Khotbah Bilangan 21: 10 - 20 Tuhan Sumber Air Kehidupan

 Minggu Letare; 30 Maret 2025

21:10 Kemudian berangkatlah orang Israel, lalu berkemah di Obot.

21:11 Berangkatlah mereka dari Obot, lalu berkemah dekat reruntuhan di Abarim, di padang gurun yang di sebelah timur Moab.

21:12 Dari situ berangkatlah mereka, lalu berkemah di lembah Zered.

21:13 Dari situ berangkatlah mereka, lalu berkemah di seberang sungai Arnon yang di padang gurun dan yang keluar dari daerah orang Amori, sebab sungai Arnon ialah batas Moab, di antara orang Moab dan orang Amori.

21:14 Itulah sebabnya dikatakan dalam kitab peperangan TUHAN: "Waheb di Sufa dan lembah-lembah ke sungai Arnon,

21:15 dan lereng lembah-lembah; lereng itu terbentang ke tempat di mana terletak kota Ar, dan bersandar pada batas daerah Moab."

21:16 Dari sana mereka ke Beer. Inilah sumur di mana TUHAN berfirman kepada Musa: "Kumpulkanlah bangsa itu, maka Aku akan memberikan air kepada mereka."

21:17 Pada waktu itu orang Israel menyanyikan nyanyian ini: "Berbual-buallah, hai sumur! Mari kita bernyanyi-nyanyi berbalas-balasan karena sumur yang digali oleh raja-raja,

21:18 yang dikorek oleh kaum bangsawan di antara bangsa itu dengan tongkat-tongkat kerajaan, dengan tongkat-tongkat mereka." Dan dari padang gurun mereka ke Matana;

21:19 dari Matana ke Nahaliel; dari Nahaliel ke Bamot;

21:20 dari Bamot ke lembah yang di daerah Moab, dekat puncak gunung Pisga yang menghadap Padang Belantara.

21:10 Dung i borhat ma halak Israel sian i jala marsaro di Obet.

21:11 Dung i borhat muse nasida sian Obet jala marsaro di bona ni dolok Abarim di halongonan, tondong ni Moab, tungkan habinsaran.

21:12 Borhat muse nasida sian i jala marsaro martopihon sunge Zered.

21:13 Borhat muse nasida sian i jala marsaro di bariba i sunge Arnon na mardalan di halongonan, na marharoroan sian partalpahan ni halak Amori; ai Arnon i do parbolatan ni Moab, di holangholang ni Moab dohot Amori.

21:14 Ala ni do umbahen tarsurat di bagasan buku parporangan ni Jahowa: Mardonokkon Waheb di Supa dohot mardonokkon angka sunge ni Arnon.

21:15 Tole muse hapuasan ni angka sunge, angka na mabaor tungkan inganan Ar, jala mandiori di partalpahan ni Moab.

21:16 Borhat muse nasida sian i tu Beer (sumur); i ma sumur i, na nidok ni Jahowa tu Musa: Papungu ma bangso i, asa Ahu mangalehon aek inumon tu nasida.

21:17 Uju i ma diendehon halak Israel hata ni ende on: "Binsat ma ho, ale sumur, marende taripar ma hamu!

21:18 I ma sumur na hinali ni angka induk, na saut nidungkir ni halak na sangap sian bangso i marhite sian tungkot harajaon, marhite sian angka tungkotnasida i tahe." Dung i borhat muse nasida sian halongonan tu Matana.

21:19 Jala sian Matana tu Nahaliel, jala sian Nahaliel tu Bamot.

21:20 Jala sian Bamot tu rura na di ladang ni Moab na patondong dohot punsu ni Pisga, panatapan tungkan halongonan.

Letare, marlas ni roha ma hamu; i do goar ni Minggu sadarion. Dijou hita marlas ni roha. Aha do sihalashonitegu on Slas rohanta molo godang arta portibi, molo marhasil ulaonta dohot molo malua hita sian parungkilon. Las roha ni halak Batak, molo gabe, mamora dohot sangap. Boi do hagabeon, hamoraon dohot hasangapon i mangalehon las ni roha molo marojahan tu haporseaon di Jesus, sabalikna mamboan haporsuhon do i molo pamangkeonna ndang marojahan tu haporseaon. Molo diarahon goar ni minggu on hita mar-Letare, marlas ni roha, na nidokna: Marlas ni roha hita ala diasii, ala dipalua Tuhan i hita sian uhum dosa dohot sian hamagoan. Aha ma las ni roha sipasahaton ni jamita on di Minggu Letare on? Las ma rohanta molo porsea hita Debata do mual haroroan ni hangoluan di hita. Domu tusi do na pinasahat ni tema ni jamita on: Debata do mual ni Aek Hangoluan. Aek, i do sada sian kebutuhan pokok ni nasa na mangolu di portibi on. Aek i do sada unsur na mambahen mangolu jolma, suansuanan dohot pahanpahanan. Nang tano i pe ndang boi mangalehon hangoluan molo so adong aék. Molo so adong aek ndang mangolu jolma, suansuanan dohot pahanpahanan.

Di turpuk on dipatorang do pardalanan dohot pengalaman ni bangso Israel dohot inganan paradianan nasida sahat tu tano Moab. Dung i taipar ma nasida tu sunge Jordan laho tu tano Kanaan, idaon di hatorangan ni turpuk i hira na lam hatop bangso Israel mardalan ala nunga lam jonok be nasida tu tano Kanaan. Pardalanan bangso na disurathon di turpuk on sasintongna patuduhon na adong progres manang hamajuon di pardalanan nasida di na lam donok nasida tu tano Kanaan. Molo taida di pardalanan bangso i andorang so sahat di Obet, tung ganjang do pardalanan nasida gok parungkilon ala hatangkangon ni roha nasida, alai sai tong do nasida ditogutogu marhite pinsangpinsang (teguran) na koras na sian Debata. Tarlumobi diboto Debata do kebutuhan ni bangso i, i ma aek, jala diparade Debata do di nasida marlobilobi asa unang sai marungutungut bangso i. Molo na sai laon sai marungutungut do bangso i andorang so dilehon Debata tu nasida aek (molo ndang adong aek), alai di turpuk on dipatorang ndang marungutungut be bangso i, alani pintor dilehon Debata ma aek tu bangso i andorang so marungutungut.

Di turpuk on dipatorang do huaso ni Debata na mandongani bangsoNa na mamolus angka sunge di Arnon dohot di holangholang ni wilayah ni bangso Moab dohot Amori (ayat 13-15). Jala nunga sahat nasida manghaliangi tano Edom na so boi gangguon manang hahuaan nasida manang marmusu nasida dompak bangso i ala pinompar ni si Esau do na hot di huta i (jala 5 Musa 2:4-5). Jala nunga sahat bangso i di tano Moab, alai ndang adong sada bangso pe na manggugai bangso Israel di tingki sahat nasida tu huta Moab, nang pe sasintongna boi do angka musu nasida mangambati pardalanan nasida tu tano Kanaan, alai ndang diloas Debata angka musu nasida mangambati pardalanan ni bangsoNa. Sian on taida ma ala unduk bangso i tu parenta ni Debata asa unang marmusu nasida dohot halak Moab (jaha 5 Musa 2:9: na so jadi marmusu jala hagogotan Moab jala marsindirsindir bangsoNa dompak halak Moab ai nunga dipasahat Debata i tu pinompar ni si Lot). Alani do ingkon marsaro (berkemah) nasida di bariba ni sunge Arnon (ayat 13) donokhon tano nj halak Amori manang di holangholang ni Moab dohot Amori.

Dipasupasu Debata bangsoNa na marsaro di Obet. Hata 'obet' na marlapatan 'botol', na patuduhon ala disi do nasida mangisi angka inganan panginuman nasida (botol-botol inuman nasida) dohot aek asa adong kebutuhan nasida saleleng pigapiga ari di pardalanan nasida. Dipasupasu Debata muse bangsoNa dung marsaro nasida di Beer i ma sumur na nidok ni Jahowa tu si Musa asa lehononNa aek tu bangsoNa (ayat 16). Hata 'Beer' na marlapatan 'sumur' manang mata air' (mual). Jala memang dipatorang disi, saleleng di pardalanan nasida i ndang adong marungutungut bangso i, di bagasan asi ni roha ni Debata diboan Debata ma nasida tu sada mual na boi papuashon bangso i manginum aek na sian tangan ni Debata. I ma na patuduhon nunga marsiajar bangso i paimahon di bagasan panghirimon dohot serep ni roha di pangurupion ni Debata na mangalehon aek tu nasida, na so pola ingkon marungutungut nasida paimahon pangurupion ni Debata. Ndang dipangido nasida dope aek i, alai nunga diparade Debata aek tu nasida. Na marlapatan, ingkon porsea nasida tu Debata, na diida jala diparade Debata do angka na porlu di ngolu nasida nang pe so dipangido nasida dope, jala ndang marungutungut nasida. Marsiajar ma hita, ndang ala na ingkon marungutungut hita asa gabe dilehon Debata kebutuhanta siganupari. Ndang ungutungutta i na mambahen gabe tergerak roha ni Debata mangalehon kebutuhan ni ngolunta siganupari. Justru ndang dihalomohon Debata ungutungut dihagigihon Debata do angka na sai marungutungut, ala maralo do i tu pangalaho haserepon ni roha, hasabamon dohot habengeton ni roha na dihalomohon ni Debata. Justru parungutunguton boi do mamboan jea tu hita gabe ndang fokus hita pasahathon persoalan na taadopi tu Debata, ujungna gabe lam dao hita sian Debata jala tarsulandit tu angka dalan na so hasea. Taparsiajari ma sian turpuk on, marpos ni roha dohot di bagasana serep ni roha tu Debata mangadopi manang aha pe na masa, fokus mangido tu Debata molo tung maol pe hasusaan dohot angka pergumulan na taadopi di ngolunta siganupari.

Ndang dope dipangido nasida aek sian Debata, alai nunga didok Debata tu si Musa: "Papungu ma bangso i, asa Ahu mangalehon aek inumon nasida". On ma tandana na umbotoan Debata di kebutuhan ni bangsoNa sian bangsoNa sandiri jala tongtong disarihon Ibana angka kebutuhan ni bangsoNa. Hata ni Debata mangalehon jaminan tu hita na disarihon Debata kebutuhan ni jolma i ganup ari. Andorang so masa na dibaritahon di turpuk on, molo adong masa halongangan dipatupa Debata di pardalanan ni bangso i alani ungutungut dohot parhorsihan, sai dibahen bangso i do goar ni inganan i hombar tu bonsir ni hamamasa ni halongangan i, isarana Meriba, laho bahen parningotan boasa masa halongangan i. Alai di turpuk on, bahen parningotan halongangan i ndang be songon i dipatupa nasida, alai gabe direspons, diabadihon nasida do marhite ende pujipujian tu Debata laho marningot halongangan na binahen ni Debata di nasida mardonokhon di Beer na mangalehon aek na marbuhalbuhal sian Sumur i (ayat 18). Turpuk on paingothon asa taingot taboto mandok mauliate tu Debata (ayat 17) di bagasan las ni roha marhite ende pujipujian.

Turpuk on paingothon hita, sai lehonon ni Debata do aek hangoluan di hita marbuhalbuhal molo pos rohanta di Ibana, jala tapangido di bagasan serep ni roha, manghirim hita di bagasan habengeton dohot hasabamon ni roha. Tontu sai tapangido do tu Debata angka na tahirim di ngolunta, alai ndang pintor hira tukang sulap Debata pasahathon i tu hita, alai dipasahat do i hombar tu tingki ni Debata Alani naeng ma tongtong hot haporseaonta tu Debata maniop hataNa jala tongtong hita mardalan di dalan na tama na hombar tu lomo ni roha ni Debata. Molo naeng mamora pe hita, marjabatan, naeng ma sian dalan na sintong jala na tama. Molo dilehon Debata tu hita aek hangoluan, naeng ma taungkap rohanta manjangkon Aek Hangoluan i ma Jesus Kristus di bagasan ngolunta, jala taloas ma mangula Tuhan Jesus di bagasan ngolunta. Molo taloas Tuhan Jesus mangula marbuhalbual di ngolunta, tontu martambatamba do pasupasu na masa di ngolunta, lam margogo ma hita mangadopi angka na masa, las ni roha dohot arsak ni roha, lam marpanghirimon ma hita paimahon sangkap na denggan na naeng pasahaton ni Debata di ngolunta. Amen.