Khotbah Habakuk 1: 12 - 17 Tuhan Allah Mahakudus dan Mahatahu

 Minggu 16 Set. Trinitatis; 05 Oktober 2025

1:12 Nda ho do ale Jahowa Debatangku sian na robi dope na sun badia di ahu? * Ndang tagamon mate hami loasonmu. Ale Jahowa * bahen uhum do ibana, umbahen dipatindang ho jala bahen panjoraan do ibana, umbahen ojak ibana dibahen ho, ale dolok batu.
1:13 Pita situtu do matam umbahen so tarpaidaida ho na roa, jala ndang tarbahen ho marsombusombu mida pangarupaon; boasa ma tung paidaonmu pamupusi? Tung siap ho, molo dibondut halak parjahat na tumigor sian ibana.
1:14 Jala tudoshon angka dengke laut jolma i dibahen ho, tudoshon gulokgulok tahe na so marraja.
1:15 Tung saluhut do disintak nasida tu ginjang marhitehite hail, jala dipapungu di bagasan jalana, jala dionjat tu bagasan hadangkadanganna. Alani marlas ni roha ibana, jala marolopolop.
1:16 Dibahen i umbahen mamele ibana tu jalana, jala manutung daupa tu hadangkadanganna, ai binahen ni do napu partalianna, jala talmis sipanganonna.
1:17 Alai dung songon i, tung parumaronna ma jalana, jala datdatanna mambunu i angka bangso parbegu, so marpansadian?

“NA SUN BADIA DO DEBATA, JALA PARBINOTO TU SALUHUTNA” HABAKUK  1:12-17

 

Panurirang Habakuk i ma panurirang na maringanan di harajaon Juda di Jahudi Selatan, Habakuk mangulahon tugasna di ujung ni pamarentahan ni raja Josia dohot di tingki raja Joyakim mamarenta, mar taon 626 sM – 612 sM. Hatiha i, harajaon Juda diparhatoban Misir dope. Dung i, raja Joyakim mamarenta di ujung ni harajaon Assur, jala marganti gabe harajaon Babilonia Baru (Kasdim) na marhuaso di Juda. Habakuk bindu 1:12-17 ima sada bagian na mansai ringkot na patoranghon Haporseaonni Habakuk (terhadap kekekalan, kekudusan, dan pengetahuan Allah yang sempurna). Alai dihaporseaonna i lomos do roha ni panurirang i ala ni saluhut dosa na diida ibana, i ma: Hasesega, hasusurang di paruhumon, ulaon sipinsangon, gumodang angka halak na jahat sian na burju. Marsak do panurirang i mamereng saluhut na masa i, dipangido ibana do pangurupion sian Debata, alai seolah-olah ndang olo Debata mangalehon pangurupion (ida Habakuk 1:2). Alai dipapos Debata do ibana umbahen marhaporseaon jala mangolu di bagasan haporseaon. 

Borat do sitaonon ni Juda diparhatoban Kasdim. Masa do hadoboon fisik nang verbal. Ima alualu manang protes ni Habakuk tu Debata. Habakuk manungkun hatigoran ni Debata tu bangso Israel. Sungkunsungkun, alualu, dohot protes na pinasahat ni Habakuk dipungka marhite ima na manghatindangkon haporseaonna tu Debata na badia (ay. 12). Tarida do dison, Habakuk patuduhon relasi na mansai solhot tu Jahowa marhite panjouon: Jahowa dijou ibana (najolo, ndang sembarangan jolma manjou apala goar ni Jahowa). Jala dison, tarida do pangoloionna di pambahenan ni Debata Sibahen Uhum. Di ayat 13, idaon ma Habakuk songon na agoan (kebingungan). Ia mata ni Debata, pita situtu do, alai boasa loason ni Debata halak Kasdim mamupusi Juda. Mamupusi sian hata Heber: ‘bala’, na marlapatan mambondut. Songon binatang buas na mambondut soroanna. Hira songon i do garang ni Kasdim tu Halak Israel. Umbahen i, tubu muse sungkunsungkun ni rohana taringot tu hatigoran ni Debata. Ia halak Kasdim, na manomba debata sileban, nda tung tumigor i sian bangso Juda, atik pe Juda olo mangulahon na so hombar tu lomo ni roha ni Debata, alai tong do Jahowa na gabe Debata di nasida, Debata ni bangso Israel. Alai boasa gabe halak Kasdim na dipangke Debata manoro, mambondut, mamupusi halak Juda?

Diuduti muse gombaran ni sitaonon nasida i. Songon dengke dohot songon gulokgulok na ditangkup marhite jala dohot hadangkadang. Jala dohot hadangkadang patuduhon, ia pamupusani bersifat massal (torop halak), jala ndang maol Kasdim manaluhon Juda. Molo didok ‘tudoshon dengke dohot gulokgulok’, ai bagas do lapatan ni i, ima manggombarhon: ia nasida ndang songon birubiru. Somalna, birubiru do isara na dipangke manggombarhon jolma. Birubiru, sai adong do parmahan na mamparmahani, manogunogu, mangarahon. Alai, dengke dohot gulokgulok, so pola adong parmahanna. Jadi, ayat 14-17 on songon protes, alai molo tapabagas, songon joujou tu Debata asa diparmahani nasida.

Marhite protesna tu Debata, boi tarida Habakuk na so olo menyerah, songoni ma nian saluhut angka naporsea na di bagasan sitaonon i, asa unang menyerah. Songon Habakuk, nang pe protes ibana, alai molo talapati bagas, tarida do panghirimonna tu Debata Jahowa na sun badia, na gok huaso, na boi mangalehon hamonangan di nasida. Di Habakuk 3, boi taida panghirimon ni Habakuk tu Debata. Songon tema di hita, Debata na sun badia. I do na mangalehon semangat, sikap optimis, sikap na so olo menyerah di hita di na maradophon gulmit ni ngolu na adong di hita. Jala tarida do di turpuk sadarion, terbuka do Debata manjalo dohot mangalusi joujounta. Alai, ala badia do Debata, ala gok huaso do Debata, tontu ndang sude na tasangkapi, jala na tapingkirhon i sarupa dohot na sinangkapan jala na piningkiran ni Debata. Molo tung pe ndang dioloi Debata, manang haduan asa dilehon Debata, ingkon rade do hita manjalo saluhutna i. Alai ndang gabe pasrah, ingkon hot do hita berjuang.

Sun badia do Debata jala parbinoto di saluhutna, pita situtu do mata ni Jahowa, ndang tarpaidaida-Na na roa. Halak Juda ima bangso hasolhotan-Na, ndang tarpaidaida-Na bangso i sai mangulahon hajahaton, ndang ture dipangalaho sai manundalhon Debata dihaporseaon. Ndang na so parbinoto Debata di na tinaonni bangsoNa i, alai umbahen dipaloas Debata nasida manaonni jala une doi tinaonni nasida diroha ni Debata asa lam mananda nasida di dirina be na sai tontong mangulahon hajahaton dohot na manundalhon Debata, disi ma Debata lam papatarhon tu bangsoNa i paboa Debata ndang marlaok tu angka na roa tu hadirionNa. Attong taparrohahon ma on: Sitaonon i, sada kesempatan do i di hita laho mangarajumi diri marningot ma hita di angka hasalaan nang dosanta. Dung i, berkontemplasi ma muse hita, pasahathon joujou di bagasan panghirimon tu Debata, ai Debata na sun badia dohot na gok huaso do Debatanta. Molo songon i hita maradophon sitaonon, adong hal positif na boi tajalo marhite sitaonon. Ima hamubaon ni roha tu arah na lobi denggan dohot hiras ni roha manang semangat di na laho berjuang. Antong, sitaonon i, sada dalan do i di hita asa lam tu dengganna hita.

Angka dongan sahaporseaon, tahangoluhon ma ngolu na badia, ai nunga diparbadia i Tuhanta Jesus Kristus hita marhite mudarNa na durus di hou pinorsilang i, jala nunga dilehon tu hita hangoluan nasorasuda alani Asi nirohaNa i. Attong tahangoluhon ma hataNa naung tatangihon. AMEN