Khotbah 2 Timotius 3: 10 - 17 Diperlengkapi untuk Setiap Perbuatan Baik

 Minggu 19 Set. Trinitatis; 26 Oktober 2025

3:10 Tetapi engkau telah mengikuti ajaranku, cara hidupku, pendirianku, imanku, kesabaranku, kasihku dan ketekunanku.
3:11 Engkau telah ikut menderita penganiayaan dan sengsara seperti yang telah kuderita di Antiokhia dan di Ikonium dan di Listra. Semua penganiayaan itu kuderita dan Tuhan telah melepaskan aku dari padanya.
3:12 Memang setiap orang yang mau hidup beribadah di dalam Kristus Yesus akan menderita aniaya,
3:13 sedangkan orang jahat dan penipu akan bertambah jahat, mereka menyesatkan dan disesatkan.
3:14 Tetapi hendaklah engkau tetap berpegang pada kebenaran yang telah engkau terima dan engkau yakini, dengan selalu mengingat orang yang telah mengajarkannya kepadamu.
3:15 Ingatlah juga bahwa dari kecil engkau sudah mengenal Kitab Suci yang dapat memberi hikmat kepadamu dan menuntun engkau kepada keselamatan oleh iman kepada Kristus Yesus.
3:16 Segala tulisan yang diilhamkan Allah memang bermanfaat untuk mengajar, untuk menyatakan kesalahan, untuk memperbaiki kelakuan dan untuk mendidik orang dalam kebenaran.
3:17 Dengan demikian tiap-tiap manusia kepunyaan Allah diperlengkapi untuk setiap perbuatan baik.

3:10 Alai diihuthon ho do ahu di poda, di parange, di tahi, di haporseaon, di lambas, holong dohot benget ni roha,
3:11 di bagasan angka pangaleleon, haporsuhon, angka na masa tu ahu di Antiokia, di Ikonium, di Listra: Pangaleleon na sai godang do huta on, jala dipalua Tuhan i do ahu sian saluhutna i.
3:12 Alai ndang tarbahen so hona lele nasa, na naeng marparange na daulat marhitehite Kristus Jesus.
3:13 Alai na mangkapogani hamagoanna do angka parjahat dohot siulas utiutian; na paotootohon do nasida huhut dipaotooto.
3:14 Alai anggo ho, sai mian ma di bagasan angka na ginuruhon jala naung hinaporseaanmi, ai diboto ho do na mangajarhonsa tu ho.
3:15 Huhut ala diboto ho, sian sietehetehonmi dope, surat na badia i, na margogo pabisukkon ho, asa taruli di haluaon marhitehite haporseaon di Kristus Jesus.
3:16 Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran,
3:17 asa rimpas halak ni Debata, hobas tu nasa ulaon na denggan.

Diigil Tuhanta i do ingkon lam matoras haporseaonta. Unang marpengpeng manang laos mintop. Isara ni suansuanan, asa martumbur, lam magodang jala matoras, diharingkothon ma zat tertentu mangurupi suansuanan i asa magodang jala matoras. Hira songon i ma dipatudos Apostel Paulus hatotoras ni haporseaon ni si Timoteus nang hita saluhutna. Sederhana alai olo songon na suhar, didok Apostel Paulus dalan patorashon i ma : sitaonon dohot manjaha, manangihon, manghangoluhon hata ni Debata. Domu tu si, di suratna tu si Timoteus, dilehon Apostel Paulus do poda na mansai hona tu saluhut ngolu ni halak na porsea. Dipaingot do si Timoteus ia ngolu sisean ni Kristus ndang na sai mura, ala na sai adong hamaolon dohot haporsuhon na ingkon adopan. Alai, si Paulus mandok ia hata ni Debata i ma gogo dohot bisuk na naeng manogihon saluhut halak na porsea margogo mangadopi sude angka situasi. Hata na tarsurat di buku na badia ndada holan suratsurat boti, alai hata hasea mamodai, maminsang, pauliulihon, manogunogu di bagasan hatigoran, asa rimpas halak ni Debata, hobas tu nasa ulaon na denggan.

Di turpuk 2 Timoteus 3:10-17 on dipasahat Apostel Paulus do sipaingot tu si Timoteus taringot tu poda pangajarion dohot angka sitiruon, termasuk ma i mangadopi haporsuhon ala Barita na Uli (ayat 10-11). Hata parakoloutheô = diihuthon, na marlapatan "mengikut dengan cermat" manang "mengamati dengan teliti." Marhite on pataridahon, si Timoteus ndada holan mamoto pangajarion ni Apostel Paulus di bagasan parbinotoan, alai nunga tung bagas marurat parbinotoan pangajarion di bagasan ngoluna. Di bagasan konteks ni turpuk on, Apostel Paulus paingothon dohot patoguhon si Timoteus asa maniop haporseaon na marsitutu, tarlumobi di tonga tantangan dohot pangaleleon. Apostel Paulus ndada holan mangajarhon taringot tu doktrin na sintong, alai patuduhon boha do ngolu na mian di bagasan hasintongan i sandiri. Marsiajar do si Timoteus marhite parange dohot pambahenan ni Apostel Paulus di na mangadopi ragam hamaolon.

Dung i dipaingot Apostel Paulus muse ia halak na marparange daulat di Kristus talpe do mangadopi pangaleleon. Hata "beribadah" (eusebôs) na marlapatan mangolu di bagasan hadaulaton manang unduk mangihuthon patik ni Debata. Sian on idaonta, ngolu na sintong di adopan ni Debata ndang na sai tongtong mian di bagasan hasonangan, alai ingkon tuk mangalo hisap ni portibi on dohot manirang diri sian angka na pasiding diri sian hasintongan i. Konteks sejarah patuduhon taringot tu pangaleleon ni halak na porsea na lam tu jorbut jala herbangna di tingki panggomgomi Romawi, jala Apostel Paulus mangadopi ragam pangaleleon dohot haporsuhon ala ni haporseaonna (ayat 13). Apostel Paulus mandok "ndang tarbahen so hona lele nasa na naeng marparange na daulat marhitehite Kristus Jesus." Marhite on naeng dohonon ia pangaleleon ndada songon na kebetulan di ngolu ni angka na porsea alai gabe bagian na so tarsirang sian pardalanan haporseaon. Hata "daulat"- eusebeia, i ma ngolu na hinalomohon ni Debata. Angka halak na mangolu di bagasan hadaulaton dohot hasintongan ingkon mangadopi ragam paraloan sian portibi on na manulak hasintongan ni Kristus.

Haporsuhon dohot pangaleleon na niadopan angka na porsea ndada tanda na ditadinghon Debata nasida, alai gabe tanda do i ia nasida mian di bagasan hasintongan. Apostel Paulus mangadopi pangaleleon di Antiokhia, Ikonium, dohot Listra (ay. 11) alai dipalua Debata do ibana. Taida ma dison nang pe adong haporsuhon nang pangaleleon na so boi tapasiding sian ngolunta alai ndang dipasombu Debata hita mangadopisa sasada hita sambing. Marhite on taingot ma hata ni Debata di Johannes 16:33, "Haporsuhon do jambarmuna di portibi on; alai pos ma rohamuna: Nunga talu hubahen portibi on." Alai, haporsuhon ala ni Kristus ndang magopo sambing. Jotjot do haporsuhon i gabe dalan laho patoguhon haporseaon, paturehon parange, jala mamboan hita jumonok tu Debata. Didok di Rom 5:3-4, "Dihorhon haporsuhon i do habengeton ni roha. Jala dihorhon habengeton ni roha i do hatauon, jala hatauon i do manghorhon panghirimon." Marhite on, halak na porsea marnida haporsuhon pangaleleon i ndada hasurahan alai gabe lam pahothon jala pabalgahon haporseaon dohot hadaulatonta.

Dung i dipodai Apostel Paulus do si Timoteus asa hot tongtong di poda na jinalona sian hametmetonna. Apostel Paulus paingothon tung mansai ringkotna do taringot tu pangajarion ni partondion. Hata "berpegang" (menô), na marlapatan "tinggal" atau "tetap berada dalam." Marhite on on dipatuduhon taringot tu haporseaon na manongtong ndada holan taringot tu manjalo pengajarion alai jotjot do bertumbuh di bagasanna. Apostel Paulus paingothon sian hametmetonna, si Timoteus nunga dimemehon taringot tu Barita na Uli. Hata ni Debata di Barita na Uli gabe hatontuon laho manopa haporseaon dohot hangoluan di angka na porsea. Dipodai Apostel Paulus do si Timoteus asa manongtong mangolu di hasintongan ni surat na badia naung jinanghonna sian sietehetehonna. Surat na badia tung mansai ringkot laho manopa ngolu partondion ni sasahalak na margogo pabisukhon, jala mamboan tu dalan haluaon ala haporseaon di bagasan Kristus Jesus. Apostel Paulus patandaphon ia surat na badia sinihathon ni Debata, paboahon hata ni Debata na marhuaso na so tarpatudos tu surat ni jolma. Surat na sinihathon ni Debata hasea mamodai, maminsang, pauliulihon, manogunogu di bagasan hatigoran. Marhite surat i, dilehon do pangantusion tu hita ia hata ni Debata ndada holan mengalehon parbinotoan taringot tu hapistaran alai huaso laho pauba roha dohot ngolunta. Surat na sinihathon ni Debata mangurupi halak ni Debata asa rimpas jala hobas tu nasa ulaon na denggan.

Nasa na taula ingkon marojahan tu parange dohot poda na denggan. Poda haliluon ingkon aloon do marhite hasintongan ni Hata i. Ndang boi tarsirang panghobasion sian sitaonon, alai didongani Debata do i. Ganup na porsea ingkon paulihon ngoluna di atas ojahan ni Buku Nabadia i. Haporseaon na sintong tarida do i di habengeton sahat tu ujungna. Hata ni Debata, ima Jesus Kristus na mangula dibagasan hita. Ganup halak na porsea asa margogo mangadopi sitaonon, mangulahon na sintong, manghobasi, pasangaphon Debata di sude gulmit ni ngoluna. Nasa pambahenan na denggan". Na martudutudu do on tu sude aspek ni ngolu ni halak Kristen na patuduhon holong, hasintongan dohot lomo ni roha ni Debata. Tarmasuk ma i: manghobasi dongan, mangolu marhabadiaon, mamodai dongan, marparange na tigor, masilehonlehon, marpanganju, mangula na sintong, dna. Ndada holan "ulaon parasinirohaon", alai sude pambahenan na hombar tu lomo ni roha ni Debata. "Pambahenan na denggan" ndada holan pambahenan di bidang sosial, berdiakonia, laho mangahut tu diri, mangalului pencitraan manang popularitas alai pambahenan na tubu sian haporseaon, na hombar tu lomo ni roha ni Debata, jala na pasangaphon goarNa, ndada pambahenan na denggan ndada laho paluahon hita, alai parbue ni haluaon naung dipatupa Tuhan Jesus tu hita. Ai jadijadianNa do hita, angka na tinompa di bagasan Kristus Jesus, asa marulaon na denggan hita; ai angka i do dipature Debata hian, asa taparangehon i. (Efesus 2:10). Amen!