ma mandok si Simon: Unang ho mabiar: Olat ni on ma ho gabe sijala jolma!

5:11 Dipadarat nasida ma angka parau i, ditadingkon ma saluhutna i mangihuthon Ibana.

Turpuk on pabotohon tu hita hamuaon na radikal sian ngolu na somal tu ngolu na jinou ni Debata. Dijou Jesus do si Simon dohot si Johannes sian ulaon nasida na somal asa gabe "sijala jolma." Adong do sangkap ni Debata na umbalga tu ganup jolma na olo mangoloi Ibana. Dipaingot hita, molo mangihuthon Kristus diigil do sian hita pangoloion na tutu, dohot haporseaon tu hagogoonNa patupahon lobi sian na tapingkiri. Songon halak Kristen, tarjou do hita mangalusi joujou Na, pasahathon holongNa tu portibi on, jala gabe sitindangi na mangolu di huasoNa na paubahon ngolu.

Didok hata ni Tuhanta do: "Ganup jolma girgir ma ibana mananginangi..." (Jak. 1:19) i ma mananginangi di hata ni Tuhan i. Alai laos diuduti do pandohan i: "Alai gabe siulahon hata i ma hamu, unang holan pananginangi, angka na paotootohon dirina" (Jak. 1:22). Asa marhite pandohan i naeng tangkas idonta hadomuan ni na mananginangi dohot na mangulahon hata ni Tuhan i. Ulaon na borat do na dua on, manangihon dohot mangulahon. Holan manangihon hata pe jotjot do maol, apalagi ingkon mangulahon. Tauji ma marsuru ianakhonta laho paias jabunta. Piga ma sian ianakhonta i na pintor hobas mangulahon parsuruonta i, holan sahali tadok pintor diulahon? Maol do jumpang si songon i di roha ni angka ianakhon. Godangan do nasida, pola so dibege do hatanta i. Alai ndada holan angka ianakhonta na olo songon i. Hita angka natoras pe sipata olo do maol manangihon dohot maol hobas mangulahon parsuruon na dipasahat tu hita. Maol do jumpa halak na girgir mananginangi jala ringgas mangulahon. Hape i do didok, molo naeng sukses ngolunta ingkon olo do hita mananginangi (marsiajar) jala ingkon do diulahon asa sukses meraih cita-cita.

Alai ndang songon i anggo si Simon Petrus. Tangkas do i boi idaonta songon na dipatorang di turpuk jamita on. Tangkas do dipatorang di turpuk on na masa di tao Genesaret, uju dibongoti Tuhan Jesus parao ni si Simon jala sian parao i ma Tuhan Jesus mangajari angka natorop na olo paihutihut Ibana. Dung simpul Ibana mangajari didok ma tu si Simon: "Lugai ma tu na umbagas jala sampakkon hamu ma jalamuna, asa dapotan hamu" (ay. 4). Dung dibege si Simon hata ni Tuhan Jesus i, gabe ninna si Simon ma mangalusi: "Guru! Manipat saborngin on do huhalojahon hami, so adong dapot; alai mangasahon hataMi olo do ahu sumampakkon jalaon" (ayat 5).

Sasintongna marhite pengalaman ni ngoluna songon pardengke, tontu maol do tarjalo roha ni si Simon parsuruon ni Tuhan Jesus i, hira na marsuang do molo diulahon ibana parsuruon ni Tuhan Jesus i. Ai marhite pengalaman songon pardengke tangkas do diboto ibana na so tupa jumpang nasida dengke molo manangkup dengke di tiur ni ari, ai ndang partingkian na lehet i laho manjala dengke. Tarlumobi ala tangkas do diboto si Simon paboa anak ni tukang hau do Tuhan Jesus, ndang anak ni sijala dengke. Alani i songon anak ni tukang hau, aha ma ojahan ni Tuhan Jesus mangalehon parenta tu si Simon laho manjala dengke. Sian hajolmaon ni Tuhan Jesus tutu do maol tarjalo roha parenta na pinasahat ni Tuhan Jesus tu si Simon. Alai ndang hajolmaon ni Tuhan Jesus (songon anak tukang hau Ibana) na diida si Simon. Tangkas do panjouon ni si Simon tu Tuhan Jesus marhite na didok ibana: "Guru!" Sahalak Guru na tuk jala na marhuaso mangajari huhut manuturi do anggo Tuhan Jesus di roha ni si Simon. Alani do ditangihon ibana do hata ni Tuhan Jesus jala diulahon. "Guru! Manipat saborngin on do huhalojahon hami, so adong dapot dengke di hami; alai mangasahon hataMi olo do ahu sumampakkon jalaon." Nang pe nunga tung mansai loja dihilala rohana, alai rade do si Simon mangulahon hata ni Tuhan Jesus laho sumampakkom jalana.

Marparbue na denggan do tutu pangoloion ni si Simon i tu hata ni Tuhan Jesus, dapotan dengke do nasida na mansai godang. Songon hata Batak i: dapot na niluluan jala jumpang na jinalahan nasida. Alai ndada holan roha pangoloion na tarida disi, huhut do patar kerja keras dohot habengeton. Ai nunga loja nasida ala nunga manipat saborngin nasida mangula laho manjala dengke, alai ndang na gabe manjua nasida di parsuruon ni Tuhan Jesus tu nasida. Baliksa tahe, di bagasan haunduhon dohot benget ni roha do dioloi parsuruon ni Tuhan Jesus jala diulahon nasida na didok Tuhan Jesus i. Jala tutu ma, songon hata ni Tuhan Jesus i: "Asa dapotan" dapotan do tutu nasida jala ndang holan dapotan alai dapot nasida ma dengke na mansai godang, pola maribak jala nasida, pola ndang siat parao nasida ala godang ni dengke i. Gabe dihilap nasida ma dongan nasida na di parao na asing asa ro mandongani nasida mambuat dengke na mansai godang i. Las ma roha nasida ala gok ma tutu dengke di dua parao i.

Si Simon ndada holan dapotan di dengke na tung mansai godang, alai tarlumobi dapotan parbinotoan na arga situtu do ibana, gabe tangkas ma panandaion ni si Simon tu Tuhan Jesus. Guru dokNa do saluhutna na adong di portibi on. Alani i do umbahen na marsomba ibana tu Tuhan Jesus huhut ma didok si Simon: "Tuhan." Ndang be didok si Simon "Guru" ala nunga tangkas diboto jala ditanda si Simon paboa "Tuhan" do Jesus i. Alani tung mansai metmet ma diida ibana dirina di jolo ni Tuhan Jesus na marhuaso i, ai dihilala ibana do dirina songon halak pardosa, gabe didok ibana ma: "Laho ma Ho sian ahu, Tuhan, ai halak pardosa do ahu." Alai umbege hata ni si Simon i pintor didok Tuhan Jesus ma tu ibana: "Unang ho mabiar! Olat ni on ma ho ale Simon, ndang sijala dengke be ho, alai gabe sijala jolma ma ho jala ihuthon ma Ahu."

Di turpuk on, taida do songon dia rumang ni pangoloion ni si Simon, nang pe digohi ganggu ni roha, alai olo mangoloi panjouon ni Debata jala rade ibana manadingkon ngolu na buruk asa gabe imbaru di bagasan Debata. Transformasi on manggombarhon songon dia Jesus paubahon tujuan ni ngolu ni sasahalak sian holan na di portibi on gabe ulaon partondion. Di ngolu na lam materialistis on, godang do jolma na mangeahi holan hamoraon, hagabeon, hasangapon. Ndada sala i. Alai ingkon huhut itaingot ia panjouon ni Kristus i ma ngolu na lobi sian angka na di portibi on. Dijou do hita gabe sitindangiNa, mamboan dongan tu Ibana marhite ngolu dohot pambahenanta. Disosoi do huria marnida ulaon dohot ngolu siganup ari songon dalan laho pararathon Barita na Uli, gabe sijala jolma di parsaoranna di huta manang di ulaon siapari, parkarejoan, keluarga, dohot masyarakat na humaliang, suang songon i tu angka dongan na so sahaporseaon.

    Godang do jolma nuaeng on mangadopi ketidakpastian di ragam ni ngolu-ulaon, hahipason, parsaoran, manang masa depan. Songon si Simon, jotjot do hita loja jala ganggu rohanta. Nunga marsitutu mangula alai ndang tarida parbuena. Ndang tarbahen hita marhasil molo holan sian gogonta sandiri. Pangoloion tu panjouon ni Kristus do na boi mambahen hita boi manatap mardongan panghirimon. Pangoloion on ma na mangungkap pintu tu halongangan dohot pasupasu na marlobilobi, andul sian na boi tapingkiri. Ditogihon do ganup ruas ni huria asa marhaporseaon huhut marhaposan tu Debata di ganup hamaolon na taadopi jala huhut tinggil mambege joujouNa, atik pe so tarida dope parbue ni na niula. Uli jala denggan situtu do tahe parbue ni pangoloion ni jolo ni Tuhan Jesus i. I do na tangkas tarida sian na masa di turpuk jamita on. Diloas Tuhan Jesus do si Simon, rap dohot angka donganna parjala dengke i, suang songon i nang angka natorop na marpungu di topi tao Genesaret, marnida holong ni roha dohot huaso halongangan na pinatupa ni Tuhan Jesus. Asa marhite barita nauli on naeng gabe tiruan na denggan ma di hita haradeon ni si Simon manangihon hata ni Jesus dohot mangoloi parsuruon i. Di tonga-tonga ni godang ni angka na ringkot taulahon, naeng talehon tingkinta dohot rohanta manangihon hata ni Tuhan i. Taingot ma na tarsurat di Psalmen 119:105 "HataMi do sulusulu ni pathu jala hatiuron di dalanku." Amen.