Khotbah Kisah Para Rasul 11: 1-18 Allah Mengaruniakan Pertobatan

 Minggu Kantate; 18 Mei 2025

11:1 Alai dibege angka apostel dohot angka dongan na di Judea i ma, naung dohot do hape halak sipelebegu manjangkon hata ni Debata.

11:2 Gabe dibadai angka na porsea sian Jahudi i ma si Petrus, dung nangkok ibana tu Jerusalem, angka ninna ma:

11:3 Bongot do ho hape tu angka halak na so tarsunat, jala rap mangan do ho dohot nasida!

11:4 Alai jojor sian mulana ma dipatorang si Petrus na masa i, ninna ma:

11:5 Uju na martangiang ahu di huta Joppe, huida ma di bagasan tondingku, mijur sada inganan na bidang na maropatsuhi, tartantan sian ginjang ro di jolongku.

11:6 Dung i di na hupanotnoti i, huida ma disi angka siopatpat na di tano, angka binatang dohot angka na manjirir ro di angka pidong na martongatonga langit.

11:7 Jadi hubege ma soara na mandok tu ahu: Hehe ma ho, Petrus; seseati ma, pangan ma!

11:8 Alai ningku ma: Tongka, Tuhan! Ai ndang dung hudai na ramun manang na so ias.

11:9 Alai mangalusi ma soara i paduahalihon sian ginjang: Unang ramun dok naung niiasan ni Debata!

11:10 Ro di tolu hali do masa songon i dung i ditait ma saluhutna i muse tu ginjang.

11:11 Dung i tongon di na satongkin i jongjong ma tolu halak di jolo ni jabu inganannami, angka na disuru sian Kaesarea mandapothon ahu.

11:12 Alai didok Tondi i ma tu ahu, na so jadi ganggu rohangku mandongani nasida. Alai angkuphu do dongan na onom on, jadi hubongoti hami ma jabu ni halak i.

11:13 Dibaritahon ma tu hami, naung niidana surusuruan i jongjong di bagasan jabuna, na mandok tu ibana: Suru ma tu huta Joppe, manjou si Simon na margoar Petrus!

11:14 Hatahonon ni i do tu ho hata na tau paluahon ho ro di sandok isi ni jabum!

11:15 Alai mamungka dope ahu marjamita disi, gabe songgop ma Tondi Parbadia tu nasida, songon na tu hita di mulana i.

11:16 Disi ma huingot hata ni Tuhan i na nidokna i: "Aek do dididihon si Johannes, alai Tondi Parbadia do didihononhon tu hamu!"

11:17 Antong, tung margogo ma ahu mangambat Debata, anggo dos do hape silua na binasabasahon ni Debata tu nasida, songon na tu hita, angka naung gabe porsea di Tuhan Jesus Kristus?

11:18 Dung dibege nasida hata i, hohom be ma, gabe dipuji ma Debata, angka ninna ma: Asa dohot do hape tu halak sipelebegu dilehon Debata hamubaon ni roha asa mangolu!

Dipatuduhon si Lukas i ma panurat ni buku Ulaon ni Apostel on do hinaringkot ni barita ni parjumpangan ni Apostel Petrus dohot Kornelius, pola do dipaduahali mambaritahon barita masa i. Na parjolo disurathon ma i di bindu 10 dungi diulahi ma muse di bindu 11. Tontu marhahonaan ma i tu ringkot ni barita on laho papatarhon tu ganup panjaha taringot tu ulaon manang pambahenan ni Debata di na masa i. Dung mulak Apostel Petrus tu Jerusalem mamintor dipangido do ibana laho patoranghon ulaon na pinatupana di parjumpanganna dohot angka halak sileban (non Jahudi) ala nunga tung suhar situtu di roha nasida pangalaho ni Apostel Petrus na martamue tu bagas ni si Kornelius jala rap ma-ngan dohot angka halak sileban i. Dibuhai panurat do turpuk on marhite naung sar barita di angka na porsea di Jerusalem taringot naung dohot do hape halak sipelebegu manjanghon hata ni Debata. Sada na mansai ringkot sian na masa i na mambahen hagunturon di nasida i ma na mandok bongot do ho hape Apostel Petrus tu angka halak na so tarsunat, jala rap mangan dohot nasida! Hata "halak na so tarsunať" patuduhon sada parsoalan na mansai rongking ai mamintor dipatudu hata "sunat" on do hatandion ni halak Israel songon bangso ni Debata maradophon bangso na asing, asa mansai ringkot do pangalapation ni hata on ala marhahonaan do on tu proses inisiasi (proses awal)- parsidohotan ni halak sileban tu ruas ni bangso ni Debata.

Ndang pola mamintor dialusi Apostel Petrus haboratan ni angka na porsea i, alai jojor jala nonor dipatorang Apostel Petrus sian mulana boha pambahenan ni Debata na mamboan ibana marjamitai jala laos bongot do tu bagas ni si Kornelius. Asa tangkas dipaboa ibana ndada sian sangkap manang tahi ni rohana na masa i gabe ingkon bongot ibana tu bagas ni sipelebegu - non Jahudi. Dipabotohon Apostel Petrus do na masa jala na pinarungkilhonna andorang so muba pangantusion dohot pangalahona taringot tu halak sipelebegu - non Jahudi, diondolhon ibana tung ala ni pambahenan ni Debata do umbahen adong hamubaon di ibana (ayat 4-14) tung marhite partondion do. Dipabotohon Apostel Petrus do na masa tu ibana taringot sipanganon dohot soara na ro sian ginjang pola tolu hali masa songon i dung i ditait ma muse sude tu ginjang. Hata "ginjang" na pinahena disi manggombarhon "peristiwa ilahi". Marhite parnidaan na dijalo si Petrus, diida ibana do angka siopat pat na di tano, angka binatang dohot angka na manjirir ro di angka pidong na martongatonga langit. Tingki dibege si Petrus soara na mandok "seseati ma, pangan ma!", alai ditulak si Petrus do ala ditiop ibana dope hasomalan ni hajahudion. Mangihuthon si Petrus hira na maralo do tu rohana pandohan i. Alai nang pe songon i, dipatangkas soara i do muse marhite ayat 9 "unang ramun dok naung niiasan ni Debata!". Marhite parnidaan on, ndada holan taringot tu sipanganon, alai poda na sian Debata taringot tu holong na lobi sian hasomalon ni halak Jahudi. Diajari Debata do taringot tu sude jolma tujuan ni Debata mangatasi angka nasinangkapan ni jolma. Nang pe ringkot angka hasomalon na naung salpu, ndang boi i mangambat angka tujuan nanilehon Debata tu ganup jolma.

Pangoloion na sian si Petrus tu Debata nang pe maralo tu hasomalon, patuduhon habaranion ni partondion do i. Disadari si Petrus do ingkon paojahonna ibana di harohaon na sian Jahowa di ginjang ruhut manang hasomalon na nunga leleng ditiop ibana. Ndang mura tahi na dibuat si Petrus on, marningot laho dihilala ibana do angka kritik sian donganna sahaporseaon. Alai, hot do ibana mangoloi hata ni Debata, ala jotjot do panjouon Debata manogihon hita laho ruar sian "zona nyaman". Dibagasan parngoluonta, mansai ringkot do hasatiaon lumobi dibagasan panjouon i. Isarana Hita angka parhalado tingki dijou Debata hita, ra adong do Sian Hita na tongtong mangihuthon hasomalanta hian. Hape ingkon barani hita maninggalhon hasomalanhasomalan na maralo tu hata ni Debata. Isara ni hasomalan marsidalian, marlembalemba, jotjot tarlambat tu angka ulaon (leleng ro, hatop mulak) dohot lan na asing.

Di ayat 15 didok andorang manghatai manang marjamita dope Apostel Petrus songgop ma Tondi Parbadia tu angka halak na so Jahudi, songon tu angka apostel di tingki ari Pentakosta. Hatorangan i naeng patangkashon tu nasida na so marimbar do jolma di adopan ni Debata, ai Tondi Parbadia do na manahaphon tu ganup jolma gabe nampuna ni Debata. Tondi Parbadia do na manghehei menggerakkan ganup halak manghaporseai dohot manjanghon Jesus Kristus gabe sipalua jala laos Tondi i do mangungkap panandaon di Ibana dohot di siteanon ni angka na porsea. Di ayat 17, dipangke Apostel Petrus do kalimat retorik di na mandok: "Antong, tung margogo ma ahu mangambat Debata?" On ma puncak ni sude alus na pinasahat ni Apostel Petrus laho mampartanggungjawabhon sude ulaon na tarsurat di turpuk on. Dipasahat Apostel Petrus: "Debata do na marsangkap jala Debata do na patupahon, tung ise ma ibana na boi mangambati Debata?" Marhite i pandohan i naeng pataruon ni Apostel Petrus ma ganup angka na porsea tu sada panindangion haporseaon na dibuhai sian pangalaho pangoloion maradophon hadaulaton ni Debata jala laos sosososo do hata i tu ganup na porsea asa unang gabe pangambati di sangkap ni Debata taringot holong ni rohaNa tu portibi on. Alus manang tanggapan na diigil sian Hatorangan na pinasahat ni Apostel Petrus taringot tu parjumpanganna dohot halak na so Jahudi ndada pola taringot tu na sintong do manang na ndang sintong ulaon na pinatupa ni apostel i, alai na rumingkot tanggapan na niigil sian turpuk on i ma panindangion na mandasor sian angka na porsea i taringot tu na dilehon Debata do silua basabasa na sarupa tu sandok jolma: Jahudi manang na so Jahudi i ma Tondi Parbadia. Laos Tondi i na mambahen ganup halak sahat tu hamubaon ni roha na manghorhon haluaon. Dung dipasahat Apostel Petrus hata di ayat 17 i, hohom ma nasida, sian i gabe ruar ma pamujion ala sangkap dohot pambahenan ni Debata na mangalehon hamubaon ni roha tu sipelebegu asa mangolu.

Goar ni minggunya sadarion Kantate, na marlapatan endehon hamu ma di Jahowa ende na imbaru (Psalmen 98:1). Ende na tapasahat tu Debata i do panindangion ni haporseaonta marningot denggan basa ni Debata. Marhite turpuk evangelium on, dipatudu do tu hita songon dia pengalaman naung dihilala si Petrus. Ingkon adopan ni ibana do ketegangan antara hasomalon ni ugamo Jahudi dohot parenta ni Debata na mangalaosi batasan hasomalon ni halak Jahudi. Marhite turpukta sadari on, diajari do hita laho mangungkap rohanta dohot pingkiranta asa boi hita gabe panindangi na satia tu Debata dijou do hita asa boi gabe parhitean holong ni roha ni Debata tu ganup halak. Ndada holan tu keluarganta alai boi do tu halak na asing. Marhite na mangurupi dohot rap mangula (kerjasama) dohot nasida. Di sude parungkilon, taingot ma tujuan utama ni haporseaonta, ima mamaritahon holong ni Kristus tu ganup jolma.

Dijou hita angka na porsea asa gabe sitindangiNa asa lam tamba na porsea di Ibana. Dijou hita mangarahon jolma na humaliang hita laho mananda Jesus. Panindangionta i unang holan marrumang holan hata, alai tapapatar marhite parange na denggan. Molo gabe las ni roha hita di donganta, i do panindangionta na mangolu. Molo las ni roha hita di na humaliang hita, i do parange na denggan. Parangenta na denggan i do daya tarik, daya pikat tu portibi on manjalo haluaon i. Na mangihut unang sogo rohanta manjalo angka kritik sian angka donganta. Alana boi do kritik i paulihon hita di angka nahurang singkop. Songon si Petrus, jotjot do hita manghilala panulakan, alai sude kritik ni angka dongan paulihhon hita do i. Di panghobasion ni Tuhan Jesus pe godang do angka kritik dohot sogo ni roha ni halak parise dohot angka siboto surat, alai ndang pola gabe sogo roha ni Jesus tu nasida gariada dilehon Jesus pangajarion manang alus na patut (Mat. 23:13-22). amen.