Khotbah Lukas 4: 31-37 Perkataan Yesus yang Penuh Kuasa

Minggu Septuagesima, 31 Januari 2021

Warna Liturgi: Hijau

4:31 Kemudian Yesus pergi ke Kapernaum, sebuah kota di Galilea, lalu mengajar di situ pada hari-hari Sabat.

4:32 Mereka takjub mendengar pengajaran-Nya, sebab perkataan-Nya penuh kuasa.

4:33 Di dalam rumah ibadat itu ada seorang yang kerasukan setan dan ia berteriak dengan suara keras:

4:34 "Hai Engkau, Yesus orang Nazaret, apa urusan-Mu dengan kami? Engkau datang hendak membinasakan kami? Aku tahu siapa Engkau: Yang Kudus dari Allah."

4:35 Tetapi Yesus menghardiknya, kata-Nya: "Diam, keluarlah dari padanya!" Dan setan itu pun menghempaskan orang itu ke tengah-tengah orang banyak, lalu keluar dari padanya dan sama sekali tidak menyakitinya.

4:36 Dan semua orang takjub, lalu berkata seorang kepada yang lain, katanya: "Alangkah hebatnya perkataan ini! Sebab dengan penuh wibawa dan kuasa Ia memberi perintah kepada roh-roh jahat dan mereka pun keluar."

4:37 Dan tersebarlah berita tentang Dia ke mana-mana di daerah itu.

4:31 Jadi tuat ma Ibana tu huta Kapernaum, na di Galilea; diajari ma nasida jumpa ari Sabbat.

4:32 Gabe longang do rohanasida umbege podana, ai marsahala do jamitana i.

4:33 Jala adong ma di parguruan i sada halak partondi na hodar; marsoara na gogo ma dianggukhon:

4:34 Oe Jesus na sian Nasaret, marhua Ho tu hami! Na ro do Ho hape mangago hami! Hutanda do Ho; na badia ni Debata do Ho!

4:35 Alai disonggahi Jesus do ibana, didok ma: Sip ho! Ruar ma ho sian ibana! Jala tu tongatonga i ma disampathon tondi na hodar i ibana, laho ruar; ndang mahua ibana dibahen.

4:36 Jadi longang ma rohanasida saluhutna, gabe masipandohan ma nasida: Na boha do on? Mardongan huaso dohot gogo dipaksa angka tondi na hodar, gabe ruar do.

4:37 Jala sar ma baritana tu nasa inganan humaliang.

Ra hea do hita manonton acara di televisi na boi mambahen hita longang manang tarhatotong, i ma acara “Got Talent”, diacara i dipatudu angka peserta i ma haboion/kemampuan nasida na so pola piga jolma na boi manang tolap patupahon songon na pinatupa ni nasida. Jala somalma do longang manang tarhatotong hita molo taida na masa di duru ni hagogoon dohot parbinotoan ni jolma. Jala i do na masa nang di turpuk on longang do jolma natorop mambege jala marnida na pinatupa ni Jesus. Marhite huasoNa jotjot do natorop i longang manang tarhatotong marnida pambahenan ni Jesus, i ma uju dipamalum Ibana na mapitung, jala na ngugu hinorhon ni tondi na hodar; uju dipamalum Jesus na gurdung, na sarion dohot lan angka na marsahit, dohot lan dope angka pambahenan ni Jesus na mambahen longang torop halak. Alai ndada holan marhite pambahenan ni Jesus natorop i longang. Huhut do hataNa mambahen nasida longang, i ma uju dipasahat Ibana pangajarion tu angka natorop. Andul sumurung do hata pangajarion na pinasahat ni Jesus sian na pinasahat ni angka siboto surat (Mark. 1: 22), ala pangajarion na pinasahat ni Jesus i ndada marharoroan sian bisukbisuk dohot parbinotoan ni jolma alai tung marharoroan sian banua ginang do saluhutna. Tarlumobi dipatorang do di turpuk on, patar do huaso dohot sahala ni Jesus marhite angka hata pangajarion na pinasahatNa di tongatonga ni parguruan nasida tingki ari Sabat, na mambahen longang rohanasida. Ai tangkas dipatorang di turpuk on, gabe longang do rohanasida umbege poda na pinasahat ni Jesus, ai marsahala do jamita ni Jesus (ay. 32).

Alai lam longang do nasida mambege hata na pinasahat ni Jesus maradophon tondi na hodar. Ai adong do ditongatonga nasida uju i diparguruan i sahalak partondi na hodar. Ditanda do Jesus jala diboto tondi na hodar i do na marhuaso Jesus. Alani mabiar ma tondi na hodar i pola marsoara na gogo manganggukhon: “Oe Jesus na sian Nasaret, marhua Ho tu hami! Na ro do Ho hape mangago hami. Hutanda do Ho, na badia ni Debata do Ho”. Gari natorop i sipata maol mananda Jesus, nang pe nunga di tongatonga nasida Jesus jala nunga dipatupa Jesus angka halongangan di tongatonga nasida. Alai molo tondi na hodar i ditanda do Jesus. Diboto do na sian Nasaret do huta hagodangan ni Jesus. Ndada holan i. Laos ditanda do Jesus, na badia ni Debata. Jala ditanda do huaso ni Jesus. Jala tutu do dipapatar Jesus do huasoNa maradophon tondi na hodar i. Disonggahi Jesus ma tondi na hodar i jala disuru ruar sian jolma i. Marhite huaso ni Jesus ndang diihoti tondi na hodar i be jolma i. Ruar ma tondi na hodar i. Alai anggo jolma i ndang agia mahua ibana nang pe disampathon tondi na hodar i ibana.

Marnida saluhut na masa i jadi longang ma rohanasida saluhutna, gabe masipandohan ma nasida: Na boha do on? Mardongan huaso dohot gogo dipaksa angka tondi na hodar, gabe ruar do (ay. 36). Hita pe tontu longang do molo parsidohot hita marnida na masa i. Gari holan mambege barita taringot tu na masa i boi do longang hita. Tarlumobi ma molo tangkas taida marhite simalolongta. Alai sasintongna ndang respon longang na diigil sian angka na marnida jala na umbege na masa i. Ai molo holan longang do hita, ndang marpanghorhon i dibagasan ngolunta. Unang ma nian hita songon pangisi ni huta Nasaret, longang do nasida mambege hata ni Jesus alai diujungna ditulak nasida do Jesus i laos dipabali sian huta Nasaret (Luk. 4: 16 – 30). Jala unang ma nian hita songon pangisi ni huta Kapernaum. Tutu longang do nasida marnida pambahenan dohot hata ni Jesus na gok huaso i, alai ndang apala dipatorang di turpuk on boha do udut ni pambahenan nasida tu Jesus. Alai molo tajaha di buku Padan na Imbaru boi do botoonta: jotjot do Jesus ro tu huta Kapernaum, mangajari jala manghobasi do Jesus disi, godang do tanda halongangan dipatupa Jesus di huta Kapernaum. Alai hira so marpanghorhon do saluhutna i di nasida gabe dalan manambai huhut pahothon haporseaon nasida tu Jesus. Ai tangkas do dipatorang di Mateus 11: 20 – 24 “Dung i ditorui Jesus ma huta, angka naung gumodang marnida hagogoonna i, ala so muba rohanasida, ninna do: Marjea ma ho, Korasin! Marjea ma ho, Betsaida! Ai aut di huta Tirus dohot Sidon dipamasa hagogoon angka na masa di hamu, ndang tarbahen so paubaonna rohana uju i, marabithon goni, hundul di orbuk! Angkup ni i, hudok ma di hamu: Neang do sitaonon ni pangisi ni huta Tirus dohot Sidon di ari uhum i, martimbangkon sitaononmuna. Ia ho Kapernaum! Nda na pinatimbo ho ro di langit an? Sidabuhononhon do ho sahat tu api na roko! Ai aut di huta Sodom dipamasa hagogoon angka na masa di bagasan ho, ndang tarbahen so hot dope huta i rasirasa sadari on! Angkup ni i, hudok ma di hamu: Neang do sitaonon ni pangisi ni huta Sodom di ari uhum i, martimbangkon sitaononmuna!”

Alani ndang sae holan na mamboto manang mananda di huaso ni Jesus, songon tondi na hodar i. Alani ndang sae holan na longang mambege dohot marnida pambahenan ni Jesus alai ndang marhamubaon jala ndang porsea, songon na pinatupa ni halak na di huta Kapernaum. Alai naeng ma hita songon ngolu ni Parpsalmen, songon na dipatorang di turpuk Epistel. Nunga dibege jala diida ibana pambahenan dohot huaso ni Debata, alani dipuji ibana do Debata sian nasa rohana jala saleleng ni ngoluna. Alani mangolu ma ibana dibagasan biar mida Jahowa, mangoloi Tuhan i huhut mangulahon na hombar tu lomo ni Debata. Manang aha pe na masa di ngoluna, ndang lupa Parpsalmen dipambahenan ni Debata na gok hagogoon dohot huaso i. Sai dipaingotingot ibana do i, laos i do gabe ojahan di ibana manongtong mamuji Tuhan i saleleng ngoluna.

Naeng ma panandaion di huaso ni Tuhan i lam pahothon haporseaonta dohot haunduhonta tu Ibana. Asa manang aha pe na masa di ngolunta, las ni roha nang arsak; uju hipas hita manang uju marsahit; tingki masa gotilon manang uju masa haleon, uju mengkel manang uju tangis dohot lan angka na asing, boi hita nian tongtong porsea tu Ibana. Tapangasahon Ibana jala taloas Ibana mangula di ngolunta, asa patar huasoNa mangurupi jala mangaramoti huhut mamasumasu hita. Asa loasonNa hita marnida ragam nari halongangan na pinatupaNa di ngolunta. Ai tangkas do didok di Pilippi 4: 13 “Saluhutna do tarpatupa ahu marhitehite Ibana, na margogoihon ahu!”