Khotbah Yeremia 29: 7 - 14 Berdoa untuk Kesejahteraan Bersama

 Minggu Rogate; 25 Mei 2025

29:7 Ringkoti hamu huhut hasonangan ni huta habuanganmuna na hubahen i, jala tangiangkon hamu nasida tu Jahowa, ai molo marhasonangan huta i, marhasonangan ma dohot hamu.

29:8 Songon on do hata ni Jahowa Zebaot, Debata ni Israel: * Unang olo hamu paotootoon ni panurirangmuna manang pangarunding angka na di tongatongamuna, jala unang patangitangi hamu nipi, angka na niipimuna.

29:9 Ai sipaotooto do na sinurirangkonnasida tu hamu marhitehite goarhu; * ndang ahu marsuru nasida, ninna Jahowa.

29:10 Ai songon on do hata ni Jahowa: Molo dung gok * na pitupulu taon i di Babel, ebatanku ma hamu dohot pasintongkon tu hamu bagabagangku na denggan i asa mamboan hamu mulak tu inganan on.

29:11 Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna.

29:12 Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu.

29:13 Jala luluanmuna ma ahu laos jumpang hamu, molo tung dilului hamu ahu sian nasa rohamuna.

29:14 Jadi jumpang hamu ma ahu, ninna Jahowa, jala * mulak bahenonku angka na tarbuang sian hamu, jala papunguonku hamu sian saluhut bangso parbegu dohot sian saluhut inganan haambolonganmuna na sai laon na hubahen i, ninna Jahowa, jala mulak hamu boanonku tu inganan haborhatanmuna hian laho tarbuang.

Di minggu Rogate sadari on dipasunggulhon Debata marhite panurirang Jeremia do tu hita asa tongtong mangolu di bagasan partangiangon. Molo martangiang hita tu Debata, ndada holan na mangido angka na ringkot di ngolu siganup ari alai lumobi naeng mananda dirinta di jolo ni Jahowa, jolma na so talup nian pajumpang dohot na sun badia i. Jala laos di bagasan tangiang i do hita naeng manangihon sangkap ni Jahowa, aha na naeng bahenonNa di parngoluonta jala laos disi ma hita mangelek asa tung marasi ni roha Ibana di angka na tapangido. Di tano habuangan Babel do uju i halak Juda jala tu nasida do ditongoshon panurirang Jeremia suratna mangido nasida asa manangianghon huta inganan nasida na tarbuang i Ndada holan manangianghon dohot do mangula na tinangianghon nasida. Lapatanna ndang manjujui Debata laho patupa na hinirim ni rohanasida di bagasan tangiangna alai mangido gogo sian Debata asa boi tulus na pinangidona i. Angkup ni dipodai ibana do nasida asa renta marparsaoran di ngolu siganup ari songon dia nasida nasailaon di bonapasogit. Unang marsak, holsoan jala busisaon alai didalani ma parngoluanna di habuangan i tudos songon di Jerusalem. Ingkon marhasohotan do angka dolidoli dohot na marbaju asa adong pomparannasida laho manguduti na sinangkapan ni Debata songon di ari panompaon i. Ala sada punguan do nasida di tano habuangan naeng hot nasida jamot di paralealeon, parsaoran dohot parhahamaranggion. I do hagogoon nasida disi, ai molo sada nasida, lam togu do tarihot di holong ni roha jala lam mura mangeahi na pinarsinta ni rohanasida.

Ia bonsir ni surat on ditongos si Jeremia i ma barita na binegena taringot tu panurirang pargapgap na mandok suhar tu hata ni Debata. Siala i adong ma sian nasida na mangalo Babel jala laos muse na lintun sian i ala so tarjalo rohana hona taban di habuangan. Borhat sian na masa i dipodai panurirang Jeremia nasida, "unang olo hamu paotootoon ni panurirangmuna manang pangarunding angka na ditongatongamuna, jala unang patangitangi hamu nipi, angka na niipimuna" (ayat 8). Di panuturion ni angka panurirang pargapgap didok, jala habuangan na masa tu bangso i holan sanghidop mata jala angka na so olo manjalo habuangan songon uhum ni Debata dijujui do laho mangalo. Baliksa tahe didok ingkon dialo do bangso Babel. Ala so diboto bangso i na panurirang pargapgap na mandok i, jala dirimpu nasida panurirang na tutu gabe dihaposi na deba do pandohan i. Adong ma na mambahen hagaoron di tongatonga ni bangso na tarbuang i. Diasupi ma angka na deba asa dialo bangso Babel. Marnida na masa i ma didok Jahowa tu nasida marhite panurirang Jeremia, "ai sipaotooto do na sinurirangkon nasida tu hamu marhitehite goarHu; ndang Ahu marsuru nasida", ninna Jahowa. Udut ni hata on didok muse tu Jahowa taringot tingki na ingkon bolusonnasida di Babel. Nunga dibuhul Jahowa sahat tu pitupulu taon, jala dung pe boho partingkian i, ro ma Ibana mangebati huhut mamboan mulak bangso i.

Di ayat 11 didok Jahowa do tu nasida, "Ai nunga tangkas Huboto sangkap angka na Husangkapi taringot hamu". Jahowa naung marsangkap di mulana laos Ibana do paujunghonsa tu nasida. Tangkas do marhite pandohan on Jahowa manguhum nasida marhite tangan gan ni bangso Babel asa astuanna molo mangalo Babel na mangalo Debata do nasida disi. Molo pe ingkon dao nasida di Babel jala pola sahat pitupulu taon, ingkon botoonnasida do ia partingkian i nunga tangkas disangkapi Jahowa. Sangkap hasonangan do tahe ndada hamatean jala Jahowa sandiri do mangalehon ujung na hinalungunhon ni bangso i. Sude na masa di Babel nunga disangkapi Jahowa tu nasida jala alani naeng pangkeon nasida partingkian i laho mamparsiajari dia na hinalomohon ni Jahowa. Laos disi ma nasida mananda diri asa hot marhaposan tu Jahowa unang sai marpangunsandean tu habisuhon ni portibi on. Unang hata ni jolma ditangihon hape hata ni Debata dijua.

Hamubaon sian bangko hadirion na mangetong tuk gogo dohot pingkiranna laho mangaradoti dirina be unang be sai didatdati. Nuaeng sae ma holan tu Debata Jahowa nasida mangalualu huhut marpanungkun, dia dope sibahenonNa tu bangso i. Olo ma nasida paturetureonNa asa sahat tu hatuaon nang pe di tano na leban. Mardomu tusi do sian bona ni turpuk on dipopai panurirang ni Jahowa bangso i asa burju martangiang mangido hademahon dohot hasonangan ni Babel. Molo sonang Babel taruli hasonangan do nang bangso ni Debata. Na burju martangiang ndang tinggil pinggolna laho manangihon hata ni jolma alai tinggil umbege hata ni Debata. Marhite tangiang do jolma mangido nasa na ringkot di parngoluan siganup ari. Alai unang sala mangantusi, ndang sude na pinangido jolma ingkon sai oloan ni Jahowa. Di ayat 13 didok, "molo tung dilului hamu Ahu sian nasa rohamuna". Ndang margaitgait mangido tu Debata. Ndang holan na ringkot di dirina jolma i mangido tu Ibana alai naeng tangkas dipangido di tangiangna dia do na hinalomohon ni Tuhan i. Ndang na mamaksa Tuhan i jolma mangido di bagasan tangiang. Unang dipangke tangiang laho pasombu tagasna jala unang dibahen Debata sigohi na ringkot di ngolu ni jolma alai mangido asi ni roha ni Tuhan Debata. Na martangiang marlapatan do i mangido asa saut lomo ni rohaNa. Ndang roha ni jolma sipasauton ni Debata di bagasan tangiang molo martangiang hita ndada asa olo Debata paubahon na sinangkapanNa alai mangido gogo sian Ibana asa olo hita paubahon dirinta tu sangkap ni Debata. Jala mangihuthon ayat 13 na martangiang pe ingkon di bagasan parsitutuon. Lapatanna, hibul roha mangido tu adopan ni Debata jala na mangido naeng tangkas tandaonna dirina, ise ibana na pajumpang dohot Debata marhite tangiang i.

Diajari jamita on do hita taringot tu partangiangon huhut mangharingkothon ngolu na martangiang. Dia do lapatan ni i? Angka na marsitutu martangiang tu Debata, sai pamujion do hata na haruar sian pamanganna. Ndada mangaleai, mamuarai nang marungutungut tu Debata. Molo pe suhar tu na tapangido di tangiang na masa di ngolunta unang mambahen jut roha gabe madabu tu ragam pangunjunan, mandele manang mandao sian Debata. Gariada naeng lam solhot do hita tu Ibana asa taboto dia na hinalomohon ni Debata. Martangiang tu Debata patuduhon hadirionta di adopan ni Debata. Ai di bagasan tangiang i do hita mandok mauliate paboa na sian Ibana tajalo angka na adong di dirinta. Mananda pambahenan ni Debata do hita molo tadok mauliate. Udut ni pandohan mauliate, laos tapangido do muse pangaramotion ni Debata di sude parngoluonta be. Tapangido do hahipason na singkop songon i nang parmaraan asa dao sian ngolunta. Na gumodang tapangido i ma angka na ringkot isara sintasinta na uli tu donganta, alealenta nang ianakhonta. Luhutna i sai jaloonta do sian Ibana molo sian nasa roha hita martangiang. Martangiang marlapatan mangoloi Jahowa. Tandi do ngolu ni si partangiang. Bahat pe siparungkilhononna ndang gabe sumurut ibana sian asi ni roha ni Debata manang dipadao dirina sian haporseaon na marsihohot tu Debata. Asa sabam, sonang jala dame do parngoluon ni si partangiang. Nunga diida ibana ndada holan dirina be na mangadopi angka hamaolon i. Sai jumpangan do jolma na mangido tu Debata ndang tarhirim di ngoluna. Sai tulus do pardalanan ni jolma na sai pasahat parngoluonna tu Debata. Gok pujipujian dohot las ni roha do jolma na manghangoluhon ngolu partangiangon. Dao umuli na sinangkapan ni Debata sian sangkapta sandiri, siala i tadok ma mauliate tu Ibana ala nunga dijoloani Ibana hita pasingkophon parngoluonta. Molo adong na so tuk tahatahaon di adopan ni Debata, taingot ma tangiang ni Jesus i ma tangiang hatopan i, jala pos ma rohanta ondihonon ni Tondi i do hita pasahathon nasa na tapangido dibagasan tondinta. Rap ma hita martangiang mangido tu Tuhanta asa dame, demak jala sonang ingananta.