Khotbah Efesus 1: 15 - 23 Yesus Duduk di Sebelah Kanan Allah

 Kenaikan Tuhan Yesus; Kamis 29 Mei 2025

1:15 Asa ahu pe, dung hubege, naung porsea hamu di Tuhan Jesus jala holong rohamuna di saluhut angka na badia,

1:16 ndang mansadi ahu mandok mauliate siala hamu, marningot hamu, di na martangiang ahu:

1:17 Anggiat dilehon Debata ni Tuhanta Jesus Kristus, Ama ni hasangapon i, tu hamu Tondi hapistaran dohot pangungkapon mananda Ibana.

1:18 Dipatiur ma mata ni rohamuna, asa diboto hamu rumang ni arta sihirimon sian panjouonna i ro di surung ni hasangapon, siteanon ni angka na badia i.

1:19 Asa ditanda hamu nang hagogok ni gogona na sumurung i na tu hita, angka na porsea sian pangkorhon ni hagogoonna na marmulia i.

1:20 Ai di Kristus do i diulahon Debata, di na pinahehena i Ibana sian na mate jala pinahundulna i tu siamunna di bagasan banua ginjang i,

1:21 tu ginjang ni nasa harajaon dohot huaso, nang hagogoon dohot hamuliaon, nang tu ginjang ni nasa goar na tarhatahon, ndada holan di hasiangan on, dohot do di na ro sogot.

1:22 Saluhutna do dipatunduk tutoru ni patna, jala dipabangkit do Ibana, na mangatasi sasude, gabe ulu ni huria i.

1:23 I do pamatangna na manggohi Ibana, asa gohanna sasude di bagasan saluhutna.

Sai songon na ngali do pamestahonon ni halak Kristen di Ari Parningotan Hananaek ni Tuhan Jesus martimbangkon pesta na asing. Torop ni na marpungu tu gareja pe di ari i ndang songon torop ni jolma na ro di pesta Natal, ari Parningotan Hamamate, Haheheon ni Tuhan Jesus dohot di ari Haroro ni Tondi Porbadia. Ra didok roha nadeba ala so di ari Minggu dipamasa parningoitan i ndang pola ringkot ro tu gareja di ari i. Ndang holan ala di ari holang, Kamis dipatupa ari Parningotan Hananaek ni Tuhan Jesus dohot do ala so diantusi pardomuan ni hananaek ni Jesus tu haporseaon. Sai dirimpu do i holan barita na palonganglongankon. Angkup ni, jempek jala otik do barita Hananaek ni Tuhan Jesus di buku na badia i, ndang songon jamita na mardomu tu Hatutubu, hamamate, haheheon ni Tuhan Jesus, dohot hasasaor ni Tondi Porbadia. Hape molo tasigati Hata parsirangan na pinasahat ni Tuhan Jesus di Johannes 14-16, dohot hataNa parpudi andorang so manaek tu banua ginjang, ndang hurang arga ni Hananaek ni Tuhan Jesus di haporseaonta. Ai marhite hananaekNa i disungguli hita mandok mauliate ala songon i lelengna Jesus maringanan di tongatonga ni hajolmaon mangajari, mangurupi dohot patandahon Ama i tu hita. Marhite hananaekNa i dipasahat tu hita ulaon dohot huaso mamaritahon barita na uli i, jala na parade ingananta do hananaekNa i, songon na nidokNa tu siseanNa.

Dipatorang si Paulus di surat on taringot tu dalan sitaonon ni Jesus na marhaujungan tu hasangaponNa. Dipatorang si Paulus tu huria Epesus, marhite hananaek ni Jesus tu banua ginjang dilehon kepastian tu na porsea i, paboa songon Jesus na sahat tu hasangaponNa songon i do na porsea i pajumpang sogot dohot Ibana di banua ginjang. Hombar tusi do lapatan ni parpunguanta di Parningotan Hananaek ni Tuhan Jesus. Kristen siotikotik jala na dipasisi. Songon i ma rumangna angka siihuthon Kristus di Epesus hatiha i. Tardok saotik do di huta bolon na marisihon jolma hirahira 250.000 halak. Asing ni parsombaon tu Artemis, adong do pe angka parhaporseaon manang ugamo na asing di si. Di roha ni toropan pangisi ni Epesus, tumagon do ugamo Artemis sian hakristenon (ida Ul 19: 27). Asa tardok, halak Kristen di Epesus i, siotikotik di hatoropon, di bagasan ondamondam ni parhaporseaon Artemis, dihaliangi angka poda dohot pangulaon haholomon (okultisme), songon i muse panggosaon sian angka parhuaso. Ndang holan sian angka parbegu i na manulak nasida, alai laos dohot do angka dongan sapunguan nasida di sinagoge, i ma angka halak Jahudi na so mangokui Jesus na gabe Mesias, ala di mulana i rap do pe halak Kristen sapunguan dohot nasida di Sinagoge. Songon i ma angka hamaolon niadopan ni halak Kristen na di Epesus. Dipasisi, hira na so mararga, dipalea jala dipados tu angka na so sintong parsombaonnasida nang na sinombana pe, ala asing sian na somal disomba angka natorop.

Di pamuhai ni surat on dipatorang do las ni roha na masa ala nunga marparbue haporseaan ni huria Efesus di Kristus Jesus. Boi do tang haporseaon nasida nang pe godang angka panomba ganaganaan di luat ni huria i. Sada pencapaian na luar biasa do on, ala boi monang nasida patuduhon haporseaon na togu di tongatonga ni halak na so daulat roha. Alani di bagasan las ni rohana, diboan panurat surat Efesus on do nasida di tangiangna. Di bagasan roha mauliate di adopan ni Debata, ditangianghon ibana ma ruas ni huria i ala marparbue haporseaon nasida, jala huhut do ditangianghon ibana asa dilehon Tuhan i tondi hapistaran dohot tondi pangungkapon tu huria Epesus, i ma Tondi Parbadia, na margogoihon huria i laho mangalo saluhutna na naeng manusai jala mambahen gaor huria i.

Adong do dua pangidoan na boi idaonta di bagasan tangiang i. Pangidoan na parjolo i ma asa dipatiur Tuhan i mata ni roha huria Efesus gabe tangkas ma diboto jala ditanda nasida arta sihirimon sian panjouonNa i ro di surung ni hasangapon, siteanon di angka na badia. Pandohan on mangondolhon asa lam patar nian diida huria i saluhut na denggan basa ni Debata jala ndang be olo nasida digaori saluhut na adong di hasiangan on. Dos jala hombar do pangidoan na parjolo i tu pangidoan na paduahon, i ma asa ditanda huria i hagogok ni gogoNa na sumurung i. Sian dua pangidoan i sada do tujuanna, i ma asa tangkas jala bagas ditanda jala dihaposi huria i Kristus Jesus naung manaek tu harajaonNa jala manggomgom di harajaon na saleleng ni lelengna. Dung diida nasida surung ni huaso ni Kristus ndang mura be dipalindaklindak portibi on haporseaon nasida. Alai lam tang jala lam togu ma haporseaon nasida i marhite panandaion dohot panghirimon di Kristus na naung manaek tu banua ginjang i.

Di ayat 20 tangkas do dihatindanghon "Ai di Kristus do i diulahon Debata, di na pinaheheNa i Ibana sian na mate jala pinahundulNa i tu siamunna di bagasan banua ginjang i." Asa mansai tangkas do diajarhon jala dipodahon taringot tu panandaion tu Kristus Jesus, i ma naung mate jala dipahehe laos manaek tu siamun ni AmaNa di banua ginjang. Mansai denggan do diajarhon taringot tu Jesus, i ma dalan laho pamurahon pangantusion ni huria i paboa Ibana do Anak ni Debata jala naeng ma tongtong nasida marhaporusan tu Tuhan Jesus. Tangkas do dipabotohon huaso manang jabatan ni Kristus i ma so marna suda ndada holan di hasiangan on alai hot do nang tu ari sogot sahat tu ari paruhuman ni saluhut jolma. Sude do tunduk tu goar ni Kristus, ai di toru ni huasoNa do luhutna na adong di hasiangan on. "Saluhutna do dipatunduk tu toru ni patna." Pandohan i manggombarhon ndang adong tudosan ni Jesus, martimbanghon saluhut na adong di hasiangan on, jala sudena tunduk di Ibana.

Asa hananaek ni Jesus tu banua ginjang mamboan haulion do di hita. Taruli do hita di haluaon na pinatupaNa i. Ai manaek Ibana tu banua ginjang laho paradehon inganan di saluhut na porsea di Ibana. Asa naeng lam tang ma haporseaonta tu Ibana, ai marhite haporseaon i do boi tatanda huaso jala hagogoon ni Kristus na mangatasi saluhutna di hasiangan on. Naeng taungkap rohanta dohot haporseaonta laho manomunomu haluaon na binoan ni Kristus tu saluhutna halak. Jala mata ni haporseaonta naeng ma marnida hinagok ni haluaon na binoan ni Kristus tu saluhutna jolma. Asa unang ma tatondong dalan hamagoan, songon na didok di BE No. 182: 3 "Kristen au, hape hutondong dalan hamagoan i." Nunga taboto jala tatanda dalan hasintongan, alai jotjot gabe taoloi do hisaphisap ni dagingta jala mandao hita sian dalan haluaon naung diparade Kristus tu hita. Antong marhite hananaek ni Kristus on, lam tapatogu ma haporseaonta tu Ibana jala tangkas ma taida denggan basa dohot huaso Kristus i di hita, asa boi hita mangolu di bagasan hatigoran dohot lam tang haporseaonta tu Ibana, songon huria Epesus na tang haporseaon nasida nang pe sai dipagosagosa angka parugamo na leban nasida. Margogo ma hita laho mangulahon hataNa jala taihuthon ma dalan haluaon na pinasahat ni Kristus i tu hita. Amen.