Khotbah Matius 5: 38-48 Mengasihi Musuh

 Minggu Sexagesima; 23 Pebruari 2025

5:38 Kamu telah mendengar firman: Mata ganti mata dan gigi ganti gigi.

5:39 Tetapi Aku berkata kepadamu: Janganlah kamu melawan orang yang berbuat jahat kepadamu, melainkan siapa pun yang menampar pipi kananmu, berilah juga kepadanya pipi kirimu.

5:40 Dan kepada orang yang hendak mengadukan engkau karena mengingini bajumu, serahkanlah juga jubahmu.

5:41 Dan siapa pun yang memaksa engkau berjalan sejauh satu mil, berjalanlah bersama dia sejauh dua mil.

5:42 Berilah kepada orang yang meminta kepadamu dan janganlah menolak orang yang mau meminjam dari padamu.

5:43 Kamu telah mendengar firman: Kasihilah sesamamu manusia dan bencilah musuhmu.

5:44 Tetapi Aku berkata kepadamu: Kasihilah musuhmu dan berdoalah bagi mereka yang menganiaya kamu.

5:45 Karena dengan demikianlah kamu menjadi anak-anak Bapamu yang di sorga, yang menerbitkan matahari bagi orang yang jahat dan orang yang baik dan menurunkan hujan bagi orang yang benar dan orang yang tidak benar.

5:46 Apabila kamu mengasihi orang yang mengasihi kamu, apakah upahmu? Bukankah pemungut cukai juga berbuat demikian?

5:47 Dan apabila kamu hanya memberi salam kepada saudara-saudaramu saja, apakah lebihnya dari pada perbuatan orang lain? Bukankah orang yang tidak mengenal Allah pun berbuat demikian?

5:48 Karena itu haruslah kamu sempurna, sama seperti Bapamu yang di sorga adalah sempurna."

5:38 Dibege hamu do hata na mandok: "Mata do abul ni mata; ipon do abul ni ipon!"

5:39 Alai Ahu mandok tu hamu: Unang alo hamu na jahat! Molo adong na mamastap hurum siamunmi, tarehon ma nang hurummu sihambirang!

5:40 Molo adong na naeng mambahen sindir tu ho, laho mambuat ulosmu, atena ma dohot bajubajum di ibana!

5:41 Molo adong manang ise na manggogoi ho mandongani ibana sapaal, oloi ma ibana dua!

5:42 Lehon na mangido tu ho! Unang tundali na naeng marsali tu ho!

5:43 Dibege hamu do hata na mandok: "Holong ma roham di donganmi; hosom ma ia di musum!"

5:44 Alai Ahu do mandok tu hamu: Holong ma rohamu di musumuna; tangiangkon hamu ma angka na paburuburu hamu.

5:45 Asa tung gabe anak ni Amamuna na di banua ginjang i hamu: Ai dipabinsar do mata ni arina tu angka parroha na jahat nang tu na bonar, diparo do udan tu parroha na tigor nang tu na geduk.

5:46 Ai molo holong rohamuna holan di angka na mangkaholongi hamu, dia ma upamuna? Gari angka sijalobeo, nda songon i do dibahen?

5:47 Dia do hasurunganmuna, molo denggan hatamuna holan tu angka donganmuna? Gari angka sipelebegu, nda songon i do dibahen?

5:48 Ipe, ingkon sun denggan do rohamuna songon Amamuna di banua ginjang na sun denggan roha i!

Adong do sada pandohan ni halak Batak songon on: "mardomu di tano rara". Lapatanna, halak na marsalisi manang marbada tung so olo do mardomu manang mardame. Dung jolo mate pe ninna asa mardomu. Jala di tradisi ni halak Batak na parjolo andorang hakristenon, adong do na nidokna "manguji" i ma laho manontuhon na sintong dohot na sala ala ndang tarjalo nasida haputusan sian panguhum. Molo ndang tarjalo muse haputusan dungkon manguji, dipangido pihak na talu ma "marmusu" manang marporang. Sai adong do na merasa dirugikan jala ndang puas molo ndang dibaloshon hajahaton na masa tu nasida. Ra, jumpang dope na songon i sahat tu nuaeng. Marhadomuan do i tu turpuk jamita on. Jala marhite turpuk on naeng patuduhonon ni Jesus tu angka siseanNa nang tu hita di tingki on, ndang songon pangantusionta i na masa. Bahkan, na nidok ni Jesus i, ra, maralo do tu roha ni godangan hita jolma. Turpuk on, songon sada bagian ni jamita ni Jesus di dolok, i ma angka jamita taringot tu pangalaho ni angka sisean manang siihuthon Kristus.

"Dibege hamu do hata na mandok: mata do abul ni mata, ipon do abul ni ipon." Lapatan ni pandohan on i ma: na pinasahat ni Jesus i nunga adong di hasomalan manang di angka uhum ni halak Jahudi. Jala di Padan na Robi pe, boi taida di 2 Musa 21: 24, 3 Musa 24: 20, 5 Musa 19: 21. Mura do ra antusan pandohan on "mata abul ni mata, ipon abul ni ipon." Lapatanna, mambaloshon hajahaton na masa tu diri ni sasahalak jolma manang na jotjot didok balas dendam. Sasintongna, pandohan on sada uhum do i laho mangatur haputusan ni angka panguhum (hakim). Songon sada uhum, ndang boi dohonon ndang sintong manang ndang adil i. Ndang na disalahon Jesus uhum i ala memang ulaon ni panguhum do i, jala ndang na gabe diparsoada Ibana i. Na gabe persoalan i ma: uhum i ndada gabe holan urusan ni panguhum, alai torop sian angka halak Jahudi mamangke i secara pribadi manang urusan pribadi, songon na ginoaran nuaeng on "main hakim sendiri" laho balas dendam. Jadi, dihilala nasida do sintong mambaloshon hajahaton na masa tu nasida marhite uhum nangkin i. "Molo hujalo na hansit sian ho, ingkon jaloonmu do na hansit sian au". Hirahira songon i ma lapatanna. On do na diprotes manang dikritik Jesus taringot tu uhum i. Na naeng dohonon ni Jesus i ma ndang boi pangkeon uhum laho mambaloshon dendam pribadi. Holan angka panguhum do na boi mangulahon i secara hukum, ndada tu urusan pribadi, termasuk ma angka panguhum i sandiri.

Ndang holan balas dendam na diorai Jesus dison, dohot do nang perlawanan. Dipatorang Jesus do songon dia mangadopi halak na mangulahon na jahat tu hita, marhite angka tudosan. Na parjolo, pastappastap di siamun jala lehonon ma hurum sihambirang. Na paduahon, adong na mambuat ulosmu, lehon ma nang bajubajum. Na patoluhon, mangido mardalan sapaal, dongani ma 2 paal. Ra, ndang na mura on ulahononhon. Ai molo adong na mamastap hurumta, olo do ra pintor muruk manang sogo ni roha na ro, jala naeng baloshononhon di tingki i. Molo adong mambuat ugasanta ndang sian pamotoanta, tong do ra gabe muruk na ro. Molo adong na mamaksa hita mandongani sasahalak mardalan, gabe ro do ra sogo ni roha. Alai na naeng dohonon ni Jesus dison i ma unang alo, unang baloshon angka pangalaho si songon i, unang gabe dohot hita mardosa. Ndada holan mandok asa unang tabaloshon angka pangalaho si songon i, alai Jesus mandok asa tahaholongi nasida. Di ayat 42 tangkas didok: "Lehon na mangido tu ho! Unang tundali na naeng marsali tu ho. Ndang holan "unang mambaloshon", alai haholongi nasida.

Ndada sada ulaon na mura i. Alai angka pangalaho sisongon i do pangalaho ni angka na mangihuthon Jesus. Jesus sandiri pe diulahon do i. Tingki ditijuri, dipastap, direhei jala diparsilangkon Ibana, tung sahali pe ndang adong dibaloshon ibana i. Na ruar sian pamanganNa holan on do: "Ale amang, marpamuati ma rohaM mida nasida, ai ndang diboto nasida na binahennasida i" (Luk. 23: 34). Holong do dipatudu ibana tu nasida pola mate ibana. Jala margogo do holong i paubahon roha ni angka na mangulahon hajahaton i. Ragam do masa tu angka si ula hajahaton. Dipuji letnan i do Debata dung diida mate Jesus, disolsoli si i Judas do rohana, dina. Mangula do holong i paubahon roha.

Na mangihut, naeng ma tahaholongi angka na manghosomi hita jala manangianghon nasida (ay.43-44). Molo di halak Jahudi holan donganna sabangso do dongan di nasida, sude na di luar ni bangso Jahudi, ndang dongan nasida alai musu nasida do i, nang pe ndang adong dihosomi bangso na asing nasida, alai molo di halak Jahudi sude bangso na asing musu nasida do dianggap nasida. Ala dianggap nasida sude bangso na asing ndang dohot i di bagasan Harajaon ni Debata, ala manomba debata sileban do angka bangso na asing hatiha i. Jala fanatisme hajahudion mansai melekat do di bangso Jahudi. Alani didok Jesus tu halak Jahudi na mambage pangajarion ni Jesus, asa dihaholongi nasida sude bangso na asing na dianggap nasida na gabe musu nasida. Mansai maralo do on tu pingkiran ni halak Jahudi na nidok ni Jesus on.

Manghaholongi musu marhite na dalan do i asa adong pertobatan di angka na manghosomi hita. On do manangianghon nasida, sada perbedaan ciri khas halak siihuthon Kristus, na manghaholongi angka na manghosomi hita. Marhite na manangianghon nasida, mangula ma Tondi Parbadia di bagasan roha nasida gabe disolsoli ma hajahatonna jala mulak tu dalan na ture. Sotung tarimpu ndang adong keuntungan di hita molo tatangianghon angka na manghosomi hita. Mansai godang pasupasu tu hita molo tatangianghon angka na manghosomi hita, pasupasu di partondion nang di pardagingon pe i. Angka na manangianghon halak na manghosomi ibana, ndang adong be dendam di bagasan rohana, gok dame ala adong roha pengampunan di ibana. Halak na so memiliki dendam, tarida do i sian pambahenanna tu angka donganna, gok dame jala ndang olo mamaloshon hansit ni rohana tu donganna. Alai halak pendendam sai dibaloshon ibana do hansit ni rohana tu halak na dihasogohon rohana. Apalagi molo adong di tanganna huaso dohot jabatan, marlomolomo do ibana manindos donganna mamaloshon dendam na di bagasan rohana. Tarida do i di tonga ni huria nang di tonga ni bangsonta on. Alani unang tatiru angka na mangulahon si songon i di huria nang di tonga ni bangsonta, tatangianghon ma nasida asa Debata na mamoloshon tu nasida angka pambahenan nasida na jat i. Ihut tusi unang taburai halak na mamurai hita dohot na manindos hita alai tapasahat tu Debata asa Debata na mamaloshon bubura na haruar sian pamanganna.

Hasurungan ni halak siihuthon Jesus, i ma manghaholongi angka na manghosomi dirina. Molo holan donganna na sahorong dohot ibana do na dihaholongi sarupa do ibana dohot parjahat na holan manghaholongi donganna parjahat. Ndang adong imbarna dohot parjahat na holan manghaholongi donganna parjahat. Alani parjahat do halak molo holan donganna na sahorong, sajabatan, sakelompok, sagolongan na dihaholongi. Marlangku do hata ni Debata on tu sude siihuthon Jesus, asa naeng ma sun denggan angka siihuthon Jesus songon parrohaon ni Debata na di ginjang na sun denggan roha tu saluhut halak (ay.48). Songon Debata na parohon udan dohot mataniari tu sude halak parroha na jat dohot tu angka na bonar roha, naeng ma songon i hita tu sude jolma nang angka na manghosomi hita (ay.45). Gabe angka sibahen dame hita, unang be nian masa pandohan “mardomu di tano na rara”. Pandohan ni Jesus nama na sai tadok, “Sai marparmuati ma roham dihajahatonnasida. On ma hatandianta songon anak ni Debata hita. Amen!