Khotbah Yohanes 20: 1 - 10 Yesus Bangkit dari antara Orang Mati

 Minggu Paskah I; 20 April 2025

20:1 Pada hari pertama minggu itu, pagi-pagi benar ketika hari masih gelap, pergilah Maria Magdalena ke kubur itu dan ia melihat bahwa batu telah diambil dari kubur.

20:2 Ia berlari-lari mendapatkan Simon Petrus dan murid yang lain yang dikasihi Yesus, dan berkata kepada mereka: "Tuhan telah diambil orang dari kuburnya dan kami tidak tahu di mana Ia diletakkan."

20:3 Maka berangkatlah Petrus dan murid yang lain itu ke kubur.

20:4 Keduanya berlari bersama-sama, tetapi murid yang lain itu berlari lebih cepat dari pada Petrus sehingga lebih dahulu sampai di kubur.

20:5 Ia menjenguk ke dalam, dan melihat kain kapan terletak di tanah; akan tetapi ia tidak masuk ke dalam.

20:6 Maka datanglah Simon Petrus juga menyusul dia dan masuk ke dalam kubur itu. Ia melihat kain kapan terletak di tanah,

20:7 sedang kain peluh yang tadinya ada di kepala Yesus tidak terletak dekat kain kapan itu, tetapi agak di samping di tempat yang lain dan sudah tergulung.

20:8 Maka masuklah juga murid yang lain, yang lebih dahulu sampai di kubur itu dan ia melihatnya dan percaya.

20:9 Sebab selama itu mereka belum mengerti isi Kitab Suci yang mengatakan, bahwa Ia harus bangkit dari antara orang mati.

20:10 Lalu pulanglah kedua murid itu ke rumah.

20:1 Dung i di ari parjolo dung salpu ari Sabbat, laho ma si Maria Magdalena sogot di na holom i dope tu tanoman i, jadi diida ma, naung dihindat batu i sian tanoman i.

20:2 Gabe marlojong ma ibana manopot si Simon Petrus dohot sisean na sada nari, haholongan ni roha ni Jesus, paboahon tu nasida: Nunga dibuat na mambuat Tuhan i sian tanomanna; ndang binoto, manang tudia ditaruhon.

20:3 Jadi borhat ma si Petrus dohot sisean na sada nari, jadi sahat ma nasida tu tanoman i.

20:4 Na rap marlojong do na dua i, gabe marhajoloan do sisean na sada, na humatop sian si Petrus, gabe parjolo ma ibana sahat tu tanoman i.

20:5 Jadi dipaunduk ma dirina, diida ma peak angka pangalilit; alai ndang bongot ibana.

20:6 Ro ma nang si Petrus sian pudina; dibongoti ma tanoman i jadi diida ma peak angka pangalilit i.

20:7 Anggo sekka panaputi ni uluna ndang rap dohot angka pangalilit i, pulik do dibalun tu ingananna.

20:8 Disi pe asa bongot nang sisean na sada, naung parjolo sahat tu tanoman i; dipanotnoti, gabe porsea ma ibana.

20:9 Ai ndang dope diantusi nasida hata ni Surat i na mandok: Ingkon hehe Ibana sian na mate.

20:10 Asa muli ma sisean na dua i.

Sadarion marpungu hita marningot haheheon ni Tuhan Jesus, ganup taon do tapestahon ari parningotan haheheonNa i. Ndang hea dope adong jolma na marningot ari haheheonna. Langgo marpesta parningotan hatutubu dohot parmondingon somal do i dipatupa. Ala sude do jolma asing ni si Adam dohot si Hawa, tubu do dalanna parngoluon ni jolma sorang tu portibi on. Ndang hea dope tebereng jolma hehe sian na mate. Tubu, mangolu, dung i mate, i do partording (proses) parngoluon ni jolma. Tuhan Jesus pe didalani do partording ni parngoluon na songon i. Tubu Ibana di Betlehem, magodang jala mate di Golgatha, alai hehe di ari patoluhon. Ndang adong dope jolma na mandalani partording ni parngoluon na songon i. I ma tandana na luar biasa pestanta sadarion. Luar biasa, nang pe ndang luar biasa pamestahononta. Ai umbalga do pemestahononta di Natal sian Paskah (Ari Parningotan haheheon), hape Paskah do pusok ni haporseaonta. Boasa luar biasa Paskah i? Ala hehe Jesus sian hamatean; ala monang Jesus maralohon hamatean. Luar biasa paskah i ala dilehon semangat naimbaru tu sisean i. Mangihuthon Evanggelium na opat i dohot Padan na Imbaru, dilehon haheheon ni Jesus do semangat, habaranion tu siseanNa naung ginohan ni biar dung mate Jesus. Haheheon ni Jesus mangalehon habaranion tu sisean i laho manghatindangkon Jesus na monang i.

Hasomalan ni Jahudi do borhat tu tanornan ni sisolhotna, 3 ari padodot dung ditanom. Ala hasomalan i do borhat angka boruboru i manopot tanoman ni Jesus. Nang pe naung mate Jesus ndang lupa nasida di Ibana. Nang pe ndang sude nasida sisolhot ni Jesus masihol do nasida di Ibana. Dung ditangkup Jesus sai dipaihutihut angka parompuan i do Jesus. Tuhanna i. Ndang songon angka baoa i mabiar jala martabuni. Sisean baoa i do na mandok. "Sahat tu hamatean pe Ho Tuhan, ingkon huihuthon". Hape holan hata do, ai dung ditangkup Jesus disoadahon si Petrus do Ibana, na asing i mabiar lao martabuni. Alai anggo boruboru i diihuthon do Jesus, masihol do nasida tu Jesus. I do umbahen laho nasida manopot tanoman ni Jesus. Holip sian mata, holip sian roha, i do bangko ni jolma. Ndang songon i parompuan i. Nang pe ndang sisolhotna Jesus, nang pe naung mate Jesus masihol do nasida tu Jesus. Hobas do angka parompuan i dungo manogot i, di buha buha ijuk. Dikorbanhon parpodomon laho mandapothon Jesus. "Modom" i ma simbol ni hasonangan. Olo parompuan i maninggalhon hasonangan ni pamatangna laho mandapothon Jesus. Hea do tatinggalhon hasonangan ni panghilalanta laho mandapothon Jesus? Manang sabalikna, tatinggalhon Jesus ala hasonangan portibi. Rupani ala adong tayangan hasoloman ni rohanta di ari minggu, sundat tu parmingguan. Manang, ndang laho tu partangiangan ala manonton pertandingan bola. Ala mangula, ala ni adat, sundat pajumpang dohot Jesus di parmingguan. Manangihon Hata ni Debata i do tanda ni sihol ni rohanta di Jesus.

Di na sahat nasida tu tanoman i dibereng nasida ndang disi be bangke ni Jesus. Ndang diantusi nasida, rumar tanoman i ala naung hehe do Jesus. Aha do na masa tu si Maria? Boasa pintor marlojong ibana? Na marlapatan do i "ndang diboto ibana aha na masa, ndang diantusi ibana na masa i". Songon i ma si Maria Magdalena gok haholomon ala gondok ni rohana, ala holan sada na piningkiran ni rohana i ma na sai torus habot rohana tu bangke ni Jesus. Alani andorang so sahat dope ibana tu tanoman i, diida ibana nunga dihindat batu i sian tanoman i. Aha ma na ro tu pingkiranna? Sian udut ni carita i di ayat 15, na ro tu pingkiranna i ma naung ro do panangko kuburan. Di bagasan haholomon gondok ni roha gabe panik ma ibana, dung i marlojong mulak paboahon tu si Simon Petrus dohot sisean haholongan ni Jesus. Songon i nang si Petrus tong dope di bagasan haholomom, kebingungan, cemas, khawatir jala panik. Songon siseanNa di buhabuha ijuk i, na tongtong dope hita tartuktuk di bagasan haholomon, tartuktuk hita di haholomon ni dosa, mardalani jala marlojong dope hita di bagasan haholomon, di bagasan haliluon. Sipata songon si Petrus dohot si Maria dope hita na di haholomon i, na gok haholomon do ngolunta on, kebingungan, panik jala khawatir.

Dung sahat angka sisean i tu tanoman manigor hatop do si Petrus masuk ta tanoman i. Diida si Petrus ma tolu tanda: na parjolo, sada tanoman na rumar; na paduahon, kain lenan manaputi bangke i peak tungkan hapeahan bangke ni Jesus; na patoluhon, dung i sekka panaputi simanjujung ni Jesus. Dipanotnoti si Petrus do i, alai ndang diantusi ibana, tongtong dope di haholomon biar ni roha ibana. Ai nunga didok Jesus hian tu si Petrus dohot tu angka sisean na asing paboa na ingkon masa i: "la Anak ni jolma i ingkon godang do sitaonNa, laos pusaonna do, dung i mulak mangolu do dung tolu ari (Mark. 8:31). Mansai godang do halak Kristen di tingki on songon si Maria Magdalena dohot si Petrus, na so mampu mangadopi sitaonon dohot angka gondok ni roha di bagasan haporseaon, na so mampu menguasai kekecewaan dohot lungun ni rohana marhite hata ni Debata. Baliksa gabe hira sisoada angka las ni roha na jinalona sian Debata ala umbalga sitaonon i didok rohana sian huaso ni Debata.

Alai naeng nian hita songon sisean na sada, sisean ni Jesus na so nigoaran di turpuk on, sisean na hinaholongan ni Jesus i. Secara sederhana, bulus do dipatorang tu hita (ay. 8) bongot do nang ibana tu bagasan tanoman i, "dipanotnoti gabe porsea ma ibana". Na marlapatan, anggo di ibana nunga salpu be haholomon i, nunga torang nuaeng diida ibana, nunga di bagasan hatiuron ibana dung diida, dipanotnoti, dung i porsea. Sisean na so ginoaran on ma na gabe model (contoh) di sude halak Kristen nian. Ndang adong pola ringkot di ibana panatapan sian surusuruan. Ndang pola ringkot di ibana marnida Jesus secara langsung sian pamereng ni simalolongna sandiri. Ndang pola ingkon jamaonna manang haolonna Jesus naung hehe i asa porsea ibana. Ndang! Sederhana do, dipanotnoti tandatanda i: tanoman na rumar dohot pahean panguburan, dung i porsea ibana. Dia ma lapatan ni haheheon ni Jesus i di hita nuaeng? Barita na uli ni Pesta Paskah sadari on mandok: ndang be di bagasan haholomon hita ala nunga hehe Jesus. Ibana do Tuhanta dohot hatiuronta. Songon sisean na hinaholongan i, asa hita pe porsea nang pe so marnida. Tutu ndang taida Jesus marhite simalolongta. Alai uju tatangihon barita na uli, marnida ma hita dibagasan haporseaon. Marhite mata ni haporseaonta do hita marnida, gabe porsea. Alani molo nunga taida/tapanotnoti angka pambahenan ni Debata ni ngolunta, naeng ma i patubuhon haporseaonta, songon sisean haholongan i, dung diida/dipanotnoti siseanNa i angka na masa i, disi ma porsea ibana. Naeng taida marhite mata ni haporseaonta naung mate do Jesus di hau pinarsilang alani dosanta, taida do i dibagasan haporseaonta. Jala taida Ibana hehe sian na mate di bagasan hamuliaon, secara ajaib taida do Ibana mangolu marhite mata ni haporseaonta.

Paskah i ma barita hangoluan na mamboan las ni roha Nunga taripar Jesus sian hamatean tu hangoluan. Songon i ma nang hita na porsea di Ibana, taripar do hita sian hamatean tu hangoluan. Na marlapatan na tarjou do hita tu sada ngolu na imbaru di bagasan Kristus. Na hehe do Tuhan i jala na mangolu do Tuhan i, na marlapatan nunga malua hita sian hamatean paduahon sogot, songon angka siseanNa na di ari Parjolo Paskah i, dijou do hita haruar sian haholomon i asa mardalan hita di bagasan sondang hatiuron ni Tuhanta naung hehe i. Paskah manjou hita menyadari ia Jesus Kristus i do Tuhanta na mangolu na mangalehon hangoluan, hatiuron dohot dame di bagasan rohanta asa unang sai tahutan, panik jala mabiar hita mangadopi angka na masa di portibi on. Di Pesta Paskah naeng marolopolop tondinta mamuji pasangaphon Kristus naung hehe sian na mate ala nunga di hita hangoluan na salelenglelengna. Amen.