Khotbah Yehezkiel 34: 11 - 16 Allah Menggembalakan UmatNya

 Minggu Jubilate; 11 Mei 2025

34:11 Ai songon on do hata ni Tuhan Jahowa: Ida ma, ahu, apala ahu sandiri usouso sogot di birubirungku, jala luluanku nasida.

34:12 * Songon pangalului ni parmahan di punguanna di ari uju di tongatonga ni birubirunna angka na mampar i ibana, suang songon i ahu mangalului birubirungku sogot, jala paluaonku nasida sian saluhut inganan parserahannasida i, * uju di ari ombun dohot haholomon marimpotimpot.

34:13 Jala ahu manogihon nasida ruar sian angka bangso dohot papunguhon nasida sian angka luat, asa huboan nasida mulak tu tanonasida i, laos ahu marmahan nasida di atas ni angka dolok Israel, di bagasan angka rura dohot di bagasan saluhut parmianan di tano on.

34:14 Di * jampalan apala na lomak ahu marmahan nasida, jala di atas dolok angka na timbo di Israel parudamannasida, disi ma mangulon nasida di parudaman na denggan, jala jampalan apala na lomak jampalanna di atas ni angka dolok ni Israel.

34:15 Ahu sandiri ma marmahan birubirungku, jala ahu paulon nasida, ninna Tuhan Jahowa.

34:16 Luluanku ma na mago i, jala mulak boanonku na tardempar i, jala lilitanku do na mabugang i, jala pargogoanku do na marsahit i; alai anggo na mokmok i dohot na gogo i siaphononku do, ahu sandiri tahe marmahansa marhitehite uhum.

Adong sada pandohan ni natuatua "ummaol do marmahan sada jolma sian marmahan saribu horbo". I do holso ni godang natoras, ama manang ina di tonga ni jabu. Godang na marsak ala ni ianakhonna na manuntun lomo, mangalo poda ni natoras manang didok dakdanak na so tarpinsang. Tubu pe pandohan i siala jugul dohot jogal ni ianakhon i do. Jut do roha ni natoras mamereng anak dohot boruna na so olo marhamubaon. Ndang otik be natoras di partingkian nuaeng mandok borat situtu manogunogu ianakhon jala adong muse mandok angka dakdanak i siparo jea dohot parmaraan do. Marlea natoras alani gellengna.

Borhat sian pangantusion on ma nuaeng taida ulaon ni panurirang Hesekiel na dipabangkit Jahowa gabe parmahan di bangsoNa, Israel na tongon tarbuang di Babel. Ndang holan manjaga dohot marmahan pamatang manang daging ni bangso i ibana alai lumobi manjaga tondi nasida huhut manogunogu asa unang manimbil sian dalan dohot patik na hinalomohon ni Debata. Na tongon do bangso i maheu di Babel, marsak jala lungun dihilala ala nunga leleng dao sian bonapasogitna. Holang sian tano habutubuan dohot angka sisolhot. Ndang sonang be dihilala nasida mangolu di luat na leban i, ai na tartaban do nasida disi. Sai holsoan jala marsak do rohanasida jala dao sian ngolu na marlas ni roha. Tu bangso i do dipaborhat Debata panurirang Hesekiel, marmahani nasida asa tongtong mangolu, marhaporseaon tu Debata Jahowa. Songon dia do bangso i manjangkon hadirion ni panurirang i, aha do alusnasida? Ala di habuangan Babel do ibana dijou Debata, hira so adong do na porsea tu panurirangonna jala didok ndang toho ibana panurirang ni Debata.

Marnida bangso na tarbuang i tung asi situtu do roha ni Jahowa. Ndang dipasombu Ibana bangso i mago di panghirimon jala ndang diloas nasida mangolu di pandelean. Hombar tu pangalaho na masa i do dipatubegehon si Hesekiel hata ni Debata na mandok, "Ida ma, apala Ahu sandiri usouso sogot di biru-birungku, jala luluaHu nasida". Ala naung di bagasan pandelean i do bangso i umbahen Ibana sandiri marmahani nasida. Bangso Juda do na gabe birubiru ni Jahowa jala Ibana Parmahan nasida. Ibana mangalului nasida angka naung lilu manondong dalanna, marlapatan ndang laos mampar nasida so marparmahan. Dibagabagahon Jahowa ari haluaon na ingkon hatop jaloonnasida. Ibana sandiri do na manogihon bangso i ruar sian angka bangso dohot papunguhon nasida sian angka luat. Ibana mamboan nasida mulak tu tanonasida jala laos Ibana marmahan nasida di atas ni angka dolok Israel di bagasan angka rura dohot di bagasan saluhut parmianan di tano on (ayat 13). Bagabaga i do hataridaan na hot do bangso i hasian ni Jahowa. Nang pe diloas Ibana Babel manaban satongkin, na naeng mangajari do Jahowa, asa ditanda nasida nian pangalahona naung dao sian dalan na sintong. Habuangan i do na gabe inganan mangarajumi angka bangso nasailaon huhut gabe partingkian laho marhamubaon. Di Babel i ma nian nasida manopoti hasalaan dohot dosana be asa boi sahat na pinarsinta ni Tuhan i, gabe pasupasu tu saluhut bangso. Aha ma na naeng masa molo Jahowa gabe Parmahan ni bangso i? Di ayat 14 didok, "di jampalan apala na lomak Ahu marmahan nasida, jala di atas dolok angka na timbo do Israel parudamannasida, disi ma nasida mangulon di parudaman na denggan, jala jampalan apala na lomak jampalanna di atas ni angka dolok ni Israel". Lapatanna, Jahowa nama na paradehon na ringkot di ngolunasida. Ndang pola be mangahut na so artana nasida. Ndang hurangan di sipanganon ai jampalan apala na lomak do diparade Jahowa.

Angka na tangkas mananda soara ni Debata jala mangulahonsa, sai na idaonna do tangan ni Debata marmudumudu ngoluna ariari, panghilalahononna nang lambok ni tanganNa na mangalilit bugang ni dagingna uju masa parsahiton, jala mangalehon gogo dohot haluaon di angka parmaraan di angka pardalanan ni ngoluna. Asa manang ise na marhatopothon Jahowa na marmahan ngoluna, ndang tagamon lomos manang tahutan di angka na ringkot di ngolu siganup ari. Sai tongtong do sonang rohana mandalani ariari ni ngoluna atik pe dibolus lan hasusaan dohot parmaraan, ala diboto tangkas di bagasan huaso ni Debata do saluhut huaso dohot hagogoon na adong di tano on. Adong do jaminan sian Debata di angka na tangkas manangihon dohot mangulahon na nidok ni Debata, paboa sai angka na dumenggan do jaloonna sian tangan ni Debata.

Ndang holan bohal pardagingon rade dibahen Debata gabe so manaon rapar nasida dohot do nang hahipason disarihon Ibana. Ndang adong be na lilu ala Jahowa marmahan nasida. So mansohot Ibana usouso mangalului na lilu manang na mago jala sai dijamothon nasida asa unang adong na diroro pangago. Hasonangan do na gabe siparsaulihononasida ganup ari di parmahanion ni Tuhan i. Hombar tu hataNa di ayat 16, "LuluanHu ma na mago i, jala mulak boanonHu na tardempar i, jala lilitanHu do na marsahit i....; Sipabosur na male, silehon aek na tio tu angka na mauas huhut pandaoni di angka na marsahit do Ibana tu bangso i. Sada na mansai nalnal taida sian angka pandohan ni Jahowa i ma haburjuonNa. Ndang dipangido bangso i na ringkot di dirinasida alai nunga singkop diparade. Umbotoan do Jahowa dia na ringkot di ngolunasida siganup ari. Sian i do tandana, tung mansai holong situtu do Ibana di bangso i. Ripe mandai na tabo nama nasida dung mulak tu bonapasogit sogot. Sonang nasida mandalani ariari ni ngolunasida disi ai nunga Jahowa paradehon saluhutna. Ndang nasida na marusaha asa boi ruar sian Babel, alai Jahowa do na ro mamboan, manguluhon nang mangaramoti ngolunasida. Nian nunga tarhirim Jahowa sian nasida ala na mangalaosi nasida di patikNa.

Ndada holan tu bangso Israel Jahowa gabe Parmahan. Hita pe nuaeng tongtong do diparmahan Ibana ai didok Jesus tu hita, "Parmahan na denggan do anggo Ahu. Diseahon parmahan na denggan i do hosana humophop angka birubiruna" (Joh. 10:11). Na porsea di haluaon pinatupa ni Jesus tongtong diparmahani Jesus. Alai tubu ma nuaeng sungkunsungkun tu hita, rade do hita tahe diparmahani Tuhanta Jesus? Manang sai manuntun lomo do hita laho pasombu tagas manang hisaphisap ni daging? Nunga taula be lomo ni rohaNa di ngolunta siganup ari? Laos tatangkasi ma dirinta be nuaeng, aha do na mangambat hita gabe dao sian ngolu na marolopolop. Atik do na tajua joujou ni Tuhan i, ujungna holan loja sambing dagingta. Taida ma na masa tu angka donganta. Hea do didai na tabo di ngoluna alai holan satongkin. Holan do jolma na mora alai suda hepengna ala holan manuhor ubat. Godang jolma marjabu na uli alai holan na gaor na sajabu i. Boasa? Ala ndang Jesus marmahan ngolunasida. Molo so diparmahan Tuhanta i ngolu ni sasahalak sega do parngoluonna dohot parsaripeonna. Jolma na marmahani dirina boi gabe hatoban ni dirina, ai sai na luluanna do angka na tuk pasombu hisapna. Ndang mansadi jolma hurangan molo guru tu lomona sandiri. Asa molo nasailaon tahilala nunga tung mansai dao hita sian punguan ni birubiru ni Debata, dao sian huria i, ndang hea be hita rap marsaor dohot donganta sahuria, dilului Tuhanta do hita, asa mulak hita marsaor dohot angka na hinaholongan ni Tuhanta i. Molo tahilala godang na hurang di ngolunta, adong angka sipatureon, adong angka hansit ni roha dohot angka na manorati roha dohot pingkiranta, tatangihon ma soara ni Parmahan Bolon i, asa malum rohanta jala marlas ni roha hita marsaulihon denggan basa ni Tuhanta.

Jubilate, marolopolop tu Debata ma sandok tano on, i do goar ni Minggu on. Marrumang joujou do goar ni minggu on mangarahon hita asa marolopolop. Marolopolop hita ala naung dihamonanghon Jesus hita marhite haheheonNa sian na mate. Marolopolop hita ala nunga ditaluhon hamatean i. Marolopolop hita ala ndang dipasombu Debata hita digosagosa hamatean i. Alani Unang taolophon arta na olo salpu, hasangapon na olo sega songon i nang pamatang na togos na olo marsahit. Taloas ma Tuhan i tongtong marmahani ngolunta asa dao hita sian holso, lomos, biar dohot mara. Molo pos rohanta di parmahanion ni Tuhan i, daionta do na tabo jala singkop do diparade Ibana angka na ringkot di parngoluanta siap ari. Unang padao dirim sian parmahanmu jala ihuthon ma parmahanmu asa sonang ngolum nuaeng nang sogot pe. Amen!