Khotbah Lukas 13: 1 - 5 Bertobatlah, Agar Tidak Binasa

 Minggu Okuli; 23 Maret 2025

13:1 Pada waktu itu datanglah kepada Yesus beberapa orang membawa kabar tentang orang-orang Galilea, yang darahnya dicampurkan Pilatus dengan darah korban yang mereka persembahkan. 

13:2 Yesus menjawab mereka: "Sangkamu orang-orang Galilea ini lebih besar dosanya dari pada dosa semua orang Galilea yang lain, karena mereka mengalami nasib itu? 

13:3 Tidak! kata-Ku kepadamu. Tetapi jikalau kamu tidak bertobat, kamu semua akan binasa atas cara demikian. 

13:4 Atau sangkamu kedelapan belas orang, yang mati ditimpa menara dekat Siloam, lebih besar kesalahannya dari pada kesalahan semua orang lain yang diam di Yerusalem? 

13:5 Tidak! kata-Ku kepadamu. Tetapi jikalau kamu tidak bertobat, kamu semua akan binasa atas cara demikian." 

13:1 Adong ma na ro uju i paboahon tu Ibana taringot tu angka halak Galilea, na didurushon si Latus do mudarnasida, gabe saor tu na pinelehonnasida.

13:2 Jadi ninna Jesus ma mangalusi nasida: Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida?

13:3 Hudok ma di hamu: Ndang; anggo so muba rohamuna, laos songon i do hamu mago muse!

13:4 Manang na dirimpu hamu, anggo na sampuluualu halak, na mate ditinggang palaspalas na di Siloam, parsalaan sian sude pangisi ni huta Jerusalem?

13:5 Hudok ma di hamu: Nda tung; anggo so muba rohamuna, laos songon i do hamu mago muse!

Nunga sian padan na robi tajaha Joujou taringot tu hamubaon ni roha. Sude barita na masa, na taida manang na tabege ingkon tau do mambahen hita muba. Tabege do barita, sada jolma na so muba di bangkona ujungna marmara. Taida do jolma na so olo muba di parangena gabe hagigian do di jolo ni donganna. Tasungkun ma jo nuaeng dirinta, dia do parjolo sipaubaonta? Ingkon parjolo hamubaon di pingkiran. Saleleng tadok tingkos pingkiranta, jala ndang olo hita manjalo pingkiran ni dongan, nang pe dumenggan do nian pingkiran ni dongan i, luangan do hita di ujungna. Dung tajalo hamubaon i di pingkiran, mangihut ma muse hamubaon dibagasan roha. Lapatanna, tajangkon hamubaon i masa di bagasan parngoluonta.

Hamubaon na songon dia do na nidok ni Jesus di turpuk jamita on? Marbonsir do pangajarion ni Jesus on sian sada barita na ro sian halak Galilea paboahon na didurushon si Latus mudar nasida gabe saor tu na pinelehonnasida. Molo tapamanat alus ni Jesus sai hira na mangunjuni Jesus do halak Galilea i huhut mamintori dirina siala ndang dos manang sarupa nasida dohot angka na pinaboanasida i. Dirajumi nasida do dirina ndang pardosa jala dietong na niula ni si Latus tu angka halak Galilea i songon balos ni pambahenannasida be. Hatiha i adong do pangantusion molo tompu sasahalak mate manang tandi hamamatena didok do i na hona bura manang na hona toru jala dietong songon uhum sian na tumimbul tu ibana. Asa ndada holan ala ni pangalahona gabe tandi hamamate ni sasahalak alai ala na ditorui Debata umbahen jorbut hamamatena. Ala pangantusion i do umbahen ro alus ni Jesus mandok "Na diagam rohamuna do pardosaan halak Galilea i martimbangkon saluhut halak Galilea ala songon i diahap nasida"? (ay. 2). Sian pandohan ni Jesus boi taida ndang hamamate ni sasahalak na ringkot, songon dia jolma i mate alai na pabotohon sude do jolma ingkon mate. Di ayat 3 didok, "Hudok ma di hamu: Ndang, anggo so muba rohamuna, laos songon i do hamu mago muse". Ndang hamamate ni jolma na patuduhon ibana pardosa. Ndang boi dohonon molo jolma mate siala mara (isara magulang tu rura manang disintak porhas) alani dosana.

Marhite sian alus ni Jesus i, nunga hira tarida dia na naeng tangkas antusan nasida. Jesus sandiri pe ndang mate songon jolma na somal ala na marsahit manang naung matua alai mate diparsilangkon songon angka na hona uhum. Sitaonon dohot silang do na ingkon tuhukonNa andorang so mate. Ndang holan alus dipasahat Jesus tu ibana, i ma tu na ro paboahon barita i. Lobi sian i dilehon poda manang joujou asa olo marhamubaon. Angka na so olo muba mate manang mago do ibana ala ndang parjambar di hangoluan na so ra suda. Dia na mansai arga sian pangajarion ni Jesus i? Dijou Jesus nasida muba asa unang hona bura ni dosa. Jolma pardosa hamatean salelengna do jambarna alai na olo muba dapotan hangoluan na manongtong.

Pasingkophon alusNa didok Jesus di ayat 4, "manang na dirimpu hamu, anggo na sampulu ualu halak na mate ditinggang palaspalas na di Siloam parsalaan sian sude pangisi ni huta Jerusalem?" Diarahon Jesus parningotan nasida taringot tu sampulu ualu halak na mate ditinggang palaspalas na di Silom mardonokhon Bagas Joro di Jerusalem. Na matompas do tingki i palaspalas jala manipa torop jolma pola sampulu ualu halak na mate. Dipangke Jesus na masa i paingothon nasida asa unang manguhumi na mate. Ndang ala holan na sampulu ualu i na mardosa umbahen mate, manang angka na asing gabe so pardosa. Songon alus tu na parjolo i do Jesus, "Ndang" (ayat 5). Borhat sian alus ni Jesus on ma nuaeng taida parsiajaran na mansai arga di ngolu parsaoranta.

Parjolo, ingkon marhamubaon do sude jolma, muba sian bangko na robi jala manghangoluhon haimbaruon. Naeng sude jolma mananda dirina huhut pasiding dirina sian na manguhumi dongan. Unang ma adong di dirinta na mandok, halak jolma pardosa hape dirina sandiri pe mangolu di bagasan dosa. Andigan do tingki na lehet marhamubaon? Ndang adong suhatsuhat ni tingki laho muba. Lapatanna, ndang boi di roha ni jolma mandok, sogot ma ahu muba. Boasa? Atik so mangolu be ibana marsogot? Unang ma adong sangkap maniti ari laho muba. Asa manang sadihari pe, dung tangkas tatanda dirinta ingkon ma muba jala marhangoluan na imbaru. Olo do sipata adong jolma martahi asa muba jala dititi arina, didok jolo butong ma ibana jala mamora, dung pe i asa muba. Tabo dihilala mandai angka na niahutna, ai so pola loja ibana mangula alai suksuk artana. Tu aha ma artana i molo mago do hosa manang hangoluanna? Ise ma mandai artana i?

Paduahon, ingkon tahaburjuhon do paimbaru diri, paubahon ngolu. Ndang sai mura mamungka parngoluon na imbaru, lumobi molo dung somal manang peam di pangalahona hian. Isarana, mansai maol situtu do sahalak parjuji marhamubaon. Nang pe sai talu di parjujian alai sai didatdati do marjuji. Nang pe suda artana, alai ndang mansadi marjuji. Lumobi di parngoluan na lam maju nuaeng, ndada holan juji paadop bohi nunga adong juji on-line. Holip do ibana marjuji, ndang adong na umbotosa. Molo pe gabe tarboto, ala naung targadis do artana ala holan na talu marjuji. Tudos tusi do nang bangko na asing. Maol hian do hita muba di pangalaho naung peam. Alani, ingkon hibul do rohanta marhamubaon. Nuaeng ma tingk lumehet muba, unang paima ari marsogot. Molo tapaloas salpu tingki magopo ma i so marparbue. Aha ma gunana hau na ramos marbulung ndang marparbue, nda holan paima ditaba do? Songon i do ngolu ni jolma molo so muba ndang marlapatan di adopan ni Tuhan i. Asa, binsan sadihari dope, tapauba ma dirinta asa tau halomoan ni Tuhanta. Angka na so olo muba paruhuman do sijaloonna sogot. Ingkon tadok do mauliates Tuhan i, ala dilehon di hita partingkian laho muba. Sai tarpaima do Tuhanta di hamumuba ni jolma. Haulion do sijaloonta di hamubaon ndada rimas manang uhum sian Ibana. Ditulak Debata do jolma na so muba

Patoluhon, basabasa ni Debata do hamubaon ni roha. Hasurungan do rajumanta molo olo hita parjolo marhamubaon, Unang tapaima donganta parjolo muba manang tabahen sidalian ndang marhamubaon ala tabereng adong dope donganta na so ra muba. Ndang sitiruon halak na olo muba. Gariada tahe dirinta ma tabahen tiruan di dongan asa diihuthon dalan na tingkos jala ndang diulahi mangolu di bagasan dosa. Sada na mansai maol tapauba di dirinta i ma mangarajumi diri tingkos. Angkup ni sipata talpe do hita tu pangalaho na manguhumi dongan.

Dia ma siparangehononta sian turpuk jamita di minggu Okuli on? Joujou ni Tuhan i tu hita asa marhamubaon. Holan hamubaon do dalan laho manjangkon haluaon pinatupa ni Kristus Jesus. Marhamubaon ndada holan mananda diri huhut manopoti hasalaan manang dosa alai lobi sian i, mangalehon diri dipaimbaru Tuhan i. Na boi jolma muba sian bangkona alai ndang dipasahat dirina dipature Tuhan i. I do alana godang jolma mulak tu bangkona hian nang pe naung sanga muba. Boasa? Adong jolma olo muba molo mambahen paruntungan, alai disi tubu harugian mulak ma tu hasomalanna hian. Tandi do jolma naung tangkas muba. Dia ma i? Angka naung muba ndang holan dirina be disarihon alai nunga gabe pasupasu tu angka na humaliang. Ingkon boi do dihilala dongan ngolu sasahalak naung marhamubaon. Angkup ni jolma naung muba marhabiaran do ibana taringot tu ari sogot. Disarihon do ngolu sogot ndada holan nuaeng. Aha ma gunana denggan parngoluon ni sasahalak nuaeng alai sogot mago? Asa borhat sian goar ni minggunta sadari on, dijou do hita asa marhamubaon ni roha. Molo naeng sonang jala ndang mago ngolunta, tapauba ma rohanta. Amen.