Khotbah Yesaya 55: 1 - 5 Dengarkanlah Tuhan, maka kamu akan hidup

 Minggu Quasimodogeniti; 27 April 2025

55:1 Ayo, hai semua orang yang haus, marilah dan minumlah air, dan hai orang yang tidak mempunyai uang, marilah! Terimalah gandum tanpa uang pembeli dan makanlah, juga anggur dan susu tanpa bayaran!

55:2 Mengapakah kamu belanjakan uang untuk sesuatu yang bukan roti, dan upah jerih payahmu untuk sesuatu yang tidak mengenyangkan? Dengarkanlah Aku maka kamu akan memakan yang baik dan kamu akan menikmati sajian yang paling lezat.

55:3 Sendengkanlah telingamu dan datanglah kepada-Ku; dengarkanlah, maka kamu akan hidup! Aku hendak mengikat perjanjian abadi dengan kamu, menurut kasih setia yang teguh yang Kujanjikan kepada Daud.

55:4 Sesungguhnya, Aku telah menetapkan dia menjadi saksi bagi bangsa-bangsa, menjadi seorang raja dan pemerintah bagi suku-suku bangsa;

55:5 sesungguhnya, engkau akan memanggil bangsa yang tidak kaukenal, dan bangsa yang tidak mengenal engkau akan berlari kepadamu, oleh karena TUHAN, Allahmu, dan karena Yang Mahakudus, Allah Israel, yang mengagungkan engkau.

55:1 O sude hamu angka na mauas, ro ma hamu tu aek on! Jala hamu angka na so marhepeng, ro ma hamu manuhor, mamonggoli dohot manganhon! Sai ro ma hamu manuhor anggur dohot susu, unang pola marhepeng manang marpanuhor.

55:2 Boasa tung mandasing hepeng hamu tu na so tau hangoluhononhon, jala na niomomuna tuhor ni na so tau pasonang hamu? Sai tangihon hamu ma ahu, asa panganonmuna na tabo i, jala bosuran rohamuna di tabotabo.

55:3 Tarehon hamu ma pinggolmuna, jala ro ma hamu tu ahu! Tangihon hamu ma, asa mangolu tondimuna i! Jadi bahenonku ma tu hamu * padan salelenglelengna: I ma * padan parasian na sintong i tu si Daud na so tupa muba.

55:4 Ida ma, sitindangi tu angka bangso ibana hulehon, bahen partogi dohot silehon patik tu angka bangso.

55:5 Ida ma, bangso na so tinandam hian ingkon jouonmu do, jala bangso na so tumanda ho ro manahopi ho ala ni Jahowa Debatam dohot ala ni na badia ni Israel, ai nunga marmulia ho dibahen.

Tongon do bangso Juda di Babel uju didok panurirang Jesaya barita on. Sai marsak nasida disi ala sai diingot uli ni Jerusalem. Tumatangis nasida marningot bagas joro na malengse i. Malungun nasida mulak tu bonapasogit mandai tabo ni ngolu. Di situasi na songon i do si Jesaya patolhas sangkap hatuaon ni Jahowa di bangsoNa. I do alana ndang ditaringoti sidalian ni Debata manguhum nasida. Barita apulapul, bagabaga na uli nama dipasahat. Di taon 539 andorang so hatutubu ni Jesus, nunga be patu harajaon Babel, uju panggomgomion ni raja Nabunidus. Jala laos di hamumuba ni politik na songon i ma ro hata ni Debata paboahon, Debata sandiri mamillit Kores sian Persia gabe sipalua nasida jala patubegehon tu nasida hababangkit ni Sion manang Jerusalem. Marojahan tusi ma dipatolhas tona ni Debata i ma haimbaruon ni ngolu dung mulak sian habuangan. Nunga diida si Jesaya, ia parungkilon ni bangso i naung marujung jala dosanasida nunga salese. Apulapul, las ni roha, ngolu na imbaru dohot hinaulina di ari sogot do sisiasia ni panurirangionna. Ondolan ni ari sogot na imbaru i ma uari ni Debata naung pinasahatNa tu ompunasida. Dia na naeng dohonon ni turpuk on?

Martingting panurirang i songon partigatiga; joujou tu situan na torop na naeng manggadis boniagana. Hira partigatiga di topi ni dalan na ribur ibana joujou. Alai asing do ibana sian parboniaga na somal taida, ala ndang na mangalului pangomoan. Somalna partigatiga ndang olo rugi jala godang paruntungan. Alai si Jesaya ndang mangalului untung, ala siinumon (aek, anggur, susu) nang sipanganon nilehonna ndang gararon manang marpanuhor. Boi dohonon, gonghon i sada joujou tu angka jolma laho manjalo hasongan manang haluaon. Aha sibonsiri ni gonghonna i? Mangihuthon barita di bangso Juda uju di habuangan Babel, dung ro boaboa sian raja Kores paloashon nasida boi mulak tu Jerusalem, ndang sude nasida marlasniroha umbege boaboa i. Deba manjalo barita sian na tading di Palestina pabotohon, ja tano nasida ndang songon na uju i be ulina. Tano golat nunga tungil huhut tarulang, bagas joro lengse dohot parik ni Jerusalem. Tano, hauma nang ladang hot dope diula bangso ma asing. Angkup ni nunga adong sian nasida bangkit gabe pangula di Babel isara parhobas ni raja dohot partigatiga. Alani tubu ma tu pingkiranna, dengganan nama hot di tano parserahan sian di bonapasogit; ala ndang umura parngoluon di Jerusalem. Borhat sian "alasan ekonomi i do joujou ni panurirang i. Dung dijou nasida disuru ma manuhor dohot marsaulihon sipanganon nang siinumon so pola marhepeng. Mauas manggombarhon parange na girgir papungu arta (hisap, mongkus) holan tu dirina. Na naeng dohonon ni si Jesaya, i ma haburjuon ni Debata manarihon ngolu ni bangsoNa. Debata do manjou nasida mulak tu Jerusalem jala ndang pasombuon Na nasida mauas jala male di hutana.

Hombar tu ayat 2, ia hasonangan ni ngolu ndang boi suhaton sian hepeng, arta manang sinamot. Hepeng na niomo ndang tau gabe bohal ni ngolu dohot pasonang roha. Hinauli ni tano Babel nang pandaraman na boi daion ni bangso i disi, didok Debata ndang tau pasonang roha; alai sipanganon na tabo jala tau pabosurhon marharoroan sian Jahowa. Boasa? Tung pe adong taruli deba sian nasida na marpingkir tading di Babel ndang dohot mulak tu Jerusalem alai hadirionna tong do paisolat manang jolma na tarbuang disi. Ndang singkop hajongjongan nasida di tano ni sileban. Alani i do didok hamoraon i ndang tau pasonang roha. Pandohan ayat i dipadomu tu hata ni Debata na hea dipasahat tu ompunasida, uju laho bongot tu tano Kanaan. Songon dia panjouon ni Debata najolo tu ompunasida, songon i do nang di ujung ni habuangan i tu bangso Juda. Adong jaminan ni Debata manarihon na ringkot di ngolunasida. Hamoraon dohot pangomoan na ro sian na niula ni gogo so mardongan pasupasu ni Debata ndang tuk pasonang ngolu. Udutna didok, "tarehon hamu ma pinggolmuna, jala ro ma hamu tu Ahu!" Haradeon umbege joujou ni Debata dohot haunduhon mandapothon Ibana i do garansi ni ngolu na marhasonangan. Tujuanna "asa mangolu tondimuna". Ndada holan ngolu ni daging hape disarihon Debata alai dohot nang ngolu ni partondion. Lapatanna, ngolu i ndada holan ngolu sambing, alai ngolu na gok jala marlobilobi. Saluhutna i marhataridaan molo adong haradeon mangoloi Debata.

Sangkap ni Jahowa mamboan nasida mulak sian Babel i ma mambahen padan na hot salelenglelengna, padan parasian na sintong. Pandohan on ndang na imbaru di nasida. Holan paingothon nama panurirang i huhut paposhon rohanasida. Sangkap ni Jahowa paulak hatongamon ni Sion. Ndang mose Debata di padanNa. Lapatanna ndada nipi na mambahen tarhirim hata ni Debata. Tontu sada parungkilon na mansai dokdok do pandohan i di sipareon nasida. Songon dia ma hatongamon ni Sion, tungkot harajaon sian si David i boi mulak songon najolo, ai tongon di habuangan nasida. Ndang adong be harajaon ni si David. Antong aha do lapatan ni i? Mangihuthon ayat 4, ia harajaon ni si David ndang songon najolo i be gabe partogi tu angka bangsa, alai gabe sitindangi tu angka bangso. Lapatanna, ndang ideologi politik tujuan panjouon ni Debata alai ugamo dohot haporseaon (pat. Jes. 43:10.12; 44:8). Bangso Juda dung marujung masa habuangan ndang politis, alai gabe sitindangi tu saluhut. Jala laos dipabidang ma nuaeng, ndang be holan tu angka bangso naung tinanda nasida alai tu sude, angka na so tumanda nasida dope. Dison dipataridahon panurirang i do na tandi sian na masa uju so tarbuang nasida. Ro angka bangso tu Jerusalem ndada na laho marnida haulion dohot habisuhon ni raja ni Israel, alai naeng marnida jala naeng mangguruhon hatuaon ni Jahowa.

Songon dia ma hadomuan ni barita i tu parngoluonta saonari? Songon dia jolma nuaeng mangalusi Debata. Adong sian hita na bangkol rohana mangalusi, adong deba na marpinggol harpe; dibege alai dipaula so dibege. Nunga sai disungguli ganup minggu asa rap manumpahi ulaon ni Tuhan i marhite huriaNa, alai laos so adong hamubaonna. Aha ma na jotjot sidalian ni jolma manjua joujou ni Debata? Sada na mansai tangkas taida sian turpuk jamita on i ma alasan ekonomi: hepeng, sinamot, arta. Godang dope jolma songon bangso Juda marsidalian di tingki nuaeng, holan mangida na ringkot di parngoluanna sian paretongan matematis dohot rasional. Tontu ndang sala jolma mamangke pertimbangan na songon i, alai unang ma nian holan i suhatsuhatna. Dipaingot si Jesaya do bangso i paboa na so muba asiniroha ni Debata. Haulion ni tano on isara arta dohot hamoraon, molo so pasonang roha ndang marlapatan. Holan pangomoan na mambahen hasonangan do ringkot luluan. Joujou ni Jesus tu hita. "ro ma hamu tu Ahu, hamu angka na loja jala sorat, asa hupasonang hamu". Joujou ni Tuhanta patupa hasonangan. Hamaolon ni ngolu ndang holan hita mangadopi, dohot do Tuhanta mangurupi hita. Alani ro ma hita tu Ibana, ai Ibana do hangoluanta, tapaimbaru ma dirinta marsiajar di patik ni Debata asa parjambar hita di haluaon ni Kristus i Quasimodogeniti, songon posoposo na imbaru tubu, na uasan di susu na tama, songon i ma hita mangolu tongtong mauas di asi n iroha ni Debata, unang pangasahon gogom, Amen!