Khotbah Roma 1: 8 - 15 Memberitakan Injil dengan Segenap Hati

 Minggu 17 Set. Trinitatis; 12 Oktober 2025

1:8 Pertama-tama aku mengucap syukur kepada Allahku oleh Yesus Kristus atas kamu sekalian, sebab telah tersiar kabar tentang imanmu di seluruh dunia.
1:9 Karena Allah, yang kulayani dengan segenap hatiku dalam pemberitaan Injil Anak-Nya, adalah saksiku, bahwa dalam doaku aku selalu mengingat kamu:
1:10 Aku berdoa, semoga dengan kehendak Allah aku akhirnya beroleh kesempatan untuk mengunjungi kamu.
1:11 Sebab aku ingin melihat kamu untuk memberikan karunia rohani kepadamu guna menguatkan kamu,
1:12 yaitu, supaya aku ada di antara kamu dan turut terhibur oleh iman kita bersama, baik oleh imanmu maupun oleh imanku.
1:13 Saudara-saudara, aku mau, supaya kamu mengetahui, bahwa aku telah sering berniat untuk datang kepadamu -- tetapi hingga kini selalu aku terhalang -- agar di tengah-tengahmu aku menemukan buah, seperti juga di tengah-tengah bangsa bukan Yahudi yang lain.
1:14 Aku berhutang baik kepada orang Yunani, maupun kepada orang bukan Yunani, baik kepada orang terpelajar, maupun kepada orang tidak terpelajar.
1:15 Itulah sebabnya aku ingin untuk memberitakan Injil kepada kamu juga yang diam di Roma.

1:8 Mandok mauliate ahu jumolo tu Debatangku marhitehite Jesus Kristus siala sude hamu, ala tu liat portibi on do tarbarita haporseaonmuna.
1:9 Ndang mansadi ahu marningot hamu. Ia sitindangingku Debata do, na huoloi di bagasan tondingku, di na hubaritahon Anakna i.
1:10 Tongtong do hupangido di angka tangiangku, anggiat tung manang andigan pe lomo ni roha ni Debata patiurhon dalanku manopot hamu.
1:11 Ai masihol do ahu marnida hamu, anggiat tung tarlehon ahu tu hamu deba silehonlehon partondion, patoguhon rohamuna.
1:12 On do tahe: Naeng dapotan hiras ni roha nang ahu sian hamu hinorhon ni haporseaonta b'e.
1:13 Alai naeng ma botoonmuna, angka dongan, naung jotjot ditahi rohangku manopot hamu, asa marparbue ahu nang di hamu songon na di angka bangso na leban i; alai tarsabat do ahu rasirasa nuaeng.
1:14 Na marutang do ahu di halak Junani nang di bangso na leban, di angka parhapistaran nang di angka na hurang roha.
1:15 Dibahen i husangkap sian nasa rohangku manjamitahon barita na uli i nang di hamu di huta Rom.

Molo tajaha turpuk Rom 1:8-15 gabe tubu do sada sungkunsungkun, boasa songon i las ni roha ni Apostel Paulus mambege barita ni huria na di Rom. Mandok mauliate do apostel ala asi ni roha ni Tuhan tu huria na adong di Rom. Tarida do sian haporseaon ni huria na di Rom naung tarbarita di sandok portibi, gabe masihol apostel i naeng mangebati huria i, laho mangalehon angka apulapul dohot semangat di hatongtongon di haporseaonnasida. Adong manang na piga na pinatolhas ni apostel i na gabe unok ni hamauliateon ni rohana di turpuk on. Parjolo, Holan dibagasan haporseaon na manongtong do dapot angka silehonlehon partondion, na naeng pangkeon nasida gabe hagogoon (ayat 11), hiras ni roha manang penghiburan (ayat 12), marparbue (ayat 13). Paduahon, songon angka na porsea, naeng ma diantusi manjalo silehonlehon partondion i ma marhite haporseaon tu Jesus Kristus anak ni Debata. Patoluhon, haporseaonta na togu mamboan hita manjalo silehonlehon partondion jala bertujuan laho pararathon Barita na Uli tu sandok portibi on (ayat 8, 15).

Di ayat 8 didok do "Mandok mauliate ahu jumolo tu Debatangku marhite Jesus Kristus siala sude hamu, ala tu liat portibi on do tarbarita haporseaonmuna". Ndang pola godang dipasahat apostel i di suratna i, alai marimpola na pataridahon ketulusan ni ibana paboahon las ni rohana jala apresiasi positip marhite ro mandapothon huria di Rom i ma ala ni haporseaon ni huria na manongtong. Hombar tu pangantusion ni apostel i, na so adong do kemungkinan boi tapatupa las ni roha ni Tuhan i molo so marhaporseaon hita tu ibana. Ala mansai lomo do roha ni Tuhan i tu huria i ala nunga dipatupa nasida na boi mambahen las roha ni Tuhan i. Marhite turpuk on, gabe lam dapot do pangantusion na sai jotjot salah pangantusion sian hita angka na porsea. Ai jumotjotan do hita di pangidoanta di bagasan tangiang asa dijama Tuhan i rohanta. Alai nuaeng na gabe sungkunsungkun nunga hea hita berusaha mangulahon manjama roha ni Tuhan i marhite haporseaonta. Haporseaon na aktif jala i ma haporseaon na boi manjama roha ni Tuhan. Manjama roha ni Tuhan i, naeng ma taulahon marhite angka pujian, panghataion, tindakan, tangiang dohot angka ulaon na nihalomohon ni Tuhan, songon huria na adong di Rom. Jala ala naung diulahon nasida do lomo ni roha ni Debata, gabe di utus do apostelNa i laho ro tu Rom, ai tubu do sihol di apostel i. Jala tarajuman do sihol ni apostel i ima sihol ni Debata, alai dipangke ma apostel laho mangebati nasida.

Di ayat 9-11 dipatolhas Apostel Paulus do holong ni rohana tu huria i ala ni Tuhan, gabe ndang mansadi ibana marningot huria i. Apostel Paulus songon na sinuru ni Tuhan mambaritahon taringot anakNa i i ma sada bentuk pangoloion ni ibana tu parsuruon ni Debata. Molo pe godang angka tantangan diadopi apostel laho manjumpangi huria i, alai dihaporseai ibana do ala na sinuru ni Debata do ibana, sai lehonon ni Tuhan i do angka partingkian laho manopot nasida. Sian ayat on naeng dipaandar molo tubu sihol ni roha ni Apostel Paulus tu huria i, i ma patandahon parsaoran nasida na dirahut holong na sian Kristus. Jadi ndang holan roharoha ni apostel na laho manopot nasida, alai parsuruon ni Tuhan i do songon apostelNa ibana, jala na sinuru Tuhan i do ibana. Alani do laos di ayat on pe, tangkas do dipaandar asa dia do sasaran manang tujuan ni apostel i naeng mandapothon huria i, ndada holan sihol ni pardagingon. Alai na ummarga na sinuru ni Debata do ibana laho mangalehon silehonlehon partondion na jinalo na sian Debata asa tung i ma dipangke nasida laho patoguhon roha mangadopi situasi na mansai sulit di bagasan ngolunasida. Alani Paulus mamangke istilah silehonlehon partondion (karunia rohani). Silehonlehon na khusus sian Debata marhite Tondi Parbadia tu saluhut angka na porsea laho pahehehon huria (ndada mangahut tu diri). Marragam do rumang ni silehonlehon partondion alai na marragam i ima basabasa ni Debata laho tu huria, jala na boi do marrumanghon habisuhon (boi bisuk manghatai), parbinotoan (boi manghatai di bagasan parbinotoan dohot pangantusion na bagas), haporseaon (boi marhaporseaon na togu), pamalum na marsahit (boi patupa hamamalum tu angka na marsahit mangasahon gogo sian Tuhan i) dohot angka tanda na asing dope (boi patupahon angka na luar biasa). Tung godang pe angka ragam ni silehonlehon partondion i asa ima pangkeon nasida patoguhon rohanasida, ala Debata do na pasahathon i marhite Tondi Porbadia tu angka na porsea. Marnida situasi ni huria di Rom, naung mian nasida di bagasan haporseaon gabe ditambai ma pasupasu partondion tu nasida.

Molo taida muse di ayat 12-15, Apostel Paulus pe manghirim do na ingkon dapot ibana do hiras ni roha (semangat baru) marnida haporseaon ni huria i. Jala di bagasan panghirimon di sada haporseaon na togu, alani do asa dipangke hata 'haporseaonta be'. Na marlapatan hasadaon ni haporseaon na bersinergi, songon haporseaon ni si Abraham dilehon tu si Ishak dohot si Jakob. Debata ni si Abraham gabe Debata ni si Isak jala Debata ni si Jakob (ptd. 2 Musa 15:2). Debata na ni haporseaon ni si Paulus na tong Debata ni halak Rom, mambahen nasida ndang hahurangan, jala gabe sombu ma di situasi na adong. Hasadaon ni roha ni huria na di Rom dohot apostel na sinuru ni Tuhan i, boi pahothon haporseaon na togu jala pahothon lomo ni roha ni Tuhan i. Nian dirajumi Apostel Paulus do, sihol ni roha ni apostel i laho manopot huria na adong di Rom ndang tolhas alai dibuat apostel i do hikmahna, gabe sada utang na mansai arga i ma laho marbarita na uli tu huria na adong di Rom. Perasaan marutang nian gabe boi do on marrujiruji tu sada panghilalaan na manghaholongi angka tondi na lilu, ala ndang unsur na dipaksa (memberatkan). Marasing do ra pangantusion utang na adong di portibi on, i ma na mandok molo utang ingkon dibayar (otomatis jala terpaksa), alai ndada konsep utang na pinasahat ni apostel i. Hutang na pinasahat ni apostel i ima na taronjar sian roha na nionjar ni pangoloion tu Tuhan songon nampuna hangoluan. Andorang so ro dope apostel i tu Rom, nunga ditongos surat on laho pasadahon persepsi, visi, tujuan, dohot doktrin ni huria na di Rom asa tung dapot hasintongan ni Debata. Apostel Paulus menekankan ia rencana naeng mangebati huria na adong di Rom i ma sian las ni roha dohot ias ni roha laho manjamitahon Barita na Uli tu sandok huria na adong di Rom. Nian ndang Apostel Paulus na pajongjong huria di Rom alai parsaoran na mansai uli do dipahot nasida, parsaoran na di bagasan Tuhan i. I do umbahen marsangkap apostel laho manjamitahon Barita na Uli. Boasa margogo apostel i naeng manjamitahon Barita na Uli, ala dilapati apostel do, ia Barita na Uli i ma hagogoon ni Debata laho paluahon angka na porsea. Ai Barita na Uli na marhagogoon laho merubah, jala mambahen jolma kuat mangadopi angka ragam ni masalah dohot mangadopi angka tahitahi ni parjahat. Barita na Uli i ma hasintongan ni Debata na marhagogoon mangalusi sude parungkilon di ganup pardalanan ni jolma. Ala ni do sude angka na porsea ingkon bertanggung jawab do ndada paksaan manang alani ulaon.

Margogo mangadopi angka tantangan ni ngolu on di bagasan haporseaon ido na nihalomohon ni Debata sian ngolu ni angka na porsea. Unang ma tubu angka haporseaon na muramura mardandi, alai ingkon ma togu tung ro pe angka ragam ni parungkilon dohot angka tantangan na taadopi. Huria na adong di Rom na sai hona pangaleleon sian pamarenta Romawi hinorhon ni minoritas, gabe tiruan di hita, ala ndang sumurut haporseaon nasida tung pe hansit diae nasida. Justru bertahan nasida maniop haporseaon na togu, asa i do na nihalomohon ni Debata di bagasan ngolunta. Na mangihut Ingkon tubu do las ni roha marnida angka dongan na mian di bagasan haporseaon na togu, molo pe tarajumi ndang adong pengaruhna dingolunta secara pribadi. Alai tanggung jawab di angka na porsea ima rade marsiapoan di haporseaon molo ro angka ragam ni pangunjunan. Ala ni ngolu na masiapoan naeng ma na taronjar sian hita ala i do na nihalomohon ni Tuhan i, ndada mangalului pangomoan sandiri di bagasan ngolunta. Ala ni prinsip ni ngolu "sisolisoli do na mangolu on" nunga ingkon nangetnanget tapalua sian prinsip ni ngolunta, jala ingkon ma muba gabe sada panghilalaan di las ni roha dohot jut ni roha. Las ni roha ni Apostel Paulus manangihon barita ni huria na di Rom, ima gabe tiruan di hita, nang pe ndang adong hubungan secara famili alai na diihot holong na sian Tuhan gabe boi marlas ni roha manangihon haporseaon na togu di huria na di Rom. Ulaon marbarita na uli ingkon ma tarajumi sada tanggung jawab ni angka na porsea, ala Barita na Uli i ma hagogoon di angka na porsea. Molo Apostel Paulus mandok "marutang" ibana. Na marlapatan do i tanggung jawab ni angka na porsea. Ala tanggung jawab ni na porsea do i, asa marbarita na uli naeng ma diulahon sian ias ni roha, unang ala na pinaksa jala unang ala ni tugas. Alai sihol ni roha na ingkon sude manisia dapotan Barita na Uli. Amen.