Khotbah Yeremia 17: 12-18 Tuhan Pengharapan Kita

 Minggu Septuagesima; 16 Pebruari 2025

17:12 Takhta kemuliaan, luhur dari sejak semula, tempat bait kudus kita!

17:13 Ya Pengharapan Israel, TUHAN, semua orang yang meninggalkan Engkau akan menjadi malu; orang-orang yang menyimpang dari pada-Mu akan dilenyapkan di negeri, sebab mereka telah meninggalkan sumber air yang hidup, yakni TUHAN.

17:14 Sembuhkanlah aku, ya TUHAN, maka aku akan sembuh; selamatkanlah aku, maka aku akan selamat, sebab Engkaulah kepujianku!

17:15 Sesungguhnya, mereka berkata kepadaku: "Di manakah firman TUHAN itu? Biarlah ia sampai!"

17:16 Namun tidak pernah aku mendesak kepada-Mu untuk mendatangkan malapetaka, aku tidak mengingini hari bencana! Engkaulah yang mengetahui apa yang keluar dari bibirku, semuanya terpampang di hadapan mata-Mu.

17:17 Janganlah Engkau menjadi kedahsyatan bagiku, Engkaulah perlindunganku pada hari malapetaka.

17:18 Biarlah orang-orang yang mengejar aku menjadi malu, tetapi janganlah aku ini menjadi malu; biarlah mereka terkejut, tetapi janganlah aku ini terkejut! Buatlah hari malapetaka menimpa mereka, dan hancurkanlah mereka dengan kehancuran berganda.

17:12 Oe habangsa ni hamuliaon, hatimboon sian mulamula, hajongjongan ni habadiaonnami!

17:13 Ale Jahowa, ho do pangkirimon ni Israel! Saluhut angka na tumadingkon ho gabe tarurak; angka na marbalik sian ahu, ingkon tarsurat goarna tu tano, ala * tinadingkonnasida mual ni aek hangoluan, i ma Jahowa.

17:14 Sai ho ma pamalum ahu, ale Jahowa, asa tung malum huhilala; sai ho ma mangurupi ahu, asa tung dapotan pangurupion ahu, ai ho do pujipujionku.

17:15 Ida ma, angka nasida mandok tu ahu: Didia do hata ni Jahowa i? Uaro ma nian nuaeng!

17:16 Alai anggo ahu, ndang husonsonhon gabe parmahan ahu mangihuthon ho, jala ndang huhalomohon ari na marjea i, ho do umbotosa; hata na ruar sian bibirhu pe patar do i di jolo ni bohim.

17:17 Unang tung gabe hasonggoton ho di ahu, ho do haporusanku di ari hasusaan.

17:18 Ingkon tarurak nian angka na mangalele ahu, alai unang tarurak anggo ahu; ingkon tarsonggot nasida, alai unang tarsonggot anggu ahu, paro ma tu atasnasida ari hinamago, jala silompit dua hapipidomnasida i.

Panghirimon, on ma na ringkot dingolu ni hita jolma, lumobi molo mangadopi ragam hamaolon manang sitaonon, pangkirimon manghorhon hagogoon sian Debata asa manahan hita. Di tonga-tonga ni portibi na sai mubamuba on, torop do halak marpangkirimon tu joma na bersifat parsatongkinon; songon hamoraon, huaso manang manang gogo ni jolma. Diadopi panurirang Jeremia do hamaolon di ulaonna na manjou asa marhamubaon bangso i. Hata ni Debata do na dipasahat tu nasida alai tong dijua. Dihirim rohana do nian asa unang adong na hona uhum ni Jahowa, alai ndang dijangkon barita i, baliksa tahe dialo. Marbonsir sian na masa i holan sada nama na dibahen si Jeremia, martangiang tu Debata Jahowa. Di tangiang i ma dipatolhas sude na pinarungkilhonna, aha ma jambar sijaloon ni jolma na so olo muba jala dia sijaloon ni na olo marhamubaon.

Dibuha panurirang Jeremia do tangiangna manjou, "Oe habangsa ni hamuliaon, hatimboon sian mulamula, hajongjongan ni habadiaon-nami". Nang pe naung muruk jala marsigorgor jut ni rohana, alai hot do pamujionna di Jahowa. Ditanda ibana do tu ise ibana martangiang jala dia ma sidohononna. Sian panandaon i do ibana manjou Jahowa na hundul di habangsa ni hamuliaon. Ndang tuk nian sian hadirionna mandapothon Jahowa alai ala naung dijou do ibana gabe naposoNa umbahen dipatau manjou na badia i. Pangidoan parjolo di tangiangna i didok, "Ale Jahowa, Ho do panghirimon ni Israel". Ndang adong hagogon dia pe na talup gabe sihirimon di bangso i so holan Jahowa. Pandohan on marbonsir sian tahi ni raja Juda na mangido hagogoon sian bangso sileban ala naung diondam hagogoon ni raja Babel nasida. Dipangido raja i do haradeon ni raja Misir mangurupi nasida laho mangadopi Babel. Nunga nian dipinsang jala dipaingot si Jeremia raja i asa unang mangalualu dohot mangido pangurupion sian bangso na asing. Alai dituntun do lomona. I do alana gabe tarurak bangso i ala naung ditadingkon Jahowa. Talu do bangso Juda dohot na mangurupi nasida mangadopi hagogoon ni bangso Babel. Angka na mangido pangurupion sian na leban siala manundalhon Jahowa sai na tarurak do ngoluna. Angka na manjua hata ni panurirang siala suhar tu pingkiranna sai na maila do ujung ni ngoluna. On do na masa tu bangso Juda hatiha i, ala ndang mangasahon gogo ni Jahowa.

Dung marsak roha ni panurirang Jeremia jala hira naung marsahit dihilala dipangido ma tu Jahowa, "Sai Ho ma pamalum ahu ale Jahowa asa tung malum huhilala. Sai Ho ma mangurupi ahu, asa tung dapotan pangurupion ahu, ai Ho do pujipujionhu". Dipaima ibana Jahowa patupahon pangidoanna. Diadopi panirirang i do haporsuhon, alai ala Jahowa do na manjou ibana tu ulaoan i, ingkon tu Jahowa do ibana mangalualu pasahathon sude holso nang hoihoina. Ndang adong be jolma na mangantusi parniahapanna dung gabe siboan barita ni Debata. Gariada tahe ditulak natorop ibana ala disurirangkon halelengse ni Jerusalem dohot bagas joro i. Diinsahi do ibana jala dileai ala na so manolopi tahi ni raja Juda. I do sialana didok di ayat 15, "Ida ma, angka nasida mandok tu ahu: Di dia do hata ni Jahowa i? Ua ro ma nian nuaeng". Nda na mangarehei do i? On ma apala na dumangol diae sahalak panurirang ala ndang sai olo natorop i manjangkon barita na pinasahat ni Jahowa taringot tu nasida.

Nunga sai hira na marsak situtu panurirang Jeremia marnida pangalaho luhut bangso Juda ala na so olo nasida mangihuthon tona ni Jahowa. Sai didatdati do marsomba angka ganaganaan, ndang olo mulak tu Jahowa. Dokdok do dihilala Jeremia hatangkangon ni bangso i ala nunga diida pangungkapon ni Jahowa na ingkon suda nasida bahenon ni Babel. Dihirim rohana unang ma nian adong na mago sian bangso i siala jogalna. Sai hira na mandele nama ibana mandok, "Alai anggo ahu, ndang husonsonhon gabe parmahan ahu mangihuthon Ho; jala ndang huhalomohon ari na marjea i. Ho do umbotosa, hata na ruar sian bibirhu pe patar do i di jolo ni bohiM" (ay.16). Ndang na mamintori diri si Jeremia di pandohanna i. Ndang na manolsoli ibana di ulaon naung jinalona gabe siboan barita ni Debata. Holan na paboahon jut ni rohana do ibana. Lapatanna, panurirang pe ibana ndang ala na dipangido tu Debata asa gabe parmahan tu bangso Juda. Asa ias do si Jeremia sian roha diri. Ndang asa gabe sangap jala dipuji natorop ibana umbahen dibaritahon hata ni Debata. Ndang na ditambai ibana hata na pinasahat ni Jahowa tu ibana. Habuluson ni rohana do na pinaboa di angka pandohan i. Di panandaon diri i ma si Jeremia mangido tu Jahowa, "Unang tung gabe hasonggotan Ho di ahu, Ho do haporusanhu di ari hasusaan" (ay.17). Marhite pandohan on tangkas do dipaimbar ibana dirina sian angka na torop i. Jahowa do haporusanna ndang bangso sileban. Jahowa do hagogoonna ndang huaso ni portibi. Parsihohotonna tu Jahowa do pos ni rohana, tung na so tagamon marmara ibana di ari hinamago i.

Dung dipatolhas si Jeremia na sonson dibagasan rohana, didok ma, "ingkon tarurak nian angka na mangalele ahu, alai unang tarurak anggo ahu, ingkon tarsonggot nasida, alai unang tarsonggot anggo ahu, paro ma tu atas nasida ari hinamago, jala silompit dua hapipidomnasida" (ay. 18). Nunga diboto panurirang i ndang haambatan be rimas ni Jahowa. Ndang mombun be panghilalaanNa sian muruk na marsigorgor i. Ingkon hona uhum nama Juda. Ala nunga jotjot dipaingot panurirang i nasida alai ndang olo muba jala nunga mansai godang dilumbahon hasusasaan na ingkon jaloonnasida alai ndang olo porsea di hata ni Debata. Hatangkangon i do na mangido uhum. Jogal nasida i do na manjou ari hinamago. Nian ndang dihalomohon si Jeremia masa na songon i. Alai, holan marhite uhum i nama mangajari nasida mananda dalan ni Jahowa. Dung pe diuhum Jahowa nasida asa olo mulak tu Ibana.

Na masa di ngolu ni panurirang Jeremia, masa do nang di ngolu ni Tuhanta Jesus. Dijou ibana bangso Jahudi asa olo manjangkon asi ni roha ni Debata, ai nunga songgop harajaon banua ginjang, alai ditulak bangso i. Jamita dohot ragam panghobasion nunga dipatupa Jesus di adopan ni natorop alai ndang dijangkon haroroNa na mamboan haluaon ni Jahowa. Alai, songon dia do bangso Jahudi mangangkupi Jesus di panghobasionNa i, piga do sian nasida na rade manjalo barita haluaon ni Jesus i? Songon panuriang Jeremia do Jesus di jolo ni halak Jahudi. Ditulak do Ibana jala dipasiding. Dileai jala direhei do haroroNa nang pe naung tangkas dipatuduhon hadirionNa songon Mesias na sinuru ni Jahowa. Nuaeng dia ma sipeoponta sian jamita on?

Parjolo, marhite turpuk jamita on dijou do hita asa unang marguru tu pingkiranta manang marpangunsandean holan tu hatauonta. Taingot ma na masa tu bangso Juda, uhum ni Jahowa do na sahat tu nasida ala ndang dijangkon sipaingot dohot panuturion ni naposoNa. Paduahon, tatanda ma dirinta! Ndang tuk gogonta nang pingkiranta laho mangadopi hamaolon na ro tu parngoluonta. Tapasahat ma sude tu adopan ni Debata. Tatiru ma parange ni panurirang Jeremia na olo mangalualu tu Jahowa mangido pangurupion. Patoluhon, molo adong na hurang singkop di ngolunta, tapangido ma tu Debata. Godang do ra na mambahen marsak rohanta manang na mambahen sundat hita marlasniroha. Boi do i gabe sibingkasi ni sahit. Mangadopi pangalaho si songon i, tapangido ma hamamalum sian Ibana asa hisar daging dohot tondinta. Paopathon, molo diida ho jolma pardosa sai hira na sonang ngoluna unang tiru manang parguru, alai tagonan tundalhon. Ingkon sai hona uhum do angka pardosa, ndang lias rimas ni Debata sian pardosa. Palimahon, jolma na satia mangihuthon Jahowa, sai dipamonang do di paraloanna. Songon si Jeremia na malua sian hasusaan naeng ma nian hita parsidohot di haluaon na pinatupa ni Tuhanta Jesus i, Amen!