Khotbah Mazmur 27: 1 - 6 Menyaksikan Kemurahan Tuhan

 Minggu Reminicere; 16 Maret 2025

27:1 Dari Daud. TUHAN adalah terangku dan keselamatanku, kepada siapakah aku harus takut? TUHAN adalah benteng hidupku, terhadap siapakah aku harus gemetar?

27:2 Ketika penjahat-penjahat menyerang aku untuk memakan dagingku, yakni semua lawanku dan musuhku, mereka sendirilah yang tergelincir dan jatuh.

27:3 Sekalipun tentara berkemah mengepung aku, tidak takut hatiku; sekalipun timbul peperangan melawan aku, dalam hal itu pun aku tetap percaya.

27:4 Satu hal telah kuminta kepada TUHAN, itulah yang kuingini: diam di rumah TUHAN seumur hidupku, menyaksikan kemurahan TUHAN dan menikmati bait-Nya.

27:5 Sebab Ia melindungi aku dalam pondok-Nya pada waktu bahaya; Ia menyembunyikan aku dalam persembunyian di kemah-Nya, Ia mengangkat aku ke atas gunung batu.

27:6 Maka sekarang tegaklah kepalaku, mengatasi musuhku sekeliling aku; dalam kemah-Nya aku mau mempersembahkan korban dengan sorak-sorai; aku mau menyanyi dan bermazmur bagi TUHAN.

27:1 Jahowa do * panondangingku dohot hatuaonku, tung ise ma habiaranku? Jahowa do * partanobatoan ni ngolungku, tung mida ise ma ahu biahaton?

27:2 Molo tung ro angka parjahat mangarongrong ahu naeng manganhon sibukku, angka sisosak ahu dohot angka musungku, gabe martinggangan do nasida, jala marragean.

27:3 Nang pe * marhoronhoron parangan angka na manungkum ahu, ndang dihabiari rohangku, nang pe hehe parmusuon dompak ahu, * sai pos do rohangku disi.

27:4 Sada do naung hupangidohon sian Jahowa, sai i do hulului! Naeng mian ahu di bagasan joro ni Jahowa saleleng mangolu ahu, paidaida hinadenggan ni Jahowa dohot mamingkiri ganup sogot di bagasan jorona i.

27:5 Ai * diondingi do ahu di bagasan undungundungna di ari hinamago, ditabunihon do ahu di partabunian ni undungundungna, tu * dolok partanobatoan do ahu dipanangkok.

27:6 Asa mandirgak ulungku mida musungku, angka na humaliang ahu; jadi pelehononku ma di bagasan undungundungna i angka pelean pujipujian, marende ma ahu huhut mamalu parhinaloan mamuji Jahowa.

Panindangion i do ulaon na tama di ngolu ni na porsea. Marhite panindangion i patuduhon na taparhatopot pangurupion ni Debata di ngolunta. Ndang mansohot haringgason ni sada halak martangiang, manindangi ala diparhatopot rohana, "Debata pangantoi di ngoluna". Haporseaon na songon i do dipatuduhon si Daud di Psalm on. Marhite tangiangna dipangido si Daud tu Debata haluaon sian musu dohot sian dosana. Marhite tangiangna, dialualuhon si Daud parungkilonna tu Tuhan i, ala Debata do nampuna partubolon dohot pamaloson. Ala late roha ni si Saul maradophon si Daud, disangkapi si Saul mamunu si Daud. Alai ndang disangkapi roha ni si Daud mamalos i marhite hagogoon portibi manang marhite huaso na di tanganna, tu Jahowa do ibana martangiang asa Debata mamalos pambahenan ni si Saul i. Diarahon jamita on hita asa tu Tuhan i tapasahat parungkilonta. Di angka na masa na mambahen marungkil hita tadok ma "Ale Tuhan urupi ahu". Barani hita mandok songon i ala tahaporseai Ibana do donganta. Domu tusi do na pinasahat ni jamita on.

Sude pengalaman ni si Daud na tonggi nang na paet mangarahon dirina di bagasan parsitutuon manghatindanghon pambahenan ni Jahowa na gok halongangan i. Dihatindanghon pambahenan ni Jahowa i marhite angka Psalm, naung gabe bagian ni Buku Na Badia i; sian 150 bindu Psalm, lobi hurang satonga sian si Daud. Sian na 150 bindu Psalm, 73 ma i sian si Daud, 12 sian si Asaph ahli musik jala parende na pinabangkit ni si Daud, 12 sian si Korah sahalak parende di istana; 2 sian si Salomo; sada bindu be sian si Heman dohot sian si Ethan parmusik dohot parende di tingki ni raja Daud dohot raja Salomo. Sian i tarida gumodang do si Daud mangarang Psalmen on, sada sian i ma turpuk on. I ma patuduhon parsitutuon ni si Daud manghatindanghon pambahenan ni Tuhan i di ngoluna.

Di ayat 1-3 dipatuduhon si Daud pos ni rohana marhanalomhon pangurupion ni Debata. Panandaonna di hagogoon, di asi ni roha dohot di hasatiaon ni Debata mangonjar si Daud mandok, "Jahowa do panondangingku dohot hatuaonku, tung ise ma habiaranku? Jahowa do partanobatoan ni ngolungku, tung mida ise ma ahu biahaton?" Songon raja si Daud diadopi ibana ragam ni hamaolon, lumobi asupasup sian si Saul na mambahen ponjot pangkilalaanna. Ala hamaolon i sipata do ibana maol mambahen haputusan. Molo sala haputusanna boi do i mambahen maila ibana. Alani dipangiđo hatigoran ni Debata jongjong di sude haputusanna asa malua ibana sian na pailahon ibana. Godang na manegai ulaonna, na mangalului dalan pajepolhon ibana, sian bagasan dohot sian duru ni harajaonna.

Dung dipataridahon si Daud pos ni rohana tu Jahowa, di ayat 4-5 dipangido asa boi ibana mian di bagasan joro ni Jahowa saleleng mangolu, asa disi dipaidaida hinadenggan ni Jahowa dohot asa di bagas joro ni Jahowa ibana ganup sogot diajari laho mamingkiri na denggan. Na nidokna, molo mian ibana di joro ni Jahowa, sonang ma rohana ala disi ma paidaidaonna hinadenggan ni Jahowa, jala disi ma dapot ibana pingkiran laho mangoloi Jahowa. Marhite sihol ni rohana mian di joro ni Jahowa, dipatuduhon si Daud haradeonna mangihuthon dalan (lomo ni roha) ni Debata, 5 Mu. 33, 13; Psa. 86, 11; Joh. 14, 15. Hasatiaonna tu Debata dipatuduhon marhite na sai malungun ibana mian di joro ni Jahowa, dohot mangulahon lomo ni roha ni Debata. Boi do ala borat ni parungkilon tarela sada halak mangulahon sogo ni roha ni Debata. Ala parungkilon i pusok pingkiranna, lilu sian dalan na sintong. Godang jolma ala paborathu parungkilonna, lilu pingkiranna. Asa unang lilu, dipangido si Daud, asa mian ibana di joro ni Jahowa, asa disi hibul rohana mamingkiri dalan na sintong.

Godang do jolma molo mangadopi parungkilon, diula na so denggan. Godang halak na marungkil lilu, mandao sian Debata, madabu tu harorangon. Adong na marungkil, na mangadopi pangunjunan, mandele jala mangalului haluaon sian portibi on, marhite na mabuk. marjuji, mangisap ganja dohot narkotika; lilu sian dalan ni Debata. Si Daud mangido pangurupion sian Debata asa unang lilu ibana sian dalan na sintong di parungkilon i.

Dung dirgak simajujung ni parPsalmen on ala naung talu musu haporseaonna i, dihatindanghon par Psalm on angka pambahenan ni Jahowa na mangurupi ibana. Ndang holan dihatindanghon, marpadan ibana mamelehon angka pelean pujipujian, jala marende ibana huhut mamalu parhinaloan laho mamuji Tuhan i. Dihatindanghon par-Psalm on pangurupion ni Jahowa di ngoluna marhite na pasahat pelean hamauliateon, dohot pelean pujipujian laho mamuji Jahowa. Didok di ayat 6, "jadi pelehononku ma di bagasan undungundungna i angka pelean pujipujian, marende ma ahu huhut mamalu parhinaloan mamuji Jahowa"

Ndang hea tangiang hamauliateon ni bangso Israel marrumang hapunjungan, sai marrumang hatopan do. Haporseaon dohot pengalaman pribadi taringot tu holong ni roha ni Tuhan i, ingkon gabe pengalaman hatopan ni sude bangso Israel. Alani do umbahen dibaritahon par-Psalm on pengalamanna i, asa sude bangso Israel dohot mamuji Tuhan i. Pengalamanna taringot tu burju dohot holong ni roha ni Tuhan i dihatindangkon tu donganna. Pengalamanna i dipasahat tu na asing asa dohot nasida manghilalahon, jala mamuji Tuhan i. Ndang dirina na malua i pokok pemberitaan, Tuhan na paluahon i do. Tujuan ni panindangionna i ndada asa diboto halak naung malum ibana sian sahit na posa i, na papatarhon Holong ni Debata na mangurupi i do; asa dohot nasida mamuji Ibana. Di panindangionna i dipapatar hadirion ni Tuhan i tu donganna; Mangihuthon ibana holan satongkin do Debata tarrimas, lumeleng do Ibana mangasii. Tung sura pe songgop parsahiton na posi, parungkilon na borat unang didok jölma ndang Parasi roha Tuhan i Lumeleng do Asi ni rohaNa sian rimasNa.

Songon siihuthon Jahowa hita marhite Tuhan Jesus Kristus, tarjou do hita gabe panindangi di ngolunta. Manghorhon tu na denggan ma panindangion i, mangapuli halak na marsak jala na tarsosak di siala parsualan na niadopanna dohot lan na asing. Asa di bagasan gok dame dohot las ni roha hita diondinganNa, sonang so hariboriboan mamilangi angka pambahenanNa huhut manghatindanghon asi ni rohaNa. Laho marigadopi parngoluon na gok hamaolon on, ditogihon parpsalmen on do hita laho mangadop tu haulion ni Debata, haulion na i do na tuk paubahon ngolunta. Molo nunga dihaliangi haulion na sian Debata hita, tagamon ma dapot hagoon dohot las ni roha hita. Ringkot situtu do hita nang marnida ari na laho ro di bagasan haporseaon, mangalului bohi ni Debata na gok holong dohot huaso. Asa haporseaon i ndada holan taringot tu ngolu na ro sogot, alai dohot do nang gogo laho marnida holong dohot asi ni roha ni Debata di ngolu siganup ari. Amen