Khotbah Markus 15: 33 - 41 Yesus Menyerahkan NyawaNya

 Jumat Agung, 18 April 2025

15:33 Pada jam dua belas, kegelapan meliputi seluruh daerah itu dan berlangsung sampai jam tiga.

15:34 Dan pada jam tiga berserulah Yesus dengan suara nyaring: "Eloi, Eloi, lama sabakhtani?", yang berarti: Allahku, Allahku, mengapa Engkau meninggalkan Aku?

15:35 Mendengar itu, beberapa orang yang berdiri di situ berkata: "Lihat, Ia memanggil Elia."

15:36 Maka datanglah seorang dengan bunga karang, mencelupkannya ke dalam anggur asam lalu mencucukkannya pada sebatang buluh dan memberi Yesus minum serta berkata: "Baiklah kita tunggu dan melihat apakah Elia datang untuk menurunkan Dia."

15:37 Lalu berserulah Yesus dengan suara nyaring dan menyerahkan nyawa-Nya.

15:38 Ketika itu tabir Bait Suci terbelah dua dari atas sampai ke bawah.

15:39 Waktu kepala pasukan yang berdiri berhadapan dengan Dia melihat mati-Nya demikian, berkatalah ia: "Sungguh, orang ini adalah Anak Allah!"

15:40 Ada juga beberapa perempuan yang melihat dari jauh, di antaranya Maria Magdalena, Maria ibu Yakobus Muda dan Yoses, serta Salome.

15:41 Mereka semuanya telah mengikut Yesus dan melayani-Nya waktu Ia di Galilea. Dan ada juga di situ banyak perempuan lain yang telah datang ke Yerusalem bersama-sama dengan Yesus.

15:33 Alai di hos ni ari songgop ma na holom tu liat tano i, sahat ro di pungkul tolu.

15:34 Jadi di pungkul tolu i, marsoara na balga ma Jesus manjouhon: Ale Debatangku, Debatangku, boasa tadingkononmu Ahu (Eloi Eloi, lama sabakhtani)!

15:35 Jadi adong ma deba na jongjong disi na umbegesa, gabe didok ma: Si Elia do jinouna i!

15:36 Alai marlojong ma sahalak manornophon limut tu asom, dilohothon ma i tu tolong laho painum Ibana, huhut ma didok: Antong, taida ma, manang na ro si Elia paijurhon Ibana!

15:37 Dung i marsoara na gogo ma Jesus, laos tos ma hosana.

15:38 Jadi maribak bola dua ma hirehire na di bagas joro i, sian ginjang tu toru.

15:39 Dung diida letnan na mangadopi Ibana, songon i hape parmatena, gabe didok ma: Na tutu do Anak ni Debata Halak on!

15:40 Manatapnatap do sian na dao deba inaina, songon si Maria Magdalena, si Maria ni si Jakobus na umposo, angkup ni i ina ni si Josep dohot si Salome.

15:41 Diihuthon nasida do Ibana laho mangkobasi, uju di Galilea dope Ibana; dungkon ni i lan dope angka na asing, na rap nangkok dohot Ibana tu Jerusalem.

Ganup taon sai dipestahon hurianta do parningotan hamamate ni Jesus Kristus, manang na somal didok Jumat Agung. Ndang tarbahen hita ndang tangis disi marningot pambahenan ni Tuhan Jesus Kristus humophop hita sian dosanta. Di turpuk jamita on pe, ndang tarbahen so tarilu manjahasa, lumobi ma di bagas manghilala na masa i, i ma partinaonan ni Tuhan Jesus di hau pinarsilang i. Aut sugari dohot hita na jolo di dalan na binolus ni Jesus sian Jerusalem sahat tu Golgatha; Aut sugari dohot hita na jolo mamereng Jesus na sorat manuhuk silangNa i; Aut sugari dohot hita na jolo mamereng Jesus diparsilangkon di Golgatha, boi do gabe tubu sungkunsungkun dirohanta mandok, "Boasa tarsilang Jesus? Boasa parsilangkonon Ibana? Halak na songon i lambok, na burju mangurupi angka na marsahit, na pangoluhon angka na mate parsilangkonon? Boasa ingkon pusaon Jesus na pajongjong hatigoran i? Boasa pamateon ni portibi on jolma na pajongjong hasintongan? Boasa marsingkor ngolu ni na pajongjong hasintongan? Boasa singkirhonon halak na jujur jala na burju? I do sungkun sungkun molo masa na so denggan tu angka na burju jala na jujur. Boi do songon i tubu sungkun sungkun di rohanta molo tabege barita silang ni Jesus. Alus ni sungkun-sungkun i ma sibegeonta sian jamita on. la turpuk on paingothon hita uju tarpajal Jesus di hau pinarsilang i jala mate. Molo rap tasigati turpuk on, taida ma paboa adong 2 hal na naeng pataridahon turpuk on tu hita, i ma: a) hajolmaon Jesus; dohot b) hadebataonNa. Asa tung marhite na 2 on ma boi tarjalo roha ni torop jolma, lumobi nasa na porsea paboa Jesus Kristus, Mesias, Anak ni Debata.

Hamamate ni Jesus patuduhon hajolmaonNa. Saluhut partording hamamate ni Jesus nunga disuriranghon jala dihatahononNa hian, lumobi ma i tu siseanNa uju manjonok tingkina. Ndang tarbahen Ibana pe paluahon diriNa sandiri, ai sada ulaon hapunjungan na so boi singkatan manang ise, na mandok paboa Debata Jahowa do na marsuru Ibana tuat jala mangadopi ragam ni na masa i ro di na hamamateNa. Manahan ma Ibana di haporsuhon i, jala tangis mangido asi ni roha ni Debata mida Ibana. Alai naung sahat ma ulaon i ingkon paluahon bangsoNa.

Di na marsoara Jesus i mangido pangurupion sian Debata, ndada tung marhata metmet Jesus dison: mansai balga do soaraNa jala marsaringar. Ndang adong imbarna sian hita uju mangadopi angka hasusaan na so boi bolusanta; tarpajal di ragam ni parsualan, lumobi ma parsualan na ro mardapotdapot. Tung so tarbahen ndang tumatangis jala marsuraksurak joujou tu Debata. Marhite on boi idaonta, na situtu do jolma Jesus na tuat tu banua tonga on marsaor dohot jolma. Di ragam ni ulaonNa, lumobi halongangan na pinatupaNa jotjot mambahen Ibana gabe tarunjun di jolo ni na torop na mandok na diinsahi Ibana do Debata Jahowa. Alai sian hamamateNa i diboto na torop ma jolma songon nasida do ianggo Ibana.

Huria ni Tuhanta! Ndang tarbahen hita manjalo Jesus di ngolunta molo holan sai pamasa halongangan di humaliangNa. Ndang tarjalo hita ulaon i gabe mambahen hita manguhumi jala manghosomi Ibana. Atik pe, ndang dao marimbar hita sian angka halak Parise dohot Sibotosurat na sai mangganggu ulaonNa marhite ragam sungkunsungkun laho mangunjuni Ibana. Siala i do tung mansai ringkot diida Debata, asa suman songon ngolu ni jolma na adong disi. Asa borhat sian toru ma ulaonNa i, jala mangalusi angka haporsuhon, hasusaan dohot haberniton ni jolma na torop i na sai laon. Laos disi ma diboan Ibana mulak na torop i, paboa nunga ro Sipaluanasida di tongatonganasida. Haluaon do na pinatupaNa, alai ingkon marhite na mangelehon TondiNa humonghop saluhut halak.

Hamamate ni Jesus patuduhon hadebataonNa. Uju mangolu Jesus di tongatonga ni na torop i, nunga tung tandi dipatuduhon Ibana sada ulaon hapunjungon na so boi diulahon halak songon na somal. Alai, i pe ndang marna singkop haporseaon i marurat di ngolunasida. Atik pe di tongatonga ni angka siseanNa. Tung pe songon i, ndang tarbahen angka sisean i mangantusi saluhut na diula ni Jesus, ai Debata do Ibana, na songkal jala na badia, na so hadungdungan jala so habogasan pingkiranNa. Ndang diboto nasida, ndada holan diri ni Jesus i laho lehononNa tu nasida, alai ro di TondiNa di hamamateNa.

Maribak bola dua hirehire na di bagas joro sian ginjang sahat tu toru, mambahen longang sude halak na marnida Ibana na tarsilang i. Suang songon i letnan dohot angka soldadu, sian na direhei Jesus i hian. dipastapi, ditijuri ro di na mamajal Ibana di hau silang laho pailahon Ibana ala uhuman na didabuhon tu Ibana di jolo ni torop halak, gabe muba rohana ala ni na masa i jala diauhon jala diparhatutu paboa Anak ni Debata do Jesus na tarsilang i. Di ngolunta pe, jotjot masa na songon na didok ondeng. Molo nunga ndang tarbahen hita mangadopi na masa ni ngolunta, jotjot do ndang tu Jesus i pangalualuanta. Gariada tu na asing. Hape molo dilehon Tuhan i di hita tingki hasonangan, boi ruar sian ragam ni hamaolon i, jotjot do taparsoada Ibana, gariada donganta na jonok isara aleale na taetong songon halak na burju jala satia. Ro ma hinamaol ni parngoluon na mambahen hita tarsosak, gabe Jesus ma inganan na laho sisalaanta ala so tarida pangurupionNa. Hape paula so diingot, Debata do ĺbana di tongatonganta, na boi mangatasi sude angka parsualan.

Tontu ndada holan na marningot sambing hita na marhaujungan tu habot dohot arsak ni roha di hamamate ni Jesus. Na umarga sian i i ma mangauhon dohot manghangoluhon panghophopon ni Jesus di hita, pola sumeahon hosa Ibana marhite na mate di hau pinorsilang i. Dohononta ma nian ala ni ahu do umbahen na tarsilang Jesus i. Hinorhon ni i, tangkas ma tahamauliatehon panobusionNa i marhite na olo hita paubahon roha, tongtong mardalan di dalan lomo ni rohaNa. Dipalua Jesus do hita marhite na rade Ibana tumaon na porsuk. Asa tutu ma Jesus hagogonop ni Mesias na pinaimaima ni halak Israel na di Padan na Robi i.

Dilehon Jesus do TondiNa humonghop hita asa dapotan haluaon na sian Jahowa. Dijou do hita di parningotan ni hamamate ni Tuhan Jesus Kristus on asa unang holan didagingta taauhon Jesus i di ngolunta, alai marurat ma di haporseaonta, i ma di partondion. Suman tu Jesus ndada holan mangalehon diriNa laho mangajari torop halak, alai ro di na mangalehon TondiNa patuduhon parsitutuonNa diulaonNa, i ma sian Debata Jahowa. Ala ni i, taparsitutu ma haporseaonta tu Ibana. Amen!