Khotbah Roma 10: 16 - 21 Iman Timbul dari Pendengaran

 Minggu Invokavit, 09 Maret 2025

10:16 Tetapi tidak semua orang telah menerima kabar baik itu. Yesaya sendiri berkata: "Tuhan, siapakah yang percaya kepada pemberitaan kami?"

10:17 Jadi, iman timbul dari pendengaran, dan pendengaran oleh firman Kristus.

10:18 Tetapi aku bertanya: Adakah mereka tidak mendengarnya? Memang mereka telah mendengarnya: "Suara mereka sampai ke seluruh dunia, dan perkataan mereka sampai ke ujung bumi."

10:19 Tetapi aku bertanya: Adakah Israel menanggapnya? Pertama-tama Musa berkata: "Aku menjadikan kamu cemburu terhadap orang-orang yang bukan umat dan membangkitkan amarahmu terhadap bangsa yang bebal."

10:20 Dan dengan berani Yesaya mengatakan: "Aku telah berkenan ditemukan mereka yang tidak mencari Aku, Aku telah menampakkan diri kepada mereka yang tidak menanyakan Aku."

10:21 Tetapi tentang Israel ia berkata: "Sepanjang hari Aku telah mengulurkan tangan-Ku kepada bangsa yang tidak taat dan yang membantah."

 10:16 Alai ndang sude mangoloi barita na uli i, ai ninna si Jesaya do: "Ale Tuhan, tung ise ma mangkaporseai jamitanami?"

10:17 Asa sian na tumangihon do ro haporseaon; ia panangihon i, sian hata ni Kristus do.

10:18 Alai on ma dohononku: Ndang dibege i huroha? Nunga nian! "Naung tolhas do soarana tu liat portibi on, jala ro di suhi ni tano on do baritana."

10:19 Alai hudok muse: Ndang manganto Israel disi? Parjolo si Musa mandok: "Pinggilonku ma hamu mangiburu mida na so bangso hian, paheheonku rimasmuna mida bangso na oto."

10:20 Hum do si Jesaya mandok: "Angka na so mangalului Ahu, i do na dapotan; naung gabe patar do Ahu di angka na so mangusoi Ahu."

10:21 Alai tu bangso Israel do didok: "Manipat ari hupaherbang tanganku tu bangso na so mangoloi jala na manggaga."

 Mamungka sian na robi sahat tu tingki on tongtong do Debata i ma hata na pinaboa ni Debata tu jolma manisia marhite marsaringar hata ni Debata marhite angka naposoNa. Ia hata ni angka panurirang, dung i marhite AnakNa Tuhan Jesus Kristus dohot angka apostelNa. Alai songon na pinatuduhon ni Apostel Paulus, adong do angka halak na manangihon hata i, alai ndang marpanghorhon tu haporseaon. Sahat do soara ni Debata tu halak Israel, alai ndang manganto nasida disi, ditulak nasida do si Musa, si Jesaya, nang apostel i. Gariada tahe, ndang porsea nasida di panghophopon ni Jesus Kristus na mamboan haluaon i. Cara ni Debata patubuhon haporseaonta asa lam tang, asa lam martambatamba, i ma na parjolo marhitehite na mamangke sipareonta on na olo manangihon dohot marhite pingkiranta nang rohanta na olo manjalo hataNa. Na paduahon marhitehite hataNa na tatangihon. Molo ditompa Debata di hita sipareon, naeng pangkeonta i laho manangihon hata ni Debata, asa lam magodang jala lam tang haporseaonta. Sipanganon tu haporseaonta i ma hata ni Debata, ndang hatahata ni jolma, alai tangkas didok sian hata ni Kristus (ayat 17).

Godang do halak na untangi manangihon hatahata ni jolma sian hata ni Debata, ujungna gabe hatahata ni jolma do na diulahon, ndang hata ni Debata. Hape molo untangi hita tu hatahata ni jolma (gosip) jotjot do hita madabu mangulahon lomo ni roha ni jolma, ndang mangulahon lomo ni roha ni Debata. Alai molo jotjot tatangihon hata ni Debata, gabe taboto dia do lomo ni roha ni Debata na ingkon taulahon. Marhite hata ni Debata do taboto dia do na sintong dia do na so sintong. Marhite hata ni Debata do margogo hita mangalo na jat jala mangulahon na denggan. Jotjot do maralo hatahata ni jolma dohot hata ni Debata. Molo hata ni jolma mandok ulahon na jat alo ni na jat, alai hata ni Debata mandok, unang alo na jat marhite na jat. Molo sai tatangihon hata ni Debata gabe taboto ma boha do mangalo na jat, marhite mangulahon na denggan.

Boasa hata ni Debata na ingkon tatangihon asa lam matoras haporseaonta? Ala hata ni Debata do na boi mangajari hita mangulahon lomo ni rohaNa. Hata ni Debata do na songon podang sidua baba (pedang bermata dua) na boi mangurupi hita manirang na roa dohot na sintong. Hata ni Debata do na mangalehon bisuk tu hita mangadopi angka na masa di ngolunta asa marbisuk hita, asa unang madabu hita mangulahon hajahaton. Hata ni Debata do na margogoihon hita asa hot hita mangulahon na denggan nang pe taida godang halak mangulahon hajungkingon (kecurangan). Hata ni Debata do na mangalehon pos ni roha di hita, na didongani Debata do hita di tingki taadopi hasusaan nang arsak ni roha. Hata ni Debata do na menjamin di hita haluaon na salelenglelengna di bagasan Jesus Kristus naung mate humophop hita. Lapatanna Hata ni Debata do na porlu sai tatangihon ala HataNa i marhuaso di sude panggulmit ni ngolunta. Jala ndang margogo hita molo ndang tatangihon hata ni Debata, gale do haporseaonta, jala gabe gale ma pamatangta on, gabe gale ma sude ngolunta.

Unang ma hita songon bangso Jahudi na didok di ayat 19 "bangso na oto" (di hata Indonesia didok "bangsa yang bebal"). Boasa didok apostel Paulus nasida bangso na oto manang "bangsa yang bebal"? Ala ndang olo nasida manangihon hata ni Debata naung dipatariparhon angka panurirang tu nasida, sai dipajogal nasida rohanasida ndang olo manangihon, ndang olo manjangkon hata ni Debata. Didok hata ni Debata sadari on tu hita, angka na oto do angka halak na bebal na sai pajogalhon rohana na so olo manangihon hata ni Debata. Boasa didok halak na oto do halak na bebal? Ala diboto do manfaat ni hata ni Debata pasti do manambai haporseaon nasida alai ndang olo nasida manangihon. Sarupa ma i molo dilehon Debata tu hita pasupasu alai tatulak pasupasuNa, nda halak na oto do hita disi? Pasupasu do hata ni Debata boasa tatulak hata ni Debata na dipasahat Debata tu hita? Nda halak na oto do na manulak pasupasu ni Debata marhite hataNa?

Marsiajar ma hita sian turpuk on, asa unang gabe halak na oto na bebal hita, naeng ma tatangihon hata ni Debata na dipasahat Debata tu hita. Dijou hata ni Debata do hita manjalo pasupasu marhite hataNa na sahat tu hita, tatangihon ma sian nasa rohanta, tajangkon, tapahusorhusor di bagasan rohanta, jala taulahon. Di tingki tatangihon hata ni Debata disi do hita lam magodang di haporseaonta jala lam margogo mangulahon angka ulaon na denggan di huria nang di masyarakat. Angka halak na sai olo manangihon hata ni Debata angka i do na tarpasupasu di ngoluna.

Boasa tadok lam matoras do haporseaonta molo ringgas hita manangihon hata ni Debata? Marhite na manangihon hata ni Debata, disi do hita memiliki kesempatan mengoreksi/mengevaluasi dirinta sandiri marhite hata ni Debata. Molo sai tatangihon hata ni Debata, ndang terjebak be hita di kebenaran (hasintongan) diri sandiri manang hasintongan ni jolma. Di na tatangihon hata ni Debata, disi ma tapardompakhon sude ngolunta, ulaonta, rohanta nang pingkiranta tu Hata ni Debata, gabe taboto ma dia na sala na taula, dia na sintong jala dia na ingkon tapadenggan tu joloan on. Alani do didok tarpasupasu do hita molo sai tatangihon hata ni Debata, ala gabe dikoreksi, dievaluasi ngolunta, molo sala hita gabe taboto na sala pambahenanta, molo sintong na taula gabe lam bersemangat ma hita manorushon angka ulaon na sintong naung taula i. Hata ni Debata do na paubahon ngolunta, hata ni Debata do na padimundimun, patureture sude ngolunta asa lam denggan. Hata ni Debata do na mangalehon semangat di hita asa unang sumurut semangatta mangulahon angka na denggan ala dihalomohon Debata do angka na denggan na taulahon i, ujungna gabe lam hiras ma rohanta mangulahon angka ulaon na denggan. I ma manfaat na mansai balga molo olo hita mangalehon rohanta manangihon hata ni Debata di ngolunta. Antong taharinggashon ma manangihon hata ni Debata jala mangulahon di bagasan ngolunta.

Tangkas, sian na tumangihon do ro haporseaon. Hombar tusi, adong ma angka na ringkot sipareahanta songon angka halak naung tumangihon hata ni Debata asa lam matoras haporseaon i. Boi do ragam hata i. Na parjolo, sai taharinggashon ma tongtong manangihon dalan laho mangharinggashon i, isara ni: manopot parmingguan, manopot partangiangan, manopot parpunguan, manjaha hata ni Debata. Na paduahon, ringgas ma hita mamaritahon hata ni Debata. Tu ganup do hita sahat parsuruon laho patolhashon hata ni Debata tu na humaliang hita. Na patoluhon, ringgas mangulahon hata ni Debata. Tutu ndang marhite na mangulahon i hita dapotan haluaon, alai ala ni haporseaon do. Haporseaon di Jesus Kristus ingkon marparbuehon ulaon na denggan. Amen!